Alkye tten in tzaj tqʼuqbʼaʼn Dios qkʼuʼj

Tqʼama apóstol Pablo qa a Jehováa atzun «Diosju kukx in tqʼuqbʼaʼn qkʼuʼj. In tqʼuqbʼaʼn Dios qkʼuʼj tuj tkyaqil yajbʼil qe» (2 Corintios 1:3, 4). Kyukʼil qe yol lu, in tzaj tqʼamaʼn Xjan Uʼj qa jaku tzʼonin Dios qiʼj qkyaqilx, maske in tzaj nimxix nya bʼaʼn qiʼj jaku tzaj tqʼuqbʼaʼn Dios qkʼuʼj, aju Qtat at toj kyaʼj.

Ax tok, il tiʼj tuʼn tbʼant jun tiʼ quʼn qa qaj tuʼn ttzaj tqʼuqbʼaʼn Dios qkʼuʼj. Ximana tiʼj jlu: ¿tzeʼn jaku tzʼonin jun aj qʼanil qiʼj qa mintiʼ xqoʼx tukʼil? Chʼixme ax jlu kubʼ t-xjelin Amós: «¿Tzinpe in che bʼet kabʼe xjal junx qa mya mojl kyyol?» (Amós 3:3). Tuʼntzunju, in tzaj tqʼamaʼn Tyol Dios tuʼn tbʼant jlu quʼn: «Che laqʼexe ttxlaj Dios, ax ikx te ktzajel laqʼeʼ kyukʼile» (Santiago 4:8).

¿Tiquʼn jaku tzʼok qeʼ qkʼuʼj tiʼj qa jaku tzaj laqʼeʼ Dios qtxlaj? Tnejel, kukx in tzaj tqʼamaʼn qe qa taj tuʼn tonin qiʼj (qʼonka twitza tiʼj recuadro tku’x toj t-xaq 5). Tkabʼ, at nimku xjal o tzaj kyqʼamaʼn qa o tzaj tqʼuqbʼaʼn Dios kykʼuʼj, ik tzeʼn toj ambʼil jaʼlo ex toj ambʼil ojtxe.

Tzaj nimxix nya bʼaʼn tiʼj David, ik tzeʼn nya bʼaʼn in tzaj kyiʼj xjal jaʼlo, noqtzun tuʼj, jyon onbʼil tukʼil Dios. Kubʼsan twitz: «Bʼintza tqʼajqʼajel nwiʼye ok t-xi nqanine onbʼil teya». ¿Tzajpe tzaqʼweʼn tuʼn Jehová? Tzaj, tuʼntzunju tqʼamatl David jlu: «Ate oninte weye. In tzalaj wanmiye» (Salmo 28:2, 7).

¿ALKYE TOKLEN JESÚS AT TUʼN TTZAJ TQʼUQBʼAʼN QKʼUʼJ?

Tajtoq Dios tuʼn tten jun toklen Jesús aj t-xi tqʼuqbʼaʼn kykʼuʼj xjal. Kyxol qeju tiʼchaq xi tqʼoʼn Jehová te, xi tqʼoʼn toklen «tuʼn kybʼanix qeju bʼis taʼ kyanmi» ex «tuʼn tqʼuqbʼet kykʼuʼj qeju in che bʼisun» (Isaías 61:1, 2). Ik tzeʼn otoq kyaj tziyen, kubʼ tyekʼun Jesús tbʼanel tmod kyukʼil kykyaqil qeju «ma che sikte tuʼn aqʼuntl ex ma che sikte tjaqʼ iqtz» (Mateo 11:28-30).

In xi tqʼuqbʼaʼntoq Jesús kykʼuʼj xjal tukʼil tbʼanel yol, tukʼil tbʼanel tmod axpe ikx toj junjuntl maj e kubʼ tqʼanin qe yabʼ. Toj jun maj, xi tqʼamaʼn jun xjal te aju attoq txʼaʼk tiʼj: «Qa taja, jaku chin bʼanixe tuʼna». Tzaj qʼaqʼin tkʼuʼj Jesús tiʼj ex xi tqʼamaʼn jlu te: «Wajbʼile, bʼiʼx kbʼantela» (Marcos 1:40, 41). Ex bʼiʼx bʼant xjal.

Ax tok, mintiʼtl Tkʼwaʼl Dios tzalu twitz Txʼotxʼ, noqtzun tuʼnj, aju Ttat, aju Dios «kukx in tqʼuqbʼaʼn qkʼuʼj», kukx in tzaj tqʼuqbʼaʼn kykʼuʼj qeju in tzaj kʼixkʼoj kyiʼj (2 Corintios 1:3). ¿Alkye tten in bʼant tuʼn? Qo xnaqʼtzan kyiʼj kyaje tumel nim toklen.

• Aju Tyol Dios. «Porque tkyaqil aju o tzʼibʼanjtz tuj Tuʼjil ojtxi, o tzʼibʼanjtz te xnaqʼtzbʼil qe, tuʼn tten qpasens ex tuʼn tqeʼ qkʼuʼj tuʼnju yol tzʼibʼan tuj Tuʼjil, tuʼntzun tqeʼxix qkʼuʼj tiʼj Dios» (Romanos 15:4).

• Aju xewbʼaj xjan. ¿Tiʼ onin kyiʼj okslal tuʼn kytzalaj toj chʼin ambʼil tiʼj mujbʼabʼil tej otoqxi kyim Jesús? In tzaj tqʼamaʼn Tyol Dios qa aqeju okslal in che anqʼintoq «niman Qajaw kyuʼn, ex in qʼuqbʼanjtz kykʼuʼj tuʼn Xewbʼaj Xjan» (Hechos 9:31). Aju xewbʼaj xjan moqa aju t-xew Dios at nimxix tipumal, ex jaku tzʼajbʼen tuʼn Dios tuʼn ttzaj tqʼuqbʼaʼn tkʼuʼj alkyexku xjal ex toj alkyexku nya bʼaʼn in nok weʼ twitz.

• Aju naʼj Dios. In tzaj tqʼamaʼn Tyol Dios jlu: «Mi jun tuʼn tbʼaj kykʼuʼje tiʼj». Ex in tzaj tqʼamaʼn tuʼn tbʼant jlu quʼn: «Kyqaninxe te [...]. Kyjaʼtzun kqebʼil kykʼuʼje tuʼn Dios; mas maʼ t-xilen jlu twitz tkyaqil kynabʼl xjal, tuʼn jlu kʼokel kwentin kyanmiye ex kyximbʼetze» (Filipenses 4:6, 7).

• Aʼyeju qerman. Jaku che ok junjun qerman te tbʼanel qamiw jatumel jaku qoʼx jyol qʼuqbʼil qkʼuʼj. Tqʼama apóstol Pablo qa «qʼuqbʼanjtz» tkʼuʼj kyuʼn qe tukʼil «tuj bʼis ex tuj yajbʼil» (Colosenses 4:11; 1 Tesalonicenses 3:7).

Jakulo kubʼ t-xjelina qa ax tok jaku che onin qeju onbʼil lu tiʼja. Qo xnaqʼtzan chʼintl tiʼjju ikʼ kyiʼj xjal ma qo yolin kyiʼj toj xnaqʼtzbʼil ma kyaj. Ik tzeʼn kye, jaku tzʼok tqʼoʼn twitza tiʼj qa kukx in japun kywiʼ qe tbʼanel tyol Dios lu: «Ik tzaʼn jun txubʼaj in xi tqʼuqbʼaʼn tkʼuʼj tal, kyjaʼxtzun weye kxel nqʼuqbʼaʼne kykʼuʼje» (Isaías 66:13).