Enero

Nʼio nkjín superintendente xi tsʼe circuito xi kʼoatso nga nʼio nkjín mani jtín jñani nga tsín jme xi tjíosʼín je xi chjotajchínga sʼin tjío nga tjíobinyakao je ndsʼee nga ngisasa tse xá kʼoaile. Kʼiatsa chjotajchínga sʼin tijnai, nanda ʼyai nga nʼio chjíle nga binyakoaa je ndsʼee nga tsesa xá katabʼaile. Kʼoati ʼyai kʼianga nʼio nkjín ndsʼee machjén xi tsjoánganʼiole je jtín xi tjíosatío ndʼaibi kʼoa kao xi sa̱tíosa nichxin xi nroaján (Is. 60:22). Je Biblia kʼoatso nga je xi chjotajchínga sʼin tjío katabakóyale xi kjaʼaí. Tsakui nichxin likui maʼali nga kʼoanʼiai nga̱ je familiali nisinlai kʼoa nixání. Kʼoa kʼoati kui nitjosuin je xá xi kjineli ya jinjtín kʼoa tsa jmesa xáni xi nʼio maxátíyale. Tonga nʼio machjén nga si̱ʼai kʼianga kuisenkoai je ndsʼee nga tsesa xá katabʼaile. Nga̱ kui xi kuinyakao nga ngisasa tse sixá ya jinjtín. Tjole nganʼio je jtín kʼianga nkjín mani je ndsʼee xi xá tjínle. wp15 1/4 1:2, 3

Jngo ndsʼee xi chriansʼa katjoéle xá, kʼianga tsesa xá kʼoaile ya jinjtín, ali koa̱n kʼoasʼin sikjaʼaitsjen nga koa̱n kjaʼaí sʼin sixá. Tokʼianí nga koa̱n sikʼantjaiya josʼin maxá kʼianga je jtín xi machjénle kʼoa tsa kʼiaje̱ nga je naxinandále Niná xi kʼoakuitso nga tjínnele kʼoantjaiya josʼin kjimaxá. Alikui koa̱n jme xi sikʼantjaiya tsa toje xi kʼoasʼin koa̱nmele. Tsa jetsakʼaile xá ya jinjtín kʼoasʼin tjínnele sixá jotso je Biblia, josʼin tsakakóyale je xi chjotajchínga sʼin tjío. Tsa kʼoasʼin koakoní nga tíbakóle kjoaxkóntokon je xi tsakakóyale. Kʼianga jengisa sʼe̱le kjoafaʼaitsjen koaan sikʼantjaiya tsa jmeni xi ngisa koasenkao je jtín nga tsín kʼoéjnatjenngi josʼin tísíxá je naxinandále Niná. Nga jekoai nichxin, je Jeobá koasenkao ndsʼee jebi. Tsakui nichxin ngisa tse jme xi sʼin tikʼoajinni jme xi kisʼin je xi tsakinyakao (Juan 14:12). wp15 1/4 2:17

Kʼiatsa nʼio ñʼai tjín kjoa xi tijnajin kʼoa kʼoatjín tokuin jokisʼe kon Pablo nga kichʼasjentjai ya “tsʼoa xa” nʼio machjén nga si̱nʼiotʼai je Jeobá (2 Tim. 4:17). Tobʼelañá, tsa jngo familiali xi chʼin tjínle tinikuindai. Jejin Jeobá tinijélai nganʼio nga katabasenkaoli. Koaan tʼejngui tokuin nga̱ be Jeobá jme kjoa tibitjatojin. ʼYaní nga je koasenkaoli kʼianga ska̱li kʼoa nga kixi kʼuíntʼalai. Tonga tsakui nichxin alikui tíbasenkaoli Jeobá koa̱nli. Tsakui nichxin kjaʼaí kjaʼaí tso je chjinexki josʼin koa̱nsinle je xíngi xi chʼin tjínle. Tsakui nichxin kʼoasʼin kinikjaʼaitsjain nga sinʼio tokuin je familiali, tonga tosani tokjoa tísʼe. Kʼiatsa kʼoakjimai, nʼio machjén nga tosi tonda si̱jélai nganʼio je Jeobá kʼoa nga tosi tonda si̱chriantʼalai (1 Sam. 30:3, 6). Xijekoa̱n, kʼianga koa̱njinli nga je Jeobá tíbasenkaoli, ngisaa nʼiosa koa̱nmiyui. wp15 1/4 4:10, 11

Ñá xi choʼndale Jeobá maa ʼyañá nga tíjna je Na̱i. Nga̱ ya Biblia kʼoatso nga ye̱ kisichjén kʼianga tsakjákao je Eva (Gén. 3:1-5). Kʼoati tsakjákao je Jeobá kʼianga kʼoakitso nga totjín xi tísʼínnile je Job nga je tísíxále (Job 1:9-12). Kʼoati tsakjákao je Jesús kʼianga mele tsakʼanachale (Mat. 4:1-10). Kʼoa nga rey kinikao Jesús nga nó 1914, je Na̱i kʼoati tsakʼétʼale je chjotale Cristo xi ya koai ngʼajmi (Apoc. 12:17). Nichxin xi tiyoaa ndʼaibi, tojo tíbʼétʼaná ngatsʼiaa xi Jeobá tinixálee. Kʼianga si̱kinjelee, machjénní nga kuixkantʼakoaa kʼoa nga nʼio katasʼejna je kjoamakjainná. Je Na̱i jé xi ngisa nʼio ngʼakon. Nga̱ kʼoakitso nga tsínle ʼnde je Jeobá nga koatexoma. Saʼnda tsakásjaile jmeni xi kisʼin kʼianga je katabʼétsʼoale chjota ʼndele nga Jeobá kʼoetsʼoale. Je Na̱i nʼio ngʼakon. Kʼiatsa mená nga si̱kinjelee machjénní nga kʼoéchjoalee yaoná je kjoangʼakon (1 Ped. 5:5). wp15 1/5 2:3, 4

Jetongini kʼoatítsoná Jeobá nga naskánakoa̱nchon nichxin xi nroaján. Kʼiatsa kui si̱kjaʼaitsjeen, tsjoa sa̱tío tokoán kʼoa koasenkaoná nga tosi tonda si̱xálee je Jeobá. A fiya jkui nga jekʼoatinʼiai jmeni xi tongini títso Niná, ni ya ngʼajmi kʼuín kʼoa ni i̱ Sonʼnde kuijnai. Kʼiatsa i̱ tjínli kjoachoya i̱ Sonʼnde, cha̱niyai jkui kʼianga tinixái kao miyoli nga naskákatamachon je Sonʼnde. Xá jebi jé koandiaale chjota xi koa̱nndosinle xi tʼatsi. Ngatsʼi je chjota xi ya koatio tsjoake koa̱n je Jeobá joni tsa ji. Tsjoa sʼe̱ tokuin nga koa̱n kʼoasʼiain jmeni xi mali nʼiai kʼianga kuisenkoai je xi ngikʼa kʼoa nga chʼa̱sjengʼai je Jeobá. Kʼoa nga jekjoaʼáyale je kʼien, tsakui nichxin kuisenkoai nga katabe je Jeobá (Juan 17:3; Hech. 24:15). Kʼianga kui chaniyaa jkoaa, ʼyañá nga kui tinikjaʼaitsjeen jmeni xi ñaki kuitjoson nga̱ yaa Biblia faʼaitʼa (Is. 11:9; 33:24; 35:5-7; 65:22). wp15 1/5 3:15

Kao nganʼiole Jeobá, je Jesús kui bino xi ñaki nda kisikʼóya nandá (Juan 2:6-11). Je Jesús alikʼia nga to yaole kini nga kisichjén nganʼio xi kisʼele. Tobʼelañá, jókisʼin kʼianga kʼoakitsole Na̱i nga nioxtila katasíkʼóya je la̱jao̱. Alikui kʼoakisʼin (Mat. 4:2-4). Kui xá kisichjénni je nganʼio xi kisʼele nga koasenkao chjota. Jósʼin koa̱n chjénngilee. Je Jesús kʼoakitso nga tjínnele kuinyakoaa xíngiaa (Luc. 6:38). Jmé xi koa̱n sʼiaan. Koaan kuinókjoalee nga katafikjenkaoná ya niʼyaná. Koaan si̱kʼayalee nichxinná nga jekafetʼa kjoajtínná, tsakui nichxin koa̱n kuinóʼyalee tsa ʼya xi kjoanokjoayale skótʼaya. Tsakui nichxin kʼoati koa̱n kuinyakoaa je xi tosʼa kjimale tjíotsoyason. Kʼianga binyakoaa xíngiaa kui choa̱le Jesús timangíntjenngiaa. wp15 1/6 1:3, 4,6

Kʼiatsa si̱tjosonlee ngantsjai je Niná, koaan kuitjátojin tjínkoaan je Armagedón. Kui kjoaxkón jebi xi nʼiosa tokʼoakoa̱nná xi sʼe̱jna. Kʼoa kʼianga jekjoaʼato Armagedón kʼiaa jchasaa je kjoaxkón xi sa̱tío. Tobijbi koa̱nndayani je chjota (Is. 35:5, 6; Apoc. 21:4). Je chjota alikui ticho̱tsín koa̱nchjénnile, yánise, muleta kao silla de rueda. Kʼoa je chjota xi tsín nrʼoé alikui ti aparato kʼoeyani xo̱ño. Je xi kjoaʼatojin tjínkon Armagedón, nʼio tse xá sʼe̱le, ʼndenaxó sikao ngakjijngo je Sonʼnde (Sal. 115:16). Kʼianga chotʼayajiaan je kjoaxkón xi tsakatío Jesús, xi chjotankjín ʼminá xi kuiyoaa i̱ Sonʼnde ngisasa sʼená kjoachoya nga tsín tichʼin sʼe̱ni (Apoc. 7:9). Kjoaxkón jebi kui bakóná jokji tsjoakená je Jesús (Juan 10:11; 15:12, 13). Je kjoamatokon xi tsakakó Jesús kʼoati kui síkjaʼaitsjenná jokji tsjoake Jeobá je choʼndale (Juan 5:19). wp15 1/6 2:16, 17

Kʼianga nó 1914, ya Europa jngo kjoajchán kisʼe xi tsangabason jngo tjíjtsa Sonʼnde. Nʼio nkjín chjota xi kjinrá kʼien. Kʼoa nga nó 1918, jngo chʼinndʼai xi toán kisʼe xi ngisa nkjín chjota kisikʼien tikʼoajinni xi kjoajchán kʼienjin. Kʼianga kʼoakoan to jngoní “choa̱” jmeni xi kitsole Jesús je chjotale (Mat. 24:3-8; Luc. 21:10, 11). Kʼianga kʼoakoan kao kui tsaʼyanile kʼianga kʼia tsakʼétsʼiakao Jesús nga tsakatéxoma ya ngʼajmi nga nó 1914. Kʼianga kui nó jebi, jngoyanile kʼia jitjo je Jesús nga tínjele (Apoc. 6:2). Je Jesús kisitsje ngʼajmi, jngo kjoajchán tsakʼéjna kao je Na̱i kʼoa kao ánkje xi ya fitʼale kʼoa i Sonʼnde tsakʼaonjenngi je Na̱i kao ánkje tsʼenle. Kʼianga jekʼoakisikao kʼiaa kitjoson én xi kamaxkia ndʼaibi. wp15 1/6 4:13

Je pastro Pablo tongini kʼoakitso kʼianga koatio kʼa xi yátsʼi̱n kuinyale je relijión xi ñaki kixi kʼoa kjoandiso koakoya ya jinjtín (Hech. 20:28-30; 2 Tes. 2:3, 4). Kjoa jebi kʼiaa kʼoakoan nga kjesa fetʼajin siglo 1 kʼianga jekisʼejna je jtínle Cristo. Kʼoa nʼio ñʼai koan nga tsaʼyale je xi ñaki choʼndale Niná ma. Kʼoa nga jenkjín siento nó jaʼato, je Jeobá jé Jesús kisichjén kʼianga tsakʼéjnatsen ʼyáni je xi ya tjíosíxá ya yo̱ngo̱ xi tsín matsen xi tsʼe Niná. Kʼianga nó 1919, kʼiaa tsaʼyale ʼyani xi ya tjíosíxá ya yo̱ngo̱ xi tsín matsen xi tsʼe Niná. Chjota jebi kisindaya yaole kʼianga kʼoasʼin tsabexkón Jeobá josʼin nga mele (Is. 4:2, 3; Mal. 3:1-4). Kʼoa kʼiaa kitsʼiani nga kitjoson je sén xi tsabe je pastro Pablo. Kui nganʼiole Jeobá kisichjén kʼianga tsakakóle Pablo jmeni xi koa̱n nichxin xi nroaján (2 Cor. 12:2-4, TNM). wp15 1/7 1:6-8

Nʼio nkjín chjota xi kʼoasʼin makjainle nga ñaki koa̱ntsen je Jesús nga kjoaʼaíkatéxoma i̱ Sonʼnde kʼoa nga koaikaosontsen chjota ya ngʼajmi. Tonga ya Biblia kʼoatso nga tsín koa̱ntsen je Jesús nga kjoaʼaí. Itso: “Kʼiaa koa̱ntsen choa̱le ʼndíle chjota ya ngʼajmi”. Je Jesús yaa “kjoaʼaíjinni yojbi ya ngʼajmi” (Mat. 24:30). Je Biblia kʼoati i̱ tso: “Je yao kao njínná likui koa̱n sʼe̱kjoatjaole kjoatéxomale Niná”. Kʼoa kʼoatso jmeni xi koa̱nle je xi ya koai ngʼajmi, itso: “Ni̱kʼantjaiyaná, xi ndi̱to̱nndi̱to̱n xi tojngo nikʼajtsoaa xkoaan, kʼia nga je xjao xi fetʼani kjoane” (1 Cor. 15:50-53). Je xi ya koai ngʼajmi, tojngo nikʼajtso xkoaan koai ya ngʼajmi tonga kui kʼoa̱ yao xi tsín matsen. wp15 1/7 2:14, 15

Ya Ndʼia jña chotʼayá yaa ʼyaxkoán je Jeobá. Je kjoajtín xi satíoná nga xki̱ xomana jngo kjoatjao xi tʼatsʼe Niná tínroani. Ánni. Nga̱ kui xi basenkaoná nga ngisa mamiyosaa je Jeobá. Kʼianga satío je kjoajtínná yaa tsoyaná kʼoa tsjoánganʼioná je naxinandále Jeobá. Kʼianga mangián kjoajtínná joxi kuini tibichaa jmeni xi títsjoáná je Jeobá kao Jesús nga xki̱ xomana. Kʼoa nʼio tse kjoanda tjínná nga ya biyotʼá “yámixa̱” xi tsʼe Jeobá kao Jesús (1 Cor. 10:21). Je Jeobá kʼoatsoná nga tjínnele kjuian je kjoajtín xi satíoná kʼianga jchaxkoán kʼoa nga si̱nʼiojiaan xíngiaa (Heb. 10:24, 25). Nga ʼyaxkoán je Jeobá alikui nichaa je kjoajtín xi satíoná, tokʼiajin nga tsín kjuian tsa ñaki tsín kʼoakoa̱n kjoaixiná. Kʼoa nga tongini kuiyondaa kʼoa kʼoee énná koakoñá nga ʼyachjiá je kjoajtín xi satíoná. wp15 1/7 4:3, 4

Ánni nga machjénsíni nga tosi tonda tjenyatokon kuiyoaa kʼoa nga kuiyondaa. Kuinga kʼoakitso Jesús nga tjenyatokon kuiyoaa. Xi ijngosani, je naxinandále Jeobá kʼoatsoná nga tjenyatokon kuiyoaa kʼoa nga kuiyondalee kjoafetʼa kʼoa nga kuenta sʼiaan je ʼNdenaxó xi sʼa nroa (2 Ped. 3:11-13). Je chjotale Cristo xi tsakatio nga siglo 1, tjenyatokon tsakatio kʼoa kiskoyale je nichxinle Jeobá. Tonga nichxin xi tiyoaa ndʼaibi ngisaa tinʼio machjénngáni nga kuiyondaa. Ánni. Kuinga nó 1914 tsakʼétsʼiakaoni Jesús nga tíbatéxoma, kʼoa kʼiaa kitsʼiani nga nichxin fetʼa tiyoaa. Jmeni xi kitso je Jesús tʼatsʼe nichxin fetʼa jetíbitjoson ndʼaibi. Tobʼelañá, je sonʼnde sa chʼao sa chʼao kjimachon kʼoa je énnda chjotse xi tʼatsʼe Chjotaxále Niná tíʼmiyason jngo tjíjtsa Sonʼnde (Mat. 24:3, 7-14). Je Jesús alikui kʼoakitso jokji tse sʼe̱jna je nichxin fetʼa. Kuinga machjénsíni nga kuiyondaa. wp15 1/8 2:4, 5

Ya ʼNdenaxó sʼeená ngayeje xi tsjoa kʼoe tokoán. Tonga je xi ngisa tsjoa kʼoe tokoán kuinga miyoná ma je Jeobá (Mat. 5:3, TNM). Je xi ngisa jchachjiá kʼoa xi ngisa tsjoa kʼoe tokoán kuinga Jeobá si̱xálee. Tsa mená nga tjen kuiyondalee ʼNdenaxó, je xi ngisa títjon si̱kʼéjnaa ndʼaibi kuijin je xále Jeobá (Mat. 6:19-21). Jósʼin nga ngisasa nʼio kjoáyatsjoaa tokoán nga si̱xálee Jeobá. Kuinga si̱kjaʼaitsjeen josasʼin si̱xálee. Kʼiatsa sʼa xti, tikjaʼaitsjain josʼin si̱xálai Niná. Tsakui nichxin kui chjoéjin nga to xále Niná sʼiain. Ya xo̱n xi nichjén nkjín koya koa̱nsjaitʼali josʼin koa̱n si̱xálai Niná. Kʼoati koa̱n kuinókjoakoai je ndsʼee xi jenkjín nó nga to xále Niná tjíosʼín. Kʼiatsa kʼoasʼin si̱chjain kjoabijnachonli nga to Jeobá si̱xálai, nʼio tse xi koa̱nli xi koasenkaoli nga kuijnai ya ʼNdenaxó. wp15 1/8 3:13, 14

Je nganʼiotsjele Niná binyakao je chjotale Cristo nga sʼele kjoafaʼaitsjen, nga nda chjota ma, nga ndʼé ma kʼoa nga tsejta ma (Gál. 5:23). Kʼianga kjoa faʼatojin alikui síchangale yaole, male josʼín kʼoa kale jmeni xi kjimatʼain. Kʼianga kotʼaya Biblia, kui kjoafaʼaitsjen xi koasenkao básjaiya nga skoe̱ jmeni xi ndatjín kʼoa jmeni xi chʼaotjín, kʼoa síchjén kjoafaʼaitsjen jebi nga kui xi ndatjín kjoejin. Tjínle kjoanangitokon kʼoa bení nga kui xi ngisa ndatjín nga kjoatéxomale Jeobá mangíntjenngiaa. Ñaki kao kjoatsjoa tsoyason kʼoa bʼénele yaole nga tsjoánganʼio nga tsín xkoa̱ya bʼejna je jtín. Ninga jenʼio nkjínná nó nga tinixálee je Jeobá, machjénní nga chjónangilee yaoná: “Jñásani sindaya je yaona nga kʼoakoa̱nkjoan jokoankjoan je Jesús”. wp15 1/9 1:6, 7

Je chjotale Jesús tsabee je Jesús nga tsoʼbason ya ndáchikon Galilea. Je Pedro kʼoakitsole Jesús tsa koa̱n nga kʼoati kʼoámjeson tsanda je ya nandá. Je Jesús kʼoakitsole nga koa̱n. Je Pedro kitjoo ya chitso kʼoa kison nandá nga kinrʼoe Jesús. Tonga nga jejao jan tsakinyá ndso̱ko̱, kiskangindá. Ánni. Kuinga kui kiskotsenle je jtsínʼio kao ntjao̱ kʼoa kitsokjon. Je Pedro kʼoakitsole Jesús nga katabasenkao. Je Jesús kiskoé ntsja Pedro kʼoa kʼoakitsole jotso én xi kamaxkia ndʼaibi (Mat. 14:24-32). Kʼianga kinchja̱le Jesús, je Pedro kitjoo ya chitso kʼoa tsakʼamjeson nandá. Kui kʼoakisʼinni nga koankjainle nga je Jeobá koasenkao josʼin tsakasenkao Jesús. Kʼoati mangóson jmeni xi tinʼia ñá. Tsakʼaitʼalee yaoná je Jeobá kʼoa tsangínsʼenngindáñá. Kuinga kʼoakinʼiañá nga nʼio kisʼená kjoamakjain xi tʼatsʼe Jeobá kao Jesús nga je kuinyakaoná (Juan 14:1; 1 Ped. 2:21). wp15 1/9 3:1, 3

Jngo nʼai xi nda sʼín síkuindaa je ʼndíxtile nga tsín xkón katabatio. Je Jeobá kʼoatisʼin síkuindaná. Tojosʼin nikuindaa je xkoaan kʼoatisʼin síkuindaná je Jeobá (Zac. 2:8). Tonga kʼoati tjínkʼa je choʼndale xi tjíonikʼien nga kixi kjima. Kʼoakoan je chjotale Cristo xi Esteban tsakʼin kʼoa kao xi kjaʼaísa. Je Jeobá alikui tongantsjai nga bʼéchjoa nga nikʼien je choʼndale. Tonga síkuindajtínní je choʼndale nga bájinkon jme che̱n xi batíobasen je Na̱i (Efes. 6:10-12). Je Jeobá kui Biblia kʼoa kao naxinandále síchjén nga bájinkonná jmeni xi xkón tíjna ya Internet, kʼoati tsoná nga ñʼai tjínle tsa tao̱n koa̱ntsjoachaa kʼoa tsakui koa̱ntsjoachaa pelíkula, libro kʼoa kao videojuego xi kjoachajngi kao kjoatsʼen tjínle. Jebi kui bakóná nga tsjoakená je Jeobá kʼoa nga mele sikuindaná. wp15 1/9 4:15, 17

Je Jeobá kʼoati tíbasenkao je choʼndale ya ngixko̱n kjoatéxoma nga katatjoʼndele nga katatsoyason (Filip. 1:7). Tobʼelañá, kʼianga tjíobatio kʼa chjotaxá xi tjíobatiochjoa nga kʼuínyasoán yaa timangián ngixko̱n kjoatéxoma nga tinitoánntje yaoná. Jela 268 kjoa kinjená ya ngixko̱n kjoatéxoma xi nʼiosa ʼyale jngo tjíjtsa Sonʼnde. Tobʼelañá, saʼnda tjen nó 2000 jekanño kjoa kinjená ya Tribunal Europeo de Derechos Humanos. Jebi kui xi bakó nga nijmejin xi kʼoechjoale je Jeobá nga koasenkao naxinandále (Is. 54:17). Jmé choa̱ xi tjínsa nga tíbasenkaoná je Niná. Kuinga tiʼmiyasoán jngo tjíjtsa Sonʼnde (Mat. 24:14; Hech. 1:8). Kʼoati kuije̱ nga jtín sʼin tjío ngatsʼi je choʼndale Jeobá tojñani tsʼe. Tsínsa ijngo relijión xi kʼoasʼin jtín tjío. Kʼoa saʼnda je chjota xi tsín Jeobá síxále itso: “Ñaki kjoakixi [nga] Niná tíjnajinno” (1 Cor. 14:25). Nʼio nkjín choa̱ tjín nga Niná tíbasenkaoná (Is. 66:14). wp15 1/10 1:13, 14

Je pastro Pablo kʼoakitso nga tsín nʼio kjuintʼalee xi tjín sonʼnde (1 Cor. 7:29-31). Ninga tsín tongayeje nga chʼaotjín, machjén nga tsínkui nʼio si̱kʼayalee nichxinná. Tsa kʼoasʼiaan, tochale likui tije Jeobá si̱xánilee (Efes. 5:15-17). Je xi nʼio fáʼaná nichxin kuiní tsa tokʼoétsaojinla, tsa to libro kʼoéxkiaa, tsa telebisión chótsenlee, tsa xin ʼnde kjuinkimaa, tsa tsojmi kjuinkindá, tsa to mensajela si̱kasén, tsa noticia chótsenlee, kʼoa tsa josʼin kabatio je chjota xi síská, kʼoa tsakui kjoásjee aparato xi nʼio sʼa chjotse kʼoa tsa tsojmi xi naskásʼin matsen. Tjínkʼa chjota xi ñaki tokui tjíotso tjíonchja̱le jebi (Ecl. 3:1, 6). Je Na̱i kui xi mele nga tokjaʼaíla kjoa si̱sinlee kʼoa nga tsín tije Jeobá si̱xánilee. Kʼoakisikao je chjotale Cristo xi tsakatio nga siglo 1 (2 Tim. 4:10). Kuinga machjénsíni nga kjuintjenngiaa je kjoafaʼaitsjen xi tsjoáná je testo xi kamaxkia ndʼaibi. wp15 1/10 3:7, 8

Jngo ánkje tsʼatsenle je chjoónle Manóah kʼoa kʼoakitsole nga jngo ʼndí sʼe̱le. Kʼoa nga jetsakʼéyanajmíle je Manóah, nʼio tsjoa koanle. Tonga kʼoati kui kisikjaʼaitsjen Manóah jokji xá tjenkao. Kʼianga kui nichxin nʼio nkjín chjota israelita xi chʼao tjíosʼín. Jósʼin kuitsoyale je ʼndí xi sʼe̱le kʼianga je Jeobá sixále kʼoa nga katamatsjoake. Je Manóah kʼoakitsole je Jeobá nga ijngokʼa katasíkasén je ánkjele kʼianga katatsoyale josʼin sijchá ʼndí jebi (Juec. 13:1-8). Kʼiatsa tjínli ʼndíxti, kʼoajinti machoyali jokoanle je Manóah. Kʼoati kui xá kjineli nga kʼuínyalai je ʼndíxtili nga je Jeobá katasíxále kʼoa nga tsjoake katama (Prov. 1:8). Jméni xi koasenkaoli nga kʼuínyalai je ʼndíxtili. Je xi koasenkaoli kuinga chótʼayajtíon Énle Niná ya niʼyano kʼianga xki̱ xomana. Kʼoasʼin skoe̱ni xi tʼatsʼe Jeobá kʼoa kao jmeni xi tso je Biblia je ʼndíxtino (Deut. 6:6-9). Tinyakao je ʼndíxtino nga katamale xi tʼatsʼe Niná. wp15 1/11 1:1, 2

Ninga tsín ʼyai jme xi síkjaʼaitsjen je xtili, tonga koaan si̱jinlai yaoli jotjío kon. Jé Jeobá koasenkaoli. Tsa sakʼoa jme xi sʼin, ali kʼoajinsʼin nikjaʼaitsjain nga likui tikoa̱nndayani. Tosa kʼoatʼinlai jmeni xi nda tjíosʼín kʼoa kuenta tʼiain nga bʼénele yaole nga nda sʼín. Kʼianga bele tokuin koaan kʼoaisalai xá nga tosi tonda sindaya yaole. Je Jesús kʼoakisikao je chjotale. Nga jekoanni jngo nó basen nga tsabexkon je Natanael, kui xá kitsjoale nga pastro koa̱n. Kʼoa je Natanael nʼio ndasʼin kisitjoson je xá xi kisʼenele (Luc. 6:13, 14; Hech. 1:13, 14). Tʼintjenngi choa̱le Jesús. Alikuijin kʼoanʼiai jmeni xi chʼao kʼoe kon je xtili kʼoa tsa kʼoasʼin sikjaʼaitsjen nga tsín jme xi nda sʼín. Tosa tʼainganʼiolai kʼoa kʼoatʼinlai nga tsjoa tjínli kʼoa nga kʼoati tsjoa tjínle je Jeobá nga tjíobʼénele yaole kʼianga tjíosíxále. wp15 1/11 2:15, 16

Kʼianga nó 1914 nga kitsʼia je nichxin fetʼa, to aon jmi mani je choʼndale Niná xi ya koyale nga ya koai ngʼajmi. Ningalani kjoa jaʼatojin, tosi tonda kitsoyason nga̱ tsjoake koan je chjota kʼoa kui nganʼiotsjele Niná tsakinyakao. Kʼoa jósʼin tíbichómani nga kʼoakisʼin, nichxin xi tiyoaa ndʼaibi nʼio nkjín chjota tísʼexkó xi i̱ Sonʼnde koatio. Chjotankjín jebi tsʼato jin miyón mani nichxin xi tiyoaa ndʼaibi. Kʼoa tsʼato 115,400 jtín tjío jngo tjíjtsa Sonʼnde jñani batioxkó. Kʼoa tosi tonda kjimankjín. Tobʼelañá, tjen septiembre nó 2013 saʼnda agosto nó 2014 tsʼato 275,500 chjota kisʼenngindá. Xi tsonile 5,300 chjota kisʼenngindá nga xki̱ xomana. Sa nkjín sa nkjín kjima chjota xi je Jeobá tjíosíxále. Kuinga kjimankjínni nga tjínná kjoamakjain tʼatsʼe Niná kʼoa makjainná nga tʼatsʼe jaʼaini je Biblia (1 Tes. 2:13). Ningalani jtikená kʼoa bʼétʼaná je Na̱i, ndasʼin tiyoaa xi kao Niná (2 Cor. 4:4). wp15 1/11 4:12, 14, 16

Je chjotachjine nkjín jmi xo̱njchá xi kjioni saʼnda ngasʼa, xi énle Niná faʼaitʼa tjíokotʼayason. Kʼoa jméni xi kjimasjaile. Kuinga tojngo jao bersíkulo xi bʼantjaiyajin jmeni xi tso, kʼoa nga tsín bʼantjaiya jmekjoanni xi kitso je Niná. Je chjota xi ñaki tjíojngo kon nga kotʼayason Biblia alikui jao tjíole nga ñaki Énle Niná je Biblia. Ninga nʼio tse kjoa tífaʼatojin je Biblia jokji nga tínroa nichxin, tsʼato 2,800 én jekjio ndʼaibi. Tjín én xi jejaʼatoya ngakjijngo Biblia kʼoa tjín én xi tochoa jejaʼatoya. Nijngojin libro xi kʼoasikji én tífaʼatoya joni tsa Biblia. Kʼoa ninga nʼio nkjín chjota xi tsín makjainle xi tʼatsʼe Niná, tokuiní je Biblia xi nʼio tíbʼabíson jokji nga tínroa nichxin. Ningalani tjíokʼa Biblia xi tsín nda jaʼatoya kʼoa ñʼai sʼexkia tonga tojo títsjoáná kjoachoya je én xi faʼaitʼa kʼoa koaan sʼe̱ná kjoabijnachon xi tsínkʼia fetʼa. wp15 1/12 1:13, 14

Jmeni xi kuixoán koaan koasenkao je chjota kʼoa koaan sikiʼaon. Kuinga machjénsíni nga nda si̱kjaʼaitsjeen jmeni xi kuixoán. Nʼio nkjín chjota xi tsʼen kʼoa tokui én xi síkiʼaon chjota nchja̱, kʼoama énle joni tsa jngo espada kʼoa joni tsa jngo flecha (Sal. 64:3). Kʼoa je én jebi yaa manile jotso je pelíkula xi kotsenle kʼoa kao xi faʼa ya telebisión. Tonga ñá xi chjotale Cristo maa alikʼia nga kui én xi chʼao tso nichjén ninga to énská. Alikui chʼaotjín nga kui kʼoabixoán én xi tosíkijnoná. Tonga alikʼia nga kui kʼoakuixoán jme én xi tokuijnochani xíngiaa kʼoa chʼaosʼin sikʼéjna. Je Biblia itso: “Nitojngojin én xi chʼao tso nʼósjenio ndsoʼbao, tojé én xi nda tjín xi kuinyakao, xi machjénle, jméni nga kʼoasʼin tsjoásínile kjoanda je xi nrʼoé” (Efes. 4:29, 31). wp15 1/12 3:10

Je én jebi jé xokitso je cuerpo gobernante xi tsakʼejna nga siglo 1. Én jebi kʼoati “katasʼeno nganʼio” sʼin tsoyanile. Kʼoa kui xi mená ngatsʼiaa nga tsín chʼin sʼe̱ná kʼoa nga sʼe̱ná nganʼio. Nga kjesa faʼaikaojin sonʼnde chjotse je Niná kʼoa nga chjotajée maa, toxá tjóchʼinniná. Alikui kʼoasʼin si̱kjaʼaitsjeen nga sindayaná je Jeobá ndʼaibi. Tonga ʼyañá nga sindayaná nichxin xi nroaján kʼoa nijmejin chʼin tisʼe̱niná. Je pastro Juan kui kisikʼaxki̱ jngo “ndáje xi tsje xi tsʼe kjoabijnachon” kʼoa kao “yále kjoabijnachon” xi sindaya ngatsʼi chjota (Apoc. 22:1, 2). Alikuijin xi tsonile tsa ndáxka̱ sʼioa nga koa̱nndayaa ndʼaibi kʼoa tsakui sʼioaa ya ʼNdenaxó. Én jebi kui tínchja̱ni ngayeje jmeni xi sʼin je Jeobá kao Jesús nga koa̱n kuiyoaa ngantsjai nichxin (Is. 35:5, 6). wp15 1/12 4:17, 18

Je Jeobá kʼoakitso kʼianga je nichxin xi tiyoaa ndʼaibi “te chjota xi ya jaʼaini ngayeje én xi nokjoa ngakjijnda naxinandá tsoa̱nʼio, tsoa̱nʼio je najñojnrole jngo chjota xi judío, kʼoa i kuitso: Menajin nga ya koanngínkaolaijin, nga̱ kinoʼyaníjin nga Niná tíjnakaono” (Zac. 8:23). Je “chjota xi judío” jé tsoyanile chjota xi kao nganʼiotsjele Niná kitjoejinni. Kʼoa ya Biblia “chjota Israel xi tsʼe Niná” tsole (Gál. 6:16). Kʼoa je xi “te chjota” jé tsoyanile xi i̱ koatio ngantsjai nichxin i̱ Sonʼnde. Chjota jebi bení kʼianga Jeobá tjíosíchikontʼain xi ya koai ngʼajmi kʼoa tse kjoanda xi kao je nga ñatjen bexkón je Niná. Tojo kitso je Zacarías, je Jesús kʼoati kitso nga jtín sʼin koatio je choʼndale Niná. Je xi ya koai ngʼajmi, “xi tochoa mani” kao je xi koatio i̱ Sonʼnde, xi “kjaʼaí barré. [...] Tojngo koa̱njtín, kʼoa tojngo koa̱n” xi skóʼnda (Luc. 12:32; Juan 10:16). w16.01 4:1, 2

Machjén nga si̱kuindaa je kjoamiyo xi tjínná kao Jeobá. Machjén nga chʼa̱sjee nganʼio. Yaa mangóson joni tsa nandá timangínjiaan, tsa tífi je nandá kʼoa tinroa ñá. Tsa tsín mená nga je nandá koaikaoná tjínnele nga nʼio tse nganʼio chʼa̱sjee. Kʼianga ʼmiyasoán basenkaoná nga tosi tonda miyoná mani je Jeobá. Ánni. Kuinga kui sʼeya kjoafaʼaitsjenná je xi nʼio chjíle kʼoa jmeni xi ndatjín kʼianga kui nokjoañá tʼatsʼe Niná kao jmeni xi tso je Biblia. Likui kui nikjaʼaitsjeen xi sikʼajen kjoamakjainná. Kʼianga ʼmiyasoán ngisasa nʼio sʼejna kjoamakjainná nga̱ kui nikjaʼaitsjeen kjoatéxomale Niná kao kjoachoya xi tsjoáná. Kʼoati basenkaoná nga tosi tonda kʼoanʼia josʼin mele Niná kʼoa síkuindaná nga tsín ya tsaoyaa che̱nle Na̱i (Efes. 6:14-17). Nga ʼmiyasoán, nga chotʼayá kʼoa nga bisenkoaa je ndsʼee kʼoati basenkaoná nga tsínkui nʼio nikjaʼaitsjeen je kjoa xi tjínná. w16.01 5:12, 13

Je Rut nʼio tsjoake koan je Jeobá. Kʼoa kuinga kʼoakitsoni je Boaz nga joxi ya “jngale” Jeobá tsakásjai nganʼio je Rut (Rut 2:12). Jmeni xi kitso je Boaz kui síkjaʼaitsjenjinná josʼín je xo̱ʼnda̱ʼndí kʼianga fikationgi ya jngale na̱le (Sal. 36:7; 91:1-4). Je Rut kʼoakisʼin. Koanmele nga je Jeobá sikuinda. Kʼoa je Jeobá kisichikontʼain nga kisʼele kjoamakjain. Je Rut ñaki tjínjngo kon nga kʼoakisʼin. Ndʼaibi, nkjín chjota xi be jotjínni xi tʼatsʼe Jeobá tonga alikui tso kon nga tsjoátʼale yaole kʼoa nga fisʼenngindá. Kʼiatsa kʼoakjimai, jméni xi sʼiain. Jan koya tjínni xi koasenkaoli. Xi títjon, tikjaʼaitsjain ánni nga tsín bʼaitʼanilai yaoli je Jeobá. Xi majaoni, tikjaʼaitsjain kʼianga je xi tsín Jeobá tjíosíxále jé tjíosíxále niná xi tjín sonʼnde (Jos. 24:15). Xi majanni, tsa kʼoaitʼalai yaoli je Jeobá, tibakoní nga tjínli kjoamakjain nga je sikuindali kʼoa nga je koasenkaoli tojme kjoa kuitjátojin. Je Niná kʼoasʼin tsakasenkao je Rut. w16.02 2:6, 7

Kʼianga koanmele Abisai nga sikʼien je Saúl, kui tsakakó nga kixi tífitʼale je David. Alikui koanjinle kʼianga tsín kixi tífitʼale je Jeobá kʼiatsa je josikao “chjota xi je Jeobá kiskoejin”. Tonga je David koanjinle xi tʼatsʼe jebi kʼoa kuinga tsín kitsjoaʼndesínile Abisai nga Saúl sikʼien (1 Sam. 26:9-11). Jméni xi bakóyaná jebi. Kʼiatsa tsín ʼyaa ʼyani xi kixi kjuintʼalee, tjínnele si̱kjaʼaitsjeen jmeni xi tso je Biblia kʼoa kui xi koasenkaoná nga jchaa jmeni xi sʼiaan. Toxá kixi mangíntʼanilee je chjota xi tsjoachaa, jolani tsa familianá kʼoa tsa miyoná. Tonga machjénní nga si̱kuindaa yaoná nga̱ sakʼoaa bʼanachaná je ni̱ma̱ná kʼoa tsakui nichxin likui tikixi kjuintʼanilee je Niná (Jer. 17:9). Kʼiatsa jngo xíngiaa kʼoa tsa miyoná xi chʼao sʼin kʼoa sikʼéjna Jeobá, si̱kjaʼaitsjeen nga ngisa chjíle nga kixi kjuintʼalee Niná tikʼoajinni toʼya chjotani (Mat. 22:37). w16.02 4:5, 6

Jmé xi tsonile én jebi. Kui xi tsonile nga jisoa kataʼyai ánni nga kjoanda tsini nga kui kʼoasʼiain jotso Niná. Tikjaʼaitsjain choa̱le Timoteo kʼianga sʼa xti. Je Timoteo nʼio nda tsabe jmeni xi tso je Énle Niná nga̱ jé na̱le kao majchále kitsoyale. Tonga je Pablo i kitsole: “Tonga ji nda tʼinkoai xi kichotʼayai, xi nda koankjainli” (2 Tim. 3:14, 15). Nga “nda koankjainli” kitso Pablo, kʼoati kui xi kitsonile nga je Timoteo ñaki kisʼejngo kon nga ñaki kʼoatjín jmeni xi faʼaitʼa je Énle Niná. Ánni nga tsín jao kisʼenile. A tokui nga je na̱le kao majchále xi kʼoakitsole. Mai. Kuinga kisichjén kjoafaʼaitsjenle, jesoa kisijinle yaole jmeni xi tsakʼinyale (Heb. 5:14). Je Timoteo nʼio nda choa̱ tsakʼéjnale je xi sʼa xti. Tsa nda chótʼayai Biblia, koaanli josí kʼianga jme xi chjónangili, tsín jao sʼe̱li kʼoa sʼe̱jngo tokuin tʼatsʼe jmeni xi makjainli (Hech. 17:11). w16.03 2:3, 4, 7

Kʼianga ki je sʼuí xi kisatio ya Jerusalén, je chjota israelita jtín sʼin kisixá ngatsʼi. Tsakatíonda jmeni xi koanchjénle kʼoa tsakinyakaongañá xínkjín ya yandiaa. Kʼianga jekicho jñani tíjna yo̱ngo̱, ñatjen tsakʼétsʼoale je Jeobá kʼoa ñatjen tsabexkón. Kʼoa ñá kui tibiyondalee nga ya kuiyoaa ya sonʼnde chjotse. Kuinga nʼio chjínile nga jtín sʼin kuiyoaa kʼoa nga si̱xájtián ngatsʼiaa. Je chjota sonʼnde xkoa̱ya tjío kʼoa tojme xi kjányani. Tonga ñá, nʼio bʼailee kjoanda je Jeobá nga tíbasenkaoná nga nyʼán tiyoaa kʼoa nga majinná jmeni xi tso Biblia. Jngo tjíjtsa Sonʼnde, kʼoasʼin ʼyaxkoán Niná josʼin mele. Kʼoa ndʼaibi nga nichxin fetʼa tiyoaa ngisaa nʼio jtín sʼin tiyoaa. Tojo kitso je Isaías kao Miqueas, ngatsʼiaa timangínmiñá “ya nindole Jeobá” (Is. 2:2-4; Miq. 4:2-4). Tsa jtín sʼin kuiyoaa, nʼio tse kjoanichikontʼain sʼe̱ná. Jemachrianle nichxin kʼianga toje Jeobá kʼoétsʼoalee ngatsʼiaa i̱ Sonʼnde. w16.03 3:16, 17

Ánni nga tsín síʼa kʼasíni xi chjotajchínga sʼin tjío nga binyakao je ndsʼee. Tsakui nichxin kʼoasʼin síkjaʼaitsjen nga ngisa tjínle kjoandosin je xá xi kjaʼaí kʼoa ngisa nʼio maxátíyale nga sʼe̱ndajin. Kʼoa tsa kʼoasʼin síkjaʼaitsjenje̱ nga tsín machjén ndʼaibi nga kuitsoyale je ndsʼee nga xá katabʼaile. Kjoaixi nga sʼe kjoa xi ngisa machjén nga sasa sʼe̱ndajinni. Tonga tsa tsín kuinyakao ndʼaibi je ndsʼee nga tsesa xá katabʼaile tsakui nichxin ñʼai kʼoéjna je jtín nichxin xi nroaján. Tjínkʼa chjotajchínga xi kʼoasʼin síkjaʼaitsjen nga ngisa chjíle nga kuikjoanla sitjoson je xá xi kjinele ya jinjtín ánni nga tsín jme kjoa katasʼesíni. Tonga tsa tsín siʼa nga kuinyakao je ndsʼee, chan likui tisʼe̱ni je ndsʼee xi xá sʼe̱nele ya jinjtín. Je chjotajchínga xi mandosinle je jtín binyakao je ndsʼee nga tsesa xá katabʼaile. Chjotajchínga jebi nda tjíosítjoson xále kʼoa nʼio chjíle jmeni xi tjíosʼín (1 Ped. 4:10). wp15 1/4 1:4, 6, 7