Abril

Jmé xi tjínnele sʼiaan nga koasenkaoná xá xi sʼín je xi chjotajchínga sʼin tjío. Xi koa̱n sʼiaan kuinga chjénngiaa je kjoamakjainle kʼoa nga nda choa̱ batío, kʼoa kjuintjenngiaa je kjoafaʼaitsjen xi tsjoáná xi ya Biblia bʼangini (Heb. 13:7, 17). Je xi chjotajchínga sʼin tjío tjao bená kʼoa kui xi mele nga tosi tonda si̱miyoaa je Jeobá. Tobʼelañá, tsa skoe̱ nga tinichaa je kjoajtínná kʼoa tsa tsín titsjoa tísʼeni tokoán nga tinixálee je Niná, kjitʼanangi kuinyakaoná. Nda kjuinrʼoéná, tsjoánganʼioná kʼoa tsjoáná kjoafaʼaitsjen xi ya Biblia yʼangini. A majinná nga kʼoasʼin bakóniná kjoatsjoacha je Jeobá. Alikui tongantsjai nga choa ñʼai male je xi chjotajchínga sʼin tjío nga kjoafaʼaitsjen tsjoáná. Jósʼin kʼoainganʼiolee je xi chjotajchínga sʼin tjío nga kuitjosonle je xá xi kjinele. Nangitokon katamaa, kuinóʼyá je kjoafaʼaitsjen xi tsjoáná kʼoa kʼoailee kjoanda. Si̱kjaʼaitsjeen nga kʼoasʼin bakóniná kjoatsjoacha je Niná kʼianga binyakaoná je xi chjotajchínga sʼin tjío. Tsa kʼoasʼiaan, kjoanda tsaanñá kʼoa je xi chjotajchínga sʼin tjío ngisaa tsjoa sa̱tío kon nga sitjoson je xá xi kjinele. w18.03 31 párr. 15, 16

Kjaʼaí kjaʼaí sʼín nga jngó jngó je xti. Alikui tongóson sʼin mataja je kjoamakjainle. Tjínkʼa xi ngotjo sʼenile kjoafaʼaitsjen ninga sʼa ʼndí kjoan, kʼoa kʼoatso nga jemele koaisʼenngindá. Kʼoa tjínkʼa xi kʼoasʼin síkjaʼaitsjen nga kjesa tjíondajin nga koaisʼenngindá. Kʼianga majinle jebi je xi xijchá ma, alikui bʼénele je ʼndíxtile nga koaisʼenngindá, tosaa binyakao nga tosi tonda koa̱ntaja je kjoamakjainle. Nʼio tsjoa satío kon je xi xijchá ma kʼianga fitjenngi je ʼndíxtile kjoafaʼaitsjen xi tsjoá je Biblia tojo tso je texto xi kamaxkia ndʼaibi. Tonga alikui koa̱n sichajin nga machjén nga chjotale Cristo koa̱n je ʼndíxtile. Kuinga ndatjínsíni nga skónangile yaole jebi: “A jetjínle kjoankjíntokon je ʼndítina nga tsjoátʼale yaole je Jeobá kʼoa nga koaisʼenngindá”. w18.03 9 párr. 6

Kʼiatsa ʼya xi kʼoakuitsoná nga ya koanngínchonlee kʼoa tsa kʼoakaʼmilee nga koanngián tjínnele si̱tjosoán kʼoa tsín totjín totjen xi chʼa̱ngiñá nga tsín koanngián. Kʼiatsa tsín koanngián, toxitsjoajinni jmeni xi kasʼín je xi kanchja̱ná ya niʼyale (Mat. 5:37). Tjínkʼa xi kʼoatso nga koai jñani nokjoale tonga skanni kʼoatso nga tsínni koai, nga̱ tosaa ya fi jñani ngisa kjenndiaale. Je chjota xi kʼoasʼín tsín bakó kjoatsjoacha kʼoa tsín bakó kjoaxkóntokon. Tjínnele kʼoee kjoanda kʼianga ʼya xi kʼoatsoná nga ya koanngínchonlee kʼoa chjoé jmeni xi kʼoainá (Luc. 10:7). Kʼiatsa ñaki tsín kʼoakoa̱nná nga koanngían, tjínnele kjoájinkoaan je xi kʼoakatsoná. Tsa kʼoasʼiaan, koakoñá nga chjí ʼyaa kʼoa nga tjínná kjoatsjoacha. Nʼio tjínle kjoandosin nga kuenta sʼiaan josʼin beni je chjota. Tjínkʼa ʼnde jña kʼoasʼin beni nga tsín síkjinrʼoé xínkjín nga fikonle, tonga kʼoati tjín ʼnde jñani nga títjonkjoanla kʼoatsole xínkjín nga ya koaikonle. Kʼoati tjín ʼnde jñani toxá kʼoasʼin nganile je chjota nga títjonkjoanla kao kjoanda kʼoatsoni nga tsín kʼoakoa̱nle koai, tonga fini nga jejao jan kʼa kʼoaʼmile. Tonga kʼoati tjín ʼnde jñani chʼaosʼin beni je chjota nga ʼya xi kʼoatsole nga tsín kʼoakoa̱nle koai. Tojosʼin beni je chjota, xi kuenta sʼiaan kuinga tsjoa katasʼe kon xi kʼoakatsoná nga kjuinchónlee. w18.03 18 párr. 20, 21

Kʼianga nʼio sʼe̱jna je kjoamakjainná ali tsa tokuijin xi machjén nga jchaa jmeni xi tsoya je Biblia (1 Rey. 4:29, 30; 11:4-6). Kuinga nʼio machjénni nga tosi tonda si̱tajaa je kjoamakjainná kʼoa nga tsín tokui jchaa jmeni xi tsoya je Biblia (Col. 2:6, 7). Nʼio tjínle kjoandosin nga chótʼayá je libro “Tosi tonda katasʼeno kjoatsjoachale Niná”. Tsa kʼoasʼiaan jchañá josʼin si̱chjén je kjoafaʼaitsjen xi tsjoá je Biblia. Kʼiatsa jekichotʼayá libro jebi, koaan chótʼayá je xi kjaʼaísanile xi koasenkaoná nga nʼio sʼe̱jna je kjoamakjainná (Col. 1:23). Xi ijngosani, tjínnele kʼoétsʼoaa kʼoa si̱kjaʼaitsjenjiaan josʼin si̱chjén jmeni xi chotʼayá. Kuinga chotʼayañá kʼoa nikjaʼaitsjenjinñá nga̱ mená si̱tjosonlee je Jeobá kʼoa mená nga sa̱sénle jmeni xi sʼiaan (Sal. 40:8; 119:97). Nga kʼoasʼiaan, kʼoati koasenkaoná nga tsín kʼoaiʼndee nga jme xi kʼoechjoaná nga nʼio sʼe̱jna je kjoamakjainná (Tito 2:11, 12). w18.02 24, 25 párr. 7-9

Jósʼiaan nga kʼoakji kjoamakjain sʼe̱ná joni je Noé. Je xi koasenkaoná kuinga nda chótʼayá je Énle Niná, nga chjí jchaa jmeni xi majinná, nga kʼoaiʼndee nga katasíndayaná kʼoa nga kui katabándiaaná nga jme xi chjoéjiaan (1 Ped. 1:13-15). Tsa kʼoasʼiaan, kui je kjoamakjain kʼoa kao je kjoachjine xi tsʼe Niná koasenkaoná nga tsín ya jtsaoyaa je che̱nle Na̱i kʼoa kao jmeni xi chon sonʼnde (2 Cor. 2:11). Kui jebi xosíkao je chjota nga kui matsjoakeni je kjoatsʼen kao kjoajndí, kʼoa nga tokui fini jmeni xi símekon (1 Juan 2:15, 16). Alikui kuenta sʼín nga jechrian tíjna je nichxinle Jeobá, kʼoa kui kjoa jebi tsaojin je xi inda tjío je kjoamakjainle. Kʼianga kui kinchja̱ni je Jesús nga kʼoati koa̱nchon nichxin xi tiyoaa ndʼaibi jokoanchon nichxinle Noé, ali tsakuijin nʼio kisikʼaxki̱ je kjoatsʼen kao je kjoajndí, kui kinchja̱ni nga xkón tíjna kʼiatsa tsín tikuenta sʼianñá xi tʼatsʼe Niná (Mat. 24:36-39). Chjónangilai yaoli jebi: “Josʼin tifikoa je yaona, a bakoña nga ñaki nda ʼbexkoan je Jeobá. Kʼianga tjínna kjoamakjain, a sitjosonña je kjoatéxomale Jeobá kʼoa a xinyale xi kjaʼaí”. Jotinʼia kui xi kuitsoni tsa kʼoati ya titomjekoaa je Niná xi kixi (Gén. 6:9). w18.02 9, 10 párr. 8-10

Ninga tsínkjoan koa̱n kjin kuiyolee chjota xi chʼao sʼín, nga̱ tsakui nichxin ya ñatjen nixá, ñatjen mangián skuela kʼoa tsa ya tiyokaoñáje̱, koaan kʼoéchjoalee yaoná nga tsín kʼoasʼin si̱kjaʼaitsjeen kʼoa tsín kʼoati sʼiaan josʼín. Jméni xi koa̱n sʼiaan. Tosi tonda si̱miyoaa je Jeobá kʼianga chótʼayá je Biblia kʼoa je si̱miyoaa chjota xi Niná tjíosíxále. Kʼoati machjén nga kuinyakoaa je chjota nga katabe xi tʼatsʼe Niná. Kʼuínyalee je chjota tojñani nga tjío kʼoa si̱jélee je Jeobá nga katabasenkaoná nga kui én xi nda tso kuinókjoakoaa je chjota. Kʼoakʼuínlee nga testigole Jeobá maa. Tsa kʼoasʼiaan, jé Jeobá kuitjongʼa kʼoa ali tsa ñá chʼa̱sjengʼaa yaoná. Kʼoasʼin ʼmiyaná nga chja̱ʼaxinlee yaoná “ngayije kjoa xi tsín bexkón Niná” kao “ngayije kjoachi̱nga̱le sonʼnde”, nga nda kjuinkoaa yaoná, “nga chjotakjoakixi” katamaa (Tito 2:11-14). Tsa chjénngilee Jeobá kʼoa si̱tjosonlee, skoe̱ní je chjota kʼoa tsakui nichxin i̱ kuitso kʼaná: “Koanngínkaolaijin, nga̱ kinoʼyaníjin nga Niná tíjnakaono” (Zac. 8:23). w18.01 31 párr. 17, 18

A kui xi tsonile nga chʼaotjín nga koa̱ntsjoachaa yaoná. Mai. Toxá kʼoanʼiañá kʼoa saʼnda machjén nga tsjoacha katamaa yaoná. Nga̱ kʼoasʼin kisindaná je Jeobá. Je Jesús i kitso: “Katamatsjoachai xikʼa joni nga tijini” (Mar. 12:31). Tsa tsín tsjoachaa yaoná, alikui josʼin tsjoacha koa̱nñá xíngiaa. Xi ijngosani, je Biblia itso: “Kʼoatisʼin xi xʼin tsjoake katama yánchjínle, joni tsa titsʼeni yao. Je xi tsjoake chjoónle, tijeni yaole xi tsjoake nijngojin xi tije taon beni yaole tokʼoasʼin síjchá, kʼoa tjaole” (Efes. 5:28, 29). Kuinga ndatjínsíni nga tsjoacha katamaa yaoná. Je kjoatsjoacha xi síkʼaxki ya 2 Timoteo 3:2 jéní xi to yaole fini. ʼYani xi nʼio tsjoake yaole tokui makjáojinle xi tʼatsʼe (Rom. 12:3). To yaole fini kʼoa tsín kuenta sʼín xi ngikʼa. Kʼoa tsa jmeni xi tsín nda kuichomani, tokjaʼaí xi bánele ʼndele nga je kjoane yaole. Je chjota xi toje matsjoake yaole alikui tsjoa tjíole. w18.01 23 párr. 4, 5

Kʼiaa noʼyalee je Jeobá kʼianga chotʼayá je Biblia. Tonga tsa mená chja̱kaonajmiá, tjínnele nga kʼoétsʼoalee. Ñá xi chjotale Cristo maa, ali tsa tokuijin bʼetsʼoañá nga tjínnele kʼoasʼiaan kʼoa tsa tokuije̱ nga nda katabichótsjoá jmeni xi mená. Nga bʼetsʼoaa nʼio chjíle, jé Niná chjakaonajmiá. Kʼoa je Jeobá mele kjuinrʼoéná (Filip 4:6). Kʼiatsa jme xi tinikjáojin, tikjaʼaitsjain nga i̱ tso je kjoafaʼaitsjen xi tsjoá je Biblia: “Je Jeobá tikʼami je chʼáli, kʼoa jé koasenkaoli” (Sal. 55:22). A makjainli nga koasenkaoli tsa kʼoasʼiain. Miyón mani je ndsʼee xi tjíobinyakao, kʼoati koasenkaoli tsanda ji. Tjínnele ntsjaintsjai kʼoétsʼoalee je Jeobá, ali tsa tokʼiajin nga machjénná. Tsakui nichxin sakʼoa nʼio si̱kjáojiaan je kjoa xi tjínná kʼoa si̱chajiaan je kjoanichikontʼain xi títsjoáná. A koaan jan koya si̱kjaʼaitsjenjiaan nga nyaon nyaon tʼatsʼe jmeni xi mená nga kʼoailee kjoanda je Jeobá. w17.12 25, 26 párr. 10, 11

Nga xki̱ nó jmi mani je xi tsjoátʼale yaole Jeobá kʼoa fisʼenngindá. Nʼio nkjín mani xi sʼa xti xi kʼoasʼín kʼoa xi choʼndale Jeobá mani je xijchále. Kʼoa nga fisʼenngindá kui kjoejin je xi ngisasa ndatjín (Sal. 1:1-3). Likui jao tjínná nga je xijchá xi testigole Jeobá ma, kui xi mele nga kuicho nichxin nga ska̱nisʼenngindá yaole je xtile (tingósonkoai 3 Juan 4). Je xijchá kui xi mele nga katabe xtile “je xo̱n Escritura xi tsʼe Niná”, xi tsonile, je Escrituras Hebreas kao Escrituras Griegas Cristianas. Ninga je xi sʼa xtiʼndí, koaan skótʼaya tʼatsʼe choʼndale Niná xi faʼaitʼa ya Biblia jokji tjen koa̱njinle. Je naxinandále Jeobá títsjoáná je libro, foyeto kao video xi kjaʼaí kjaʼaí én xi koa̱n sichjén je xi xijchá ma nga kuinyakao je ʼndíxtile. Jñánile xi faʼaitsjen kʼali. Nʼio machjén nga sʼe̱ná je kjoankjíntokon xi tsʼe Biblia nga miyoná koa̱nni je Jeobá. w17.12 18 párr. 1; 19 párr. 4

Si̱kjaʼaitsjenla tsa jngo tichjaa xi kʼoasʼin síkjaʼaitsjen nga tsín tjao be je xʼinle xi tsín testigole Jeobá ma. A ngisaa ndasʼin koatio kʼiatsa tokui kjaotini. Ningalani kʼoasʼin josʼin mele tichjaa, a koasenkao jebi je xʼinle nga testigole Jeobá koa̱n. Maijin. Ngisajin ndasʼin kuichomani kʼiatsa skoe̱xkón, ndajin koatio ya yaniʼyale, jejin Jeobá kʼoasjengʼa kʼoa tsakui nichxin saʼnda koa̱nmenile je xʼinle nga Jeobá sixále. Tsa kʼoasʼin, tjoéjinle chjíle nga jao (1 Ped. 3:1, 2). Si̱kjaʼaitsjenla kʼiatsa jngo ndsʼee xi tsín testigole Jeobá ma je chjoónle kʼoa tsín bexkón. Kʼiatsa nʼio kjoakao je chjoónle kʼoa kʼoakuitso nga je ngʼajko̱ tíjnale niʼyale, a kʼoasʼin sa̱kónile kjoaxkóntokon. Maijin. Je Jeobá kui xi mele nga je Jesús katakjenngile kʼoa nga tjao katamale je chjoónle. Nga ngʼajko̱ tíjnale Jesús je jtín kao kjoatsjoacha bándiaale kʼoa tsejtaní (Luc. 9:46-48). Tsa koaitjenngi je choa̱le Jesús ndsʼee jebi tsakui nichxin jeni Jeobá sixále je chjoónle. w17.11 28, 29 párr. 13, 14

Je chjota xi kui kjoafaʼaitsjenle sonʼnde tjínle alikui kuenta sʼín je kjoatéxomale Jeobá. Kʼiatsa je si̱miyoaa chjota jebi koaanle sikinroajen je kjoamakjainná. Nga nyaon nyaon kui sʼejnabasenná je kjoafaʼaitsjen xi tjín sonʼnde jolani xi ya faʼa ya televisión, Internet, ya tʼaxáná kʼoa tsa ya ndʼiaskuela. Nʼio nkjín naxinandá jñani kʼoatso chjota nga tsín makjainle xi tʼatsʼe Niná. Tsakui nichxin kui kʼoatsoni nga tsín nda básjaiya tsa ñaki tíjna je Niná kʼoa tsa mai, tokui síkjaʼaitsjen nga koa̱n kʼoasʼin tojmeni xi mele (Sal. 10:4). Kʼoa tjínkʼa xi kʼoatso nga ngisa chjine kʼoa nga tsín machjénle nga Niná koandiaale kuinga tsín makjainnile xi tʼatsʼe. A ndatjín tsa kʼoasʼin koa̱nkjainná nga tsín ʼya xi kisinda ngayeje jmeni xi tjín. Kʼiatsa kui kjoásjee jotso je chjota científico, tochale ngisa jao sʼe̱ tokoán. Tonga choa ñʼai tíjna nga jchaa. Tobʼelañá, jngo niʼya tjín xi bʼénda kʼoa ngayeje xi tjín i̱ Sonʼnde kao ngʼajmi kʼoati tíjna xi kisinda. w17.11 20, 21 párr. 2-4

Ánni nga nʼio tjínnile kjoandosin nga koanngían nga faʼaitsjenya je Kjoabiyale Cristo. Kuenta sʼiaan nga je kjoajtínná yaa tíjnajin nga bʼetsʼoalee je Niná. Je Jeobá kao Jesús alikui chajinle jokji nganʼio chʼasjee kʼianga mangián nga faʼaitsjenya je Kjoabiyale Cristo. Je Jeobá kao Jesús kui xi mele nga koanngián kjoajtín jebi, tokʼiajin nga ñʼai koa̱nná kʼiatsa nʼio timʼee kʼoa tsa jmesani xi kjimaná. Kʼianga bakoá nga chjí ʼyaa je kjoajtínná, kʼoasʼin bakonilee Jeobá nga mená ya katasʼetʼa jaʼaínná je libro xi tíkijnale. Libro jebi, kʼoati “xo̱n xi tsʼe kjoabijnachon” ʼmile, yaa tjíotʼa jaʼaínle chjota xi kʼoaile kjoabijnachon xi tsínkʼia fetʼa (Apoc. 20:15). Kʼianga kjesa faʼaitsjenyajin je Kjoabiyale Cristo, koaan si̱kʼayaa nichxin nga kʼoétsʼoaa kʼoa si̱kjaʼaitsjenjiaan je kjoamiyo xi tjínná kao Jeobá (2 Cor. 13:5). w18.01 13 párr. 4, 5

Kʼianga jeya kichokʼejna ya naxinandá xi tsen kisatio, je chjota xi tokjoataon xi koanle nga kʼien kisikʼien, likui tixkón tsakʼejnani. Je Jeobá i kitso xi tʼatsʼe naxinandá jebi: “Koasenkao nga tsín xóntsja je xi sijndangajaoni” (Jos. 20:2, 3). Je Jeobá alikui tikuenta kisijénile chjota jebi. Kʼoa je chjota xi síjndangajaoni, alikui kitjoʼndele nga ya jaʼasʼen naxinandá jebi kʼoa nga sikʼien je chjota xi kjoa kisokole. Kʼianga ya tsakʼejna chjota jebi ya naxinandá xi tsen kisatio, jé Niná kisikuinda kʼoa tsín jme xi kitsokjonle. Alikui tsa kjoañʼai tsakʼejna, nga̱ koan kisixá, koan tsakasenkao xi kjaʼaí kʼoa koan ndasʼin kisixále Jeobá. Koan ndasʼin tsakʼejna kʼoa nda kisʼe kon. Tjíokʼa je choʼndale Niná xi jekʼoakoannile nga nʼio ai jée tsakajngi tonga tojo kʼoasʼin síkjaʼaitsjen nga kje chatʼajinle. Saʼnda tjínkʼa xi kʼoasʼin síkjaʼaitsjen nga tsín chajinle Jeobá je jée xi tsakajngi. Kʼiatsa ji xi kʼoasʼin nikjaʼaitsjain, tʼejngui tokuin nga je Jeobá tíbakóli je kjoamatokonle kʼoa nga ñaki toje ndiaa kisichatʼali. Kuinga tsín tjínnenile nga kuijkuín. w17.11 9 párr. 6; 11 párr. 13, 14

Je xi koa̱n sʼiaan nga jtín sʼin kuiyoaa, kuinga si̱kjaʼaitsjenjiaan jósʼin tsoyanile je nioxtila kao je bino xi machjén nga faʼaitsjenya je Kjoabiyale Cristo. Machjén nga kui si̱kjaʼaitsjenjiaan nga tongini kʼoa nga kuikjoan nichxin (1 Cor. 11:23-25). Je nioxtila xi tsínle naʼyo̱san kui tsoyanile je yaole Jesús xi tsín jme jée tjínle xi kitsjoantjainá, kʼoa je bino kui tsoyanile je njínle xi tsakʼéjten xi totʼatsaan. Tonga ali tsa tokuijin xi machjén nga koa̱njinná josʼin tsoyanile jebi. Machjén nga si̱kjaʼaitsjenjiaan nga kjoatsjoacha tsakakóná je Jeobá kʼianga kitsjoa je ʼNdíle nga koa̱n kuitjo̱ntjé, kʼoa xi ijngosani, je Jesús kʼoati tsakakó kjoatsjoacha nga kitsjoa je kjoabijnachonle xi totʼatsaan. Kʼianga si̱kjaʼaitsjenjiaan je kjoatsjoacha xi tsakakóná je Jeobá kao Jesús kui xosikaoná nga kʼoati tsjoacha koaan tsanda ñá. Nga tsjoachaa je Jeobá kao je ndsʼee kui xi ngisa jtín síkatíoná. w18.01 15 párr. 11

Je Jeobá nʼio chjí bená. Nga tsjoakená saʼnda kitsjoa je ʼNdíle nga koa̱n kuitjo̱ntjé kʼoa nga koa̱n kuiyoaa ngantsjai nichxin (Juan 3:16). Tsa tsínlani sitjoson je Jeobá jmeni xi tongini tso, kuijin kʼoangini je Na̱i nga kʼoakuitso nga ndiso je Jeobá, nga tsín kixi josʼin batéxoma kʼoa nga tsínkui xi ndatjín tsjoáná. Kʼoajinti tsjoa koa̱nle je chjota xi besin kʼoa xi jtike Niná, xi i̱ tso: “Jñá tíjna ndai xi kitsjoa tsʼoa nga kjoaʼaí. Jo saʼnda nga kʼen xijcháná, tojo kʼoasʼin chon jo saʼnda nga kisʼenda sonʼnde” (2 Ped. 3:3, 4). Tonga je Jeobá sitjoson jmeni xi tso. Kʼoa nga kʼoasjentjai je chjota xi kixi koaitʼale, kʼoasʼin koakoni nga toje xi bakinle batéxoma (Is. 55:10, 11). Xi ijngosani, kui kjoatsjoacha bʼangini josʼin batéxoma je Jeobá. Alikui jao tjínná nga tsjoake koa̱n ngantsjai je choʼndale xi kixi koaitʼale (Éx. 34:6). w17.06 23 párr. 7

Kʼianga kʼoakitso je Jeobá nga tsjoá xi kʼoasjentjai je chjotasonʼnde, joxi kʼiakjoanni kitsjoa je ʼNdíle, tojo tso ya Génesis 3:15. Kʼoa ñola jmi nó jaʼato kʼianga kitsjoa Jeobá je ʼNdíjngole nga kʼienntjainá, ninga nʼio aon koanle nga kʼoasʼin kinikʼien je ʼNdíle (Juan 3:16). Nʼio bʼailee kjoanda je Jeobá nga kʼoakisʼin. Kʼianga kisindaná je Niná sénle kisikʼaná kʼoa kuinga bakosíñá je kjoatsjoacha. Ñʼai ma sakʼoaná nga kʼoanʼia nga̱ chjotajée maa, ninga kʼoalani, koaan koakoá je kjoatsjoacha. Tobʼelañá, je Abel tsakakó nga ñaki tsjoake koan je Niná, kʼianga kui kitsjoale je xi ngisa nda xi kisʼele (Gén. 4:3, 4). Je Noé tsakakó nga kisʼele kjoatsjoacha kʼianga nkjín nó kitsoyale je chjota ninga tsín ʼya xi kinrʼoele (2 Ped. 2:5). Kʼoa je Abrahán tsakakó nga ngisa tsjoake koan je Niná tikʼoajinni jokisʼe kon, nga̱ kao kjoatsjoa kitsjoatʼa tsakai je Isaac (Sant. 2:21). Tojo kisʼin chjota jebi nga kixi kitʼale je Niná, ñá kʼoati koa̱n koakoá kjoatsjoacha ninga ñʼai koa̱nná nga kʼoasʼiaan. w17.10 7, 8 párr. 3, 4

Xi totʼatsʼe je xá xi tjínle Jesús nga naʼmitítjon ma, koaan jchatʼa je jéená kʼoa so̱koná kjoanda kʼianga koa̱nchjénná (Heb. 4:16). Kuinga machjénsíni nga katamakjainli tʼatsʼe kjoabʼechjíntjaile Jesús. Je Jesús kitsjoaa kjoabijnachonle xi tʼatsi (Gál. 2:20, 21, TNM). Tikjaʼaitsjain nga kui kjoabʼechjíntjai síchjén Niná nga koa̱n jchatʼali je jée xi bijnyi. Je kjoabʼechjíntjai tsjoáli kjoachoya nga koa̱n kuijnai ngantsjai nichxin. Nga kitsjoa je kjoabijnachonle Jesús jngoo kjoatjao xi kitsjoali je Jeobá. Kʼianga jekasíchatʼa je jéená, je Jeobá tsín tikui síkjaʼaitsjen ijngokʼaniná jmeni xi kanʼia (Sal. 103:8-12). Alikui jao kʼoé tokoán nga je Jeobá ñaki síchatʼaná. w17.11 11, 12 párr. 14-17

Kʼianga tosʼa tsakʼéjnatítjon Jesús je Kjoabichile Nainá, kʼoakitsole je Nʼaile nga tsakʼétsʼoale nga kʼoatisʼin jtín katabatio je chjotale josʼin jtín tjío je. Alikui jao tjínná nga je Jeobá kinrʼoé jmeni xi kitso Jesús. Kʼianga faʼaitsjenya je Kjoabiyale Cristo bakoñá nga jtín sʼin tiyoaa xi testigole Jeobá maa. Miyón mani chjota xi xinxin naxinandále kʼoa xi kjaʼaí kjaʼaísʼin tsen yaole batiojtín nga kui nichxin, kʼoa bakó nga makjainle nga je Jeobá kisikasén je Jesús nga kʼienntjainá. Tjín ʼnde jñani tsín ndasʼin be je chjota nga kʼoasʼin batiojtín je chjota xi kjaʼaí kjaʼaísʼin tsen yaole kʼoa xi xinxin tsʼe. Tonga je Jeobá kao Jesús nʼio naskásʼin be. Ñá xi choʼndale Jeobá maa, alikui tomaxkónná nga jtín sʼin tiyoaa. Je Jeobá tongini kʼoakitso nga jtín sʼin koatio naxinandále (Ezeq. 37:15-17; Zac. 8:23). w18.01 14 párr. 7-9

Je “chjota xi bʼénda ndʼia”, xi tsonile je chjotatítjonle chjota judío, tsakʼasjengi je Jesús. Ali tokuijin nga tsín koankjainle nga je Jesús xi Niná kisikasén, kʼoati kuinga nʼio nkjín xi kʼoakitso nga katanikʼien (Luc. 23:18-23). Joxi jékjoánni xi kisikʼien je Jesús. Kʼiatsa kichʼasjengi kʼoa kinikʼien je Jesús, jókoanni nga “la̱jao̱xi̱ngi̱ xi jko̱ tíjna” koanni. Kuiní nga jaʼáyanile. Je Pedro kitso: Je xi “tsakjatʼao yá”, kʼoa xi “Niná kisikjaʼáyajinnile kʼien”. Xijekoanni i kitsole: “Jé ní je la̱jao̱ xi kaʼyataon nga jon xi mano chjomitjen niʼya, tonga ndʼaibindai sʼejna títjon ya xi̱ngi̱le” (Hech. 3:15; 4:5-11, TNM; 1 Ped. 2:5-7). Kʼianga jaʼáyanile je Jesús, tojéní xi koa̱n kʼoasjentjainá nga̱ “tsín xi kjaʼaí xi tjío i̱ sonʼndebi xi male bʼasjentjainá” (Hech. 4:12; Efes. 1:20). w17.12 9, 10 párr. 6-9

Kʼianga kisikʼaxki̱ je Jesús tʼatsʼe kjoañʼai xi nʼio tse, i̱ kitso: “Kʼiaa koa̱ntsen choa̱le ʼndíle chjota ya ngʼajmi. Kʼoa skoe̱ je ʼndíle chjota xi kjoaʼaíjinni yojbi ya ngʼajmi kao tse nganʼio, kʼoa kao tse kjoajeya. Kʼia nga sikasén ánkjele nʼio skíʼndía xjao, kʼoa ánkjele kʼoexkó je xi kitjojin” (Mat. 24:29-31). Je Jesús sikatíoxkó je xi kiskoejin kʼoa koaikao ya ngʼajmi je xi i̱ Sonʼnde tjíosa nga kʼia. Jebi kʼiaa kʼoakoa̱n kʼianga jekoaitsʼia kjoañʼai xi nʼio tse, tonga nga kjesa fitsʼiajin je Armagedón. Kʼianga sʼe̱jna je Armagedón, je Jesús kao xi 144,000 mani, sikjeson je chjotaxá sonʼnde (Apoc. 17:12-14). Kʼianga tokʼoatjínsa kjoaʼaítsjenya je Kjoabiyale Cristo, kʼiaa nga kjesa fikaojin ya ngʼajmi je chjotale xi ya tjínle kjoachoya. w18.01 16 párr. 15

Je Jesús yaa ngʼajmi tíjna kʼoa yaa kʼoéjna ngantsjai nichxin (Rom. 6:9; Apoc. 1:5, 18; Col. 1:18; 1 Ped. 3:18). Kʼoakitsole je chjotatjenngile nga kʼoati ya ngʼajmi koaikatéxomakao (Luc. 22:28-30). Je Pablo kʼoati i̱ kitso: “Cristo jekinikjaʼáyajinnile je xi kʼen. Je xi koan tjonle je xi jekʼen”. Tonga kʼoati kitso nga tjíosa xi kʼoati ya kjoaʼáyanile ya ngʼajmi. Kitso: “Nga jngójngó josʼin bʼakaole, Cristo je xi tjonle koan, skan je xi tsʼe Cristo, kʼia nga kjoaʼaí nga je”. Xi tsonile nga jetíbatéxoma (1 Cor. 15:20, 23). Kʼiaa nga nó 1914 tsakʼétsʼiakaoni nga tsakatéxoma Jesús. Tojo kui nichxin tiyoaa nga jetíbatéxoma je Jesús kʼoa jenʼio chrian tíjna nga kjoetʼa jmeni xi chon sonʼnde. w17.12 10 párr. 11; 11 párr. 14-16

Je Nʼainá Jeobá, xi bakóná kjoamatokon, kʼoati jekisicha kʼa je xi tsjoake, jolani Abrahán, Isaac, Jacob, Moisés kʼoa kao je rey David (Núm. 12:6-8; Mat. 22:31, 32; Hech. 13:22). Je Biblia kʼoatso nga nʼio mele Jeobá nga sikjaʼáyanile je choʼndale (Job 14:14, 15). Kʼianga jekjoaʼáyanile, nʼio tsjoa sa̱tío kon kʼoa alikui tijme chʼin sʼe̱nile. Je Niná kʼoati tsabe josʼin kinikʼien je ʼNdíle xi nʼio tsjoake (Prov. 8:22, 30). Alikuijin koa̱njinná jokji aon koanle je Jeobá (Juan 5:20; 10:17). Alikui jao kʼoé tokoán nga je Jeobá koasenkaoná. Kuinga machjénsíni nga kʼoéyanajmílee jotjín ni̱ma̱ná kʼoa jotjín tokoán. Nʼio tsjoánganʼioná nga be Jeobá je kjoaʼaon xi biyojiaan kʼoa nga sínʼio tokoán (2 Cor. 1:3, 4). w17.07 12, 13 párr. 3-5

Nichxin xi tiyoaa ndʼaibi, miyón mani chjota xi ni̱ma̱le tjíonroajinni nga tjíotsjoá je “tsojmichjí” xi tjínle, jolani je nichxinle, tao̱nle kʼoa kao nganʼiole (Prov. 3:9). Je Jeobá alikui kʼia sichajin jmeni xi tinʼia xi tʼatsʼe kʼoa je kjoatsjoacha xi tibakolee. Jmeni xi kjima nichxin fetʼa xi tiyoaa ndʼaibi, kui bakó nga je Jeobá tísíchikontʼainná kʼoa nga je Cristo tíbándiaale je naxinandále Niná. Xi choʼndale Jeobá maa, yaa tiyojinlee jngo jtín xi tsínkʼia cha̱ngi, xi tsín jme xi koa̱nle kʼoa xi kʼoéjna ngantsjai. Chjí jchatokoán nga i̱ tiyojiaan je naxinandále Jeobá kʼoa kuinóʼyalee jmeni xi tsoná (Zac. 6:15). Kʼiatsa kʼoasʼiaan, jé Jesús koasenkaoná xi Rey kʼoa xi naʼmitítjon sʼin tíjna. Kʼoénelee yaoná nga kʼoainganʼiolee je kjoaʼyaxkón xi kixi. Koaan kʼoéjngoaa tokoán nga je Jeobá xi tsʼe chjotakjoajchán kʼoasjentjainá je nichxin fetʼa xi tiyoaa ndʼaibi kʼoa kao nichxin xi nroaján. w17.10 30 párr. 18, 19

Jeme tjóxin ngayeje jmeni xi je Na̱i kjinentsja, jolani je kjoa polítika kʼoa kao relijión ndiso. Je Ezequiel kao Sofonías tongini kʼoakitso nga tsín tichjí koa̱nnile je tao̱nsine kao tao̱nchxoa (Ezeq. 7:19; Sof. 1:18). Tonga jósʼe̱ tokoán, tsa kuiyálañá nichxin xi tiyoaa ndʼaibi, kʼoa tsa tokui timangíntjenngiaa je kjoanyiná xi tjín sonʼnde. Kʼoajin sa̱tío tokoán jokoa̱nná nga jchaa nga tsínni ñaki tao̱n je xi tsakinyatjoá ninga nʼio kinixá (Prov. 18:11). Je kjoanyiná xi tjín sonʼnde tsín tisʼe̱ni. Kuinga kʼoasʼin si̱chjénsíñá je tsojmi xi tjínná nga kixi kjuintʼalee Niná. Tsa kʼoénelee yaoná nga kʼoainganʼiolee je Chjotaxále Niná, kui xi koasenkaoná nga miyole Jeobá koaan. w17.07 11 párr. 16

Tjínkʼa je chjotale Cristo xi bʼéʼma kʼianga ai jée bajngi, nga̱ tsín mele kjoasoa koatiojin kʼoa tsín mele nga chʼao sa̱tío kon xi ngikʼa (Prov. 28:13). ʼYani xi kʼoasʼín tsínle kjoatsjoacha, síkiʼaon yaole kʼoa kao xi kjaʼaí. Tsakui nichxin likui titsjoánile Jeobá je nganʼiotsjele kʼoa tsín tinda kʼoéjnani je jtín (Efes. 4:30). Je kjoatsjoacha xi ñaki kixi kui xosikao je xi ai jée kabajngi nga kʼoakuitsole je xi chjotajchínga sʼin tjío nga katabinyakao (Sant. 5:14, 15). Je xi ngisa bakoá xi chjotale Cristo maa kui je kjoatsjoacha (1 Cor. 13:13). Kao kui ʼyaniná nga chjotale Cristo maa kʼoa nga je Jeobá tichjenngilee, nga̱ tʼatsʼe tínroani je kjoatsjoacha. Je Pablo kʼoakitso nga tsín jme chjíle tsa tsínle kjoatsjoacha (1 Cor. 13:2). Kuinga tosi tonda koakoñá kjoatsjoacha, kʼoa tsín “toʼén kuinókjoaa”, tosa kao xáná koakoñá (1 Juan 3:18). w17.10 11 párr. 17, 18

Si̱kjaʼaitsjenla jokji kjoanʼiojin tsakakó José nga tsín kisijyo kʼianga kʼoakitsole je chjoónle Potifar nga katabajnakao. Koanjinjinle nga nʼio tse kjoa kuichomani tsa tsín kʼoasʼin jmeni xi tsakʼinle. Tonga tsakakó kjoanʼiojin kʼoa tsín kisijyo (Gén. 39:10, 12). Xi kʼoati tsakakó nga nʼiojin koan je Rahab, jngo chjoón xi ya naxinandá Jericó tsakʼejna. Chjoón jebi jé Jeobá kisinʼiotʼa yaole kʼoa tsakasenkao je chjota xi kicho ya niʼyale nga kisikatíoʼma (Jos. 2:4, 5, 9, 12-16). Kʼianga tsakatiochjoa je chjota saduceo, je pastrole Jesús tsabee jokji kjoanʼiojin tsakakó je Jesús kʼoa kui xi tsakinyakao nga kʼoati kisʼin tsanda je, tosi tonda kitsoyason xi tʼatsʼe Jesús (Hech. 5:17, 18, 27-29). Je José, Rahab, Jesús kʼoa kao pastro ñaki kʼoatsakatío kon nga kui kʼoakisʼin xi ndatjín. Xi tsakinyakao nga nʼiojin koan kuinga je Jeobá kisinʼiotʼa yaole. Ñá kʼoati kjoa bitjatojiaan kʼoa machjénná nga nʼiojin koaan, kuinga tjínneniná nga je Jeobá si̱nʼiotʼaa yaoná (2 Tim. 1:7). w17.09 29 párr. 6-9

Alikui kʼoakoa̱nná si̱kʼantjaiyaa yaoná jokjoaan ngasʼa kʼiatsa totsaan nganʼio si̱chjén. Tjín chjota xi nʼio tsakʼénele yaole nga kisikatío jmeni xi kisʼin. Jméni xi tsakinyakao. Kui je Énle Niná kao nganʼiotsjele (Luc. 11:13; Heb. 4:12). Ñá, kʼoati koasenkaoná je Énle Niná kʼiatsa nyaon nyaon kʼoéxkiaa, tsa si̱kjaʼaitsjenjiaan jmeni xi chotʼayá kʼoa tsa je Jeobá si̱jélee ngantsjai nga katatsjoáná je kjoachjine kao nganʼio nga si̱tjosoán jmeni xi tso je Énle (Jos. 1:8; Sal. 119:97; 1 Tes. 5:17). Je nganʼiotsjele Niná kao je Biblia tsjoánganʼioná kʼianga tongini chotʼayajiaan jmeni xi faʼa ya kjoajtín kʼoa kʼianga mangián (Heb. 10:24, 25). Kʼoati si̱chjén jmeni xi tsjoáná je naxinandále Niná, jolani je rebista, jmeni xi faʼa ya JW Broadcasting, je aplicación JW Library kao pájina xi tíjnaná ya Internet je jw.org (Luc. 12:42). Alikui tokui xi machjén nga nda kuiyoaa ngixko̱n Niná. Kʼoati machjén nga kʼoakoa̱nkjoaan josʼin mele Niná (Col. 3:10). w17.08 21 párr. 16, 17

Je rey David tse kjoa xi tsín kixi tíjna jaʼatojin. Ningalani kʼia kiskoejin je Jeobá nga sʼa xti nga je xi rey koa̱n ya naxinandá Israel, je David 15 nó kiskoya nga tsakatéxomale je ntje̱le (2 Sam. 2:3, 4). Nga kui nichxin, kitokachjingaa nga̱ je rey Saúl koanmele kisikʼien. Kuinga xin ʼnde kikʼejna sakʼoani kʼoa tjín nichxin nga ngijao kikʼejnangi ya ʼndekixí. Nga jeki nichxin, je Saúl kjoajchán kʼienjin. Ninga kʼoalani, je David ngi ñato nó kiskoya nga rey sʼin tsakʼejnale je naxinandá Israel (2 Sam. 5:4, 5). Ánni nga tsejta koanni je David. Kuinga tjínle kjoatsjoacha xi ñaki kjoakixi je Jeobá. Kao kjoatsjoa kiskoyale nichxin nga kjoaʼaxin Jeobá je kjoa xi tífaʼatojin. Xi ijngosani, kisikjaʼaitsjeen josʼin saje tsakasenkao je Jeobá (Sal. 13:6). Alikui jao tjínná nga koanjinle je David nga tsín toxitsjoa nga kiskoya. w17.08 6, 7 párr. 14, 15

Kʼianga jefi nichxin bʼantjaiyaa je én josʼin nokjoa. Kʼoakoan je én hebreo kao én griego, je én xi koanchjén nga kichji je Biblia. Nichxin xi tiyoaa ndʼaibi alikui tikʼoasʼin nokjoani josʼin kinokjoa ngasʼa. Kuinga je chjota xi mele nga koa̱njinle je Énle Niná, machjénnile jngo Biblia xi kui faʼaitʼa je én hebreo kao én griego xi nokjoa ndʼaibi. Tjínkʼa xi kʼoasʼin síkjaʼaitsjen nga ngisa nda koa̱njinle je Biblia kʼiatsa kui skótʼaya je én hebreo kao én griego xi kinokjoa ngasʼa, tonga jebi tsakui nichxin likui josʼin koasenkao. Bʼaiñá kjoanda nga jetsʼato 3,200 én jaʼatoya je Biblia. Jebi, kui xi bakóná nga je Jeobá kui xi mele nga “ngayije ntje̱, kao ngayije én, kao ngayije naxinandá” katabe je Énle (Apoc. 14:6). Ngisaa machriantʼalee je Jeobá nga ʼyaa nga bakó kjoatsjoacha kʼoa nga tsín ʼya xi faʼájin. w17.09 19 párr. 4

Kʼiatsa jngo xíngiaa tsakichonsjejin naxinandále Niná tsín koa̱n nga je nʼio si̱sinlee. Tsakui nichxin ñʼai koa̱nná nga kʼoasʼiaan, tonga ngisaa choa ñʼai koa̱nná kʼiatsa si̱kjaʼaitsjenjiaan nga je Jeobá tichjenngilee kʼoa nga kui tinitjosoán je kjoatéxomale. Kataʼyala choa̱le je rey David. Kʼianga kitjenngike je Saúl kʼoa nga tsakʼetʼale je Simeí, je David alikui yaole kisijtile kʼoa alikui jokisikao (1 Sam. 26:9-11; 2 Sam. 16:5-10). Tonga alikui tongantsjai nga koanle kiskoéxkó yaole. Tobʼelañá, tokjoan kisijtile yaole kʼianga tsín kʼoakisʼin je Nabal jmeni xi kitsole, kʼoa kʼoati tsín kiskoéxkó yaole kʼianga tsakajngijée kao Bat-seba (1 Sam. 25:10-13; 2 Sam. 11:2-4). Jméni xi bakóyaná jokisʼin je David. Xi títjon, nga je xi xá kjinele jinnaxinandále Niná tjínnele sikuinda yaole nga tsín sikʼatone choa̱le josʼin. Kʼoa xi majaoni, alikui ʼya xi koa̱n nga toje kʼoa̱ yaole kʼoa tsa kʼoasʼin sikjaʼaitsjen nga chókjoajinle tojmeni xi sʼe̱jnabasenle (1 Cor. 10:12). w17.09 5, 6 párr. 12, 13