Febrero

Je Jesús koanmake je chjota, kʼoa nkjín mani xi tsabe nga tsakakó kjoatsjoacha kʼoa kinrʼoé nga kitsoyale je Énle Niná. Nga sa nda sa nda chjénngilee je Jesús, ngisaa nda koa̱nná kʼuínyasoán. Nga koa̱njinná jotjío kon je chjota xi ʼmiyasonlee, machjén nga si̱jinlee yaoná josʼin síkjaʼaitsjen, kʼoa kʼoasi̱koaa josʼin mená nga ni̱kaoná ñá (Mat. 7:12). Si̱kjaʼaitsjeen jmeni xi machjénle nga jngó jngó chjota. Alikui tongóson kʼuínlee ngatsʼi je chjota nga kʼuínyalee, kuenta sʼiaan josʼin tjío kʼoa josʼin síkjaʼaitsjen nga jngó jngó. Machjén nga títjonkjoanla chjónangilee kʼianga jchaa xi tʼatsʼe, tonga chósonnile jokʼuínlee (Prov. 20:5). Kʼianga kʼoanʼia ʼyañá ánni nga nʼio machjénnile nga kjuinrʼoé je Énle Niná. Kʼianga jejchaa jebi, kui kʼuínyalee jmeni xi kuinyakao, tojo kisʼin je Jesús (tingósonkoai 1 Cor. 9:19-23). w19.03 20 párr. 2; 22 párr. 8, 9

Je Adán kao Eva alikui jme kjoanda tsakakóle Jeobá tʼatsʼe jmeni xi kitsjoale. Ngatsʼiñá nga koa̱n koakoá nga tsín sasénná jmeni xi kisʼin. Kʼianga mangínsʼenngindá kʼoasʼin bakonilee je Jeobá nga makjainná nga toje xi bakinle kʼoakuitso jmeni xi ndatjín kʼoa jmeni xi chʼaotjín. Kʼoati bakolee nga tsjoachaa kʼoa nga je ninʼiotʼaa. Kʼianga jemangínsʼenngindá, tjínnele nga nyaon nyaon si̱tjosoán je kjoatéxomale Jeobá kʼoa nga tsín to yaoná kjuinñá. Jebi alikui choa ñʼai tíjna, tonga millón mani chjota xi kʼoatjíosʼín nga xki̱ nó. Kʼoati koa̱n kʼoasʼiain tsanda ji. Nga kuitjosonli jebi, machjén nga tosi tonda katamajinli jotjínni xi tʼatsʼe Niná, timiyui je ndsʼee kʼoa kui chja̱kaonajmíni jmeni xi ngisa kjimajinli xi tʼatsʼe Nʼainá xi tíjna ngʼajmi (Heb. 10:24, 25). Kʼoa kʼianga jme xi chjoéjin, tʼintjenngi jotso je kjoafaʼaitsjen xi tsjoá je Biblia kʼoa kao naxinandále Jeobá (Is. 30:21). Tsa kʼoasʼiain, ndasʼin kuijnai (Prov. 16:20). w19.03 7 párr. 17, 18

Je Jeobá nʼio tse xi títsjoáná xi sítaja kjoamakjainná. Tobʼelañá, jme xi ʼmiyaná ya kjoajtínná, xi faʼaitʼa revista kao xi faʼaitʼa je página xi tíjnaná ya Internet. Sakʼoaa kʼoabixoán nga kuikjoan xi machjénná kʼianga jngo kjoanokjoaya faʼa, tsa jngo revista tibʼexkiaa kʼoa tsakui tichotsenlee JW Broadcasting. Tonga jósʼin kʼoailee kjoanda Jeobá tʼatsʼe ngayeje jebi (Col. 3:15, TNM). Jngo koya xi koa̱n sʼiaan kuinga kjitʼa kʼoétsʼoalee nga kʼoailee kjoanda. Ijngosa koya josʼin bʼailee kjoanda Jeobá kuinga tsje nichoaan jñani chotʼayá. Kuinga ntsjaintsjai nitsjeñá kʼoa nisinnilee Ndʼia jña chotʼayá. Kʼoa je ndsʼee xi bʼakaole audio kao video ya jinjtín nʼio nda síkuinda tsojmi xi síchjén. Kʼianga nisinlee Ndʼia jña chotʼayá ngisaa tse male kʼoa ngisaa choa jña sʼendaya. Nga kʼoanʼia ngisaa njengisa je tao̱n xi machjén nga sʼenda kʼoa nga sʼendaya Ndʼia jña chotʼayá ngakjijnda Sonʼnde. w19.02 18 párr. 17, 18

Je Job kisikʼayaa nichxin kʼianga kisikjaʼaitsjenjin ngayeje jmeni xi kisinda je Jeobá (Job 26:7, 8). Tokʼoakoanle kʼianga kisikjaʼaitsjenjin josʼin koannda je Sonʼnde, ngʼajmi, yojbi kʼoa kao je chʼao̱n. Kʼoakitso kʼianga nʼio tochoa be jmeni xi kisinda Niná. Kʼoati nʼio tsabechjí jmeni xi kitsoyale Jeobá, kʼoa kuinga i̱ kitsosíni: “Nʼio tibʼejnatjoa jmeni xi tso” (Job 23:12). Kʼianga tokʼoakoanle jme xi kisinda je Jeobá kʼoa nga nʼio tsabexkón kui xokisikao nga tsjoake koanni kʼoa nga kui kʼoakisʼinni jmeni xi sasénle. Kʼoa kʼoati kui xi tsakasenkao kʼianga kixi koan. Tojo kisʼin Job, kʼoati koa̱n chʼa̱sjeʼaa nichxin nga si̱kjaʼaitsjenjiaan jmeni xi kisinda Jeobá. Nichxin xi tiyoaa ndʼaibi, ngisaa nʼio tse xi ʼyaa tʼatsʼe jmeni xi koannda tikʼoajinni nga tsakʼejna Job. Kʼoa kʼoati kijnaná ngakjijngo je Biblia, je xi basenkaoná nga ndasa ʼyaa je Niná. Kʼianga jchasaa xi tʼatsʼe Niná koasenkaoná nga tosi tonda jchaxkoán. Kʼoa kui xosikaoná nga tsjoacha koaan kʼoa nga si̱tjosonlee kʼoa kixi kjuintʼalee (Job 28:28). w19.02 5 párr. 12

Jokji jetífaʼato nó nkjín chjotaxá xi tjíofitjenngike je naxinandále Niná. Ánni kʼoasʼínni. Tsakui nichxin kʼoatso nga tibitjatoné je kjoatéxoma, tonga kuinga fitjenngikeniná nga je títjon “nikjitjosonlee Niná kaoni tsa chjotasonʼnde” (Hech. 5:29). Sakʼoaa besinná, ndoyá síkatíoʼyaná kʼoa síkiʼaonná. Tonga jé Jeobá basenkaoná nga tsín kʼoanʼiangajaoñá jmeni xi matʼeen, tosaa tojyó biyoaa. Si̱kjaʼaitsjenla nga jan xti hebreo xi ya kinikatíonʼio ya Babilonia, je Hananías, Misael kao Azarías. Kao kjoaxkóntokon tsakjákao je rey kʼoa ngasin nganda kʼoakitsole nga tsín kʼoetsʼoale xkóson xi kisinda kʼoa kitsoyale anni nga tsín kʼoasʼinni. Tjíondaa nga kʼoakoa̱ntʼain jmeni xi tsjoáʼnde je Jeobá (Dan. 3:1, 8-28). Jósʼin koa̱n chjénngilee nga jan xti hebreo kʼianga chotʼayakao kjoamakjainná. Nangitokon katamaa kʼoa kʼoakʼoé tokoán nga je Jeobá sikuindaná (Sal. 118:7). Kʼoa kʼianga ʼya xi jée koanená ngasin nganda chja̱koaa kʼoa koakolee kjoaxkótokon (1 Ped. 3:15). Kʼoa nitsejin kui kʼoasʼiaan jmeni xi tsín tinda sikʼéjnaniná ngixko̱n Nʼainá Jeobá. w19.02 10, 11 párr. 11-13

Je xi koasenkaoná nga nʼiojin koaan kuinga si̱kjaʼaitsjenjiaan je kjoachoya xi tjínná xi totʼatsʼe nga kitsjoa kjoabijnachonle je Jesús (Juan 3:16; Efes. 1:7). Je xomana tongini nga kjoaʼaítsjenya je Kjoabiyale Cristo, koaan si̱kjaʼaitsjenjiaan jmeni xi kisʼin je Jesús xi tʼatsaan. Nga kui nichxin, kʼoéxkiaa je Biblia jñani bʼakaole nga koa̱nxkia kʼoa si̱kjaʼaitsjenjiaan jmeni xi koan nga kinikʼien je Jesús. Tsa kʼoasʼiaan, nichxin nga kjoaʼaítsjenya je Kjoabiyale, ngisajin nda koa̱njinná josʼin tsoyanile je nioxtila kao vino, kʼoa jokji chjíle nga kitsjoa kjoabijnachonle xi totʼatsaan. Kʼianga ʼyachjiá jmeni xi kisʼin je Jeobá kao Jesús xi tʼatsaan kʼoa nga majinná je kjoanda xi so̱koná ñá kʼoa kao xíngiaa, ngisaa tisʼengániná je kjoachoya kʼoa sʼená je kjoanʼiojin xi koasenkaoná nga chókjoaná saʼnda nga kjoetʼa jme xi chon sonʼnde (Heb. 12:3). Bʼaiñá kjoanda nga tosi tonda tíbasenkaoná je Jesús nga Naʼmitítjon sʼin tíjna ya ngʼajmi (Heb. 7:24, 25). Nga koakoá kʼianga chjí ʼyatokoán, si̱kjaʼaitsjenyañá kjoabiyale, tojo sʼin tsakʼéne (Luc. 22:19, 20). w19.01 22 párr. 8; 23, 24 párr. 10, 11

Jé Jeobá xi kui kjoanda tsjoáná kʼianga chʼasjengʼaa. Kʼianga bʼé je énná yaa tíjnajin je “kjoatjao” xi nʼio chjíle xi koa̱n kʼoailee je Jeobá, alikui koa̱n nga kjaʼaí xi tsjoángajao je kjoatjao jebi (Heb. 13:15). Tonga, ali tsakuijin xi tsonile nga tongóson sʼin kʼoee énná. Je kjoajtínná yaa mangóson joma kʼianga bichijtían kao je miyoná. Tsa jngo ndsʼee kʼoakuitsoná nga yaojá kjuinkichikoaa ya ndʼiale, kʼoa kʼoakuitsoná nga tjín xi chʼaa, nʼiojin nda chósonnilee jmeni xi chʼaa kʼoa kʼoajin tikuenta sʼiaan nga nda katachjinele ngatsʼi. Kʼoatisʼinni, nga satíoná kjoajtín, je Jeobá nkjín koya je tsojmi xi nʼio nda tsjoáná (Sal. 23:5; Mat. 24:45). Je Niná kui xi mele nga kui kʼoailee je xi nda, kuinga machjénni nga nda kuiyondalee je kjoajtínná kʼoa nga kʼoee je énná. Tsa kʼoasʼiaan, ali tsa toñájin xi koasenkaoná, kʼoati kuinyakao xi ngikʼa. w19.01 8 párr. 3; 13 párr. 20

Nichxin kjoatse kisichajngi je chjota kʼianga tsakʼétsʼoale je niná ndiso (Os. 4:13, 14). Nkjín xi niná ndiso tsakʼétsʼoale nga̱ tokui xi koanmele nga kisichajngi. Tonga tsínni tsjoa kisatio kon nga kʼoakisʼin. Tojo kitso je David nga “tse kjoaʼaon batiojin” je xi niná ndiso bʼétsʼoale. Nga kui nichxin, je chjota saʼnda tsakakále je ʼndíxtile je niná ndiso (Is. 57:5). Je Jeobá alikui kisasenle nga kʼoakisʼin je chjota (Jer. 7:31). Nichxin xi tiyoaa ndʼaibi, je religión ndiso kʼoati tsjoáʼnde nga síchajngi je chjota kʼoa nga tixʼin kʼoa tsa tiyánchjín xínkjín fayokaoni. Tonga tojo koan nichxin kjoatse, alikui nda bichómani nga kʼoasʼín (1 Cor. 6:18, 19). Je chjota kʼoasʼin síkjaʼaitsjen nga tjínle kjoandái, tonga tseni kjoaʼaon batiojin. Tsakui nichxin ʼyai nga kʼoachon. Kuinga machjénsíni nga kuinóʼyalai je Jeobá. Ali jaojin sʼeli nga kjoanda tsini tsa si̱tjosonlai. Nʼio tse kjoa bichómani nga kui kʼoanʼia je xi chʼaotjín (Gál. 6:8). w18.12 27, 28 párr. 16-18

Tsa jngo chjotale Cristo sichajngi, tsa je chjoón kʼoa tsa je xʼin xi tsín jme jée kasʼele, jé xi kuitsoni tsa tsjión xínkjín kʼoa tsa mai. Je Jesús kʼoakitso nga tiʼndele tsjión xínkjín kʼoa nga koa̱n kuixan ijngokʼani (Mat. 19:9). Tonga kʼoati koa̱n nga sichatʼale xínkjín. Je Biblia kʼoatso nga je Oseas kikao ijngokʼani je Gómer ya ndʼiale. Alikuiti kjaʼaí chjota tsakajnakaoni je Gómer. Kʼoa je Oseas alikui tokjoan tsakajnakao ijngokʼa (Os. 3:1-3). Tonga kʼoajin kisʼin nga jeki nichxin. Jebi kui kitsoyanile nga kisichatʼale Jeobá je naxinandále kʼoa nga nda tsakatio ijngokʼani ngixko̱n (Os. 1:11; 3:4, 5). Jebi kui bakóyaná tsa jngo xi kasíchajngitʼale je chjoónle kʼoa tsa xʼinle, tonga koa̱nmele tosi tonda koatiokao xínkjín kʼoa kjoáyokao ijngokʼa xínkjín, kui xi tsonile nga jekasíchatʼale xínkjín (1 Cor. 7:3, 5). Kʼoa jetsín tiʼndele nga tsjión xínkjín. Kʼianga jekʼoasʼin koatiokao ijngokʼa xínkjín tjínnele kʼoasʼin skoe̱kon je kjoabixanle josʼin bekon je Jeobá. w18.12 13 párr. 13

Kʼianga chotʼayá, machjén nga si̱kjaʼaitsjenjiaan jósʼin koasenkaoná je kjoafaʼaitsjenle Niná kʼiatsa jngo kjoa kuitjátojiaan nichxin xi nroaján. Tsa kʼoasʼiaan, koasenkaoná nga kui chjoéjiaan jmeni xi sasénle Niná. Kʼianga je chjoónle Potifar kʼoakitsole je José nga katabajnakao, kjitʼanangi kitoka je José. Kʼoasʼin tsakakóni nga tongini kisikjaʼaitsjenjin josʼin síkjaʼaitsjen je Jeobá xi tʼatsʼe kjoabixan (Gén. 39:8, 9). Je José i kitsole je chjoónle Potifar: “Ánni nga kui kʼoasʼinsíña je xi nʼio chʼaotjín kʼoa nga jée koanjngisíña ngixko̱n Niná”. Jebi kui bakó nga je José kʼoasʼin kisikjaʼaitsjen joni je Jeobá. Kʼoa ñá, jósʼiaan tsa je xi ñatjen nixá si sikaoná, tsa jngo mensaje kʼoa tsa jngo foto xi kjoachajngi ska̱niya je jkoaa kjoaʼaíná. Ngisaa choa ñʼai koa̱nná nga kixi kjuintʼalee je Jeobá tsa tongini si̱kjaʼaitsjenjiaan josʼin bekon kjoa jebi, tsa jekʼoasʼin nikjaʼaitsjeen joni je, kʼoa tsa tongini ni̱kjaʼaitsjenjiaan josʼiaan tsakui kjoa kuitjátojiaan. w18.11 25 párr. 13, 14

Tjínkʼa je chjotachjine xi kʼoatso nga nʼio tsjoa kisʼe kon je Habacuc xi tʼatsʼe Ninále. Nʼio basenkaoná je choa̱le Habacuc. Je Jeobá ali tokui kʼoatsoná jmeni xi sʼin, kʼoatsoná nga jetjínndajinle josʼin sitjoson jmeni xi tso. Alikui jao tjínná nga nʼio chjíle jmeni xi tso je librole Habacuc, nga̱ jé Jeobá tjínnele si̱nʼiotʼaa (Hab. 2:4). Nga tosi tonda je Jeobá si̱nʼiotʼaa, machjén nga ngisasa si̱miyoaa. Kʼoa jan koya tjínni xi koasenkaoná. Xi títjon, kʼoétsʼoalee ngantsjai kʼoa kʼoéyanajmílee jmeni xi makjáojinná. Xi majaoni, si̱tjosoán jmeni xi tso je Biblia kʼoa kjuintjenngiaa josʼin bándiaaná je naxinandále. Kʼoa xi majanni, katasʼená kjoatsejta kao kjoamakjain nga je Jeobá koasenkaoná. Kʼoakisʼin je Habacuc. Ninga kʼoatso jña fitsʼiani je librole nga nʼio aon kisʼe kon, tonga nga síkjetʼani kʼoatso nga nʼio tsjoa tjín kon kʼoa nga je Niná sínʼiotʼa. Tsa kjuintjenngiaa je choa̱le kʼoati jchaa josʼin basenkaoná je Jeobá. Kui xi sinʼio tokoán ndʼaibi nga̱ nʼio chʼao chon sonʼnde. w18.11 17 párr. 18, 19

Jngo koya tjínni anni nga kʼoéjngosíñá tokoán nga tsjoakená je Jeobá. Ya Juan 3:16 itso: “Niná kʼoasʼin koantsjoake sonʼnde nga kitsjoa je xi tojngo ʼndíle, jméni nga ngatsʼisíni xi makjainle tʼatsʼe, likui cha̱, tonga tjínle kjoabijnachon ngantsjai”. Je Jesús nʼio tse kjoatsjoacha tsakakóná nga kitsjoa kjoabijnachonle xi tʼatsaan. Je Énle Niná kʼoatso nga nijejinla kjoañʼai koa̱nle kjoaʼaxinná je “kjoatjaochale Cristo” (Rom. 8:35, 38, 39). Kʼianga nikjaʼaitsjenjiaan jokji tsjoakená Cristo tsjoánganʼioná nga chókjoajinná nga kui kjoa bitjatojiaan xi síkijtajinná, xi tsín nda bʼé tokoán kʼoa tsa xi síkinroajen kjoamakjainná (2 Cor. 5:14). Je kjoatsjoacha jebi kʼoati tsjoánganʼioná nga tsín nikʼajenlee tokoán kʼianga kjoaxkón sʼe, nga fitjenngikená chjota kʼoa tsa kʼiaje̱ nga ba sʼe tokoán. w18.09 14 párr. 8, 9

Kʼianga kʼoasʼin kjuinkoaa yaoná jotjínni xi kjoakixi machjén nga si̱tjosoán ngayeje jmeni xi bakóyaná je Jeobá. Tjínnele nga kui títjon si̱kʼéjnaa je Énle Niná kʼoa kʼoaiʼndee nga kui katabándiaaná. Joni je rey David, machjén nga kʼoakʼoé tokoán nga kʼoasʼin kjuinkoaa yaoná jotsoná je Jeobá. Tsa jao tjín tokoán, tsakui nichxin kui si̱metokon ijngokʼá jmeni xi jekinikatioá kʼianga kichotʼayá je Énle Niná. Tonga tsín koa̱n kʼoasʼiaan. ʼYañá nga tsín koa̱n ñá chjoéjiaan jmeni xi si̱tjosoán kʼoa jmeni xi mai, nga̱ majinná nga tjínnele kʼoasʼin kjuinkoaa yaoná jotjínni “ngayije xi ñaki kjoakixi” (Juan 16:13). Nga tsín koa̱nkjinlee je Énle Niná, tjínnele nga nda si̱chjén je nichxinná. Tsa tsín chósonnilee josʼiaan, tochajinle ngisa tse nichxin si̱kʼayalee je kjoasʼetsaojin, je Internet, je televisión kʼoa tsa jmesani xi nʼio tsjoachaa xi nʼia. Ningalani tsín chʼaotjín nga bʼetsaojiaan, tonga tsakui ngisa si̱kʼayalee je nichxinná, tsínjin tichótʼayañá nga toñá je Biblia kʼoa tsínjin tikʼoakoa̱nniná nga kʼoasʼiaan je xále Niná. w18.11 10 párr. 7, 8

Kʼianga toxijña bʼantjaiya josʼin tiyoaa, ba satío tokoán kʼoa nikjáojinñá (Prov. 12:25). Tsakui nichxin tsín choa ñʼai koa̱nná nga jekjaʼaísʼin kuiyoaa. Jméni xi koasenkaoná nga nyʼán sa̱tío tokoán kʼoa nga tsín nʼio si̱kjáojiaan (Sal. 131:1-3). Ninga kjoa bitjatojiaan nichxin xi tiyoaa ndʼaibi, je “kjoanyʼántakonle Niná” síkuinda je kjoafaʼaitsjenná (Filip. 4:6, 7). Kuinga je Jeobá si̱jénilee nganʼio kʼianga ba sʼe̱ tokoán. Je kjoanyʼánle Niná kui xi koasenkaoná nga tosi tonda nda si̱xálee kʼoa koasenkaoná nga tsín si̱kʼajenlee tokoán. Je nganʼiotsjele Niná kʼoati koasenkaoná nga kjoaʼaítsjenná jmé textoni xi koasenkaoná nga kui títjon si̱katioá xi tsʼe Niná (Juan 14:26, 27). w18.10 27 párr. 2; 28 párr. 5, 8

Jméni xi ngisa xkón tjíosíkatío je chjota. Kui je énndiso. Je énndiso kui jmeni xi bixoán xi tsínni kʼoatjín tojoni nga chʼanachaa. Jé Na̱i xi títjon tsakʼéndiso, je xi “nʼaile kjoandiso” kitsole je Jesucristo (Juan 8:44). Kʼiáni tsakʼéndiso títjon. Jejmi nó tjínle nga kʼoakisʼin ya ʼNdenaxóle Edén. Je Adán kao Eva nʼio tsjoa kisatio kon nga ya tsakatio ya ʼndenaxó xi kitsjoale Niná. Tonga je Niná kʼoakitsole nga tsín koa̱n ski̱ne “je tole yá xi tsʼe kjoankjíntokon xi ndatjín kao xi chʼaotjín”. Kʼoatsakʼinle nga kuiyá tsa tsín sitjoson kjoatéxoma jebi. Ningalani be jebi je Na̱i, kʼiaa tsakʼéndiso títjon nga jngo ye̱ kisichjén kʼianga i̱ kitsole je Eva: “Likui kuiyáo”. Kʼoa i kitsosale: “Je Niná bení kʼianga je nichxin nga kui chi̱nao tjóxʼángi xkon kʼoa koa̱nngósonño kao Niná, nga jchao xi ndatjín kao xi chʼaotjín” (Gén. 2:15-17; 3:1-5). w18.10 6 párr. 1, 2

Kʼianga tsje sʼe̱ je ni̱ma̱ná, tjínnele tsje kʼoé je kjoafaʼaitsjenná kʼoa tsínkui xi chʼaotjín si̱metokoán. Nʼio chjíle jebi, nga̱ tokʼoasʼin nga sa̱sénle je Jeobá kʼianga jchaxkoán (2 Cor. 4:2; 1 Tim. 1:5). Je Biblia kʼoatso nga nijngojin chjota xi koa̱n skoe̱ je Niná (Éx. 33:20). Tonga ánni kʼoakitsoni je Jesús nga skoe̱ Niná je chjota xi tsje tjío ni̱ma̱le. Je én xi “skoe̱” sʼin faʼatoya kʼianga én griego, kui tsoyanile nga “nikjaʼaitsjeen, nga majinná kʼoa nga ʼyaa”. Je chjota xi be Niná jéní xi nʼio nda tjíobe xi tʼatsʼe kʼoa xi chjí bekon jokjoan je Niná (Efes. 1:18). Kʼianga ʼyaa jokjoan Niná kʼoasʼin ʼyaxkonñá, tonga jósasʼin koa̱n jchaa je Niná. Kʼiaa nga kuenta sʼiaan josʼin basenkaoná (Job 42:5). Kʼoati koa̱n jchañá je Niná kʼianga kuenta sʼiaan je kjoanichikontʼain xi tsjoále je xi tsje sʼin fikao yaole kʼoa xi kixi fitʼale. w18.09 20 párr. 13, 15, 16

Tsakui kʼoatinʼia jmeni xi ndatjín tsee kjoanichikontʼain so̱koná. Ningalani je kjoachjine ya nroani je kjoankjíntokon, jmeni xi bakó nga chjine maa kui jmeni xi chjoejiaan, ali tsakuijin jokji kjoankjíntokon tjínná. Je Biblia kʼoatso nga saʼnda je niʼyo nʼio chjine nga̱ tongini batíonda jmeni xi kjine (Prov. 30:24, 25). Je Jesús tsakakó je kjoachjinele Niná kʼoa kui kʼoakisʼin ngantsjai jmeni xi sasénle je Nʼaile (1 Cor. 1:24; Juan 8:29). Je Jeobá síchikontʼain ʼyani xi bakó kjoanangitokon kao kjoaka, kʼoa xi kui kʼoasʼín je xi ndatjín (Mateo 7:21-23). Kuinga machjénni nga kʼoainganʼioá ya jinjtín nga kao kjoanangitokon si̱xálee je Jeobá. Nichxin tjenkao nga kui kʼoanʼia je xi ndatjín kʼoa machjén nga tsejta koaan. Tonga tsa kʼoasʼiaan, koakoñá nga tjínná kjoanangitokon kʼoa ndasʼin kuiyoaa ngantsjai nichxin. w18.09 7 párr. 18

Kʼianga kisindaná je Jeobá, kui xi koanmele nga ya si̱xákoaa kʼianga kuitjoson jmeni xi tjínndajinle. Ningalani chjotajée maa, koaan si̱xákoaa je Niná nga nyaon nyaon. Tobʼelañá je Biblia kʼoatso nga tojngo nixákoaa je Niná kʼianga ʼmiyasoán kʼoa kʼianga chjotale Cristo nikoaa je chjota (1 Cor. 3:5-9). Nʼio tse kjoanda tjínná nga je nixákoaa Niná xi nʼio tse nganʼio tjínle, xi kisinda ngayeje jmeni xi tjín ya ngʼajmi kao i̱ Sonʼnde. Nkjín koya josʼin koa̱n si̱xákoaa je Jeobá. Tobʼelañá, kʼianga binyakoaa je familianá kʼoa kao je ndsʼee, kʼianga chjoeyaa je xíngiaa, kʼianga bʼainganʼioá josʼin kjimaxá jinnaxinandále kʼoa nga ngisasa nda nixálee (Col. 3:23). Alikui koa̱n je xíngiaa si̱ngósonkoaa yaoná josʼin tjíosíxále Niná kʼoa jotinʼia ñá, nga̱ tsín tongóson kji bichó je nganʼioná nga jngó jngoá. Tobʼelañá, tjínkʼa ndsʼee xi jetjínle nó, tjínkʼa xi chʼin bʼetʼale, kjaʼaí kjaʼaí kjoa tjínná kʼoa kjaʼaí kjaʼaí xá xi nʼia. w18.08 23 párr. 1, 2

Je Jeobá kisinʼiojin kon je Habacuc kʼoa kao kjoatsjoacha kitsoyale jmeni xi kiskonangi. Alikui nʼio tse nga kjoañʼai kjoaʼa, joxi ini kitsole je Habacuc: “Katasʼeli kjoatsejta kʼoa tinʼiotʼanái. Ninga kʼoasʼin matsen nga tisikʼachxian, sitjosonña jmeni xi tixinle”. Je Jeobá kʼoakitsole je Habacuc nga jetíjna nichxin nga sitjoson je énle kʼoa kʼoakitsole nga katakoyala. Je Habacuc skoee nga kʼoasʼin je Jeobá. Kʼiatsa kao kjoatsejta chóyaa nga je Jeobá koasenkaoná kʼoa kuinóʼya jmeni xi tsoná, sʼeená kjoanʼiotʼa kʼoa nyʼán sʼe̱ tokoán ninga kjoa kuitjátojiaan. Je Jesús kʼoakitso nga tsínkui nʼio si̱kjaʼaitsjenjiaan jmé nichxinni sitjoson je Jeobá jmeni xi tso (Hech. 1:7). Alikui jao kʼoé tokoán nga be je Jeobá kʼiáni sitjoson. Kuinga tsín si̱kinroajenñá tokoán kʼoa tosi tonda nangitokon katamaa, katasʼená kjoamakjain kʼoa tsejta katamaa. Nga kjesa faʼaijin je nichxinle Jeobá, kʼoénelee yaoná jokji tjen kuicho nganʼioná nga si̱xálee (Mar. 13:35-37; Gál. 6:9). w18.11 16 párr. 13, 14

Nga chjota judío kitjenni je Pedro, kʼoasʼin kisakoyale saʼnda nga sʼa koanjchínga nga jndí je chjota xi xin tsʼe. Je xi tsakasenkao nga kisikʼantjaiya je kjoafaʼaitsjenle kuinga jngo sén tsakakóle je Niná (Hech. 10:9-16). Sén jebi kui bakóyaná nga tjínnele nangitokon koaan kʼoa kʼoaiʼndee nga katabinyakaoná xi kjaʼaí kʼianga jchaa tsa tojo chʼasjengiñá je chjota ya jinni̱ma̱ná. Jmésani xi koa̱n sʼiaan. Tsa ni̱ma̱ná kjuinroajinni nga tsjoacha koaan xíngiaa, alikuijin ʼya xi chʼa̱sjengiaa (2 Cor. 6:11-13). A kʼoasʼin nganá nga toje ngisa kuenta nʼia je xi kʼoati kui én nchja̱ xi nokjoaa ñá, xi kʼoatisʼin tsen yaole joni ñá kʼoa xi tiyani ʼndele jñani tsaan. Tsa kʼoasʼin nganá, machjén nga kʼoati si̱miyoaa je xi kjaʼaí. Tobʼelañá, koaan ñatjen kʼuínyasoán kʼoa tsa maije̱ kuinókjoalee ya niʼyaná nga ñatjen kuichaa (Hech. 16:14, 15). Tsa kʼoasʼiaan, yajin ni̱ma̱ná kjuinroajinni nga tsjoacha koaan je ndsʼee kʼoa tsínjin tiʼya xi chʼa̱sjengiñá. w18.08 9 párr. 3, 6; 10 párr. 7

Tjínkʼa je testigole Jeobá xi tojo kui kʼoasʼín jmeni xi sʼín je chjota xi tjín sonʼnde. Tobʼelañá, kʼiatsa jme sʼuí fi alikui kixi tíjna josʼín nga te kʼoa tokjaʼaíngá sʼín. Tsakui nichxin likuikjoan kʼoasʼin kuichákjáyale ya jinjtín jonikao jngo xi ai jée bajngi, tonga alikui nda choa̱ batíole je xi tjíobʼénele yaole nga kui xi ndatjín kʼoatjíosʼín (1 Ped. 2:11, 12). Kui satíobasenná ngantsjai “je kjoachi̱nga̱ xi tjínle yaoná, kao kjoachi̱nga̱ xi tjínle xkoaan, kao kjoangʼatakon xi tsʼe je kjoabijnachonná” (1 Juan 2:16). Tonga ñá, jé Jeobá jetsakʼaitʼalee yaoná, kuinga kʼoatsoniná nga chja̱ʼaxinlee yaoná “kjoa xi tsín bexkón Niná” kao “kjoachi̱nga̱le sonʼnde”, ánni “nga nda kjuinkaosínía yaoná, jméni nga chjotakjoakixi koa̱nsínía”, kʼoa jchaxkoán Niná (Tito 2:12). Ngayeje jmeni xi nʼia tjínnele koako nga choʼndale Niná maa, jolani je én xi nokjoaa, jonʼia kʼianga bichaa kʼoa nga ʼyoá, jokjoan najño xi chʼakjá, josoyoaa kʼoa kao jonʼia nga nixá, ngayeje jebi tjínnele koako nga je Jeobá jetsakʼaitʼalee yaoná. w18.07 25 párr. 13, 14

Tsa je Jeobá tichotsenlee, xi tsonile, tsa je kuenta nʼia, alikuijin kʼoaiʼndee nga kui sikaténginá jmeni xi sʼín xi kjaʼaí kʼoa tsa tokui xosikaoná nga kui kʼoasʼianñá jmeni xi tsín sasénle je Jeobá. Je xi ngisa kuenta sʼin jebi jé xi xá kjinele ya jinnaxinandále Niná. Kʼoa nga jngó jngoá tjínnele si̱tjosonlee je Jeobá kʼianga koa̱n kuitjo̱ntjé (Filip. 2:12). Ngisasa tse xi síjéná Niná kʼianga ngisasa tse xá sʼená jinnaxinandále (Luc. 12:48). Kʼiatsa tsjoacha kjoaixiaa je Niná, alijme xi sikaténginá kʼoa alijme xi kjoaʼaxinná je kjoatsjoachale (Sal. 119:165; Rom. 8:37-39). Nichxin xi tiyoaa ndʼaibi nʼio ñʼai kjimachon, kuinga machjénsíni nga je Jeobá chótsenlee, xi tsonile, nga je kuenta sʼiaan ánni nga jchasíñá jmeni xi mele (Sal. 123:1). Alikʼia kʼoaiʼndee nga totʼatsʼe jmeni xi sʼín xi kjaʼaí si̱chañá je kjoamiyo xi tjínná kao Jeobá. w18.07 16 párr. 19, 20

Je choʼndale Niná nʼio tjíosíxá jngo tjíjtsa Sonʼnde, kʼoa jebi tsjoa batío tokoán. Je nó 2017, tsʼato te millón koanni chjota xi tsakʼinyale Biblia. Xi ijngosani, millón koanni chjota xi tsakatiojtín nga jaʼaitsjenya je Kjoabiyale Cristo kʼoa koanjinle jokji kjoatsjoacha tsakakóná Niná nga kisikasén je ʼNdíle nga tsakʼéchjíntjainá (1 Juan 4:9). Kjaʼaí kjaʼaí én male je xi tjíojin naxinandále Jeobá. Kʼoa jebi alikui bʼéchjoaná nga chʼasjengʼaa je Nʼainá xi tíjna ngʼajmi (Apoc. 7:9). Ninga kjaʼaí kjaʼaí én nokjoaa kʼoa ninga xinxin ʼndená koaan si̱ʼiseen “i̱ sonʼndebi joni tsa lʼí”, xi tsonile, koaan nga nda choa̱ koakoá (Filip. 2:15). Kʼianga ʼyaa nga kjimankjínyaa, nga jtín sʼin tiyoaa kʼoa nga bakoá nga tjenyatokon tiyoaa, jé Jeobá bitjojeya kʼoa kui xosíkao je chjota nga kʼoati kotʼayani. w18.06 21 párr. 1-3

Je Jesús ngisaa kui koanndosinle nga kitsoyale je chjoón samaritana tikʼoajinni nga koakjen. Je xi niole koan kuinga kʼoakisʼin josʼin mele Nʼaile kʼoa nga kitsoyason (Juan 4:32-34). Je Santiago kao Juan alikui koanjinle jmeni xi kisʼin Jesús. Kʼianga jaʼa ya Samaria tsakásjaiʼnde jña koationi, tonga je chjota samaritano alikui kitsjoaʼndele. Kʼoa je Santiago kao Juan kʼoakitsole Jesús nga katasíjé nga lʼí katanroajenni ngʼajmi kʼoa katasíkjeson je ʼnde xi ya tíjna. Tonga je Jesús tsakatekjáyale (Luc. 9:51-56). A kʼoasikji koanjtile tsa yalani Galilea, jñani tsʼe Santiago kao Juan, jñani tsín kitjoʼndele. Maijin, kuijin kʼoakitsoni nga tsakʼasjengi chjota samaritano. Nga koanskanni, je pastro Juan kitsoyasonle chjota samaritano kʼoa nʼio nkjín xi kinrʼoéle. Tochajinle soa koanle nga jaʼaitsjenle jme xi kitso nga títjon (Hech. 8:14, 25). w18.06 10, 11 párr. 12, 13

Kʼianga ñaki nda tjíkjáná je xjoa̱xínkjándianá “xi ngoyale xi ñaki kʼoatjín”, kʼoasʼin mangínkoaa yaoná jotso je Énle Niná kʼoa kui kʼoabixoán ngantsjai je xi kixi. Ánni nga tsín kixi tíjnasíni tsa kʼoéndisoaa. Kuinga kui énndiso síchjén je Na̱i kʼianga bʼanachale je chjota. Je xi bʼéndiso tijé síkiʼaonni yaole kʼoa kʼoati síkiʼaon je xi kjaʼaí (Juan 8:44). Ningalani chjotajée maa, bʼenelee yaoná nga tsín énndiso nokjoaa (Efes. 4:25). Tsakui nichxin sakʼoa ñʼai koa̱nná nga én kixi kuinókjoaa ngantsjai. Jngo tsoti xi Abigail ʼmi, xi 18 nóle, itso: “Sakʼoaa kʼoasʼin nikjaʼaitsjeen nga tsín machjén nga énkixi kuinókjoaa, ngisaa kʼianga kjenndiaaná nga bʼendisoaa”. Kʼoa ijngo tsoti xi 23 nóle, xi Victoria ʼmi, itso: “Kʼianga bʼeyanajmiá kʼoa nitoánntjé je kjoamakjainná, sakʼoaa to ʼyasinná. Tonga nga kʼoanʼia, ngisaa nda sʼe tokoán, ngisaa machriantʼalee je Jeobá kʼoa bexkónná je chjota”. Jon xi sʼa xtio, nʼio chjíle nga ñaki “nda tʼekjáo xjoa̱xínkjándiano”, xi jngoyale én xi ñaki kʼoatjín. w18.05 28 párr. 3, 5

Nga sa chʼao sa chʼao kjimachon je nichxin xi tiyoaa ndʼaibi, nʼio machjén nga tjenyatokon kuiyoaa. Alikui jao tjínná nga je Jeobá jetíjnachoa̱le je nichxinle (Mat. 24:42-44). Nga kjesa faʼaijin nichxin jebi, machjén nga tsejta koaan kʼoa nga tjenyatokon kuiyoaa ngantsjai. Nyaon nyaon kʼoéxkiaa je Énle Niná kʼoa ntsjaintsjai kʼoétsʼoaa (1 Ped. 4:7). Kuenta sʼiaan je choa̱le ndsʼee xi tjenyatokon tjío kʼoa xi tosi tonda tjíosíxále Niná. Tosi tonda je Jeobá si̱xálee, kui kʼoasʼiaan xi ndatjín tʼatsʼe xi kjaʼaí kʼoa si̱kʼayalee nichxin je ndsʼee. Tsa kʼoasʼiaan, tsjoa sa̱tío tokoán kʼoa ngotjo koaini nichxin (Efes. 5:16). Ninga chjotajée maa, je Jeobá títsjoáʼndená nga tinixálee. Kʼoa nga tjenyatokon kuiyoaa, títsjoáná je “kjoatjao”, xi tsonile, je xi chjotajchínga sʼin tjío (Efes. 4:11, 12). Kʼianga kuichosíxʼatʼaná xi ngindia je xi chjotajchínga sʼin tjío, kjuintjenngiaa je kjoafaʼaitsjen xi tsjoáná. w18.06 24, 25 párr. 15-18

Je Jesús ali tsa tokuijin xi kitsole je chjotatjenngile nga tsjoake katama, kʼoakitsole nga tjínnele koakole kjoatsjoacha ngantsjai. Ánni. Kuinga kjoaka machjén kʼianga chjotale Cristo maa. Kui kjoaka kisikʼaxki̱ je Jesús kʼianga nkjín kʼa kisichjén je én xi kuiyokaonáo tso, tojosʼin faʼaitʼa ya Juan 15:4-10. Kʼiatsa mená nga sʼe̱ná ngantsjai je kjoatsjoachale Cristo kʼoa mená ndasʼin kuiyoaa ngixko̱n, tjínnele si̱tjosonlee. Kʼoakitso nga kʼoati sʼiaan jokisʼin je, kitso: “Joni an nga kisitjosoan je kjoatéxomale Nʼaina, kʼoa tjínna je kjoatsjoachale”. Nʼio nda choa̱ tsakʼéjnaná je Jesús (Juan 13:15). Je kjoatéxoma xi kitsjoa je Jesús tʼatsʼe Nʼaile kinroani. Kʼianga nitjosoán je kjoatéxoma xi kitsjoa je Jesús nga kʼoakitso nga tjínnele koakoyasoán bakoñá nga tsjoachaa je Niná (Mat. 17:5; Juan 8:28). Kʼianga bakolee kjoatsjoacha, kʼoati tsjoake maná je Jeobá kao Jesús. w18.05 18 párr. 5-7

Kʼianga sʼa xti tjínnele chjoéjin jméni xi chótʼayai, jmé xá xi sʼiain kʼoa tsa jmesani. Kʼiatsa ʼyai jmeni xi meli sʼiain, ngisaa choa ñʼai koa̱nli nga kuichotjenngi. Kʼianga ndi̱to̱n kʼoéndajin jmeni xi meli kuichotjenngi, ngisaa ndasʼin kuichotsjoá. Ya jtín xi tjío jngo tjíjtsa Sonʼnde, jmi mani je xti xi je Jeobá tjíosíxále. Je xti jebi kʼoaʼmilee nga nʼio nda tjíosʼín nga je Jeobá tjíosíxále. Kʼoa tsjoa tjíole nga kʼoatjíosʼín. Tjíotsjoáʼnde nga je Jeobá tjíobándiaale. Je rey Salomón kʼoakitso nga ñaki kao ni̱ma̱ná si̱nʼiotʼañá je Jeobá. I kitsosa: “Kuenta tʼiain tojmeni xi sʼiain, kʼoa jé sikixiya je ndiaali” (Prov. 3:5, 6). Je Jeobá nʼio bechjí je xti xi chjotale Cristo ma. Tsjoakee, síkuindaa, bándiaale kʼoa síchikontʼain. w18.04 26 párr. 7; 27 párr. 9

Je xi kʼoati xjáoja̱ma̱le koan ya jtínle Cristo kʼianga siglo 1 jé pastro Juan. Jmeni xi tsakʼétʼaxo̱n tʼatsʼe josʼin kitsoyason je Jesús, nʼio tjíosínʼio kon je chjotale Cristo jokji nga tífaʼa nó, kʼoati tíbinyakaoná nichxin xi tiyoaa ndʼaibi. Tobʼelañá, toyaa je Evangelio xi tsʼe Juan jñani faʼaitʼa nga kʼoakitso je Jesús nga kui kjoatsjoacha koako je xi ñaki chjotale Cristo ma (Juan 13:35). Nʼio basenkaoná nga jan carta xi kiski. Tobʼelañá, kʼianga tokui nʼio nikjaʼaitsjeen jmeni xi chʼao nʼia, nʼio tsjoánganʼioná kʼianga bʼexkiaa nga je njínle Jesús “sítsjeyaná ngayije jéená” (1 Juan 1:7). Kʼoa tsa kʼoasʼin si̱kjaʼaitsjeen nga tsínkʼia sichatʼaná Niná, basenkaoná kʼianga bʼexkiaa nga “ngisa ngʼa tíjna Niná kaoni tsa ni̱ma̱ná” (1 Juan 3:20). Tojé pastro Juan xi kʼoakitso nga “kjoatjaocha” je Niná (1 Juan 4:8, 16). Kʼoa je carta xi majaoni kao xi majanni xi kiski, kʼoatsole je chjotale Cristo nga nda tjíosʼín nga tosi tonda ya “tjíomajin xi kjoakixi” (2 Juan 4; 3 Juan 3, 4). w18.04 18 párr. 14, 15