Kʼianga táo chʼin katʼaná

“Kʼianga tsaʼyale nga cáncer tjínle je xa̱nna kʼoa kao nʼóyʼena nʼio kinroajen tokoan. Kʼianga kichoa ndʼiana i kixian: Ninga likui koyale nga cáncer sʼe̱na, tjínnele sikjaʼaitsjen jmeni xi sʼian kʼianga tsín kjuinroajen tokoan” (Linda, xi 71 nóle).

“Chʼin tjínle kjan kʼoa nʼio bao ma. Sakʼoaa ñaki nroajen tokoan kʼianga bao ma. Kʼoasʼin sikjaʼaitsjen nga toʼan tijna kʼoa saʼnda sakʼoaa mena sikʼien yaona” (Elise, xi 49 nóle).

Jngo chjota xi silla de ruedas tíjnaya kʼoa yaa tjíokao xínkjín

KʼIATSA ji xi táo chʼin tjínli kʼoa tsa jeje̱ xi xíngi mani majinjinli josʼe tokoán. Ali tsa tosíkjaʼákonjinná je chʼin, kʼoati nʼio nikjáojiaan. Nga kjitʼa mangían ya tsʼe chjinexki, nga sakʼoa likui ndi̱to̱n sokóná je xki xi koasenkaoná kʼoa tsakuije̱ nga nʼio chjí kʼoa tsa josikaoná je xki xi chinee, kui xosíkao sakʼoaná nga nikjáojiaan kʼoa nga nokjoaan. Kʼianga nʼio nikjáojiaan tʼatsʼe nga táo chʼin xi tjínná nʼio síkjaʼákonná.

Jméni xi koasenkaoná kʼianga kui kjoa bitjatojiaan. Nkjín chjota xi tjíobinyakao kʼianga bʼétsʼoale je Niná kʼoa nga bʼéxkia je versículole Biblia xi tsjoánganʼiole. Jmeni xi kʼoati binyakao kuinga bakóle kjoatsjoacha kʼoa tsjoánganʼiole je familiale kʼoa kao je miyole.

JMENI XI TJÍOSʼÍN KʼA JE CHJOTA

Je Robert xi 58 nóle, itso: “Kʼianga ska̱li je chʼin xi tijnakoai, je Niná tinʼiotʼai kʼoa jé koasenkaoli. Tʼetsʼoalai je Jeobá kʼoa kʼoatʼinlai jotjín tokuin. Tikjaʼaitsjain je familiali kʼoa tijélai je nganʼiotsjele Niná nga katabasenkaoli kʼianga chókjoajinli je chʼin xi tjínli”.

Je Robert itsosa: “Machjén nga kuinyakaoli je familiali kʼoa nga tsjoánganʼioli. Je xíngia nyaon nyaon nchja̱na nga kjonangi jósʼin tijnaña. Kʼoati tsjoánganʼiona je miyona. Kui xi basenkaona nga nda sʼe tokoan kʼoa nga kana je chʼin xi tjínna”.

Kʼiatsa chʼin tjínle je miyoli kʼoa meli nga kʼuínnixatʼai, tochale koasenkaoli jmeni xi tso je Linda, itso: “Je xi chʼin tjínle mele kui kʼoasʼin jmeni xi sʼín ngantsjai kʼoa tsakui nichxin alikui mele nga tokui kuinchja̱ ʼndeni xi tʼatsʼe chʼinle. Kʼiatsa kʼuínchonlai, ali tsakuijin nʼio nikʼaxki̱ je chʼin xi tjínle, tosa kui cho̱bayaño xi kjaʼaínile”.

Je Niná koaanle tsjoánganʼioli, sinʼio tokuin jmeni xi tso Biblia, kuinyakaoli je familiali kao miyoli kʼoa kui xi koasenkaoli nga tosi tonda chókjoajinli je chʼin xi tjínli ninga táo.

Textole Biblia xi koasenkaoli

Je Niná tinʼiotʼai

“Kinchjale je Jeobá, kʼoa kinrʼoéna, kʼoa jé tsakjaʼáxinna ngayeje jmeni xi kitsokjonle. Kʼianga tse kjoaba tsakʼejnajin, tsakʼétsʼoaa, kʼoa je Jeobá kinrʼoéle” (Salmo 34:4, 6).

Je Linda itso: “Alikui kui kʼoaxinle je Niná nga katafaʼáxin je chʼin xi tjínna. Tosaa kui xi sijéle nga katabasenkaona nga katakana je chʼin xi tjínna”.

Sinʼio tokuin nga kʼoéxkiai Biblia

“Nijngojin xi ya kʼoéjna kʼoakuitso: Timʼeña” (Isaías 33:24).

Tikjaʼaitsjenjin jmeni xi sʼin je Niná nichxin xi nroaján. Kui xi koasenkaoli nga tsín jao sʼe̱ tokuin nga sitjoson jmeni xi tongini tso, kʼoa koasenkaoli nga tosi tonda chókjoajinli je kjoa xi tibitjatojin.

Tijélai nganʼio je miyoli kao familiali

“Jngo xi ñaki miyo tsjoakená tokʼiani, kʼoa jngoyale ndsʼeñá kʼianga kjoaba tijnajiaan” (Proverbios 17:17).

Je Elise itso: “Ali tsa nikjinjin. Tʼaiʼndai nga katabasenkaoli je miyoli. Sakʼoajin toji tijnai koa̱nli kʼoa tsa kʼoasʼin ni̱kjaʼaitsjain nga tsín kuenta tísʼínli Niná, tonga ali tsa nikjinjin”.