Koaan tsjoa sa̱tío tokoán ndʼaibi
A FIYA jkui josʼin kuiyoaa tsa tsín tisʼe̱ni chʼin, tsa tsín tikoa̱njchíngañá kʼoa tsa tsín tikuiyáñá. Koaan kʼoasʼin kuiyoaa. Tonga nichxin xi tiyoaa ndʼaibi tsee kjoañʼai chjaʼá. Jósʼiaan nga tsjoa sa̱tío tokoán. Ya Biblia tsjoáná kjoafaʼaitsjen xi koasenkaoná. Kataʼyala josʼin basenkaoná je Énle Niná kʼianga jme kjoa bitjatojiaan.
TOKATAMANINÁ JOSʼIN TIYOAA
Kjoafaʼaitsjen xi tsjoá Biblia: “Kʼoasʼin tiyo ali kjoanyinájin nimetakon. Tʼejngo takon kao xi jetjínno” (Hebreos 13:5).
Nichxin xi tiyoaa ndʼaibi, nʼio nkjín koya tsojmi tjín xi kʼoatso je chjota nga machjénná. Tonga je Biblia kʼoatso nga koa̱n tsjoa sa̱tío tokoán ninga tsín nʼio tse tsojmi tjínná.
Alikui tao̱n katamatsjoachaa. Nga tao̱n matsjoake je chjota alikui tikuenta sʼínni yaole, je familiale, miyole, likui tinda fikaoni yaole kʼoa tsín tibakóni kjoaxkóntokon (1 Timoteo 6:10). Ngisani tse xi sícha nga kʼoasʼín kʼoa alikuikʼia sʼejngo kon (Eclesiastés 5:10).
Ngisaa chjíle je chjota tikʼoajinni je tsojmi. Ningalani machjénná je tsojmi, alikui koa̱nle kʼoasʼin josʼín je chjota nga bakóná kjoatsjoacha. Ngisaa tsjoa sʼe tokoán kʼianga tjínná miyo (Proverbios 17:17).
TSJOA SA̱TÍO TOKOÁN TSA KJUINTJENNGIAA JE KJOAFAʼAITSJEN XI TSJOÁ BIBLIA
NGA SOKÓCHʼINNÁ
Kjoafaʼaitsjen xi tsjoá Biblia: “Jngo ni̱ma̱ xi tsjoa tjínle ñaki síndayaná” (Proverbios 17:22).
Nga tsjoa bʼé tokoán nʼio nda basenkaoná kʼianga chʼin tjínná. Jmé xi sʼiaan nga tsjoa sʼe̱ tokoán kʼianga chʼin tjínná.
Kʼoee kjoanda. Tsa tokui kuenta sʼiaan je chʼin xi tjínná, alikuijin nda sʼe̱ tokoán nga nyaon nyaon (Proverbios 15:15). Je Biblia itso: “Tʼao kjoanda” (Colosenses 3:15). Chjí jchatokoán jmeni xi ʼyaa, jolani jomachon nga kantjai je Tsʼuí, nga tjon xoño kʼoa tsa ʼya xi kuijnokaoná tsjoa satío tokoán.
Kuinyakoaa xi kjaʼaí. Je Biblia kʼoatso nga ngisa tsjoa sa̱tío tokoán “nga kʼoee kaoni tsa nga chjoé”, kʼoa basenkaoná nga kʼoanʼia tsa chʼin tjínná (Hechos 20:35). Kʼianga tsjoáná kjoanda je xíngiaa ngisaa tsjoa satío tokoán kʼoa tsínkui nʼio nikjaʼaitsjeen kjoa xi tjínná. Tsa kuinyakoaa xi kjaʼaí ngisaa nda sa̱tío tokoán.
JÓSʼIN NGA NDA KOATIO XI JECHIXAN
Kjoafaʼaitsjen xi tsjoá Biblia: Kui kuenta sʼiaan jmeni xi ngisa tjínle kjoandosin (Filipenses 1:10).
Kʼianga tsín síkʼayale nichxin xínkjín xi jechixan alikui nda batio. Kuinga machjénsíni nga je xi jechixan kui títjon kuenta katasʼín jmeni xi machjénle je xʼin kʼoa tsa je chjoón, nga kui kjoabixanle xi ngisa chjí katabe.
Ñatjen kʼoatʼiaon tsa jmeni. Je Biblia kʼoatso nga “tongisa nda nga jao mani chjota tikʼoajinni nga tojngo mani” (Eclesiastés 4:9). ʼNdele nga tokui kʼoasʼiain jmeni xi tsjoachai, tosa kui kuenta tʼiain jmeni xi koa̱n kʼoasʼiaon nga jao. Tobʼelañá, koaan ñatjen kʼoéndao xi kuichiño, koaan tsa jñani koanngión, tsa ñatjen sʼio café kʼoa tsa josasʼin ñatjen kʼoétsaojion.
Tsjoacha katamao xíngio. Je Biblia kʼoatso nga je xi xʼin kao xi chjoón tjínnele nga tsjoake koa̱n xínkjín kʼoa katabexkón xínkjín (Efesios 5:28, 33). Tobʼelañá, nda koatio xi jechixan tsa ndʼé sikao xínkjín, tsa tsoa̱kjá xínkjín kʼoa tsa jme xi tsjoákjoatjaole xínkjín. Kʼoa tojé xi koa̱n kjoáyokao xínkjín je xi jngo chjoón jngo xʼin mani xi jechixan (Hebreos 13:4).