Bichó chjota ya kjoajtíntse nga sʼeyole xo̱n

Jan xomana tongini nga kjesa sʼejnajin je kjoajtíntse xi jan nichxin koanngínkjayolee xo̱n je chjota ánni nga koaisíni ya kjoajtíntse. Ánni nga kʼoénesínilee yaoná nga kʼoasʼiaan. Kuinga tojo kjima nó xi tífaʼato, je chjota xi bichó kjoajtíntse nʼio nda sasénle jotso je kjoanokjoaya xi faʼa, nga kʼoasʼin síxá chʼin chʼin xíngiaa xi tsjoánganʼio jme xá xi sʼe, nga ñaki nda sʼín je xi bichó kʼoa nga ñaki jtín tjío (Sal. 110:3; 133:1; Is. 65:13, 14). Tonga a bichó kjoajtíntse je chjota xi sʼeyole xo̱n, kʼoa ngisa tsa je chjota xi tsín ya chrian tsʼe jña satío je kjoajtíntse.

Kʼianga jekisʼejna je kjoajtíntse xi jan nichxin xi tsʼe nó 2011, jngo xo̱n kichole jngo sucursal xi tsʼe testigole Jeobá, xi je kisikasén jngo chjoón xi bʼejnaʼmaxóle tsakai je testigole Jeobá kʼianga bichó niʼyale. Jngoxó xo̱n xi tsʼe kjoajtíntse koansjaile ya ngi xo̱ntjoale. Je xo̱n xi kisikasén itso: “Naskánakji niʼyana kʼoa nʼio nda tijna kao xʼinna kʼoa alijme xi chana mana tsakai. Tonga likuini ñaki tsjoa tjín tokoan. Kʼoa kuinga kisíña je kjoajtíntse nga xoto, ningalani 320 kilómetro kjin kikaoña karrona”. Je chjoón jebi nʼio kisasenle jme xi jaʼa ya kjoajtíntse kʼoa saʼnda kinchjale je xʼinle nga kʼoakitsole nga tsín kuicho niʼyale nga kʼia kʼoa nga tojo ya kʼoéjnasa je kjoajtíntse nga taingo. Kitsosa: “Kinrʼoeña ngayeje kjoanokjoaya xi jaʼa kʼoa nkjín testigole Jeobá tsaʼbexkoan. Likui timenina tsakai nga kjoetʼa je kjoajtíntse”. Xi jekichoni niʼyale, kjoan tsakʼétsʼiakao nga kiskotʼaya Biblia kʼoa ño sá nga koanskanni kʼoati jekitsoyason. Kʼoa itso ndʼaibi: “Tsjoa mana nga kisokosjaina je xo̱n xi tsʼe kjoajtíntse ya ngi xo̱ntjoana. Nʼio tsjoa tjín tokoan ndʼaibi”.

Alikui jao tjínná nga kuicho kʼa chjota ya kjoajtíntse nga sʼe̱yole xo̱n. Kuinga machjénsíni nga ñaki kao kjoatsjoa si̱kʼabísoan xo̱n jebi. Kʼoa jotjín xo̱n kʼoanginá koaan chʼaa kʼianga koanngián kjoajtíntsená ánni je kʼoaisínilee chjota xi sa̱téjiaan ya ʼnde jñani sʼe̱jna.

[Rekuadrole pájina 5]

Jókuixoán nga kjoáyoaa xo̱n xi tsʼe kjoajtíntse

Koaan tongotjo chja̱kaonajmiá chjota kʼianga kjoáyolee xo̱n jebi ánni nga kuitjosonjndasíniná je ʼnde xi bʼakaoná. Koaan i̱ kuixoán: “ʼNdali. Jngo xo̱n tifayolaijin xíngiaa, jngo kjoajtíntse sʼe̱jnanajin, koajna jngole. Xo̱n jebi tíbʼabí jngo tjíjtsa Sonʼnde kʼoa yaa faʼaitʼa kʼiani kʼoa jñani sʼe̱jna”. Kao kjoatsjoa si̱kʼabísoan xo̱n jebi. Kʼoa tsa nga xoto kao nga taingo si̱kʼabísoan kʼoati koa̱n kjoáyoaa je rebista.