Tsjoa tʼai tokuin nga kʼuínyasuin je énnda chjotse

A sakʼoaa tsín tso tokuin nga ʼmikʼinyasuin. Ali tsa tojijin xomali, nʼio nkjín xi kʼoasatío kon. Tsakui nichxin kui kʼoamani nga tsín nrʼoéná chjota kʼoa tsakuije̱ nga tsín tso tokoán nga chjakoaa chjota xi tsín ʼyaxkoaan. Nga kʼoama alikui tsjoa sʼená. Tonga jé tinixálee jngo Niná xi nʼio tsjoa tjínle, kʼoa kui xi mele nga kao kjoatsjoa si̱xálee (Sl 100:2; 1Ti 1:11). Jméni xi jan koya koasenkaoná nga tsjoa kʼoé tokoán kʼianga kʼuínyasoán.

Xi títjon, kuinga si̱kjaʼaitsjeen nga kjoachoya tjenkao je én xi ʼmiyasoán. Ninga tsín tijme kjoachoya tjínnile chjota koaan kuinyakoaa nga tsjoa katasatío kon kʼianga kʼuínyalee énnda chjotse (Isa 52:7). Je énnda chjotse kʼoati koasenkaoná tsanda ñá nga tsjoa sa̱tío tokoán. Kʼianga kje mangínkʼinyasonjián, koaan títjonkjoanla si̱kjaʼaitsjenjiaan je kjoanichikontʼain xi kjoaʼaíkao Chjotaxále Niná i̱ Sonʼnde.

Xi majaoni, si̱kjaʼaitsjeen nga binyakao chjota je én xi ʼmiyasoán. Binyakao nga síkatío jmeni xi chʼaotjín kʼoa kʼoati sʼele kjoachoya nga koa̱n koatio ngantsjai nichxin (Isa 48:17, 18; Ro 1:16). Tobʼelañá, tsa chjota chʼasjentjé. Ninga tjíokʼa chjota xi tsín mele chʼa̱sjentjé, tosi tondajin kuijnyísjee je xi mele kuitjontjai (Mt 10:11-14).

Kʼoa je xi majanni ngisaa chjíle. Kʼianga ʼmiyasoán jé Jeobá bitjongʼa. Je Jeobá nʼio bechjí je xá xi nʼia (Isa 43:10; Heb 6:10). Kʼoa tsjoáná nganʼiotsjele nga bitjosonná je xá jebi. Kuinga si̱jésínilee nganʼiotsjele ánni nga tsjoa katasatíoni tokoán (Gál 5:22). Nga je Jeobá tsjoánganʼioná, kao kjoanʼiojin kʼuínyasoán kʼoa lijme xi kuijkónlee (Hch 4:31). Ninga tojme xi kuitsoná chjota, tsjoa kʼoé tokoán kʼianga kʼuínyasoán (Eze 3:3).

CHÓTSENLAI JE VIDEO XI TSAKASENKAONA NGA TSJOA KISʼE IJNGOKʼA TOKOAN. XIJEKOA̱N, CHÓTʼAYAJIN KJOACHJONANGI JEBI:

• Ánni nga ngisa kui kuenta sʼiansíñá nga nda chótʼayá Biblia ninga nʼio nkjín ora bitjokʼinyasoán nga jngo sá.

• Jósʼin koa̱n chjénngilee je María.

• Kʼiáni chotʼayai je Énle Niná.

• Jméni xi ngisa tsjoachai kʼianga ʼmiyasuin.