Je Jeobá síchikontʼain je xi fini ya ʼndele

NʼIO nkjín mani je ndsʼee kao tichjaa xi xin naxinandá kisíxá tsakai xi tjíofini ya ʼndele. Nga tsjoake je Jeobá kao chjota, yaa tsjoánganʼio jñani ngisa machjén je xi tsoyason (Mat. 22:37-39). Jméni xi tjíosíkatío kʼoa jósʼin síchikontʼain je Jeobá. Nga koa̱njinná xi tʼatsʼe jebi kataʼyala jokjima ya Camerún, jngo ʼnde xi ya África tíjna.

JÑANI NGISA TJÍN CHJOTA XI MELE KOTʼAYA ÉNLE NINÁ

Jngo ndsʼee xi Camerún tsʼe, xi Onésime ʼmi, 14 nó nga xin naxinandá kikʼejna, kʼiaa nga nó 1998 kitjoni ya Camerún. Ñandia kʼianga tíjna je kjoajtín, je xi tínchja̱ya jngo choa̱ kisikʼéjna tʼatsʼe joma kʼianga ʼmiyasoán. Je xi tínchja̱ya i kitso: “Tsa xinxin ʼnde fikʼasjengindá jti̱ jao chjota xi miyo fáo, tonga tsa jngo xi ngisa nkjín jti̱ tísokóle, a tsí kʼoati ya kuicho je miyole xi tochoa jti̱ tísokóle”.

Nga kinrʼoé choa̱ jebi je Onésime kui kisikjaʼaitsjen nga koai ijngokʼani ya Camerún, ánni nga koasenkaoni je ndsʼee xi ya tsʼe nga kuitsoyale je chjota xi mele skótʼaya je Énle Niná. Tonga je xi koankjáojinle kui tsa koa̱nngale nga ya Camerún kuicho ijngokʼa, nga̱ jenkjín nó nga xin naxinandá kikʼejna. Jaon sá kikʼejna ya Camerún nga tsabe tsa koa̱nnga ijngokʼale. Kʼoa kʼiaa nga nó 2012 nga ñaki jeya kikʼejna ijngokʼani.

Je Onésime itso: “Ya Camerún nʼio sjeya ma kʼoa ngisaa ñʼai maná nga bijnyiʼá yaoná, kʼoa kui jebi xi kisinga ijngokʼale yaona”. Kʼoa ya Ndʼia jña chotʼayá, to yá banca tsakatejnane ijngokʼa. Kʼoa itsosa: “Nga kui ngisa kuenta kisʼian jmeni xi tísakóya alikui tikui jaʼaitsjennina jokjoan je yáxile xi tsakatejnane jñani xin”.

Kʼiaa nga nó 2013 chixan je ndsʼee Onésime kao Géraldine. Je Géraldine ñajan nó nga ya Francia kikʼejna tsakai. Jmé kjoanichikontʼain tjíosokóle ndsʼee jebi nga kui xále Niná ngisa tjíotsjoále kjoandosin. Je Onésime itso: “Ñatjen tsangínníjin je Skuela xi síchjine je xi bakóyason tʼatsʼe Chjotaxále Niná kʼoa yaa Betel kinixáijin. Je nó xi jaʼato, 20 koanni xi ya fi jtínnajin xi kisʼenngindá. Ñaki kʼoatjín tokoan ndʼaibi nga i̱ tijna ʼnde jñani ngisa tjín chjota xi mele nga skótʼaya je Énle Niná” (Mar. 1:17, 18). Kʼoa je Géraldine itso: “Ngisaa tse kjoanichikontʼain tísokóna tikʼoajinni josʼin kisikjaʼaitsjen”.

NʼIO TSJOA SʼE TOKOÁN NGA CHJOTATJENNGILE CRISTO NIKOAA JE CHJOTA

Je Judith yaa Estados Unidos kikʼejna, tonga koanmele nga ngisasa tse sixále je Jeobá. Itso: “Kʼianga fisixatʼa je xíngia ya Camerún, nroajeen ndáxkoan kʼianga jenroaña nga̱ nkjín chjota sikatíoa xi Biblia xinyale”. Tonga to jao kisʼe kon tsa koai ijngokʼani ya Camerún, nga̱ nda njele jñani tísíxá kʼoa ma bʼéchjí nga maxkile je nʼaile ya Camerún. Tonga jé Jeobá kisinʼiotʼa kʼoa ki ijngokʼani ya ʼndele. Kʼoatso nga faʼaitsjen sakʼoale nga ndasʼin tsakʼejna ya Estados Unidos. Tsakʼétsʼoale je Jeobá nga kisijéle nganʼio, kʼoa jé kitsjoanganʼiole jngo superintendente xi tsʼe circuito kao chjoónle.

Jósʼin kichomani nga ki ijngokʼani ya ʼndele. Je Judith itso: “Je xi jan nó, ño chjota tsakasenkoa nga koan kisʼenngindá”. Nga títjon precursora especial sʼin kisixá. Kʼoa ndʼaibi, superintendente xi tsʼe circuito mani je xʼinle xi Sam-Castel ʼmi. Kʼoa jókoanni je nʼaile. Je Judith kao xínkjín xin naxinandá kikao je nʼaile jñani tokjoatjao koanxkile. Kʼoa koanndayani kʼianga jekitiya.

JOSʼIN TSAKINYAKAO JEOBÁ

Jngo ndsʼee xi Víctor ʼmi yaa kikʼejna ya Canadá. Kʼianga tsakʼéxkia jmeni xi tso jngo Xo̱n xi Bájinkonná tʼatsʼe skuelangʼa, kisikjaʼaitsjenjin jmeni xi sʼin. Alikui tikini ya universidad kʼoa tosaa jngo xá kiskotʼaya. Itso: “Koan nga precursor sʼin kisixá, nga̱ kui xi jekjoatse mena kʼoasʼian tsakai”. Xijekoan, je Víctor jé Caroline chixankao kʼoa yaa Camerún kikʼetsoma. Kʼianga kisíxatʼa je Sucursal xi ya tíjna, tjínkʼa je ndsʼee xi kʼoakitsole tsa mele nga ya Camerún tsjoánganʼio. Je Víctor itso: “Alikui mai tsakixuínjin nga̱ jekʼoasʼin tsakʼendajinjin nga tokoa̱nninajin josʼin kuiyuijin, kuinga kʼoasʼin kinikjaʼaitsjennijin nga koa̱n ya kʼoainganʼiuijin”. Ningalani chʼin bʼetʼa sakʼoale je Caroline, kʼoasʼin tsakʼéndajin nga ya Camerún koai.

Je Víctor kao Caroline precursor regular sʼin kisixá nga tosʼa kicho ya Camerún, nga̱ nʼio nkjín mani chjota xi mandosinle je Énle Niná. Tokui tao̱n xi tíjnatjao choale kisichjén nga tosʼa kicho ya Camerún. Xijekoan, yaa Canadá kisíxá jngo jao sá kʼoa kʼiaa ki ijngokʼa ya Camerún, kʼoa tojo precursor regular koan. Jmé kjoanichikontʼain xi tjíosokóle. Jeki ya Skuela xi síchjine je xi bakóyason tʼatsʼe Chjotaxále Niná, precursor especial sʼin kisixá, kʼoa ndʼaibi yaa tsjoánganʼio jñani sʼenda ndʼia jñani ʼyaxkón je Jeobá. Je Víctor itso: “Ningalani nda tiyuijin tsakai nga nkjín tsojmi tjínnajin, jé Jeobá kininʼiotʼaijin kʼoa tiʼyaníjin josʼin tísíchikontʼainnajin”.

TSEE KJOATSJOA TJENKAO NGA BINYAKOAA JE CHJOTA NGA TSJOÁTʼALE YAOLE JEOBÁ

Kʼianga nó 2002, jngo ndsʼee xi Alain ʼmi, universidad tíkotʼaya ya Alemania. Kʼianga tsakʼéxkia je tratado xi Joven, ¿qué harás con tu vida? ʼmi, kui xokisikao nga kisikjaʼaitsjenjinni jmeni xi mele sʼin. Kʼianga nó 2006, kʼiaa ki je Escuela de Entrenamiento Ministerial kʼoa yaa Camerún kinikasén, jñani kitsin.

Kʼoa nga jeya tíjna Camerún kisokoxále jñani tochoa nichxin kisixá. Xijekoanni yaa kisixá jñani ngisa nda kinjele, tonga kui koankjáojinle nga tsín tikʼoakji kuitsoyasonni jokisʼin nga títjon. Kʼoa kʼianga kʼoatsakʼinle tsa mele nga precursor especial sʼin sixá alikui mai kitso. Je naile jñani síxá kʼoakitsole nga ngisa tse kʼoechjíle, tonga je Alain koankaile, kʼoa tosaa precursor especial koan. Xijekoan, je Alain jé Stéphanie chixankao, xi nkjín nó nga ya Francia tsakʼejna. Jméni xi ñʼai koanle nga ya Camerún kikʼejna.

Je Stéphanie itso: “Chʼin tsakʼetʼa choana, tonga kisokona xki̱ kʼoa nda kisʼeni tokoan”. Je Jeobá kisichikontʼain nga jao. Je Alain itso: “Kʼianga tsangínkʼinyasuinjin jngo ʼnde xi Katé ʼmi, nkjín chjota kisatejinjin xi koanmele kiskotʼaya Biblia. Kao teléfono tsakʼinyanilaijin. Jao koanni xi kisʼenngindá kʼoa jngo grupo kisʼejna”. Je Stéphanie itsosa: “Tsínsa jmeni xi kʼoasikji tsjoa báya tokoán nga binyakoaa chjota nga be xi tʼatsʼe Jeobá kʼoa nga tsjoátʼale yaole. Kʼoa nʼio tsjoa tjío tokuinjin nga i̱ Camerún tiyuijin nga tibinyakoaijin je chjota nga tjíobe xi tʼatsʼe Jeobá”. Kʼoa ndʼaibi, je Alain kao Stéphanie superintendente sʼin tjíosíxá.

KUI KʼOAKINʼIAIJIN JMENI XI TJÍNNELE SʼIAINJIN

Je Gisèle kʼiaa kisʼenngindá nga tʼatsʼe chjinexki tíkotʼaya ya Italia. Kui kisikjaʼaitsjenjin nga tomanile josʼin tjíosíjchá yaole je ndsʼee xi kitsoyale Biblia, kʼoa kui xi koanmele nga ngisa tse kuitsoyason. Kuinga precursora regular koanni kʼianga tojo sʼa tíkotʼaya xi tʼatsʼe chjinexki.

Je Gisèle koanmele nga koai ijngokʼani ya Camerún nga ngisa tse kuitsoyason, tonga tjín jmeni xi ñʼai koanle. Itso: “Kʼianga jekuitjoa Italia jejin tsín tisʼe̱nina xo̱n jñani kʼoatso nga koa̱n i̱ koatejnaʼnde, kʼoa koa̱nkjinjinle je miyona kao xíngia xi tjío Italia”. Ninga kʼoalani, kʼiaa nga sá mayo nó 2016 ki ya Camerún. Xi jejaʼato nichxin, jé Léonce chixankao, kʼoa je sucursal kʼoakitsole tsa koa̱n ya koai ya naxinandá jña Ayos ʼmi, jñani ngisa machjén xi tsoyason.

Jósʼin síjchá yaole chjota ya ʼnde jñani kinikasén. Je Gisèle itso: “Sakʼoaa nkjín xomana matsín je lʼí kʼoa tsín josʼin tsakʼetʼanilaijin lʼí je celular. Kʼoa me tongantsjai nga to kisʼeyokjitsʼao. Chikín kisichjén nga tsakʼenda xi tsakichinijin, kʼoa kʼiaa nga jemanjio mangínchʼaijin nandá, nga̱ ngisaa choa chjota sʼe, chʼaníjin lámpara kʼoa carretilla nokjónyaijin nandá”. Je Gisèle kʼoatso jmeni xi tsakinyakao: “Kui je nganʼiotsjele Jeobá tsakinyakaonajin, kitsʼainganʼiolaijin xíngijin kʼoa kitsjoanganʼionajin je xíngijin kao miyonajin, kʼoa sakʼoaa kitsjoa choanajin tao̱n xi kinichjainjin”.

A tsjoa tjín kon je Gisèle nga kicho ijngokʼani ya ʼndele. Itso: “Nʼio tsjoa tjín tokoan. Nga títjon ñʼai koannajin kʼoa sakʼoaa kinroajen tokuinjin. Tonga nga tsínkui nʼio kuenta kinʼiaijin, koanjinnajin nga nda kinʼiaijin nga kicho ijngokʼanijin ya ʼndenajin. Jé Jeobá kininʼiotʼaijin kʼoa ngisaa kjimachriantʼalaijin”. Je Léonce kao Gisèle ki je Skuela xi síchjine je xi bakóyason tʼatsʼe Chjotaxále Niná, kʼoa ndʼaibi precursor especial sʼin tjíosíxá choatse.

Tojo sʼín je chjota xi jti̱ bʼasjengindá, bʼasjengindá jti̱ ninga tse kjoama̱ bʼéngi, kʼoatisʼinni je ndsʼee xi bichóni ya ʼndele, ninga ñʼai male, bʼénele yaole nga binyakao je chjota nga tsoyale je Énle Niná. Alikui jao tjínná nga sichikontʼain Jeobá ndsʼee jebi kʼoa faʼaitsjenle jmeni xi tjíosʼín nga tjíosíxále (Neh. 5:19; Heb. 6:10). Tsa xin naxinandá tijnai kʼoa tsa ʼyai nga ngisa machjén xi tsoyason ya naxinandáli, a tijnandaní nga kʼuín ijngokʼani. Tsa kʼuín ijngokʼani, jé Jeobá sichikontʼainli (Prov. 10:22).