KJOAʼMIYA XI CHOTʼAYA 30
Én xi tongini kinokjoa xi faʼaitʼa títjon ya Biblia xi nʼio chjíle
“Kontra sʼin sikatíono, ji kʼoa kao je chjoón” (GÉN. 3:15).
KJOAJNDA 15 Chʼa̱sjengʼaa je ʼNdítjonle Jeobá
XI TÍNCHJA̱NIa
1. Jmé xi kitso Jeobá kʼianga jejaʼato choatse nga tsakajngijée Adán kao Eva (Génesis 3:15).
KʼIANGA jejaʼato choatse nga tsakajngijée je Adán kao Eva, jngo kjoachoya kitsjoale Jeobá je ntje̱le. Kui kʼoakitso Jeobá jmeni xi tso Génesis 3:15b (tʼexkiai).
2. Jmé énni xi nʼio chjíle xi faʼaitʼa ya Génesis 3:15.
2 Je én jebi yaa faʼaitʼa xi títjon librole Biblia. Kʼoa je xi ngikʼa librole Biblia kʼoati kui nchja̱ni. Je én jebi xi tongini kinokjoa nʼio chjíle. Ánni. Nga̱ jmeni xi tso ngakjijngo Biblia kui tínchja̱ni jmeni xi tso Génesis 3:15. Jmeni xi tso kui nchja̱ni nga je Niná sikasén je xi kʼoasjentjai chjota nga sikjeson je Na̱i kao xi ya tsjoánganʼiole.c Ñá xi tsjoachaa Jeobá nʼio tsjoa bʼé tokoán én jebi.
3. Jmé xi chótʼayajiaan i̱ kjoaʼmiya jebi.
3 I̱ kjoaʼmiya jebi kui chótʼayajiaan jme xi tínchja̱ni Génesis 3:15. ʼYá xi nchja̱ni jmeni xi tso én jebi. Jósʼin tíbitjoson kʼoa jósʼin basenkaoná ndʼaibi.
ʼYÁ XI TÍNCHJA̱NI GÉNESIS 3:15
4. ʼYá xi tínchja̱ni je ye̱, kʼoa jómani ʼyaa.
4 Ya Génesis 3:14, 15 jngo “ye̱” bʼaxki̱ kao “ntje̱le” kʼoa jngo “chjoón” kao “ntje̱le” bʼaxki̱. Yaa Biblia bakóyaná ʼya xi tínchja̱ni.d Kuila títjon si̱kʼaxkiaa ʼyáni xi tínchja̱ni je ye̱. Alikui tsa ñaki ye̱ xi tínchja̱ni, nga̱ jngo ye̱ tsínjin koanjinle jmeni xi kitso Jeobá ya ʼndenaxóle Edén. Nʼio maña ʼyani xi tínchja̱ni kʼoa kʼoatso je Biblia ʼyani. Ya Apocalipsis 12:9 kʼoatso nga je xi “ye̱ jchínga” ʼmi jéní Na̱i, xi kʼoati Satanás ʼmile. Kʼoa ʼyáni ntje̱le ye̱ jebi.
YE̱
Je Na̱i xi kʼoati Satanás ʼmi; ya Apocalipsis 12:9 “ye̱ jchínga” tsole (Chótsenlai párrafo 4)
5. ʼYáni je ntje̱le ye̱.
5 Kʼianga totsoyanile nga kui én xi “ntje̱” tso síkʼaxki̱ Biblia jé tínchja̱ni xi kʼoasʼin síkjaʼaitsjen kʼoa xi kʼoasʼín josʼín je Nʼaile, xi kʼoati totsoyanile. Je ntje̱le ye̱ jé ánkje xi yátsʼi̱n tsakinyále Niná kao chjota xi kontra batiole Jeobá kao naxinandále tojo sʼín je Na̱i. Kʼoati je nchja̱ni ánkje xi tsín tikoanmenile nga je Jeobá kisixále kʼianga nichxinle Noé kao chjotatsʼen xi kʼoati sʼín josʼín je Na̱i, xi nʼaile mani (Gén. 6:1, 2; Juan 8:44; 1 Juan 5:19; Jud. 6).
NTJE̱LE YE̱
Ánkje xi tsín kixi kitʼale Niná kao chjotatsʼen xi kontra batiole Jeobá kao naxinandále (Chótsenlai párrafo 5)
6. Ánni nga tsín jeni Eva je chjoón xi bʼaxki̱ ya Génesis 3:15.
6 Kataʼyala ndʼaibi ʼyá xi tínchja̱ni je chjoón. Alikui je Eva tínchja̱ni. Je én xi tongini kinokjoa kʼoatso nga je ntje̱le chjoón koase̱nne je jko̱ ye̱. Tojosʼin jekaʼyaa, je ye̱ jé Na̱i tínchja̱ni. Alikuijin jokoa̱nnile nga jngo chjotajée sikʼien je Na̱i, xi ya kjuinroani ntje̱le Eva. Kuinga kjaʼaí xi tínchja̱ni.
7. Jósʼin basenkaoná jmeni xi tso Apocalipsis 12:1, 2, 5, 10 nga ʼyaa ʼya xi tínchja̱ni je chjoón xi síkʼaxki̱ ya Génesis 3:15.
7 Je libro xi tofetʼani faʼaitʼa ya Biblia kʼoatso ʼyá xi nchja̱ni je chjoón xi bʼaxki̱ ya Génesis 3:15 (tʼexkiai Apocalipsis 12:1, 2, 5, 10).e Ali tsa ñaki chjoónjin xi tínchja̱ni. Je Biblia kʼoatso nga ya ngindso̱ko̱ tíjna je sá, kʼoa nga jngo corona tíjnason jko̱ xi 12 niño tjíotʼa. Kʼoa jngo ʼndí sʼele. ʼNdí jebi jé Chjotaxále Niná tínchja̱ni. Nga ya ngʼajmi tíjna Chjotaxále Niná kʼoati ya tíjna chjoón jebi. Jé tsoyanile jtínle Jeobá ya ngʼajmi, ngatsʼi xi ya tjío ngʼajmi xi kixi fitʼale Niná (Gál. 4:26).
CHJOÓN
Je jtínle Jeobá ya ngʼajmi, xi tjío ya ngʼajmi xi kixi fitʼale Niná (Chótsenlai párrafo 7)
8. ʼYáni je xi títjon ntje̱le chjoón koan, kʼoa kʼiáni nga kui koan (Génesis 22:15-18).
8 Je Énle Niná kʼoati bakóyaná ʼya xi tínchja̱ni je xi séntítjonle ntje̱le chjoón. Kʼoatso nga ya ntje̱le Abrahán nroani (tʼexkiai Génesis 22:15-18).f Kitjoson én jebi nga̱ je Jesús yaa ntje̱le Abrahán jaʼaini (Luc. 3:23, 34). Tonga ntje̱ jebi ali tsa chjotajin tínchja̱ni ánni nga koase̱nneni je Na̱i kʼoa sikʼienni. Kʼiala 30 nóle je Jesús nga toxá kitjoéjinni kao nganʼiotsje nga ʼNdíle Niná koan. Saʼnda nga kʼia, jé xi títjon ntje̱le chjoón koan (Gál. 3:16). Kʼianga jejaʼáyanile Jesús nga kinikʼien, je Niná kitsjoale “kjoajeya kao kjoangʼa”, kʼoa kitsjoale kjoatéxoma ya ngʼajmi kao i̱ Sonʼnde ánni “nga sikixoyasíni xále na̱i” (Heb. 2:7; Mat. 28:18; 1 Juan 3:8).
NTJE̱LE CHJOÓN
Jesucristo kao xi 144,000 mani xi ya koatexomakao (Chótsenlai párrafo 8, 9)
9, 10. 1) ʼYásani xi ya tjíojin ntje̱le chjoón, kʼoa kʼiáni nga kui ma. 2) Jmé xi chótʼayajiaan xi fisani.
9 Tjíosa xi kʼoati ya maxki̱kao ntje̱le chjoón. Je pastro Pablo kui kisikʼaxki̱ kʼianga kiskile chjotale Cristo xi ya ngʼajmi koai xi chjota judío kitjenni kao xi xin naxinandále. I kitsole: “Kʼia tsa jon tsʼe Cristo mao, ñaki kjoakixi nga ntje̱le Abraham maoʼni, kʼoati tjínno kjoatjao josʼin nga Niná kitsjoa tsʼoa nga tsjoá” (Gál. 3:28, 29). Nga kao nganʼiotsje kjoejinni Jeobá jngo chjotale Cristo nga ya ngʼajmi koai yaa maxki̱kao je ntje̱le chjoón. Je ntje̱le chjoón jéní Jesús kao xi 144,000 mani xi ya koatexomakao (Apoc. 14:1). Ngatsʼi kʼoasʼin síkjaʼaitsjen kʼoa kʼoasʼín joni Jeobá, je Nʼaile.
10 Jekaʼyaa ʼyá xi tínchja̱ni Génesis 3:15. Kuila chótʼayajin choaa ndʼaibi jmeni xi tísʼín Jeobá nga tísítjoson jmeni xi tongini kitso. Xijekoa̱n, kui chótʼayajiaan jósʼin basenkaoná én jebi nichxin xi tiyoaa ndʼaibi.
JÓSʼIN TÍSÍTJOSON JEOBÁ JMENI XI KITSO
11. Jósʼin kinikiʼaon ngisjaindso̱ko̱ ntje̱le chjoón.
11 Ya Génesis 3:15 kʼoatso nga je ye̱ sikiʼaon ngisjaindso̱ko̱ ntje̱le chjoón. Kʼiaa kitjoson jebi nga je Na̱i xokisʼin nga je chjota judío kao chjota romano kisikʼien je ʼNdíle Niná (Luc. 23:13, 20-24). Kʼianga miʼaon ngisjaindso̱ko̱ jngo chjota alikui tima fi choatseni. Tikʼoasʼinni, kʼianga kinikʼien Jesús kinikʼéjnajñá choatse, kʼoa me jan nichxin nga ya tsjó tsakajnaya (Mat. 16:21).
12. Kʼiáni kʼoa jósʼin kuise̱nne jko̱ je ye̱.
12 Kʼianga kuitjoson Génesis 3:15, tjínnele nga jaʼáyanile je Jesús. Nga̱ je én xi tongini kinokjoa kʼoatso nga je ntje̱le chjoón jé koase̱nne jko̱ ye̱. Kʼianga jaʼáyanile Jesús nga koanjanni nichxin, kui tsoyanile nga ñaki jngokʼa koanndayani ya ngisjaindso̱ko̱ nga kinikiʼaon, kʼoa espíritu sʼin jaʼáyanile nga tsín tikʼia kuiyáni. Kʼoa kʼianga kuicho nichxin xi jetíjnachoa̱le Niná kʼiaa koase̱nne je Na̱i, xi tsonile, tondiaa sikʼien (Heb. 2:14). Je xi ya koatexomakao Jesús jé kuinyakao nga kjoaʼaxin ngatsʼi kontrale Niná, xi tsonile, je ntje̱le ye̱ (Apoc. 17:14; 20:4, 10).g
JÓSʼIN BASENKAONÁ NDʼAIBI ÉN JEBI
13. Jósʼin basenkaoná nga tíbitjoson Génesis 3:15.
13 Tsa jechoʼndale Niná mai nʼiojin tíbasenkaoli josʼin tíbitjoson Génesis 3:15. Nga jaʼai Jesús i̱ Sonʼnde ñaki kʼoakjoánsʼin tsakakó jokjoan je Nʼaile (Juan 14:9). Je choa̱ xi tsakʼéjna Jesús tíbasenkaoná nga tíʼyaxkoaan je Jeobá kʼoa nga tsjoacha kjimaa. Basenkaoná josʼin títsoyaná je Jesús kʼoa josʼin tíbándiaale je jtín nichxin xi tiyoaa ndʼaibi. Kʼoati bakóyaná josʼin kjuinkoaa yaoná nga tsjoa sʼe̱ kon je Jeobá. Kʼianga kinikiʼaon ngisjaindso̱ko̱ Jesús, xi tsonile, nga kinikʼien kʼoati basenkaoná ngatsʼiaa. Kʼianga jaʼáyanile, kitsjoatʼale Niná jokji chjíle je njínle ánni nga sitsjeni “ngayije jéená” (1 Juan 1:7).
14. Jósʼin ʼyañá nga tsín tokjoan kitjoson jmeni xi kitso Jeobá ya ʼndenaxóle Edén.
14 Jmeni xi kitso Jeobá ya ʼndenaxóle Edén alikui tokjoan kitjoson. Tsee nichxin jaʼato nga kisʼele ntje̱ je chjoón, nga tsakʼéxkó je Na̱i xi ya kitʼale kʼoa nga koa̱njtike xínkjín je ntje̱le chjoón kao ntje̱le ye̱. Jósʼin basenkaoná nga ʼyaa jebi. Kui bájinkonná nga je chjota xi je Na̱i kjinentsja nga koa̱njtike choʼndale Jeobá. Kʼoa nga jesiento nó jaʼato, je Jesús kʼoati kitsole je chjotatjenngile nga kʼoakoa̱ntʼain (Mar. 13:13; Juan 17:14). Tiʼyañá nga tíbitjoson én jebi je xi 100 nó jetífaʼato. Ánni kʼoabixónñá.
15. 1) Ánni nga nʼio jtikeniná chjota nichxin xi tiyoaa ndʼaibi. 2) Ánni nga tsín kuinókjonnilee je Na̱i.
15 Kʼiaa nga nó 1914 tsakʼaile xá je Jesús nga Rey sʼin tsakʼejnale je Chjotaxále Niná. Tochoatsee jaʼato nga tsakʼaonjenngi i̱ Sonʼnde je Na̱i. Je Na̱i toʼisa Sonʼnde jñani kʼoasʼín josʼin mele kʼoa tokuisa tíkoyale nga ni̱kʼien (Apoc. 12:9, 12). Tonga tsín tojyó tíjna. Nga nʼio jtile jé tíbʼetʼale naxinandále Niná (Apoc. 12:13, 17). Kuinga nʼio jtikeniná chjota nichxin xi tiyoaa ndʼaibi. Tonga tsín koa̱n kuinókjonlee je Na̱i kao xi ya fitʼale. Tosaa kʼoabʼé tokoán jokisʼe kon pastro Pablo nga i̱ kitso: “Kʼia tsa Niná tíjna tʼatsaan, ʼyá xi kontraná koa̱nʼni” (Rom. 8:31). Je Jeobá si̱nʼiotʼaa nga̱ jeme bitjosonyeje jmeni xi tso Génesis 3:15.
16-18. Jósʼin tjíobinyakao je Curtis, Ursula kao Jessica nga kjimajinle jmeni xi tso Génesis 3:15.
16 Jmeni xi kitso Jeobá tojosʼin faʼaitʼa ya Génesis 3:15 basenkaoná nga chókjoajinná tojme kjoa xi bitjatojiaan. Je Curtis, jngo ndsʼee xi misionero sʼin tíjna ya naxinandá Guam, itso: “Sakʼoa kui kjoa faʼatojian xi kotʼayakaona tsa kixi fitʼale Jeobá. Tonga nga kui sikjaʼaitsjenjian jmeni xi tso Génesis 3:15 basenkaona nga ngisa sinʼiotʼa je Jeobá”. Je Curtis kui tíkoyale nga kjoaʼaí nichxin nga kjoaʼaxin Jeobá je kjoa xi bitjatojiaan.
17 Jngo tichjaa xi Ursula ʼmi, xi ya naxinandá Alemania tsʼe jñani Baviera ʼmi, kʼoatso nga ngisa kisʼejngo kon nga Énle Niná je Biblia kʼianga koanjinle jmeni xi tso Génesis 3:15. Je xi nʼio tsakasenkao kuinga mangóson kao xi ngikʼa én xi tongini kinokjoa kao jmeni xi tso Génesis 3:15. Itsosa: “Ngisaa nʼio koantsjoake̱ je Jeobá kʼianga koanjinna nga tokjoan tsakʼéndajin josʼin nga tsjoále jngo kjoachoya je chjota”.
18 Je Jessica, jngo tichjaa xi ya naxinandá Micronesia tsʼe, itso: “Tojo faʼaitsjenna jokji tsjoa kisʼe tokoan nga tosʼa tsaʼbe je Énle Niná. Tíbitjoson jmeni xi tso Génesis 3:15. Kʼianga koanjinna jmeni xi tso kʼoati koanjinna nga tsínkui xi mele Niná nga kʼoasʼin kuiyoaa josʼin tiyoaa ndʼaibi. Jmeni xi tso texto jebi ñaki bʼéjngo tokoan nga ndasʼin biyoaa ndʼaibi nga je Jeobá nixálee kʼoa nga ngisa nda kuiyoaa nichxin xi sʼa nroa”.
19. Ánni tjínjngoni tokoán nga kuitjosonyeje jmeni xi tso Génesis 3:15.
19 Tojosʼin tiʼyaa, tíbitjoson jmeni xi tso Génesis 3:15. ʼYañá ʼyáni je ntje̱le chjoón kao ntje̱le je ye̱. Je Jesús, je xi títjon ntje̱le chjoón, jekoanndayani nga kinikiʼaon ngisjaindso̱ko̱, ndʼaibi Rey sʼin jetíjna, nʼio tse kjoajeya tjínle kʼoa tsín tikʼia kuiyáni. Kʼoa tojeme koa̱njngo jotjín mani je xi ya maxki̱kao ntje̱le chjoón. Nga jebasen kitjoson jmeni xi tso Génesis 3:15, alikui jao tjínná nga kuitjoson ngayeje, nga kuise̱nne je jko̱ ye̱. Nʼio tsjoa sa̱tío kon ngatsʼi chjota xi kixi fitʼale Niná nga ni̱kʼien je Na̱i. Nga kjesa kʼoamajin, alikui si̱kʼajenlee tokoán, ʼyañá nga koa̱n koa̱nkjainná jmeni xi tso Niná. Jé ntje̱le chjoón sichjén nga sichikontʼain “ngatsʼi naxinandá xi tjín sonʼnde” (Gén. 22:18).
KJOAJNDA 23 Jetíbatéxoma Jeobá
a Nga koa̱njinná jme xi tínchja̱ni ngakjijngo Biblia machjén nga koa̱njinná jmeni xi tso je én xi tongini kinokjoa xi faʼaitʼa ya Génesis 3:15. Kʼianga kui chótʼayajiaan én jebi ngisaa koa̱nnʼiotʼaa je Jeobá kʼoa koasenkaoná nga sʼe̱jngo tokoán nga sitjoson jmeni xi tso.
b Génesis 3:15: “Kontra sʼin sikatíono, ji kʼoa kao je chjoón, kʼoa je ntje̱li kʼoa kao je ntje̱le. Je, yaa jkui koase̱nne kʼoa ji yaa ngisjaindso̱ko̱ chi̱nelai”.
c Chótʼai je folleto Xo̱n xi basenkaoná nga chotʼayajiaan Énle Niná jñani “Jme xi tínchja̱ni je Biblia” tso.
d Chótsenlai je recuadro “Xi nchja̱ni Génesis 3:14, 15”.
e Apocalipsis 12:1, 2, 5, 10: “Jngo choa̱ xi tse, koantsen ya ngʼajmi. Jngo chjoón xi yʼakjáni tsʼuí, kʼoa je sá yangi ndso̱ko̱, kʼoa jngo korona tjíson jko̱ xi tejao niño tjíotʼa. 2 Yʼa ʼndí chjoónbe, jo nga nʼio kiskiʼndía nga koanchaanle. Ali tokʼoakji kjoañʼai tsakjaʼá nga tsakʼé ʼndí. 5 Kʼoa je tsakʼé jngo ʼndíxʼin, jñale xi koatexomale ngatsʼi chjota kao yájti xi ki̱cha̱. Kʼoa kichjoémi ʼndíle ngixko̱n Niná jña tíjna yáxilele. 10 Kinrʼoejngoa jta̱ nʼio ya ngʼajmi, xi kitso: Ndʼaibindai jejaʼai kjoabitjontjai, kao nganʼio, kao kjoatéxomale Nináná, kao kjoatéxomale Cristole, nga̱ je na̱i xi tsakángi ndsʼee jekinikʼatjenngi, jñale xi tsakángi ndsʼee ngixko̱n Nináná nichxin kao nitje̱n”.
f Génesis 22:15-18: “Kʼoa je ánkjele Jeobá kinchjaa ijngokʼale je Abrahán ya tjen ngʼajmi 16 kʼoa kitsole: Tsjoaña énna xi titʼatsʼanña, kui xi tso je Jeobá, kʼianga kʼoakanʼiai kʼoa nga tsín kabʼechjoanái je ʼndíli, xi tojngo mani, 17 ñaki kjoaixi nga sichikontʼainle kʼoa nga sinkjínya je ntje̱li joni tsa niño xi tjín ngʼá kʼoa joni tsa tsomí xi tjín ndaindáchikon. Kʼoa jé ntje̱li tjoéle naxinandá xi tsʼe chjotakontrale. 18 Kʼoa kao je ntje̱li koa̱nchikontʼainni ngatsʼi naxinandá xi tjín sonʼnde nga̱ kanitjosonní énna”.
g Chótsenlai je recuadro “Jmeni xi kjima nga tíbitjoson Génesis 3:15”.