KJOAʼMIYA XI CHOTʼAYA 30
KJOAJNDA 97 Kjoabijnachon tjenkao je Énle Niná
Basenkaoná ngantsjai jmeni xi koanjinná nga tosʼa kichotʼayá Biblia
“Likui koatejnajyoa nga sikjaʼaitsjen ntsjaino je kjoabi, nda tsa jeʼyao, nda tsa jetiyonʼiojinlao je kjoakixi xi jetjínno” (2 PED. 1:12).
XI TÍNCHJA̱NI
Ninga jekjoatse tichotʼayá Énle Niná tosi tonda koasenkaoná jmeni xi koanjinná nga tosʼa kichotʼayá Biblia.
1. Jókisʼe tokuin nga tsaʼyai jotso Énle Niná.
NKJÍN koya jmeni xi koanjinná nga tosʼa kichotʼayá Énle Niná. Tobʼelañá, koanjinná nga Jeobá ʼmi Niná kʼoa ngisaa koanchriantʼalee (Is. 42:8). Nda kisatio tokoán kʼianga koanjinná nga tsín kjoañʼai chjaʼá kʼianga jebiyaa, nga̱ tsín tijme xi beni xi jekʼien (Ecl. 9:10). Kʼoa tsín tikui nʼio nikjáojinñá nichxin xi nroaján nga̱ kʼoatso Niná nga naskánasichon sonʼnde. Koanjinná nga koa̱n kuiyoaa ngantsjai nichxin, nga tsín to 70 kʼoa tsa to 80 nó kuiyoaa (Sal. 37:29; 90:10).
2. Ninga jenʼio tjío kjoamakjainná, ánni machjénni nga tosi tonda si̱kjaʼaitsjenjiaan jmeni xi koanjinná nga tosʼa kichotʼayá (2 Pedro 1:12, 13).
2 Ninga jenkjín nó tichotʼayá Énle Niná, alikui si̱chajiaan nga nʼio chjíle jmeni xi koanjinná nga tosʼa kichotʼayá. Je carta xi majaoni xi kiski Pedro, jé kiskile chjotale Cristo xi nʼio tjío kjoamakjainle (tʼexkiai 2 Pedro 1:12, 13).a Kui xi koanmele Pedro nga tosi tonda nʼio katasatío kjoamakjainle chjotale Cristo, nga̱ tsakatio kʼa jinjtín xi tsín ya Énle Niná tsakʼangini jmeni xi kitsoya (2 Ped. 2:1-3). Nga tosi tonda kixi koaitʼale Jeobá, kui kisikjaʼaitsjenle jmeni xi jebe.
3. Ánni machjénni nga tosi tonda chótʼayajiaan jmeni xi koanjinná nga tosʼa kichotʼayá Énle Niná. Jngo choa̱ tʼejnai.
3 Ninga jekjoatse tichotʼayá Énle Niná, tojo basenkaoná jmeni xi koanjinná nga tosʼa kichotʼayá. Jngola choa̱ kʼoéjnaa josʼín jngo na̱ kao tsotile nga tsojmi bʼénda. Ninga ngóson kjoan tsojmi xi sichjén, nga jenkjín nó nga kui xá sʼín je xi na̱ ngisaa nkjín koya jmeni xi male bʼénda tikʼoajinni tsotile. Tikʼoasʼinni, jngo chjota xi tosʼa choatsele nga tíkotʼaya Énle Niná tosʼaa choa jmeni xi majinle jotso Biblia, tonga jngo chjotale Cristo xi jekjoatse tíkotʼaya ngisaa tse jmeni xi majinle, nga̱ tíbʼantjaiyaa josʼin tíjna saʼnda nga kisʼenngindá kʼoa tsakui nichxin kjaʼaí kjaʼaí xá tísʼenele jinnaxinandále Niná. Nkjín koya josʼin basenkaoná ndʼaibi jmeni xi koanjinná nga tosʼa kichotʼayá Énle Niná, kʼoa i̱ kjoaʼmiya jebi jan koya tjínni xi chótʼayajiaan. Kʼoati jchaa jméni xi bakóyaná ninga jekjoatse tichotʼayá Énle Niná.
JÉ JEOBÁ KISINDANÁ
4. Jósatío tokoán nga majinná nga je Jeobá kisinda ngayeje jmeni xi tjín.
4 ʼYañá nga nʼio chjine kʼoa nga nʼio tse nganʼio tjínle je Niná, nga̱ jé kisinda sonʼnde kao ngayeje jmeni xi tjín. Ya Biblia itso: “Je xi tsakʼénda ngayije, jé Niná” (Heb. 3:4). Nga je Niná kisindaná nda bexkonná, tsjoakená kʼoa jé xi ngisa nda be jméni xi sʼiaan nga nda kuiyoaa. Xi ijngosani, nda satío tokoán nga majinná nga je Jeobá kisinda ngayeje jmeni xi tjín.
5. Ánni nga tjínnenile nangitokon koaan (Isaías 45:9-12).
5 Nga ʼyaa nga je Jeobá kisindaná kʼoati majinná nga tjínnele nangitokon koaan. Si̱kjaʼaitsjenla jokoan je Job kʼianga to yaole kini kʼoa nga tokui kini josʼin sikjaʼaitsjen chjota xi tʼatsʼe. Nga kʼia, je Jeobá kʼoakitsole nga je kisindaná kʼoa nga nʼio tse nganʼio tjínle (Job 38:1-4). Nga kʼoatsakʼinle Job, koanjinle nga ñaki kixi jmeni xi sʼín ngantsjai je Jeobá. Kʼoa je Isaías itso xi kiski: “Je niʼnde a i kuitsole je xi tii sínda: Ánni kʼoanʼiani” (tʼexkiai Isaías 45:9-12).b
6. Jósʼin basenkaoná nga nikjaʼaitsjenjiaan nga nʼio chjine Jeobá kʼoa nga nʼio tse nganʼio tjínle (kʼoati chótsenlai sén xi faʼaitʼa).
6 Jngo chjotale Cristo xi jekjoatse tíkotʼaya Énle Niná tsakui nichxin sakʼoa tokui koaini josʼin síkjaʼaitsjen ʼndele nga kui kuenta sʼin jmeni xi tso Jeobá kʼoa jmeni xi tso Biblia (Job 37:23, 24). Nga tsín kʼoakoaan, machjén nga si̱kjaʼaitsjenjiaan nga nʼio chjine je Jeobá kʼoa nga nʼio tse nganʼio tjínle (Is. 40:22; 55:8, 9). Nga ʼyaa jebi, majinná nga tjínnele nangitokon koaan kʼoa nga ngisa chjíle josʼin síkjaʼaitsjen Jeobá tikʼoajinni ñá.
Jméni xi koasenkaoná nga kuenta sʼiaan nga ngisa chjíle josʼin síkjaʼaitsjen Jeobá tikʼoani josʼin nikjaʼaitsjeen ñá (Chótsenlai párrafo 6)g
7. Jméni xi tíbasenkao Rahela nga tísítjoson josʼin tíbándiaa naxinandále Niná.
7 Kataʼyala tʼatsʼe jngo tichjaa xi Rahela ʼmi, xi Eslovenia tsʼe. Kʼianga síkjaʼaitsjenjin nga je Jeobá kisindaná tíbasenkao nga tísítjoson jmeni xi bʼantjaiyajin naxinandále Niná. Itso: “Sakʼoa ñʼai mana nga sitjosoan jmeni xi bʼéndajin je ndsʼee xi bándiaale xále Niná. Tobʼelañá, alikui kisasenna kʼianga tosʼa tsaʼbe títjoan nga ntsja̱ʼa kji jngo ndsʼee xi tínchja̱ya, ningalani jekiskotsenle je video Xi tso Cuerpo Gobernante (xi majinni) xi tsʼe nó 2023. Tsakʼetsʼoale je Jeobá nga kʼoakixinle nga katabasenkaona nga tsín tikʼoasʼin sikjaʼaitsjenña”. Je Rahela koanjinle nga je Jeobá, xi kisinda ngʼajmi kao sonʼnde, nʼio ndasʼin tíbándiaale naxinandále. Tsa kʼoati ñʼai ma sakʼoali nga majinli ánni nga bʼantjaiyajin sakʼoani josʼin makjainná kʼoa josʼin bándiaaná naxinandále Niná, tikjaʼaitsjenjin nga nʼio chjine je Jeobá kʼoa nga nʼio tse nganʼio tjínle (Rom. 11:33-36).
ÁNNI TSJOÁʼNDENI NINÁ NGA KJOAÑʼAI CHJAʼÁ
8. Jósʼin tíbasenkaoná nga majinná ánni tsjoáʼndeni Niná nga kjoañʼai chjaʼá.
8 Nga tsín majinle chjota ánni tsjoáʼndeni Niná nga kjoañʼai chjaʼá, tjínkʼa xi tsín timakjainnile xi tʼatsʼe Niná kʼoa tjínkʼa xi kʼoatso nga tsín Niná (Prov. 19:3). Tonga ñá majinná nga tsín je Jeobá tjínle jée, nga̱ kuinga kjoañʼai chjaʼañá kʼoa biyañá nga chjotajée maa. Nga tsejta kjima Jeobá millón mani chjota xi tjíobe xi tʼatsʼe kʼoa kjimajinle jmeni xi sʼin nga kjoaʼaxin kjoañʼai (2 Ped. 3:9, 15). Nga majinná jebi sínʼio tokoán kʼoa ngisaa machriantʼalee Jeobá.
9. Kʼiáni ngisa machjén nga si̱kjaʼaitsjenjiaan ánni tsjoáʼndeni Jeobá nga kjoañʼai chjaʼá.
9 Tjínnele tsejta koaan nga chóyaa saʼnda nga kjoaʼaxin Jeobá je kjoañʼai. Kʼianga kjoa bitjatojiaan sakʼoa kui nikjaʼaitsjeen ánni nga kje faʼáxinjinni Jeobá je kjoañʼai, tsa tsín kixi tíjna jmeni xi koa̱ntʼeen, tsa xíngiaa kuiyá kʼoa tsa jmesani xi koa̱nná (Hab. 1:2, 3). Kʼianga kʼoasʼe tokoán koaan si̱kjaʼaitsjenjiaan ánni tsjoáʼndeni Jeobá nga kjoañʼai faʼá je xi nda chjota (Sal. 34:19).c Kʼoati koa̱n si̱kjaʼaitsjenjiaan nga kui xi mele Jeobá nga tondiaa kjoaʼaxin kjoañʼai.
10. Jmé xi tíbasenkao Anne nga nda tísʼe kon ninga na̱le kʼien.
10 Chókjoajinná je kjoa xi bitjatojiaan kʼianga majinná ánni tsjoáʼndeni Jeobá nga kjoañʼai chjaʼá. Jngo tichjaa xi Anne ʼmi, xi ya tsʼe jña Mayotte ʼmi, ʼnde xi tíjnajin ndáchikon Índico, itso: “Kʼianga kʼien mana nʼio ba kisʼe tokoan, kʼoa tosʼaa jngo jao nó tjínle nga kʼoakoan. Ntsjaintsjai sikjaʼaitsjenjian nga tsín je Jeobá tjínle jée nga kjoañʼai chjaʼá. Je Jeobá kui xi mele nga tsín tikjoañʼai chja̱ʼáñá kʼoa sikjaʼáyale je xíngiaa xi jekʼien. Ninga ba tjínna nga kʼien mana, nda sʼe tokoan nga kui sikjaʼaitsjenjian jmeni xi sʼin Jeobá”.
11. Ánni tosi tonda ʼmiyasonñá.
11 Tosi tonda ʼmiyasoán nga majinná ánni tsjoáʼndeni Niná nga kjoañʼai chjaʼá. Je Pedro kʼoakitso nga totʼatsʼe nga tsejta Jeobá kuitjontjaile yaole je xi kʼoakoa̱nnile jéele. Xijekoan, i kitso: “[Tikjaʼaitsjaon] jósʼin mangínkao yaono xi tʼatsʼe kjoa xi tsje, kʼoa jósʼin ʼyaxkón Niná” (2 Ped. 3:11). Jngo koya josʼin bakoá nga ʼyaxkoán Niná kʼiaa nga ʼmiyasoán. Joni Jeobá, tsjoachañá chjota kʼoa kui xi mená nga koatio kʼianga jekoa̱nndachon sonʼnde. Nga tsejta Jeobá, títsjoásale nichxin je chjota nga katabexkon ánni nga je skoe̱xkónni. Kʼoati kui kjoanda tjínná nga tibinyakoaa chjota nga katabexkon Niná nga kjesa fetʼajin jme xi chon sonʼnde (1 Cor. 3:9).
NICHXIN FETʼA TIYOAA
12. Jméni xi sʼejngo tokoán nga ʼyaa nga tíbitjoson jmeni xi tso Biblia.
12 Ya Biblia kʼoatso jokoa̱nkjoan chjota nga jetífikjetʼa nichxin (2 Tim. 3:1-5). Ñaki xkoaan tiʼyañá nga tíbitjoson jmeni xi tso Biblia. Nga sa chʼao sa chʼao tjíosʼín chjota, sʼejngo tokoán nga ñaki kʼoatjín jmeni xi tso Énle Niná (2 Tim. 3:13-15).
13. Jméni xi ndatjín nga si̱kjaʼaitsjenjiaan (Lucas 12:15-21).
13 Kʼianga nichxin fetʼa tiyoaa machjén nga kuenta sʼiaan jmeni xi ngisa tjínle kjoandosin kʼoa ndasʼin si̱chjén nichxinná. Jmeni xi kitso Jesús ya Lucas 12:15-21d (tʼexkiai) kui kinchja̱ni nga nʼio chjíle nga ndasʼin si̱chjén nichxinná. Ánni nga chjotachini kitsonile je chjotanyiná. Kuinga to yaole kini nga to kjoanyiná tsakásjai kʼoa tsín nda tsakʼejna ngixko̱n Niná. Nʼio chjíle nga nda kisichjén nichxinle tsakai, nga̱ je Niná i kitsole: “Kui nitje̱n jebi kuiyái”. Jméni xi bakóyaná. Nga ʼyaa nga tojeme kjoetʼa jme xi chon sonʼnde, machjén nga si̱kjaʼaitsjenjiaan jebi: “A kui titsjoale kjoandosin jmeni xi ngisa chjíle. A kʼoaxinle je xtina nga kui ngisa katatsjoále kjoandosin xi ngisa chjíle. Jósʼin tisichjén nganʼiona, nichxinna kao tao̱nna. A i sonʼnde tibasje kjoanyiná axo yaa ngʼajmi tibʼejnatjoa kjoanyiná”.
14. Tojo kisʼin Miki, ánni ndatjínni nga si̱kjaʼaitsjenjiaan nga nichxin fetʼa tiyoaa.
14 Nga nikjaʼaitsjenjiaan jme choa̱ xi tjín nga nichxin fetʼa tiyoaa, kui ngisa bʼailee kjoandosin jmeni xi ngisa chjíle. Tojo kisʼin jngo tichjaa xi Miki ʼmi. Je tichjaa itso: “Kʼianga jejetʼana skuela, koanmena kia universidad nga tʼatsʼe cho̱ skotʼaya. Tonga kʼoati koanmena nga precursora regular sʼin sixá kʼoa nga ya kjuía jñani ngisa machjén xi tsoyason. Tjínkʼa ndsʼee xi kʼoakitsona tsa tsjoána nichxin nga kʼoakji skotʼaya kʼoa kʼoakji sixále Niná. Kʼoakitsona nga tochoasa chale nga kjoetʼa jme xi chon sonʼnde kʼoa nga koa̱n kʼia skotʼaya xi tʼatsʼe cho̱ nga jekjoaʼaí sonʼnde chjotse. Kuinga kui xá kiskotʼayaña xi tsín tse nichxin kjoaʼana, xi koasenkaona nga koanjngiʼa yaona. Kisokoxána kʼoa precursora regular sʼin kisixá. Kʼoa nga koanskanni, yaa Ecuador kia, jñani ngisa machjén xi tsoyason”. Ndʼaibi, je Miki kao xʼinle, superintendente xi tsʼe circuito sʼin tjíosíxá.
15. Jmé xi bakóyaná choa̱le Santiago (kʼoati chótsenlai sén xi faʼaitʼa).
15 Alikui si̱kʼajenlee tokoán ninga tsín kjuinrʼoéná chjota kʼianga ʼmiyasoán nga̱ tjínkʼa xi skan makjainle. Kʼoakoan je Santiago, xi ndsʼe̱ koanni Jesús, alikui tokjoan koankjainle xi tʼatsʼe Jesús ningalani tsabe josʼin koanjchínga, ninga nʼio nda kitsoya kʼoa ninga koanjinle nga je xi Niná kisikasén. Kʼiaa saʼnda chjotatjenngile koanni nga jejaʼáyanile Jesús kʼoa nʼio nda kisixále Niná (Juan 7:5; Gál. 2:9).e Kuinga machjénni nga tosi tonda kʼuínyalee Énle Niná je chjota ninga tjínkʼa xi tsín nrʼoéná ndʼaibi kʼoa tsín kʼoasʼin si̱kjaʼaitsjeen nga tsínkʼia koa̱nkjainle je xíngiaa. Nʼio tjínle kjoandosin nga kʼuínyasoán nga̱ to jenichxin fetʼa tiyoaa. Tjínjinkʼa xi kʼia kjoaʼaítsjenle nichxin xi sʼa nroa jmeni xi ʼmilee ndʼaibi, kʼoa tsa kʼia kjoaʼaítsjenleje̱ nga jekoaitsʼia kjoañʼai xi nʼio tse.f
Ánni machjénni nga tosi tonda chja̱kaonajmíñá xíngiaa je Énle Niná (Chótsenlai párrafo 15)h
TOSI TONDA CHJÍ JCHATOKOÁN JMENI XI TSONÁ JEOBÁ
16. Jósʼin tíbasenkaoli jmeni xi tso Jeobá (kʼoati chótsenlai je recuadro “Koaan kui jebi tichjain nga kuisenkoai xi kjaʼaí”).
16 Tjín je xo̱n kao video xi bʼasje naxinandále Niná xi je satíondale chjota xi tsín be Énle Niná. Jolani je kjoanokjoaya xi noʼyalee nga satíoná kjoajtín kʼianga tífe xomana, je video kao jmeni xi faʼaitʼa ya jw.org kʼoa kao revista xi je chjile chjota xi tsín testigole Jeobá ma. Tonga binyakaoná ngatsʼiaa jmeni xi faʼaitʼa, nga̱ ngisaa tsjoacha maa Jeobá, ngisaa sʼejngo tokoán nga kʼoatjín jmeni xi tso Énle Niná kʼoa binyakaoná nga ʼmiyalee xi kjaʼaí (Sal. 19:7).
17. Jósʼin basenkaoná jmeni xi koanjinná nga tosʼa kichotʼayá Biblia.
17 Xi jekjoatsená nga tinixálee Jeobá, tsjoa satío tokoán kʼianga noʼyá nga jme xi bʼantjaiyajin josʼin makjainná tsakai jmeni xi tso Biblia. Kʼoati chjí ʼyaa jmeni xi koanjinná nga tosʼa kichotʼayá Énle Niná nga̱ tsee xi bakóyaná nga tosi tonda chotʼayajiaan. Tsa ñʼai maná nga mangíntjenngiaa jotso naxinandále Niná kʼianga jme xi bʼantjaiyajin, tsa sakʼoa tokui mangínñá josʼin nikjaʼaitsjeen kʼoa tsa to jekoanngakaoná jonʼia, machjén nga nangitokon koaan kʼoa kuenta sʼiaan nga je Jeobá tíbándiaale naxinandále.ʼYañá nga je Jeobá nʼio chjine kʼoa tsee nganʼio tjínle. Tsa ñá xi kjoa kuitjátojiaan kʼoa tsa je xíngiaa, machjén nga tsejta koaan kʼoa si̱kjaʼaitsjenjiaan ánni tsjoáʼndeni Jeobá nga kjoañʼai chjaʼá. Kʼoa kʼianga si̱kjaʼaitsjenjiaan josʼin si̱chjén nichxinná kao jmeni xi tjínná, kuenta sʼiaan nga to jenichxin fetʼa tiyoaa. Tsa tosi tonda kuenta sʼiaan jmeni xi tsoná Jeobá, kuijin kʼoasʼiaan xi ndatjín kʼoa tosi tondajin kixi kjuintʼalee.
KJOAJNDA 95 Sa kjimaʼisen sa kjimaʼiseen
a 2 Pedro 1:12, 13: “Kui kjoa likui koatejnajyoa nga sikjaʼaitsjen ntsjaino je kjoabi, nda tsa jeʼyao, nda tsa jetiyonʼiojinlao je kjoakixi xi jetjínno. 13 Tjen nga tijnajinsa je yaona, kʼoaxian nga nda tjín nga kʼoasʼin kʼoeneno, nga sikjaʼaitsjenno”.
b Isaías 45:9-12: “Ma̱xóni je tii niʼnde xi bʼékjaoʼakao je xi kisinda, nga̱ tokui koanndani je niʼnde xi tjín jinʼnde. Je niʼnde a i kuitsole je xi tii sínda: Ánni kʼoanʼiani. Axo i kuitso: Tsínle ndsʼa̱n xi kinindai. 10 Ma̱xóni je xi i̱ tsole nʼaile: Ánni nga kitsinña. Kʼoa xi i̱ tsole na̱le: Ánni nga jeʼe̱ña sonʼnde. 11 Kui jebi xi tso Jeobá, xi Tsje tíjna, je Ninále Israel, je xi kisinda jmeni xi tjín: A ngisaa ʼyao tʼatsʼe jmeni xi kisinda kʼoa a jon kʼoakʼuínnáo josʼin sijchá xtina kao jmeni xi sʼian nichxin xi nroa. 12 An kisinda je sonʼnde kao chjota. Kao ndsa̱ kisindaña ngʼajmi kʼoa an xokixian nga kisʼe ngayeje jmeni xi ya tjín”.
c Chótʼai jñani “Pronto acabará todo el sufrimiento” tso, xi faʼaitʼa revista La Atalaya xi tsʼe 15 de mayo de 2007, página 21 saʼnda 25.
d Lucas 12:15-21: “Kʼia Jesús kitsole ngatsʼi: Chótsaon, kʼoa tikuindao yaono jatʼatsʼe ngayije kjoachi̱nga̱, nga̱ je kjoabijnachonlebi chjota, alikuijin xi tsonile nga nkjín tsojmi xi tjínle. 16 Kʼia kitsoyale jngo kjoaxkóson, kitso: Tse tsojmi kitsjoa je nangile jngo chjotanyiná. 17 Je tífákao jko̱, títso: Jmé xi sʼian, nga̱ tsínna jña kuinyaxkoá tsojmina xi majchá. 18 Kʼoakitso: Jebi kʼoasʼian. Sikixoya ningʼana, kʼoa kʼoenda xi ngisa je. Yabe kuinyaxkoá ngayije xi koa̱njchána kao tsojmina. 19 Kʼoaxínle ni̱ma̱na: Ni̱ma̱, kjaínga nkjín tsojmi tjínli xi nkjín nó si̱nyátjao. Tikjáyai, tichi, tʼui, kjoáyatsjoai takuin. 20 Tonga Niná kitsole: Chi̱kuín, je nitje̱nbi kjoaʼaí síjéngáni ni̱ma̱li, kʼoa ngayije xi tongini tjíondali, ʼyá tsʼe koa̱n. 21 Kʼoasʼin je xi bʼéxkóle yaole kjoanyiná xi titʼatsʼeni, ali nyinájin tʼatsʼe Niná”.
f Chótʼai je Xo̱n xi Bájinkonná xi tsʼe mayo 2024, página 8 saʼnda 13 jñani tso: “Jméni xi ʼyaa josʼin kʼoendajinle kjoa Jeobá je chjota nichxin xi nroa”.
g XI TÍNCHJA̱NI SÉN XI FAʼAITʼA: Kʼianga tjíojtín xi chjotajchínga sʼin tjío, jngo xi kʼoatítso josʼin síkjaʼaitsjen, tonga xi ngikʼa alikui sasénle jmeni xi tso. Xijema, síkjaʼaitsjenjin jmeni xi katso kʼianga tíkotsenle niño. Majinle nga ngisa chjíle josʼin síkjaʼaitsjen Jeobá tikʼoani je.
h XI TÍNCHJA̱NI SÉN XI FAʼAITʼA: Je tichjaa kui tíkotʼayajin jme choa̱ xi tjín nga jenichxin fetʼa tiyoaa, kuinga nchja̱nile je ndichja nga fákaonajmíni Énle Niná.