KJOAʼMIYA XI CHOTʼAYA 46
KJOAJNDA 17 “Mena”
Je Jesús mamakená nga Naʼmitítjon sʼin tíjna
“Nga̱ tsín tsa tjínná jngo naʼmitítjon xi tsín tsa koa̱nle koa̱nmakená, nga̱ tsín tse nganʼio xi tjínná” (HEB. 4:15).
XI TÍNCHJA̱NI
Ánni kʼoabixónñá nga mamakená je Jesús nga Naʼmitítjon sʼin tíjna kʼoa jósʼin basenkaoná ndʼaibi.
1, 2. 1) Jmé xá kinikasénni Jesús i̱ sonʼnde. 2) Jmé xi chótʼayajiaan i̱ kjoaʼmiya jebi (Hebreos 5:7-9).
JELA 2,000 nó tjínle nga kisikasén Jeobá je ʼNdíle nga kʼienntjainá, nga ndái kuiyolee je jée kao kjoabiya. Kʼoa nga tsínti kui kjoa sʼe̱ni jme kjoa xi tíbajngi Na̱i (Juan 3:16; 1 Juan 3:8). Kʼianga i̱ sonʼnde kinikasén Jesús, je Jeobá be nga ngisa nda koa̱njinle josatío tokoán xi chjota. Kʼoa je Jesús kʼiaa Naʼmitítjon sʼin tsakʼejna kʼianga nó 29 nga jekisʼenngindá.a
2 I̱ kjoaʼmiya jebi kui chótʼayajiaan nga ngisa nda koanjinle Jesús nga jaʼai i̱ sonʼnde jme xá xi sʼe̱nele nga Naʼmitítjon sʼin kʼoéjna. Nʼio chjíle nga nda koa̱njinná jme xá xi kjinele je Jesús nga̱ ngisaa kuitso tokoán nga kʼoétsʼoalee je Jeobá ninga kʼia nga bijnyijée kʼoa tsa jñani tsín nda nʼia (tʼexkiai Hebreos 5:7-9).b
JÉ KISIKASÉN JEOBÁ I̱ SONʼNDE JE ʼNDÍLE XI NGISASA NʼIO TSJOAKE
3, 4. Jósʼin tsakʼejna Jesús nga jaʼai i̱ sonʼnde.
3 Ngatsʼiaa ñʼai maná nga xin ʼnde mangínkiyoaa nga̱ nikatíoñá je xíngiaa kʼoa tsa je miyoná. Tonga je Jesús nʼio tse jmeni xi kisʼin kʼianga jaʼai i̱ sonʼnde, nga̱ ya ngʼajmi je tsakasentítjonle ngatsʼi ánkje xi ya tjío. Nʼio tsjoake koan xi ya tjío kʼoa yaa ñatjen kisixá kao je Nʼaile (Sal. 16:11; Prov. 8:30). Ya Filipenses 2:7 kʼoatso nga kisikʼéjna ngayeje jmeni xi tjínle nga jaʼai i̱ sonʼnde.
4 Jósʼin tsakʼejna je Jesús i̱ sonʼnde kʼianga tochriankʼia kitsin. Kʼianga kitsin Jesús je xijchále jao nisechxoa kitsjoatʼa kʼoa kʼoasʼin ʼyañá nga ma̱ kisijchá yaole (Lev. 12:8; Luc. 2:24). Kʼoa nga kisʼejinle rey Herodes nga kitsin je Jesús koanmele kisikʼien kuinga ya Egipto kikationi José, María kao Jesús nga koan kitjoʼale yaole (Mat. 2:13, 15). Kʼianga jaʼai Jesús i̱ sonʼnde alikui tikʼoasʼin tsakʼejnani josʼin tsakʼejna ya ngʼajmi.
5. Jméni xi koanjinle Jesús nga jaʼai i̱ sonʼnde (kʼoati chótsenlai sén xi faʼaitʼa).
5 Kʼianga tsakʼejna Jesús i̱ sonʼnde tsabe jokji kjoañʼai tjíofaʼá je chjota kʼoa koanjinle josʼe tokoán nga xíngiaa biya nga̱ kʼoati kʼien José xi nʼaile koan. Koanmake je xi tjíofiʼndojon yaole, xi xka̱ kjoan, xi tokjioyása yaole kʼoa xi kjoaba tjíojin nga ʼndíxtile kisicha (Mat. 9:2, 6; 15:30; 20:34; Mar. 1:40, 41; Luc. 7:13). Kʼianga tsakʼejna Jesús ya ngʼajmi tsabe nga kjoañʼai faʼá je chjota (Is. 53:4). Tonga kʼianga jaʼai i̱ sonʼnde ngisaa tinda koanjingánile josatío tokoán nga kjoa bitjatojiaan nga̱ kʼoati kjoa jaʼatojin tsanda je, kijtale kʼoa ba kisʼe kon.
Je Jesús kuenta kisʼin jokisatio kon je chjota kʼoa koanmake nga kjoañʼai tjíofaʼá (Chótsenlai párrafo 5)
JE JESÚS KISIJINLE YAOLE JOSʼIN TJÍO JE CHJOTA
6. Jméni xi bakóyaná je choa̱ xi kisichjén je Isaías (Isaías 42:3).
6 Nga kitsoyason je Jesús kisijinle yaole jokisatio kon je chjota xi totaon tsaʼya. Nga kʼoakisʼin kʼoasʼin kisitjosonni jmeni xi tongini kitso Isaías. Ya Escrituras Hebreas sakʼoa ya síngósonkao je chjota xi nda tjío jngo yá xi séjna xkoén xkoén kʼoa xi yale naxó (Sal. 92:12; Is. 61:3; Jer. 31:12). Kʼoa je chjota xi ma̱ tjío xi totaon tsaʼya yaa koanngóson je yána̱xo̱ xi chikjan kʼoa xi totítjoʼndi̱sa xka̱le (tʼexkiai Isaías 42:3).c Nga kui choa̱ kisichjén Isaías kui kinchja̱ni nga tjao koa̱nle Jesús kʼoa koa̱nmake je chjota xi totaon tsaʼya.
7, 8. Jósʼin kisitjoson je Jesús jmeni xi tongini kitso Isaías.
7 Je Mateo kʼoakitso nga je Jesús kisitjoson jmeni xi kitso Isaías, nga i̱ kitso: “Alikui skótʼaó je yána̱xo̱ xi chikjan, kʼoa likui sikitsʼao je xka̱ xi totjoʼndi̱” (Mat. 12:20). Jmeni xi kisʼin Jesús tsakinyakao je chjota xi totaon tsaʼya kʼoa tsa jeje̱ xi kʼoasʼin kisikjaʼaitsjen nga tsínti kʼia nda koationi. Tobʼelañá, je chjota xi kjiʼndojon yaole tsakui nichxin kʼoasʼin kisikjaʼaitsjen nga tsín tikʼia koa̱nndayani kʼoa nga tsín tikʼia ya kʼoéjnakaoni xínkjín kao miyole (Luc. 5:12, 13). Kʼoa si̱kjaʼaitsjenjinla jóxótse kisʼe kon je chjota xi tsín nrʼoé kʼoa xi tsín ma nchja̱ nga tsabe nga tjíofáonajmí xi ngikʼa chjota kʼoa nga tsín nrʼoé jmeni xi tjíotso (Mar. 7:32, 33).
8 Je chjota judío kʼoasʼin koankjainle nga kuinga yo̱ma̱ koankjoanni je chjota kʼoa nga chʼin kisʼenile nga tsakajngijée xijchále nga kjesa tsinjin kʼoa tsa jeje̱ xokisʼin (Juan 9:2). Nga kʼoatsakʼinle je chjota xi chʼin kisʼele kʼoa je xi yo̱ma̱ koankjoan kuinga tsín chjí tsabeni yaole. Tonga nga kisindaya Jesús nda kisatio kon kʼoa kʼoasʼin tsakakónile nga chjí bekon Niná. Nga kʼoakisʼin Jesús kʼoasʼin kisitjosonni jmeni xi kitso Isaías. Jméni xi bakóyaná jokisʼin Jesús.
9. Jósʼin bakó Hebreos 4:15, 16 nga mamakená je Jesús xi Naʼmitítjon sʼin tíjna.
9 (Tʼexkiai Hebreos 4:15, 16).d Alikui jao tjín tokoán nga kʼoati mamakená tsanda ñá je Jesús. Kʼianga én griego je én xi “koa̱nmakená” sʼin jaʼatoya kui nchja̱ni nga ba sʼe tokoán kʼoa nga aon maná nga ʼyaa je chjota xi kjoañʼai tjíofaʼá. Je Pablo kʼoati kui én kisikʼaxki̱ ya Hebreos 10:34 nga kui kinchja̱ni nga mamachaa je chjota xi ndoyá tjíoʼya. Je Jesús koanmake je chjota xi chʼin tjínle nga tsabe jokji kjoañʼai tjíofaʼá kuinga kisindayani. Tobʼelañá, je chjota xi tífiʼndojon yaole jejin nkjín nó nga tsín tiʼya xi síchriannile kuinga ñaki kisikaoni nga kisindaya. Kʼoati kiskosonnile jokisikao je chjota xi tsín nrʼoé, kikao tʼaxin nga kisindaya. Kʼoa kinchja̱ntjai Jesús je chjoón xi kao ndáxko̱n kichokanéjonni ndso̱ko̱ kʼianga toxkia tsakjákao je chjota fariseo (Mat. 8:3; Mar. 7:33; Luc. 7:44). Alikui totaon tsabe je xi chʼin tjínle kʼoa tsa je xi jée tsakajngi tosaa nda kiskoeya kʼoa koanmake. Ñaki tjínjngoo tokoán nga kʼoati sʼin mamakená tsanda ñá.
CHJÉNNGILEE JE XI NAJMITÍTJON SʼIN TÍJNANÁ
10. Jósʼin kuinyakoaa nga katabe xi tʼatsʼe Niná je chjota xi tsín nrʼoé kʼoa xi tsín tsenle (kʼoati chótsenlai sén xi faʼaitʼa).
10 Nga je Jesús chjenngilee bakolee kjoatsjoacha chjota kʼoa nijinlee yaoná jotjío kon (1 Ped. 2:21; 3:8). Ningalani tsín maná nindayaa chjota xi tsín tsenle kʼoa xi tsín nrʼoé tonga koaan kuinyakoaa nga katabe xi tʼatsʼe Niná. Tobʼelañá, je xo̱n xi Énle Niná yʼangini jetsʼato 100 én seña tífaʼatoya. Kʼoati jetsʼato 60 én braille tífaʼatoya xi síchjén xi tsín matsenle kʼoa jetsʼato 100 én tífaʼatoya je video xi tiya kʼoatsoni jmeni xi kifaʼa. Je chjota xi tsín nrʼoé kʼoa xi tsín tsenle nda binyakao nga be xi tʼatsʼe Jeobá kao xi tʼatsʼe Jesús.
Jetsʼato 1,100 én tífaʼatoya je xo̱n xi Énle Niná yʼangini
Sén xi títjon: Jetsʼato 100 én seña tífaʼatoya je xo̱n xi Énle Niná yʼangini
Sén xi majaoni: Jetsʼato 60 én tífaʼatoya nga braille xi síchjén xi tsín matsenle
(Chótsenlai párrafo 10)
11. Jósʼin tífitjenngi choa̱le Jesús je naxinandále Niná (Hechos 2:5-7, 33; kʼoati chótsenlai sén xi faʼaitʼa).
11 Kʼianga jejaʼáyanile Jesús kitsjoale nganʼiotsje je chjotatjenngile nga koan kitsoyale Énle Niná je chjota xi kicho nga kisʼejna sʼuí Pentecostés ninga kjaʼaí kjaʼaí én nchja̱ (tʼexkiai Hechos 2:5-7, 33).e Je naxinandále Jeobá tojo kʼoatísʼín ndʼaibi jokisʼin je Jesús, tíbakóyale Énle Niná je chjota xi kjaʼaí kjaʼaí én nchja̱. Kuinga jetsʼato 1,100 én tífaʼatoyani je xo̱n xi Énle Niná yʼangini, tífaʼatoya ninga tochoa mani je chjota xi kui én nchja̱. Tobʼelañá, i̱ México kao jña xinsa naxinandá jesiento én tífaʼatoya je xo̱n xi Énle Niná yʼangini. Kʼoati jetsʼato 20 koya én romaní tífaʼatoya (xi kʼoati én gitano sʼin ʼyale). Nga kʼoakjima, jmi chjota kjimakjainle Énle Niná.
Sén xi majanni: I̱ México kao jña xinsa naxinandá, jesiento én tífaʼatoya je xo̱n xi Énle Niná yʼangini ninga tochoasa chjota xi kui én nchja̱
Sén xi mañoni: Jetsʼato 20 koya tífaʼatoya nga én romaní je xo̱n xi Énle Niná yʼangini
(Chótsenlai párrafo 11))
12. Jmésa xi tísʼín je naxinandále Jeobá.
12 Je naxinandále Jeobá nʼio nkjín chjota tíbasenkao nga tjíobe xi tʼatsʼe Jeobá. Kʼoati bʼéndajin nga katabʼainganʼiole je xi kjoaxkón bichóne, jolani jñani faʼa cháon, jñani tsendá kʼoa jñani bichó Huracán. Nkjín ndsʼee xi fitsjoánganʼio ya jñani kjoaxkón sʼe kʼoa je naxinandále Jeobá básjai ʼnde jñani ma batiojtín je chjota nga ʼmiyale Énle Niná ánni nga katabeni jokji tsjoakená je Jeobá.
BINYAKAONÁ NGA JNGÓ JNGOÁ JE XI NAʼMITÍTJON SʼIN TÍJNANÁ
13. Jósʼin basenkaoná je Jesús.
13 Nga nda síkuindaná je Jesús kuenta sʼín jmeni xi kuinyakaoná nga nʼio sa̱tío kjoamakjainná (Juan 10:14; Efes. 4:7). Kʼianga kjoa bitjatojiaan yaa mangósoán je yána̱xo̱ xi chikjan kao je xka̱ xi totítjoʼndi̱sa. Tsakui nichxin tsín nda sʼe tokoán tsa táo chʼin tjínná, tsa jme jée tsakijnyaa kʼoa tsa jme kjoa tjínná kao jngo ndsʼee. Tokui ngisa nʼio nikjáojiaan je kjoa xi sʼená ʼndele nga kui si̱kjaʼaitsjenjiaan josʼin kuiyoaa nichxin xi sʼa nroa. Je Jesús be jme kjoa xi bitjatojiaan, majinle josatío tokoán kʼoa basenkaoná. Tsjoáná nganʼio nga chókjoajinná kʼiatsa tínroajen tokoán (Juan 16:7; Tito 3:6). Jé síchjén xi chjotajchínga sʼín tjío nga binyakaoná kao xi ngikʼa ndsʼee xi tjío ya jinjtín (Efes. 4:8).
14. Jméni xi sʼiaan kʼiatsa tínroajen tokoán.
14 Kʼianga nroajen tokoán si̱kjaʼaitsjenjiaan nga Naʼmitítjon sʼin tíjnaná je Jesús kʼoa nga kui xá kisikasénni Jeobá i̱ sonʼnde nga kʼienntjainá kʼoa nga koa̱njinle josatío tokoán nga kjoa bitjatojiaan. Kʼianga chʼao satío tokoán tʼatsʼe jéená kʼoa tsa jñani tsín nda nʼia, je Jesús kʼiakjoán basenkaoná nga nganʼio machjénná (Heb. 4:15, 16).
15. Jmé xi tsakasenkao jngo ndsʼee nga tsakʼejnajin ijngokʼani naxinandále Niná.
15 Je Jesús kʼoati kui xá títsjoále je chjotale nga katabinyakao xi jekisikjinle Niná (Mat. 18:12, 13). Kataʼyala jokoan jngo ndsʼee xi Stefano ʼmi.f Kʼianga kichʼasjejin ya jinjtín 12 nó koanskanni ki ijngokʼa kjoajtín, itso: “Kʼianga kichoa ya Ndʼia jña chotʼayá alikui kitso tokoan nga jaʼa̱sʼe̱n tonga kui xi koanmena nga ya koatejnajin ijngokʼa naxinandá Jeobá. Kʼianga tsakjákaonajmína je xi chjotajchínga nʼio kitsjoanganʼiona nga̱ sakʼoa kinroajen tokoan nga kʼoasʼin kisikjinle Jeobá tonga je ndsʼee kʼoakitsona nga kui xi mele Jeobá kao Jesús nga je sixá ijngokʼale. Kʼianga jetsakatejnajinña naxinandále Niná nda kiskoéyana ngatsʼi ndsʼee kʼoa kʼoati kisikao je familiana. Nga koanskanni, kiskotʼaya Énle Niná je chjoónna kʼoa jé Jeobá tinixálaijin nga joaijin”. Je Jesús xi Naʼmitítjon sʼin tíjnaná nʼiojin tsjoa sʼe kon nga binyakoaa ngatsʼiaa nga je xi kʼoamanile jéele nga faʼaikatiojin ijngokʼa naxinandále Niná.
16. Ánni bʼainilee kjoanda Niná nga Naʼmitítjon sʼin kisikasénjna je Jesús.
16 Kʼianga tsakʼejna Jesús i̱ sonʼnde nʼio nkjín chjota tsakasenkao xi nganʼio koanchjénle. Ñaki tjínjngoo tokoán ndʼaibi nga kʼoatisʼin koasenkaoná kʼianga nganʼio machjénná. Kʼianga jeʼndenaxó koa̱n sonʼnde kjoaʼaxin je jée xi kichá ánni nga chjotatsje koa̱nñá. Bʼailee kjoanda Niná nga Naʼmitítjon sʼin kisikasénjna je Jesús nga̱ mamakená.
KJOAJNDA 13 Choa̱ xi tsakʼéjnaná Cristo
a Kʼianga jchai jme xá xi tjínle Jesús nga Naʼmitítjon sʼin tíjna kʼoa nga je tsakʼejnayangajaole je xi naʼmitítjon koan ya naxinandá Israel, chótʼai je Xo̱n xi Bájinkonná xi tsʼe sá octubre 2023, página 26 párrafo 7 saʼnda 9 jñani tso: “Chjí jchaa nga kʼoasʼin tiʼyaxkoán je Jeobá josʼin mele”.
b Hebreos 5:7-9: “Kʼia nichxinle nga tsʼamje i̱ sonʼndebi, Cristo tsakʼétsʼoa, kʼoa kisijé nganʼio, kiskiʼndía. Kʼoasʼin kitsjoatʼale je xi koanle tsʼasjentjaini ya kjoabiya. Kitsakjonke nda tsabexkón Niná, kui nga kinoʼyanile. 8 Nda tsa kʼoasʼin ʼNdíle koan, totʼale kjoañʼai xi tsakʼaile koanle nga nda kisitjoson. 9 Kʼia nga ñaki kjoakixi jejitjosonle, kʼia koan naile kjoabitjontjai ngantsjai xi tʼatsʼe ngatsʼi xi sítjosonle”.
c Isaías 42:3: “Alikui skótʼaó je yána̱xo̱ xi chikjan, kʼoa likui sikitsʼao je xka̱ xi totjoʼndi̱. Kao kjoakixi kjoaʼaíkao xi kixi tíjna”.
d Hebreos 4:15, 16: “Nga̱ tsín tsa tjínná jngo naʼmitítjon xi tsín tsa koa̱nle koa̱nmakená, nga̱ tsín tse nganʼio xi tjínná, tonga je kichotʼa ngayije josʼin nga kjoan, tonga likui kisʼele jée. 16 Kuinyachrianlee, tsokʼoa, je xi tíjnason yáxilele, xi tjínle kjoanda, jméni nga chjoésínía xi tsʼe kjoamatakonle, kʼoa jméni nga koa̱nsjaisíniná kjoanda xi koasenkaoná kʼia nga koa̱nchjénná”.
e Hechos 2:5-7, 33: “Kui nichxin tjío ya Jerusalén chjota judíos, chjotaxʼin xi bexkón Niná. Jaʼaini ngakijnda ʼnde xi tjín sonʼndebi. 6 Kʼia koanxkó ngatsʼi chjotankjínbe nga kinrʼoé jebe. Jo tokoanxkónle nga jngójngó kinrʼoéle nga kinchja̱ xi titsʼeni én. 7 Jo tokʼoakoanle, jo tokoanxkónle. Kitso: A tsí tsa chjota galileo je ngatsʼi xi tjíonchja. 33 Niná kisikinngʼa Jesús, kisikʼéjna ya ngakixile. Jesús kitjoéle je Espíritu Santo xi Nʼainá kitsjoa tsʼoa nga tsjoále. Kʼoasʼin Jesús kisikʼabíson je kjoabi xi ʼyao xi noʼyao ndʼaibi”.
f Alikui tsa ñaki kʼoaʼmi.