Kao kjoatsjoa tixálai je Jeobá
KʼIÁNI nga ngisasa tsjoa kisʼe tokuin. Tjínjin kʼa xi kʼoakuitso nga kʼianga chixan. Kʼoa tjínjinkʼa xi kʼoakuitso nga kʼianga kitsin ʼndítjonle. Tonga ji kʼoajin sí nga kʼianga kʼinsʼenngindái nga ngisa nʼio tsjoa kisʼe tokuin. Kʼoa nʼiojin tsjoa koanle je ndsʼee nga̱ tsabení nga tsjoachai je Jeobá kao ngayeje ni̱ma̱li, yaoli, kjoafaʼaitsjenli kao nganʼioli (Marcos 12:30).
Saʼnda nga kʼinsʼenngindái nʼiojin tsjoa tjínli nga tinixálai Jeobá. Tonga tjínkʼa xi tsín tikʼoakji tsjoa tjíonile nga tjíosíxále Niná. Ánni kʼoa jmé xi koasenkaoná nga tosi tonda tsjoa satío tokoán nga si̱xálee Niná. Kataʼyala.
ÁNNI NGA TSÍN TITSJOA TJÍOKʼASÍNILE NDSʼEE
Nʼio tsjoa sʼe tokoán nga ʼyaa xi tʼatsʼe Chjotaxále Niná, nga̱ je Jeobá kʼoatsoná nga Chjotaxá jebi jeme kjoaʼaxin ngayeje xi chʼaotjín kʼoa jngo ʼndenaxó kjoaʼaíkao. Sofonías 1:14 itso: “Je nichxin jeyale Jeobá jetíjnachrian”. Ninga kʼoalani, tsakui nichxin kʼoasʼin nikjaʼaitsjeen nga nʼio tíbʼachxinle nichxinle Jeobá. Tsa kʼoasʼin si̱kjaʼaitsjeen likuijin tikao kjoatsjoa si̱xánilee Jeobá (Proverbios 13:12).
Nga nimiyoaa je ndsʼee basenkaoná nga kao kjoatsjoa nixálee Niná. Kʼoa tsakui nichxin kuinga nda fikao yaole je choʼndale Niná nga testigole Jeobá koanñá (1 Pedro 2:12). Tonga tsa jngo ndsʼee xi chʼaosʼin kʼoa kuichákjáyale, tsakui nichxin kjuinroajen tokoán kʼoa tsín titsjoa sʼe̱niná.
Ijngosa koya xi sikinroajen tokoán kʼiaa tsakui koa̱nmená nga nkjín tsojmi sʼe̱ná kʼoa nga tse tao̱n sʼe̱ná. Je Na̱i kʼoa kao jme xi chonle Sonʼnde kui xi mele nga kʼoasʼin si̱kjaʼaitsjeen nga tjínnele kuindá tsojmi xi saʼnda tsínni machjénná. Tonga si̱kjaʼaitsjeen jokitso je Jesús: “Niʼyajin xi jao naile ma síxále. Kʼoa jtike koa̱n jngo, kʼoa xijngo tsjoake, kʼoa koaitʼale jngo kʼoa xijngo chʼao skoe̱kon. Alikui koa̱n nixálao nga jao, Niná kao kjoanyiná” (Mateo 6:24). Kʼiatsa kʼoénelee yaoná nga tokuila kuijnyá je tsojmi xi tjín sonʼnde, alikuijin titsjoa sʼe̱ni tokoán nga si̱xálee je Jeobá.
ANNI NGA KAO KJOATSJOA NIXÁNILEE JE JEOBÁ
Kʼianga tsjoachaa je Jeobá, alikui ai maná nga nixálee (1 Juan 5:3). Jesús kitso: “Nroachonnáo ngatsʼio xi nʼio tinixáo kʼoa xi tse chʼá tichʼao, nga an xi sikʼéyokjáyano. Tjayasonlao yaono yugo xi tsʼan, chótʼayao xi tsʼan, nga ndʼénía, kʼoa yo̱ma̱ kjiakoan. Kʼoa sa̱kono kjoanikjáya xi tʼatsʼe ni̱ma̱no. Nga̱ yugona ali ñʼaijin, kʼoa tja̱ní chʼána” (Mateo 11:28-30). Kʼianga chjotale Cristo maa tsjoa tjío tokoán. Nʼio nkjín koya tjínni anni nga kao kjoatsjoa nixánilee je Jeobá. Janla koya kataʼyaa (Habacuc 3:18).
Jé tinixálee je Niná xi tsjoa tjínle je xi kisindaná (Hechos 17:28; 1 Timoteo 1:11, TNM). Ngatsʼiñá nga ʼyaa nga totʼatsʼe Jeobá nga tiyochoán. Kʼianga kʼoasʼin si̱kjaʼaitsjeen kui xi koasenkaoná nga kao kjoatsjoa si̱xálee je Jeobá, ninga sʼa choa kʼoa ninga jenkjínná nó nga tsangínsʼenngindá.
Je Héctor bʼénele yaole nga tosi tonda tsoyason kʼoa nga tsín síchajin je ʼNdenaxó xi kjoaʼaíkao Niná
Si̱kjaʼaitsjenla je kjoa xi jaʼatojin jngo ndsʼee xi Héctor ʼmi je xi 40 nó nga superintendente xi tsʼe circuito koan. Ninga jejchínga ndʼaibi tojo tsjoa tjínle nga tísíxále Jeobá (Salmo 92:12-14). Alikui tikʼoakji síxánile Jeobá jokji síxále ngasʼa nga̱ jé chjoónle tímʼe. Tonga tojo tsjoa tjínle. Kʼoatso nga aon male kʼianga sa táo sa táo kjima je chjoónle. Kʼoa ninga ñʼai kjimale nga tísíkuinda je chjoónle, alikui tísícha kjoatsjoa xi tjínle nga tísíxále Niná. Nga síkjaʼaitsjen jme xá kisindaniná Jeobá kui xosíkao nga nʼio tsjoake mani kʼoa nga ñaki kao ni̱ma̱le síxánile. Kuinga bʼénenile yaole nga tosi tonda tsoyasonni kʼoa nga tsín síchajinni je ʼNdenaxó xi kjoaʼaíkao Niná. Kui jebi xi basenkao nga tosi tonda kao kjoatsjoa síxánile Jeobá.
Je Jeobá kisikasén je ʼNdíle nga kʼienntjainá. Je Biblia kʼoatso nga “Niná kʼoasʼin koantsjoake sonʼnde nga kitsjoa je xi tojngo ʼndíle, jméni nga ngatsʼisíni xi makjainle tʼatsʼe, likui cha̱, tonga tjínle kjoabijnachon ngantsjai” (Juan 3:16). Tsa tjínná kjoamakjain tʼatsʼe Jesús, je Niná sichatʼa je jéená kʼoa tsjoáná kjoabijnachon ngantsjai. Nʼio bʼailee kjoanda je Niná nga kʼoakisʼin xi tʼatsaan kʼoa kui xosíkaoná nga kao kjoatsjoa nixánilee.
Je Jesús tomanile josʼin tíjna kʼoa nʼio tsjoa tjínle nga je Jeobá tísíxále
Jngo ndsʼee xi Jesús ʼmi xi México tsʼe kʼoatso nga ñaki tokisixá ngasʼa. Sakʼoaxó saʼnda 5 turno kisixá tojoni nga ngisa tse tao̱n kuinjele. Xijekoan, kiskotʼaya xi tʼatsʼe Jeobá kʼoa tsabee nga je Jeobá kitsjoantjai ʼNdíle xi totʼatsaan. Nʼio koantsjoake je Jeobá kʼoa kʼoakitsole nga toje sixále. Ninga kjoan 28 nó tjínle jñani tísíxá kisikʼéjna xále. Ndʼaibi jenʼio nkjín nó nga tísíxále Niná kʼoa nʼio tsjoa tjínle.
Tsje mangínkoaa yaoná. A faʼaitsjenli josʼin tijnai kʼianga kjesa ʼyajin je Jeobá. Je pastro Pablo kʼoakitsole je chjotale Cristo xi tsakatio ya Roma nga “choʼndale jée” koan kʼianga kjesa kotʼayajin tonga nga “choʼndale xi kjoakixi” koan nga jetsabe Niná. Nga tsje sʼin kikao yaole kisʼele kjoachoya nga kʼoaile kjoabijnachon ngantsjai (Romanos 6:17-22). Ñá kʼoati nitjosoán kjoatéxomale Niná. Kʼoa kuinga tsínkui kjoa tiyojinsíñá jme kjoa tjíojin je xi chʼao sʼín kʼoa xi tsʼen, kʼoa jebi nʼio tsjoa bʼé tokoán.
Je Jaime kʼoatso nga kʼia ñaki tsjoa kisʼe kon kʼianga jekisixále je Jeobá
Kataʼyala choa̱le je ndsʼee xi Jaime ʼmi. Kʼianga kjesa testigole Jeobá majin, boxeador koan. Kʼoati tsín makjainle xi tʼatsʼe Niná, kui koankjainle xi tʼatsʼe evolución. Kʼianga jeki kjoajtín, tokʼoakoanle nga tsabe jokji tsjoake xínkjín je ndsʼee. Kisikʼantjaiya je yaole, kʼoa kʼoakitsole je Jeobá nga katabasenkao ánni nga koa̱nkjainsínile xi tʼatsʼe. Je Jaime itso: “Tobijbi tsaʼbe kʼianga nʼio tjínle kjoatsjoacha je Jeobá kʼoa nga nʼio mamakená”. Kʼoatso je Jaime kʼianga kuinga tojo tíjnani nga tísítjosonle Niná. Kʼiatsa tsín kisikʼantjaiya yaole jejinxó kʼien, tojosʼin nga jekʼien kʼa je xi ñatjen kiskan boxeo. Kʼianga jekisixále je Jeobá kʼianí nga ñaki tsjoa kisʼe kon.
TSA TSÍN KUIJTANÁ
Jméni xi sʼiaan kʼianga tichoyalalee nga kuichokjetʼa jmeni xi chon sonʼnde jebi. Jekʼoatinʼia jmeni xi tso je Niná kʼoa kui tichoyalee nga koa̱n kuiyoaa ngantsjai nichxin. Kuinga tosi tonda si̱tjosonsíñá jmeni xi tso Gálatas 6:8, 9: “Ali chóbejinná nga nda sʼiaan. Kʼia choa̱le kʼoéxkoá, tsa tsín kuijtaná”. Je Jeobá si̱nʼiotʼaa kʼoa katasʼená kjoaka. Si̱ndayaa yaoná ánni nga kʼoangisíñá nga kjoaʼaí kjoañʼai xi nʼio tse kʼoa nga tosi tonda kao kjoatsjoa si̱xásínilee je Jeobá (Apocalipsis 7:9, 13, 14; Santiago 1:2-4).
ʼYañá nga tsjoáná chjíná je Jeobá kʼiatsa ska̱ná. Nga̱ bení jmeni xi tinʼia tʼatsʼe kʼoa bení nga tsjoachaa. Tsa tosi tonda kao kjoatsjoa si̱xánilee kʼoasʼe̱ tokoán jokitso je David: “Jé Jeobá sʼian kuenta ngantsjai. Nga je tíjna ngakixina, alikui jme xi koa̱nna. Kuinga matsjoanile je ni̱ma̱na” (Salmo 16:8, 9).