A yaa mangóson joni xoño kʼianga ʼmiyasuin

NʼIO chjíle kʼianga ʼmiyasoán, tonga tjín chjota xi tsín kʼoasʼin síkjaʼaitsjen. Ninga tjínkʼa xi mandosinle jotso je Biblia kʼoatso nga tsín tjínnele nga ñá kʼuínyalee je Biblia.

Kataʼyala choa̱le jngo chjota xi Gavin ʼmi. Ninga fi kjoajtín xi satíoná ya Ndʼia jña chotʼayá likui mele nga estudio kʼoaile. Kʼoatso nga nʼio tochoa be jmeni xi tínchja̱ni je Biblia kʼoa alikui mele nga katasʼejinle xi ngikʼa. Kʼoati tsín koanmele nga kjoenkjoale yaole kao jngo relijión kʼoa nga tsín tochʼa̱nachale. Jósʼin nikjaʼaitsjain xi tʼatsʼe je Gavin. Jósʼin tsakʼainganʼiole. Jmeni xi bakóya je Biblia nʼio kuinyakao je chjota. Kuinga kʼoakitsosínile Jeobá je chjota israelita nga je énle kʼoasʼin koa̱nngóson joni tsa xoño kao jtsíxa̱ xi tobijbi bʼa ya jinjñá (Deuteronomio 31:19, 30; 32:2). Ñola koya kataʼyaa tʼatsʼe xoño xi koa̱n chjénngiaa kʼianga ʼmiyasonlee je chjota (1 Timoteo 2:3, 4).

ÁNNI NGA YA MANGÓSONSÍNI JE XOÑO KʼIANGA ʼMIYASOÁN

Je xoño tobijbi tjon. Je xoño kʼiaa tjon nga manjio kʼoa jé nyʼánle ntjao̱ xi kui ma. Ánni nga kʼoatsosíni ya Biblia nga je énle Jeobá ya mangóson je xoño. Kuinga énsin énnda tsakjákao je choʼndale. Jósʼin koa̱n chjénngilee Jeobá. Kʼianí nga koakolee kjoaxkóntokon josʼin makjainle je chjota kʼoa nga je katasíkjaʼaitsjenjin kʼoa je katakjoéjin jmeni xi mele sʼin. Tsa skoe̱ je chjota nga mandosin kjoaixiná xi tʼatsʼe ngisajin nda kjuinrʼoéná nga chja̱kaonajmiá. Tsa kʼoasʼiaan nda kuichotsjoá nga kʼuínyasoán.

Je xoño sʼejna nyʼán nyʼán. Kʼianga ʼmiyasoán yaa koa̱nngóson joni tsa xoño tsa nyʼán kʼoe kon je chjota. Si̱kjaʼaitsjeen jósʼin koa̱n kuinyakoaa je chjota nga katamajinle jmeni xi tso je Biblia. Kataʼyala ijngokʼá choa̱le Gavin. Nga títjon, jngo ndsʼee xi Chris ʼmi kʼoakitsole nga tsjoále estudio, tonga alikui kjoanʼio tsakʼénele nga katakotʼaya. Tosa kui xi koanmele nga nda katasʼe kon je Gavin nga fákaoni xi tʼatsʼe Biblia. Kʼoakitsole nga jngo tema tínchja̱ni je Biblia kʼoa tsa skoe̱ kui xi koasenkao nga nda koa̱njinle jmeni xi faʼa ya kjoajtín. Je ndsʼee Chris kʼoati kitsole je Gavin nga je xi tsakʼéjngo kon nga ñaki kʼoatjín jotso je Biblia kuinga bitjoson jmeni xi tongini tso. Kui tsakjáoyani josʼin kitjoson én xi tongini kinokjoa ya Biblia. Je Gavin nʼio nda kisʼe kon kʼoa koanmele nga tsakʼaile estudio.

Je xoño tsjoá kjoabijnachon. Ya naxinandá Israel kʼianga cha̱nndoá nʼio sjeya ma kʼoa sakʼoaa nkjín sá likui tibʼani jtsí. Tsa tsínlani je xoño, xí je tsojmintje. Je Biblia tongini kʼoakitso kʼianga nichxin xi tiyoaa ndʼaibi je chjota koa̱nmele kjuinrʼoé énle Jeobá (Amós 8:11). Jngoyale joxi fatile je chjota tonga xi kao Énle Niná. Kuinga kʼoatsosíni je Biblia kʼianga je chjotale Cristo xi ya koai ngʼajmi yaa mangóson je xoñole Jeobá kʼianga tsoyason je énnda chjotse (Miqueas 5:7). Kʼoati tjío xi kjaʼaí barré ʼmile xi kʼoati ya tjíotsjoánganʼiole nga tjíotsoyason (Juan 10:16). Je én xi ʼmiyasoán tʼatsʼe Jeobá tínroani kʼoa kui xi tsjoále kjoabijnachon ʼyani xi mele kjuinrʼoé. A ʼyachjíñá én xi ʼmiyasoán.

Je xoño jngo kjoanichikontʼain xi tʼatsʼe Jeobá tínroani (Deuteronomio 33:13). Je én xi ʼmiyasoán kjoanichikontʼain tsjoále je chjota xi nrʼoé. Je Gavin jngo kjoanichikontʼain kisʼele kʼianga tsakʼaile estudio nga̱ kui xi tsakasenkao nga koanjinle jmeni xi nʼio kjonangile yaole. Xijekoan, kisʼenngindá kʼoa ndʼaibi nʼio tsjoa tjínle nga títsoyason je énnda chjotse kao chjoónle xi Joyce ʼmi.

CHJÍ JCHATOKOÁN NGA ʼMIYASOÁN

Tsakui si̱ngósonkoaa nga ʼmiyasoán je xoño jchañá nga nʼio chjíle jokji bʼenelee yaoná. Ánni. Nga tojngo xoño alijo sʼin machjén, tonga nga miyón maxkótʼale xínkjín síʼnyi̱ndá je nangi. Tsakui nichxin kʼoasʼin nikjaʼaitsjeen nga tsín nʼio tse jmeni xi tinʼia. Tonga nga miyón mañá, je én xi ʼmiyasoán bichóle “ngatsʼi naxinandá” (Mateo 24:14). Tojosʼin tiʼyaa kʼianga ʼmiyasoán jngo kjoanichikontʼain xi tʼatsʼe Jeobá tínroani, kʼoa yaa mangóson je xoño xi tobijbi tjon, xi sʼejna nyʼán nyʼán kʼoa xi tsjoá kjoabijnachon.