Ninga jtaya alikui kui tíbʼéchjoana nga tixinya je Énle Niná

KʼIANGA nó 1910, je xijchána likui tiya tsakationi ya naxinandá Tiflis (Georgia). Yaa kikatio jñani tíjna jngo granja ya chrian Pelly (Saskatchewan, Canadá). Kʼiaa kitsian nga nó 1928, jaon koannijin kʼoa an maʼndía. Jaon sá tongini nga kjesa tsinjian kʼiaa kʼien je nʼaina, kʼoa je mana kʼiaa kʼien nga sʼa ʼndíleejian. Nga koanskanni, sajé kʼienngá tsoti tichja xi Lucy tsakʼin, tokʼiaa 17 nóle nga kʼien. Kuinga je kisikuindaninajin je tsinina xi Nick ʼmi.

Ñandia kʼianga je familiana tsabena nga titsoa nditsʼin jngo naxín xi tjíonajin. Tokʼiaa jao nóna. Nʼio kitsokjon nga tjíokotsenná tsa ya tsjónna je naxín, kʼoa nʼio kinchja̱na nga kʼoakitsona nga tsín ya sikoa. Yándsʼiaan séjnana kʼoa tsín kinrʼoele. Ninga tsín jme xi koanna nga kʼia, je familiana kʼiaa tsabee nga jtayaña.

Jngo xi miyonajin mani kʼoakitso nga ngisa nda nga ya kjuía skuela jñani fi je xti xi jtaya. Kuinga je tsinina Nick ya kisikasénnina je skuela xi tíjna ya Saskatoon (Saskatchewan). Nʼio kitsokjoan, nga̱ je skuela kjin tíjnale niʼyana kʼoa tosʼaa aon nóna nga kʼia. Kʼoa tokʼiaa koan kisixatʼa je familiana kʼianga batiokjáya je chjota kʼoa nga sʼena vacación. Xi jejaʼato nichxin, koanna je én seña kʼoa nʼio tsjoa kisʼe tokoan nga kisiskákoa je xti xi ngikʼa.

KʼIANGA TSAʼBE JE ÉNLE NINÁ

Kʼianga nó 1939, jngo tichja xi Marion ʼmi jé chixankao Bill Danylchuck, kʼoa jé kisikuindanajin an kao tichja xi Frances ʼmi. Kʼoa jé xi títjon kiskotʼaya kao testigole Jeobá. Kʼianga sʼena vacación kitsoyana jmeni xi jekjimajinle tʼatsʼe Biblia. Alikui choa ñʼai koannajin nga kichobanajmíjin nga̱ tsín male én seña. Ninga kʼoalani, tsabee nga koantsjoake̱ jmeni xi kjimana tʼatsʼe Jeobá. Koanjinna nga kʼoatjíosʼín josʼin tsoya je Biblia, kuinga kikaoña nga kitsoyason. Tochoatsee jaʼato nga koanmena kisʼe̱nngindá. Kʼianga 5 sá septiembre nó 1941, jé Bill kiskanisʼenngindána jñani tíjna jngo barril xi ki̱cha̱ xi kijnakitse nandá. ¡Je nandá nʼio nyʼán tjín!

Kʼianga kichoña ya niʼyana nga nó 1946, tsanginníjin je kjoajtíntse xi kisʼejna ya Cleveland (Ohio, Estados Unidos). Je nichxin nga kitsʼia kjoajtíntse, je tichja tsakʼétʼaxoonna jmeni xi jaʼa. Tonga nga koanjaoni nichxin, nʼio tsjoa koanna nga kisʼejinna nga én seña kjoaʼatoya je kjoajtíntse. Jngo jtín mani xi ya tjío xi jtaya. Kʼiaa koanjinna jmeni xi tífaʼa ya kjoajtíntse kʼoa kao jmeni xi tsoya je Biblia. ¡Nʼio tsjoa kisʼe tokoan!

XINYALE XI KJAʼAÍ CHJOTA JMENI XI TSOYA JE BIBLIA

Nga kui nichxin, tokʼiaa jetʼa je Kjoajchántse xi majaoni kʼoa je chjota kui xi nʼio koanmele tsakakó nga tsjoánganʼiole je naxinandále. Tonga kʼianga kicho ijngokʼa je skuela nga jekisʼejna je kjoajtíntse, ñaki kʼoatjín tokoan nga kixi kjuítʼale je Jeobá. Kuinga tsín tikisʼinña saludar je bandera, likui tikiseña je himno nacional kʼoa likui tikiña je sʼuí xi kisatio ya skuela. Kʼoati tsín tikiña je yo̱ngo̱ jñani fi xti xi ngikʼa. Alikui kisasenle je maestro nga kʼoakisʼian. Nʼio tsakʼénena kʼoa énndiso kʼoakitso tojoni nga sikʼantjaiya josʼin sikjaʼaitsjen. Je xti xi ngikʼa tsabee jmeni xi kjima kʼoa kʼiaa kitjoʼndena nga kixinyale je Énle Niná. Tjínkʼa xi kiskotʼaya Énle Niná nga koanskanni. Je xi Larry Androsoff, Norman Dittrick kao xi Emil Schneider ʼmi, xi tojo je Jeobá tjíosíxále saʼnda ndʼaibi.

Kʼianga xin naxinandá kʼia, kixinyale je chjota xi jtaya. Tobʼelañá, ya Montreal kiña jngo ʼnde jñani batioxkó je chjota xi jtaya. Yaa kixinyale je Eddie Tager, xi jngo jtín xti tsakájta xi toya kaye bʼetsomaʼnyo. Kʼoa saʼnda nga kʼien je Eddie yaa kitsjoanganʼio jñani tíjna jngo jtín xi tsʼe én seña ya Laval (Quebec). Kʼoati tsaʼbexkoan xi Juan Ardanez ʼmi. Tojo kisʼin je chjota xi tsakatio ya Berea kʼianga siglo 1, je Juan nʼio nda tsakʼejnatsʼinya jmeni xi kjimajinle tʼatsʼe Biblia (Hechos 17:10, 11). Testigole Jeobá koan, kʼoa chjotajchínga sʼin tsakʼejna ya Ottawa (Ontario) saʼnda nga kʼien.

Kʼianga nó 1950, yaa kia ya Vancouver. Ningalani nʼio tsjoake̱ koan nga kixinyale je chjota xi jtaya, alikuikʼia cha̱jinna jmeni xi koan nga tsakjakaonajmíña je Énle Niná jngo chjoón ya ʼnyo kaye, xi Chris Spicer ʼmi, tonga je alikui jtaya. Koanmele nga kikaole rebista nga xki̱ sá, kʼoa koanmele nga tsaʼbexkoan je Gary xi xʼinle mani. Kiña ndʼiale kʼoa tse kichobaijin kʼoa xo̱n tsakʼétʼa jmeni xi kitsona. Xijekoan, alikui tijña kisatejinña, nga jenkjín nó jaʼato kʼiaa saʼnda tsaʼbe ijngokʼa nga kisitiʼndana kʼianga kisʼejna je kjoajtíntse ya Toronto (Ontario). Tokʼoakoanna nga tsabe nga kʼia kisʼenngindá je Gary. Jebi kisikjaʼaitsjenjinna nga nʼio chjíle nga tosi tonda kʼuínyasoán. Alikui ʼyaa tsa skótʼayani nga koanskanni jngo chjota xi ʼmiyasonlee.

Xi koanskanni, yaa ki ijngokʼa ya Saskatoon. Yaa tsaʼbexkoan jngo chjoón xi kʼoakitsona nga xínyale je Biblia nga jao xtiyánchjínle xi xtingʼion, xi jtaya. Xi Jean kao xi Joan Rothenberger ʼmi. Nga jao yaa kiskotʼaya ya skuela jñani kiskotʼaya. Tochoatsee jaʼato nga kitsoyale je xi ñatjen fi skuela jmeni xi kjimajinle. Kʼoa aon koanni je xtiyánchjín xi testigole Jeobá koan. Jngo xi Eunice Colin ʼmi, xi kʼia tsaʼbexkoan nga toje kuitjoa skuela. Nga kʼia, jngo toxi kitsjoana kʼoa kiskonangina tsa mena nga miyo chobaijin. Kʼoa jé xi chjoónna koanni nga koanskanni.

Kʼianga kisʼejinle je na̱le Eunice nga Biblia tíkotʼaya, kʼoakitsole je director xi tsʼe skuela nga kʼoakatatsole je Eunice nga tsín tikatakotʼayani. Ningalani kʼoakisʼin je director kʼoa saʼnda tsakjáʼale je xo̱n xi Énle Niná faʼaitʼa, je Eunice ñaki kʼoatsakʼé kon nga kixi kitʼale Jeobá. Kʼianga koanmele kisʼenngindá, je xijchále i kitsole: “Kʼiatsa testigole Jeobá koain, alikui tiʼi̱ kuijnani”. Kuinga je Eunice yaa kikʼejnakaoni jngo familia xi testigole Jeobá ma kʼianga tosʼa 17 nóle. Tosi tonda kiskotʼaya je Biblia kʼoa kisʼenngindá. Kʼiaa chixainjin nga nó 1960, tonga je xijchále likui kicho kʼianga chixainjin. Nga jeki nó, je xijchále Eunice, tsabexkónnajin xi totʼatsʼe josʼin makjainnajin kʼoa josʼin tinijcháijin je xtinajin.

JÉ JEOBÁ TÍSÍKUINDANA

Ñato koanni je xtinajin, kʼoa alikui jtaya koan. Alikui choa ñʼai koannajin nga kinijcháijin. Tonga tsakʼinyalaijin je én seña nga koan kichjakaonajmíjin kʼoa nga tsakʼinyalaijin je Énle Niná. Nʼio tsakinyakaonajin je ndsʼee xi tjío jinjtín. Tobʼelañá, jngo ndsʼee xi xo̱n tsakʼétʼa nga kʼoakitsonajin nga jngo tinajin xi chʼao tso én tínchja̱ ya Ndʼia jñani chotʼayá. Tiʼa yaa kichjakaonajmínijin. Je xtina xi James, Jerry, Nicholas kao xi Steven ʼmi, chjotajchínga sʼin tjío kʼoa ñatjen tjíosíxále je Jeobá kao familiale. Kʼoa je Nicholas kao Deborah, xi chjoónle mani, yaa tjíotsjoánganʼio ya sucursal xi tíjna ya Gran Bretaña nga tífaʼatoya je én seña. Je Steven kao Shannan, je chjoónle, yaa tjíojinle je xi síkʼatoya je én seña ya sucursal xi tíjna ya Estados Unidos.

Tonga kʼianga tongi jngo sá cha nga kuichonajin 40 nó nga chixainjin, je Eunice cáncer kʼienni. Jokjitse nga tsakʼejnakao je chʼin, nʼio kisʼele kjoamakjain nga sʼe̱ kjoafaʼáya. Ñaki tikoyale je nichxin nga skoe ijngokʼa.

Kʼianga sá febrero nó 2012, kiskaña kʼoa nʼio kitsinʼoan. Kʼoa saʼnda nga kʼia koanchjén nga tjín xi tsakasenkaona, kuinga ya kikatejnaña ya ndʼiale tina. Yaa tsangínjin jngo jtín xi tsʼe én seña ya Calgary (Alberta), kʼoa chjotajchínga sʼin tijna ya jtín jebi. Tosʼaa ndʼaibi nga jngo jtín xi tsʼe én seña tijna. Jósʼin nʼio kisʼejnani je kjoamiyona kao Jeobá jokjitse tsakatejna ya jtín xi én Inglés. Jé Jeobá tsakasenkaona. Ñaki kʼoakisʼin kjoaixi, nga kʼoatso nga síkuinda je xtijchʼa̱n (Salmo 10:14). Nʼio tsjoale kjoanda ngatsʼi je xi kʼoasʼin kiskitʼa je xo̱n, xi én seña kiskotʼaya kao xi kisikʼatoyana nga koan tsakjakaonajmía xi kjaʼaí.

Sakʼoaa kisikʼajenle tokoan, nga̱ tsín koanjinna jmeni xi jaʼa kjoajtín kʼoa kʼoatisʼin kisikjaʼaitsjen nga tsín ʼya xi be josʼin kuisenkao jngo chjota xi jtaya. Nga kui nichxin kui kisikjaʼaitsjen jmeni xi kitsole Pedro je Jesús, nga kitso: “ʼYá xi koangínchonlaijin. Ji xi tjínli én xi tsjoá kjoabijnachon ngantsjai” (Juan 6:66-68). Tjínnele tsejta kjima, joni je chjotale Cristo xi jtaya xi jenʼio nkjín nó tjíosíxále je Jeobá. Kʼoati je Jeobá tisinʼiotʼa kao naxinandále. Kui xi nʼio tíbasenkaona. Ndʼaibi, nʼio nkjín xo̱n kao grabación tjín xi én seña, kʼoa nda majinna jmeni xi faʼa ya kjoajtín kao kjoajtíntse kʼianga én seña americano. Xi kjoaixi, nʼio tsjoa tjín tokoan kʼoa nʼio tse kjoanichikontʼain tjínna nga je Jeobá tisixále, je Ninaná.