Jmé xi kisʼin je Jesús nga tsakʼejna i̱ Sonʼnde

Kʼianga nrʼoé je chjota tʼatsʼe Jesús sakʼoa tokui fiya jko̱ nga sʼa ʼndílee, kʼoa tjínkʼa xi kui fiya jko̱ jngo profeta xi chjine koan kʼoa tsa maije̱ kui fiya jko̱ jngo chjota xi tojeme mʼe. Tonga ngisaa nda jchaxkoaan je Jesús tsa jchaa jmeni xi kisʼin kʼianga tsakʼejna i̱ Sonʼnde. I̱ kjoaʼmiya jebi kui chótʼayajiaan jme xi kisʼin je Jesús kʼoa jósʼin koasenkaoná.

1. Jmé xá xi ngisa tjínle kjoandosin kisʼin je Jesús

Je xá xi ngisa kisʼin je Jesús kuinga kitsoyason, i kitso: “Machjén nga kuinchjaya je énnda xi tʼatsʼe kjoatéxomale Niná” (tʼexkiai Lucas 4:​43). Kui kitsoyason nga jngo chjotaxá koasennda je Niná, kʼoa nga je chjotaxá jebi kʼoendajin je kjoa xi tjín i̱ Sonʼnde.a Jan nó basen nga ñaki tokui xá kisʼin je Jesús nga kʼoasʼin kitsoyason (Mateo 9:​35).

2. Jmé xi tsakakó je kjoaxkón xi tsakatío je Jesús

Je Biblia kʼoatso nga je Niná jé Jesús kisichjén kʼianga tsakakó “nganʼiole, kao kjoaxkón, kao choa̱” (Hechos 2:​22). Nga nganʼiole Niná kisichjén je Jesús koan kisikʼéjnajyo je jtsínʼio, koan nga jmi chjota kisikjen, koan kisindaya je xi tjíomʼe kʼoa saʼnda kisikjaʼáya kʼale je chjota xi jekʼien (Mateo 8:​23-​27; 14:​15-​21; Marcos 6:​56; Lucas 7:​11-​17). Je kjoaxkón xi tsakatío je Jesús kui tsakakó nga je Niná kisikasén. Kʼoa kʼoati kui tsakakó nga toje Jeobá xi koa̱nle kjoaʼaxin ngayeje je kjoa xi tjín i̱ Sonʼnde.

3. Jmé xi bakóyaná josʼin kikao yaole je Jesús

Je Jesús kisitjosonle ngantsjai je Jeobá (tʼexkiai Juan 8:​29). Kixi koan saʼnda nga kinikʼien kʼoa kʼoakisʼin jmeni xi kitsole je Nʼaile ninga nkjín koan je chjota xi tsakatiochjoale. Tsakakó nga koa̱n kixi kjuintʼalee je Niná ninga nʼio tse kjoa kuitjátojiaan. Je Jesús “tsakʼéjnachoyaná ndiaa xi tsʼe”, jméni nga kʼoatisʼin kuimasíñá “josʼin tsakʼamje nga je” (1 Pedro 2:​21).

5. Nʼio chjíle jmeni xi tsakakóya je Jesús

Ninga kui kitsoya je Jesús je énnda xi tʼatsʼe Niná, kʼoati kitsjoa je kjoafaʼaitsjen xi basenkaoná. Kataʼyala kʼa jmeni xi kitsoya ya jngo sonnindo. Tʼexkiao Mateo 6:14, 34 kao 7:12 kʼoa cho̱bayaño jebi:

• Jmé kjoafaʼaitsjen xi kitsjoa je Jesús.

• Jósingái ji, a koasenkao kjoafaʼaitsjen jebi je chjota xi tjín ndʼaibi.

6. Je Jesús tsakatío kjoaxkón

Je Jeobá kitsjoale nganʼio je Jesús nga tsakatío je kjoaxkón. Jngola choa̱ kataʼyaa. Tʼexkiao Marcos 5:​25-​34 kʼoa tsa maije̱ chótsenlao VIDEO. Xijekoa̱n, cho̱bayaño jebi:

VIDEO: Josʼin koanndaya jngo chjoón xi tímʼe (5:10)

• Tojosʼin kaʼyaa ya video, jmé xi tsín jao tsakʼé kon je chjoón xi tímʼe.

• Jméni xi ngisa kasasénli tʼatsʼe kjoaxkón jebi.

Tʼexkiao Juan 5:36 kʼoa cho̱bayaño jebi:

• Jmé xi bakó je kjoaxkón xi tsakatío je Jesús.

XI KACHOTʼAYÁ

Je Jesús kitsoyason tʼatsʼe Chjotaxále Niná, tsakatío kjoaxkón kʼoa kisitjosonle ngantsjai je Jeobá.

Jmé xi kamajinli

• Jméni xá xi ngisa kisʼin je Jesús nga tsakʼejna i̱ Sonʼnde.

• Jmé xi tsakakó je kjoaxkón xi tsakatío je Jesús.

• Jmé kjoafaʼaitsjen xi kitsjoa Jesús xi kʼoati machjénná ndʼaibi.

XI KOASENKAOSALI

Jmé xi ngisa kinchja̱ni je Jesús nga kitsoyason.

“Ánni nga nʼio koanndosinsínile Jesús xi tʼatsʼe Chjotaxále Niná” (Xo̱n xi Bájinkonná, 1 sá octubre nó 2014)

Kataʼyai ánni nga tsín jao tjínniná nga ñaki kʼoakoan kjoaixi je kjoaxkón xi tsakatío je Jesús.

“Jméni xi bakóyaná je kjoaxkón xi tsakatío je Jesús” (La Atalaya, 15 de julio de 2004)

Kataʼyai josʼin kisikʼantjaiya yaole jngo chjota kʼianga tsabe nga tsín to yaole kini je Jesús.

“To yaona kiña” (La Atalaya, 1 de octubre de 2014)

Kataʼyai jmeni xi kisʼin je Jesús.

“Nga tsakʼejna Jesús i̱ Sonʼnde” (Xo̱n xi basenkaoná nga chotʼayajiaan Énle Niná, 4-B)