KJOAʼMIYA 18
Jókoa̱nni jchaa ʼyáni xi chjotale Cristo ma
Millón chjota xi kʼoatso nga chjotale Cristo ma tonga alikui tongóson sʼin makjainle kʼoa alikui tongóson sʼin fikao yaole. Jókoa̱nni jchaa xi ñaki chjotale Cristo ma.
1. ʼYáni xi chjotale Cristo ʼmile
Je xi chjotale Cristo ʼmile jéní xi chjotatjenngile Jesús ma (tʼexkiai Hechos 11:26). Jósʼin bakó nga ñaki chjotatjenngile Jesús ma. Je Jesús i kitso: “Tsa énna si̱kitjosonntsjao, jon nío xi ñaki chjotana” (Juan 8:31). Jebi kui xi tsonile nga je xi chjotale Cristo ma tjínnele sitjoson jmeni xi tsakakóya je Jesús. Kʼoa yaa Biblia bʼangini josʼin makjainle tojo kisʼin je Jesús nga ya xo̱n Escrituras tsakʼangini jmeni xi tsakakóya (tʼexkiai Lucas 24:27).
2. Jósʼin bakó kjoatsjoacha je xi ñaki chjotale Cristo ma
Je Jesús i kitsole je chjotatjenngile: “Katamatsjoachao xíngio, josʼin tsjoake̱no nga an” (Juan 15:12). Je Jesús tsakakó nga tsjoake je chjotatjenngile nga̱ kisikʼayale nichxin, kisinʼiojin, tsakasenkao kʼoa saʼnda kitsjoa kjoabijnachonle xi totʼatsʼe (1 Juan 3:16). Tojo kisʼin je Jesús, je chjotale Cristo ali tsa toʼénjin xi nchja̱ kao jmeni xi tso kʼoa jmeni xi sʼín bakónile xínkjín nga tsjoake.
3. Jmé xá xi kjinele je xi chjotale Cristo ma
Je Jesús kui xá kitsjoale je chjotatjenngile “nga koai tsoya kjoatéxomale Niná” (Lucas 9:2). Je chjotale Cristo xi tsakatio nichxin kjoatse ali tsa toyajin kitsoya ya ndʼia jña tsaʼyaxkón je Niná, kʼoati xki̱ ndʼia xki̱ ndʼia kitsoya kʼoa kao jñani nʼio tjín je chjota (tʼexkiai Hechos 5:42; 17:17). Nichxin xi tiyoaa ndʼaibi je xi ñaki chjotale Cristo ma bakóyale chjota tojñani tjío. Nga tsjoake je chjota síkʼayaa je nichxinle kʼoa síkje je nganʼiole nga tsoyale je kjoachoya xi faʼaitʼa je Biblia (Marcos 12:31).
KATAʼYASAI JME XI TÍNCHJA̱NI
Kataʼyala jméni xi tsín mangóson xi ñaki chjotale Cristo ma kao je chjota xi tsín fitjenngi choa̱le Jesús kao jmeni xi tsakakóya.
4. Yaa Biblia básjaiya jokjoantjínni
Je chjotale Cristo xi títjon tsakatio chjí tsabekon je Énle Niná
Alikui tsa tongatsʼi je xi chjotale Cristo tsole yaole nga bechjí jmeni xi bakóya je Biblia. Chótsenlao VIDEO kʼoa cho̱bayaño jebi:
Jméni xi kisʼin je yo̱ngo̱ nga tsín kitsjoaʼnde nga katabe je chjota jmeni xi kitsoya je Jesús.
Je Jesús kui tsakakóya jmeni xi tso je Énle Niná. Tʼexkiao Juan 18:37 kʼoa cho̱bayaño jebi:
Tojo kitso je Jesús, jókoa̱nni jchaa ʼyáni xi ñaki chjotale Cristo ma.
5. Kui bakóya jmeni xi tso je Biblia
Je chjotale Cristo xi títjon tsakatio kitsoyason
Nga kjesa fijin Jesús ya ngʼajmi kui xá tsakánele je chjotatjenngile nga katatsoyason je Énle Niná tojo tinʼia saʼnda ndʼaibi. Tʼexkiao Mateo 28:19, 20, TNM kao Hechos 1:8 kʼoa cho̱bayaño jebi:
Kʼiá saʼnda tjen sa̱kóyason kʼoa jñá saʼndani sa̱kóyason.
6. Jé títjon kʼoasʼín jmeni xi tsoya
Jméni xi tsakʼéjngo kon Tom nga ñaki Énle Niná jmeni xi kiskotʼaya. Chótsenlao VIDEO kʼoa cho̱bayaño jebi:
Tojosʼin kaʼyaa ya video, ánni nga chan tsín tikisisinni je Tom tʼatsʼe religión.
Jméni xi tsakʼéjngo kon nga ñaki kʼoatjín jmeni xi tíʼmiyale.
Ali tsa toʼénjin xi nokjoaa, ñaki kʼoanʼia jmeni xi bixoán. Tʼexkiao Mateo 7:21 kʼoa cho̱bayaño jebi:
Jméni xi ngisa chjí be je Jesús: a kuinga kʼoakuixoán nga makjainná tʼatsʼe axo kuinga kʼoasʼiaan jmeni xi kitsoya.
7. Tjaole xínkjín
Je chjotale Cristo xi títjon tsakatio tjao koanle xínkjín
A tsjoántjai yaole xínkjín je xi chjotale Cristo ma. Chótsenlao VIDEO kʼoa cho̱bayaño jebi:
Ánni nga tíjnandani nga kitsjoantjai yaole je ndsʼee Lloyd xi totʼatsʼe je ndsʼee Johansson.
A kʼoakisʼin jotjínnele sʼin jngo xi chjotale Cristo ma.
Tʼexkiao Juan 13:34, 35 kʼoa cho̱bayaño jebi:
Jósʼin tjínnele skoe̱kon je chjotale Cristo je chjota xi kjaʼaí sʼin tsen yaole kʼoa xi xin naxinandále.
Jósʼin koako nga tsjoake xínkjín kʼiatsa kjoajchánlani tjín.
TJÍNKʼA XI I̱ TSO: “Nʼio chʼao tjíomasʼín je xi chjotale Cristo ma, jósʼin chjotale Cristo koa̱nni”.
Jñánile je texto xi kʼoéxkialai je chjota nga koakolai ʼyáni xi ñaki chjotale Cristo ma.
XI KACHOTʼAYÁ
Je xi ñaki chjotale Cristo ma, sítjoson jmeni xi tso je Biblia, alikui to yaole fini kʼoa kui bakóya jmeni xi tso je Biblia.
Jmé xi kamajinli
Jñá bʼangini jme xi makjainle je xi ñaki chjotale Cristo ma.
Jméni xi bakó je xi ñaki chjotale Cristo ma.
Kʼoa jmé xá xi tjíosʼín.
XI KOASENKAOSALI
Kataʼyai je chjota xi bʼénele yaole nga fitjenngi je choa̱le Jesucristo kʼoa kao jmeni xi tsakakóya.
Ñaki jo familiale koanle jngo chjoón xi madrecita koan kʼianga tsabexkon je xi ñaki chjotale Cristo ma.
“Biblia kisichjén kʼianga kʼoakitsona jmeni xi kiskonangile” (La Atalaya, 1 de abril de 2014)
Je xi ñaki chjotale Cristo ma binyakao xínkjín kʼianga nganʼio machjénle.
Binyakaoñá je ndsʼee kʼianga kjoaxkón sʼe (video xi tochoa tíjna) (3:57)
Je Jesús kʼoakitso jokoa̱nkjoan je xi chjotale koa̱n. Je chjotale Cristo xi tsakatio nichxin kjoatse kʼoa kao xi tjío ndʼaibi kʼoasʼín jmeni xi kitso Jesús.
“Jókjoan je xi chjotale Cristo ma” (La Atalaya, 1 de marzo de 2012)