Nda kuinyañoaa ánni nga koa̱nsíniná
1. Ánni nga sakʼoa ñʼai masíniná nga nda binyañoaa jme xi faʼa nga satíoná kjoajtíntse.
1 Jeme sa̱tío je kjoajtíntse xi jan nichxin xi tsʼe nó 2013. Jetongini tjíosatíonda jmeni xi kjoaʼa ya kjoajtíntse jebi, xi koasenkao xíngiaa jngo tjíjtsa Sonʼnde. Kʼoa ji, a jetibʼendajin nga kʼuín nga jan nichxin. Nkjín koya jmeni xi bʼéchjoaná nga likui nda binyañoaa jme xi faʼa nga satíoná kjoajtíntse. Kʼoa mani nga ngisa nkjín ora ʼmiyaná Énle Niná tikʼoajinni kʼianga satíoná je kjoajtín ya Ndʼia jña chotʼayá, ngisa machjén nga nʼio kʼoénelee yaoná nga nda kuinyañoaa jokji tse kjoaʼa. Tsa kjin kanroañá aonya maná, kʼoa kʼoati aonya maná tsa jmesani xá xi sʼiaan. Jméni xi koasenkaoná nga nda kuinyañoaa ánni nga koa̱nsíniná jotso kjoatéxomale Niná (Deut. 31:12).
2. Jméni xi sʼiain nga tongini si̱kʼéjnandai je ni̱ma̱li nga sʼe̱jna je kjoajtíntse xi jan nichxin.
2 Nga kjesa sʼejnajin je kjoajtíntse. Ya dirección xi tíjnaná ya Internet, www.jw.org/es, yaa koa̱nsjaitʼali je programa jña faʼaitʼa jotjín kjoanokjoaya kjoaʼa ya kjoajtíntse. Kʼoati jchai nga jngo kʼoa tsa jao testo yʼangini nga jngó jngó kjoanokjoaya. Kʼiatsa tjínli Internet koaan tongini chótʼayai jebi ánni nga tongini si̱kʼéjnandasíni je ni̱ma̱li (Esd. 7:10). Kʼoati koa̱n kui chótʼayao Nichxin nga chotʼayajtíon énle Niná ya niʼyano ánni nga ngisa tsjoa tjínsínino nga koanngínkinóʼyao je xi kjoaʼa ya kjoajtíntse.
3. Jméni xi koa̱n sʼiain kʼianga ñaki nda koasenñui jmeni xi kjoaʼa ya kjoajtíntse.
3 Kʼianga jeya tiyoaa ya kjoajtíntse. Tongini koanngián baño nga kjesa fitsʼiajin kjoajtíntse. Kʼoa kʼianga jekoaitsʼia, si̱kitsʼoaa je celularná ánni nga tsínla kui sijtininá kʼiatsa tjín xi kuinchja̱ná kʼoa tsa mensaje kjoaʼaíná, kʼoa ánni nga tsín tsa to mensajela si̱kasénsíñá. Kʼiatsa tsín koa̱n si̱kitsʼoaa je celularná koaan kʼoasʼin si̱kʼéjnalee nga tsín tsa katafane ánni nga tsín ʼya xi sijtisínile. Kʼoa tsakui si̱chjén je xi tableta electrónica ʼmi si̱kuindaa josʼin si̱chjén ánni nga tsín ʼya xi sijtisínile. Alikui koa̱n nga tjín xi chi̱nee kʼoa nga tjín xi sʼioa nga tífaʼa je kjoanokjoaya (Ecl. 3:1). Xi ijngosani, ñaki ya chótsenlee je xi tínchja̱yajin kʼoa kjoásjaijiaan je testole Biblia xi sikʼaxki. Kʼoa tongisa nda nga tochoakjoan kʼoétʼaxoaan jmeni xi kjoaʼa.
4. Jósʼin kuinyakao je ʼndíxtile je xi xijchá ma nga nda katabinyáño jme xi kjoaʼa ya kjoajtíntse.
4 Mená nga je xtiʼndí nda katabinyáño ánni nga katamasínile tsanda je. Ya Proverbios 29:15 itso: “Je ti xi totjoʼnde kjitele kjoasoa sikʼéjnajin je na̱le”. Tongisa nda nga je xti ya koatiotʼale xijchále, ánni nga je sikuindasíni nga nda katabinyáño kʼoa ánni nga tsín tsa tokjaonajmísíni, nga tsín tsa to mensajela sikasén kʼoa nga tsín tsa toyala ngaʼi̱ ngaján kʼoétsoma. Saʼnda je xi sʼa nʼio ʼndí kjoan koaan kʼuínyale nga katabinyáño kʼoa nga jyó katabatio ningalani kje nanda machoyajinle.
5. Jósʼin koasenkaoná tsa chótʼayajin ijngokʼá jme xi faʼa ya kjoajtíntsená kʼoa jméni xi koa̱n sʼiaan.
5 Nga jekjoetʼa nga jngó jngó nichxin. Xátí soyofao ánni nga nda si̱kjáyasíño. Nga jngó jngó nichxin nga sʼe̱jna je kjoajtíntse koaan cho̱baya ngotjoño kao familiano jmeni xi kamajinno, ánni nga likui ndi̱to̱n jchajinsínino. Kʼoa tsa tjín jña koanngínkicho kao miyono kʼoati koa̱n kui cho̱banajmíño jmeni xi nʼio kamandosinno, kʼoa koaan kui si̱chjaon jme xi kabʼetʼaxoon. Xijekoa̱n, kʼianga chótʼayajtíon je énle Niná ya niʼyano koaan kʼia chótʼayao jósʼin koanngíntjenngio jmeni xi sa̱kóya ya kjoajtíntse. Kʼoati koa̱n chʼa̱sjeʼa choao nichxinno nga xki̱ xomana nga chótʼayajion je xo̱n xi kʼia kuitjo.
6. Jméni xi tjínnele sʼiaan kʼianga ñaki nda koasenkaoná jmeni xi kʼuínyaná ya kjoajtíntse.
6 Kʼiatsa tjín xi kanchja̱ná niʼyale nga sikjenná tonga likuini kuichaa kʼoa lijmeni xi sʼioa, ñaki toxitsjoajinni nga ya kamangián. Kʼoakjoánti tjínni kʼianga ya mangián je kjoajtíntse xi jan nichxin satíoná. Kʼianga ñaki nda koasenkaoná jmeni xi kʼuínyaná, kʼoénelee yaoná nga koanngián nga jan nichxin, nda kuinyañoaa kʼoa si̱tjosoán jmeni xi sa̱kóyaná.