KJOAʼMIYA XI CHOTʼAYA 17
KJOAJNDA 99 Jmi mani je ndsʼee kao tichjaa
Alikuikʼia nga toñá tiyoaa
“An koasenkaole” (IS. 41:10).
XI TÍNCHJA̱NI
Ño koya chótʼayajiaan josʼin basenkaoná Jeobá.
1, 2. 1) Ánni nga tsín toñá tiyoñá kʼianga kjoa bitjatojiaan. 2) Jmé xi chótʼayajiaan i̱ kjoaʼmiya jebi.
SI̱KJAʼAITSJENLA jósʼe̱ tokoán kʼiatsa toñá tiyoaa ya jinndáchikon. Kʼoasʼe tokoán kʼianga tse kjoa bitjatojiaan, toñá tiyoaa maná. Tonga alikui toñá tiyoaa, nga̱ je Jeobá be jme kjoa xi bitjatojiaan kʼoa kʼoatsoná nga koasenkaoná. Itsoná nga jngó jngoá: “An koasenkaole” (Is. 41:10).
2 Ño koya tjínni xi chótʼayajiaan josʼin basenkaoná Jeobá. Xi títjon, bándiaaná. Xi majaoni, tsjoáná jmeni xi machjénná. Xi majanni, síkuindaná. Kʼoa xi mañoni, tsjoánganʼioná. Alikʼia nga toñá tiyoaa nga̱ kʼoatsoná Jeobá nga tsínkʼia tsjiónkonná ningalani kjoa kuitjátojiaan.
JE JEOBÁ BÁNDIAANÁ
3, 4. Jósʼin bándiaaná Jeobá (Salmo 48:14).
3 (Tʼexkiai Salmo 48:14).a Je Jeobá be nga tsín koa̱nná nga toñá kjoándiaalee yaoná, kuinga kui Biblia síchjénni nga tsjoáná kjoafaʼaitsjen (Sal. 119:105). Ya Biblia tsoyaná jósʼiaan nga tsjoa sa̱tío tokoán. Kʼoati tsoyaná jósʼiaan nga koa̱n kuiyoaa ngantsjai nichxin.b Kʼoatsoná nga si̱chatʼalee xíngiaa, nga tsín kʼoéngijtiaa tokoán, nga tsín chʼa̱nachaa kʼoa nga tsjoacha koaan xíngiaa (Sal. 37:8; Heb. 13:18; 1 Ped. 1:22). Tsa kʼoasʼiaan jotso Biblia miyo cho̱bá kao je ndsʼee, ngisaa nda si̱jchá je ʼndíxtiná kʼoa ngisaa nda koatiokao xínkjín xi jechixan.
4 Ya Biblia síkʼaxki je chjota xi kʼoati kui kjoa jaʼatojin je kjoa xi bitjatojiaan kʼoa xi kʼoati kisatio kon josatío tokoán (1 Cor. 10:13; Sant. 5:17). Kʼianga nikjaʼaitsjenjiaan jokisʼin chjota xi síkʼaxki̱ Biblia jao koya tjínni josʼin basenkaoná. Xi títjon, majinná nga tsín toñá xi kjoa bitjatojiaan. Kʼoati majinná nga je Jeobá tsakasenkao nga kichokjoajinle je kjoa xi jaʼatojin (1 Ped. 5:9). Xi majaoni, ʼyañá jósʼiaan nga chókjoajinná kʼianga kjoa bitjatojiaan (Rom. 15:4).
5. ʼYáni xi síchjén Jeobá nga bándiaaná.
5 Kʼoati je ndsʼee síchjén Jeobá nga bándiaaná.c Tobʼelañá, je kjoanokjoaya xi tsjoá superintendente xi tsʼe circuito binyakaoná kʼianga nʼio satío je kjoamakjainná kʼoa nga tosi tonda nda kjuinkoaa xíngiaa ya jinjtín (Hech. 15:40–16:5). Je xi chjotajchínga sʼin tjío binyakaoná nga jngó jngoá (1 Ped. 5:2, 3). Je xi xijchá ma binyakao ʼndíxtile nga nda katasíxále Jeobá, nga tsjoake katama kʼoa nga nda katasíkjaʼaitsjenjin jmeni xi sʼin (Prov. 22:6). Kʼoa je tichjaa xi jetjínle kjoafaʼaitsjen nda choa̱ batíole je tichjaa xi sʼa xti, tsjoále kjoafaʼaitsjen kʼoa sínʼio kon (Tito 2:3-5).
6. Jósʼiaan nga koasenkaoná je kjoafaʼaitsjen xi tsjoáná Jeobá.
6 Je Jeobá tsjoáná kjoafaʼaitsjen jósʼiaan nga nda kuiyoaa. Tonga jméni xi sʼiaan ñá nga koasenkaoná je kjoafaʼaitsjen xi tsjoá kʼoa jósʼin koakoá nga chjí ʼyatokoán jmeni xi tsoná. Ya Proverbios 3:5, 6 itso: “Tin’iot’ai Jeobá kao ngayeje ni̱ma̱li, kʼoa ali tokuijin ’mini josʼin machoyali”. Kʼoa itsosa: “Jé sikixiya je ndiaali”. Tsa kjuintjenngiaa je kjoafaʼaitsjen xi tsjoáná Jeobá tsjoa sa̱tío tokoán kʼoa tsínkui kjoa jtsaojiaan je kjoa xi tsaojin xi tsín sítjoson kjoatéxomale Niná. Nda satío tokoán nga nʼio tsjoakená Jeobá kʼoa nga tsjoáná kjoafaʼaitsjen (Sal. 32:8).
JE JEOBÁ TSJOÁNÁ JMENI XI MACHJÉNNÁ
7. Jósʼin basenkaoná Jeobá tojo tso Filipenses 4:19.
7 (Tʼexkiai Filipenses 4:19).d Je Jeobá tsjoáná kjoafaʼaitsjen jósʼiaan nga nda kuiyoaa kʼoa basenkaoná nga sokóná tsojmi xi chinee, je najño xi chʼakjá kʼoa jngo ʼnde jñani biyoñá (Mat. 6:33; 2 Tes. 3:12). Ningalani makjájonná nga bijnyiʼá yaoná, je Jeobá kʼoatsoná nga tsínkui nʼio si̱kjáojiaan (chótʼai nota xi títjon xi tsʼe Mateo 6:25, TNM). Nga̱ tsínkʼia tsjiónkon je choʼndale xi kixi fitʼale (Mat. 6:8; Heb. 13:5). Alikui jao tjínná nga sitjoson jmeni xi tso Jeobá kʼoa tsjoáná jmeni xi machjénná.
8. Jósʼin tsakasenkao Jeobá je David.
8 Jé Jeobá tsakasenkao David kao chjotale jokjitse tsakʼetsomachjinga kʼianga kitjenngike je rey Saúl. Jé Jeobá kitsjoale ngayeje jmeni xi koanchjénle, kʼoa nga kui nichxin je David i kitso: “Xti koan kʼoa jekoanjchínga ndʼaibi, tonga nisañandiajinla ʼbe tsa njiotokon jngo chjota xi kixi, kʼoa tsa tsínle jme xi tjíokjine je xtile” (Sal. 37:25). Kʼoajinti ʼyaa jósʼin tíbasenkao Jeobá je ndsʼee kʼoa jósʼin tíbasenkaoná ñá nga tísokóná jmeni xi machjénná.
9. Jósʼin basenkao Jeobá je choʼndale nga kjoaxkón bichóne (kʼoati chótsenlai sén xi faʼaitʼa).
9 Je Jeobá basenkaoná kʼianga kjoaxkón faʼainená. Kʼoati nʼia ndʼaibi tojo kisʼin je chjotale Cristo nichxin kjoatse nga tsakinyakao je ndsʼe̱ xi Jerusalén tsʼe kʼianga kjinrá koan (Hech. 11:27-30; Rom. 15:25, 26). Binyakaoñá je xi nganʼio machjénle. Nga tsjoakená je Jeobá, ñá síchjénná nga binyakoaa xíngiaa. Kʼianga kjoaxkón bichóne je ndsʼee nikasénle je tsojmi xi kjine, nandá, najño kao xki. Kʼoati toxá tjíoni je ndsʼee xi bʼéndaya Ndʼia jña chotʼayá kao niʼyale ndsʼee jñani kjoaxkón bichóne. Kʼoa tokjoan sʼendajin josʼin bʼainganʼiole kʼoa josʼin ninʼio kon je ndsʼee xi xínkjín sícha kʼoa xi bixoya niʼyale.e
Jósʼin basenkaoná Jeobá kʼianga kjoaxkón sʼe (Chótsenlai párrafo 9)i
10, 11. Jméni xi bakóyaná jokoan Boris.
10 Je Jeobá nʼio nda chjota kʼoa binyakao toʼyani, ninga xi tsín je síxále. Nga chjenngilee Jeobá kʼoati binyakoaa xi kjaʼaí ninga tsín ndsʼee mani (Gál. 6:10). Nga kʼoanʼia nda bichómani. Tojo koan je Boris, jngo chjota xi director sʼin tíjnale skuela ya naxinandá Ucrania. Ningalani tsín testigole Jeobá ma, nda kisikao je xti xi testigo ma. Kʼianga kisʼe kjoajchán ya Ucrania xin ʼnde kikʼejna kʼoa jé ndsʼee tsakinyakao. Nga koanskanni, je Boris ki nga jaʼaitsjenya Kjoabiyale Cristo. Kʼianga síkjaʼaitsjenjin josʼin tsakinyakao je ndsʼee, itso: “Tsjoale kjoanda je testigole Jeobá nga̱ nʼio nda tsakinyakaona”.
11 Koaan kʼoati sʼiaan josʼín je Jeobá nga kuinyakoaa toʼya chjotani ninga tsín ndsʼee mani (Luc. 6:31, 36). Kʼianga nda nikoaa je chjota tjínkʼa xi mandosinle kotʼaya Biblia kʼoa jé Niná síxále (1 Ped. 2:12). Ni koa̱nndosinle Énle Niná je chjota kʼoa ni mai, tsjoa satío tokoán nga binyakoaa (Hech. 20:35).
SÍKUINDANÁ JE JEOBÁ
12. Jósʼin sikuinda Jeobá je naxinandále (Salmo 91:1, 2, 14).
12 (Tʼexkiai Salmo 91:1, 2, 14).f Je Jeobá kʼoatso nga sikuinda naxinandále, ningalani kui xi mele Na̱i nga tsín tikʼoasʼin jchaxkónñá Niná josʼin mele, tonga je Jeobá alikui tsjoáʼnde nga kʼoakoa̱n (Juan 17:15). Kʼianga jekjoaʼaí kjoañʼai xi nʼio tse ñaki tjínjngoo tokoán nga je Jeobá sikuinda naxinandále kʼoa koasenkaoná nga tosi tonda nʼio sa̱tío je kjoamakjainná (Apoc. 7:9, 14).
13. Jósʼin síkuindaná Jeobá nga jngó jngoá.
13 Jósʼin síkuindaná Jeobá nga jngó jngoá. Kui Biblia síchjén nga tsoyaná ánni nga kui kʼoasʼianñá xi ndatjín kʼoa tsínkui kʼoasʼiaan xi chʼaotjín (Heb. 5:14). Kʼianga nitjosoán jmeni xi tso Biblia nda sʼe tokoán kʼoa nda biyoaa ngixko̱n Niná (Sal. 91:4). Kʼoati je ndsʼee xi tjío ya jinjtín síchjén Jeobá nga basenkaoná nga tosi tonda kixi kjuintʼalee (Is. 32:1, 2). Je ndsʼee tsjoake Jeobá kʼoa sítjosonle. Nga ñatjen ʼmiyasoán kʼoa nga tsaojiaan xíngiaa nga satíoná kjoajtín basenkaoná nga tsínkui kʼoanʼia xi chʼaotjín (Prov. 13:20).
14. 1) Ánni nga sakʼoa tsjoáʼndeni Jeobá nga kjoa bitjatojiaan. 2) Jméni xi tsoná Salmo 9:10 (kʼoati chótsenlai nota).
14 Nichxin kjoatse je Jeobá tsakasenkao choʼndale nga tsín jme xi koanle, tonga kʼoati sakʼoa kitsjoaʼnde nga kjoañʼai tsakjaʼá. Kʼoa ya Biblia kʼoatso nga toxijña faʼainená jmeni xi tsín ñá tjínjinná (Ecl. 9:11). Nichxin kjoatse kao nichxin xi tiyoaa ndʼaibi sakʼoa tsjoáʼnde Jeobá nga chjota fitjenngike choʼndale kʼoa sakʼoa saʼnda nikʼien, nga̱ kʼoasʼin ʼyanile nga to énndiso jmeni xi tso je Na̱i (Job 2:4-6; Mat. 24:9). Ningalani tsjoáʼnde sakʼoa Jeobá nga kjoa bitjatojiaan, kʼoati ʼyaa nga tsínkʼia tsjiónkonná nga̱ tsjoachañá (Sal. 9:10).g
TSJOÁNGANʼIONÁ JE JEOBÁ
15. Jósʼin basenkaoná Jeobá nga bʼetsʼoalee, nga bʼexkiaa je Biblia kʼoa nga tjío je ndsʼee (2 Corintios 1:3, 4).
15 (Tʼexkiai 2 Corintios 1:3, 4).h Ngatsʼiñá nga sakʼoa ba satío tokoán. Tsakui nichxin kjoa tibitjatojiaan ndʼaibi, kʼoa nga nʼio tinikjáojiaan tsa kʼoasʼin nikjaʼaitsjeen nga toñá tiyoaa. Ninga kʼoasʼin nikjaʼaitsjeen nga tsín ʼya xi majinle jotjín tokoán, je Jeobá majinle kʼoa kʼoatsoná nga koasenkaoná kʼoa nga sinʼio tokoán. Basenkaoná kʼianga bʼetsʼoalee, nga̱ je kjoanyʼántokonle “ñaki faʼatole ngayije kjoafaʼaitsjenle chjota” (Filip. 4:6, 7). Kʼoati kui Biblia síchjén Jeobá nga basenkaoná. Kʼianga bʼexkiaa Biblia majinná nga nʼio tsjoakená, tsjoáná kjoafaʼaitsjen kʼoa nda sʼe tokoán jmeni xi tso tʼatsʼe nichxin xi sʼa nroa. Kʼoati je ndsʼee síchjén Jeobá nga tsjoánganʼioná, nda sʼe tokoán nga tsaojiaan ndsʼee nga satíoná kjoajtín nga̱ ʼyañá nga tsjoakená kʼoa yaa Biblia bʼangini nga tsjoánganʼioná.
16. Jméni xi bakóyaná jokoan je Nathan kao Priscilla.
16 Kui Biblia síchjén Jeobá nga tsjoánganʼioná. Kataʼyala josʼin tsakasenkao jngo ndsʼee xi Nathan ʼmi kʼoa xi Priscilla ʼmi chjoónle, xi Estados Unidos tsʼe. Je ndsʼee jebi yaa kikatio ya jñani ngisa machjén xi tsoyason nga̱ ñaki kʼoatjío kon nga je Jeobá sichikontʼain. Tonga kʼianga jekicho ya jtín jñani kinikasén kitjochʼinle kʼoa ñʼai koanle tao̱n. Xijekoan, kini ʼndele tonga tojo ñʼai koanle tao̱n. Je Nathan itso: “Kui kisikjaʼaitsjen ánni nga tsín tsakinyakaoninajin Niná, kʼoa kʼoasʼin kisikjaʼaitsjen tsakui kʼoakisʼian jmeni xi tsín sasénle”. Tonga nga koanskanni, koanjinnile nga tsínkʼia kitsjionkon Niná. Je Nathan itsosa: “Kʼianga kui kjoa kitjatojinjin nʼio nda tsakasenkaonajin nga tsakʼexkiaijin Biblia, kʼoasʼin tsakasenkaonajin joni jngo miyo xi nda kjoafaʼaitsjen tsjoáná. Koanjinnajin nga ngisa nda nga tsínkui nʼio kuenta sʼiainjin je kjoa xi tibitjatojinjin. Tosaa kui kuenta kinʼiaijin josʼin tíbasenkaonajin Jeobá nga tíchókjoajinnajin kʼoa tjínjngoo tokuinjin nga je Jeobá koasenkaonajin tojme kjoa xi kuitjátojinjin nichxin xi sʼa nroa”.
17. Jósʼin tsakʼainganʼiole tichjaa xi Helga ʼmi (kʼoati chótsenlai sén xi faʼaitʼa).
17 Tojosʼin tiʼyaa kʼoati binyakaoná je ndsʼee. Kataʼyala jokoan jngo tichjaa xi Helga ʼmi, xi Hungría tsʼe. Nʼio nkjín nó nga tse kjoa jaʼatojin tichjaa jebi kʼoa alikui titsjoa kisʼeni kon, tonga nga síkjaʼaitsjen ndʼaibi jotjín nó nga kjoa jaʼatojin majinle nga je ndsʼee kao tichjaa kisichjén Jeobá nga tsakasenkao. Itso: “Je Jeobá kuenta kisʼinna ngantsjai kʼoa jé tsakasenkaona kʼianga tsínti tsaʼbeña jokisʼian, ñʼai koanna nga kisixá, an kisikuinda ʼndítina xi tímʼe kʼoa kjaʼaísa kjoa jaʼatojian. Je xi 30 nó tífaʼato tiʼbeña josʼin tíbasenkaona Jeobá nga nyaon nyaon. Nga nda tso én fákaona je ndsʼee kʼoa nga nda síkaona kʼoasʼin tiʼbeña nga tíbasenkaona je Jeobá. Kʼiakjoán binyakaona ndsʼee kʼianga nganʼio machjénna, mensaje síkasénna, xon kjina kʼoa kʼoatsona nga nda tisʼian”.
Jósʼin síchjénná je Jeobá kʼianga binyakoaa xi kjaʼaí (Chótsenlai párrafo 17)
18. Jósʼin koa̱n si̱nʼioá kon xi kjaʼaí.
18 Kʼoati koa̱n chjénngilee Jeobá nga si̱nʼioá kon xi kjaʼaí. Ngasin nganda kuinóʼyalee tsa jme xi kuitsoná, si̱nʼioá kon kʼoa kuinyakoaa tsa jmeni xi machjénle (Prov. 3:27). Ali tojejin ndsʼee xi binyakoaa, kʼoati binyakoaa je chjota xi tsín je Jeobá síxále. Tsa jme kjoa tjíofaʼatojin, tsa chʼin bʼetʼale kʼoa tsa xínkjín kisicha mangínnixatʼañá, ngasin nganda noʼyalee kʼoa kui Biblia nichjén nga ninʼioá kon. Kʼianga chjenngilee Niná nga ninʼioá kon je ndsʼee, binyakaoñá nga chókjoajinle jme kjoa xi faʼatojin. Kʼoa nga binyakoaa xi kjaʼaí chjota tjínkʼa xi mandosinle xi tʼatsʼe Niná (Mat. 5:16).
JE JEOBÁ KOASENKAONÁ NGANTSJAI
19. Jósʼin basenkaoná je Jeobá, kʼoa jósʼin koa̱n chjénngilee.
19 Nga tsjoachaa je Jeobá síkuindaná kʼoa alikui tsjionkonná nga kjoa bitjatojiaan. Kʼoasʼin síkuindaná tojo sʼín jngo nʼai xi tsjoake je ʼndíle, bándiaaná, tsjoáná jmeni xi machjénná, síkuindaná kʼoa sínʼio tokoán. Koaan chjénngilee je Jeobá nga kuinyakoaa kʼoa si̱nʼioá kon je xi kjoa tjíofaʼatojin. Tojme kjoa xi kuitjátojiaan ñaki kʼoakʼoé tokoán nga je Jeobá koasenkaoná, nga̱ itsoná: “Ali tsa nokjonjin, nga̱ an tijnakaole” (Is. 41:10). Nda sʼe tokoán nga ʼyaa nga tsínkʼia tsjionkonná je Jeobá.
KJOAJNDA 100 Nda chjoéyaa xíngiaa ya ndʼianá
a Salmo 48:14: “Nga̱ Niná jebi jéní Nináná ngantsjai nichxin. Jesoa koandiaaná tokʼia saʼndani”.
b Chótʼai je Xo̱n xi Bájinkonná xi tsʼe enero 2025, jñani “Kui kʼoasʼiaan jmeni xi sasénle Jeobá” tso.
c Chótʼai je Xo̱n xi Bájinkonná xi tsʼe febrero 2024 jñani “Si̱tjosoán ngantsjai josʼin bándiaaná Jeobá” tso, párrafo 11 saʼnda 14.
d Filipenses 4:19: “Ninána tsjoáno tojmesabe xi chano, josʼin tjío kjoanyinále kao tse kjoajeya, nga̱ tiyokao Cristo Jesús”.
e Yaasa tsoyaná xi tʼatsʼe jebi ya jw.org, jñani “labores de socorro” tso.
f Salmos 91:1, 2, 14: “Toʼyani xi ya kʼoéjna ya ʼnde xi tíjnaʼmale je Niná xi nʼio ngʼa tíjna yaa kʼoéjnangi ngʼiánle je Niná xi ngisasa tse nganʼio tjínle. 2 I xínle Jeobá: Jiní xi bisenchjoai nga tsín jme xi mana kʼoa jiní xjáo tajana, Ninána xi sinʼiotʼa. 14 Niná kitso: Nga tsjoakena, kʼoasjentjaiña. Sikuindaña nga̱ be je jaʼaínna”.
g Chótʼai je Xo̱n xi Bájinkonná xi tsʼe febrero 2017, jñani “Tjínkʼa xi kjonangi” tso.
h 2 Corintios 1:3, 4: “Kjoanda katabʼaile je Ninále kʼoa Nʼaile Nainá Jesucristo, je Nʼai xi tsʼe kjoamatakon, kʼoa Niná xi tsʼe ngayije kjoanijetakon, 4 xi síjekonná ngayije kjoañʼainá, jméni nga kʼoati ñá koa̱nsíniná si̱jetakoán je xi tjíojin tojñale kjoañʼaini kao xi tikuini kjoanijetakon, josʼin síjekonná Niná nga ñá”.
i XI TÍNCHJA̱NI SÉN XI FAʼAITʼA: Kʼianga kjoaxkón kichone je ndsʼee xi Malaui tsʼe bʼainganʼiole kʼoa bichóle tsojmi.