TJENYATOKON KUIYOAA

Ñʼai kjimale xi xin tjíofikatio: millón chjota tjíobitjo ya Ucrania

Rusia kʼiaa tsakʼétsʼiakao kjoajchán ya Ucrania nga 24 sá febrero nó 2022, nga kʼoakjima nʼio ñʼai kjimale chjota xi ya tsʼe nga tjíobitjo.a

Natalia xi ya Járkov, Ucrania tsʼe, itso: “Kʼianga kitsao bomba nʼio kitsokjoan. Kʼianga kisʼejinnajin nga tjíobitjo tren xi xin naxinandá tjíofikao chjota, kʼoati tsangínjin. Nga kitjuijin tojngoo mochila kichʼaijin nga jngó jnguíjin. Tokuikjoan kichʼaijin xo̱n xi nʼio machjénná, xki, nandá kʼoa kao tsojmi xi ma chinee. Kʼianga kitsao bomba, tsangínníjin jñani bitjo tren kʼoa kinikatíoníjin ngayeje jme xi tjínnajin”.

Nadia, xi ya Járkov, Ucrania tsʼe, itso: “Alikui kʼoasʼin kinikjaʼaitsjainjin tsa kjoajchán sʼe̱. Kinrʼoele nga kitsao bomba kʼoa ñaki koantinya ventana. Kitjoña ndʼiana kʼoa tojngo jao tsojmi tsakʼa. Las ocho kitjoa nga tanjio kʼoa kui kikoa tren xi ya ki naxinandá Lviv. Xijekoan, jngo carro kiskoé xi ya naxinandá Polonia kikaona”.

I̱bi kui koa̱njinná xi tʼatsʼe jebi:

ʼYáni xi tjínle jée nga nʼio nkjín chjota tjíobitjoni naxinandále.

Ninga kui nga tjíobitjoni naxinandále je chjota xi Ucrania tsʼe nga kjoajchán kichokaone naxinandá Rusia, tonga yaa Biblia tsoya ʼyákjoanni xi tjínle jée nga kʼoakjima.

Je chjotaxá alikui kʼoakjimale nga tjíotsjoále jmeni xi machjénle je chjota. ʼNdele nga kuinyakao je chjota tosaa to kjoañʼai tjíosíkjaʼá (Eclesiastés 4:1; 8:9).
Je Na̱i, “xi batéxoma sonʼndebi” jé xotísʼín nga nʼio tse kjoa tísʼe, je Biblia itso: “I̱ ngakijnda sonʼndebi tíjnakao na̱i” (Juan 14:30; 1 Juan 5:19).
Ninga kjoatse nga kjoa tibitjatojiaan, tonga ya Biblia kʼoati tsoya ánni nga ngisa tse kjoa tjínni ndʼaibi. Ya 2 Timoteo 3:1 itso: “Je nichxin xi kjoetʼa kjoaʼaíná kjoañʼai xi tse”. Nga tísʼe kjoajchán, kjoaxkón, kjinrá kʼoa kao chʼinʼbi kui bakó nga nichxin fetʼa tiyoaa. Nga kʼoakjima nʼio nkjín chjota xi tjíosíkatío naxinandále (Lucas 21:10, 11).

Jmé kjoachoya xi tsjoále je Niná xi xin naxinandá tjíobichókatio.

Ya Biblia kʼoatso nga je Jeobáb nʼio tsjoake kʼoa mamake je chjota xi xin naxinandá fikatio kʼoa xi síkatío ʼndele (Deuteronomio 10:18). Je Jeobá kʼoatso nga tsín tikui kjoa kjoaʼatojinni je chjota. Jngoo Chjotaxá tíjnale Niná ya ngʼajmi xi kjoaʼaxin je kjoa xi tjínle chjota (Daniel 2:44; Mateo 6:10). Je Jeobá jé Chjotaxále sichjén nga kjoaʼaxin je Na̱i (Romanos 16:20). Chjotaxá jebi jé koatexoma jngo tjíjtsa Sonʼnde kʼoa alikui tixkoa̱ya koationi je naxinandá. Ngatsʼi je chjota ñaki jtín sʼin koatio jngo tjíjtsa Sonʼnde. Alikui tiʼya xi sikatíoni ndʼiale, nga̱ ya Biblia itso: “Nga jngó jngó yaa koationgi xka̱totseele kao yá higole, kʼoa liʼya xi kuinyaxkónle, nga̱ jé Jeobá xi tsʼe chjotakjoajchán xotítso” (Miqueas 4:4).

Tojé Chjotaxále Niná xi koa̱nle tondiaa kʼoendajin je kjoa xi tjíofaʼatojin je chjota nga xin ʼnde fikatio. Je Jeobá kui Chjotaxále sichjén nga kʼoendajin kjoa jebi. Kataʼyala jmeni xi sʼin:

Kjoajchán. Je Jeobá “kjoaʼaxin kjoajchán” (Salmo 46:9). Nga jchai jmeni xi sʼin je Niná nga kjoaʼaxin je kjoajchán tʼexkiai jñani tso “¿Cómo llegará a haber paz en la Tierra?”.
Nga taon be xínkjín chjota kao kjoatsʼen. Je Jeobá kʼoasjentjai je chjota “xi tʼatsʼe kjoatsʼen kʼoa nga taon ʼya” (Salmo 72:14). Nga jchai nga koa̱n sikʼantjaiya yaole je chjota, tʼexkiai jñani tso “Aliʼya xi jtichaa katamaa”.
Nga ma̱ nijchá yaoná. Je Jeobá “kʼoasjentjainí je xi ma̱ tísíjchá yaole xi sijéle nganʼio” (Salmo 72:12). Nga jchai jme xi sʼin je Niná nga tsín tiʼya xi ma̱ sijcháni yaole, tʼexkiai jñani tso “¿Es realista esperar un sistema económico justo?”.
Kjinrá. “Nʼio sʼe̱ tsojmintje i̱ sonʼnde” (Salmo 72:16). Nga jchai josʼin Niná nga kjoaʼaxin kjinrá, tʼexkiai jñani tso “¿Un mundo sin hambre?”.

A koasenkao jmeni xi tso Biblia je xi xin naxinandá tjíobichókatio.

Jaon. Je Biblia kʼoatso nga nda koatio nichxin xi nroaján, tonga kʼoati tsjoále kjoafaʼaitsjen xi kuinyakao ndʼaibi nga chókjoajinle je kjoa xi tjíofaʼatojin.

Jmeni xi tso Biblia: “Toʼyani xi tsín nkjín kon tomakjainyejele tojmeni xi ʼmile, tonga je xi sínkjínle kon kosonnile josʼin binyá ndso̱ko̱” (Proverbios 14:15).

Xi tsonile: Tongini tikjaʼaitsjenjin je kjoa xi kuitjátojin kʼoa jmeni xi koa̱n sʼiain. Tikuindalai yaoli je chjotaché. Sakʼoa je síchéle je chjota xi be nga xin tsʼe. Kui kʼoasʼínni nga tsín be jochon ʼnde je chjota xi xin faʼaini.

Jmeni xi tso Biblia: “Tsa tjínná xi chinee kao najño xi chʼakjá, tokʼoasʼin kʼoéjngotakoán” (1 Timoteo 6:8).

Xi tsonile: Ali tsakuijin nʼio nimetokuin nga nkjínsa tsojmi sʼe̱li. Ngisaa tsjoa sʼe̱li tsa tokoa̱njngoni tokuin jmeni xi tjínli.

Jmeni xi tso Biblia: “Kʼoasʼin ngayije kjoa xi meno nga síkaono chjota, kʼoatisʼin tikaonio nga je” (Mateo 7:12).

Xi tsonile: Nda chjota kʼoa tsejta katamai. Tsa kʼoasʼiain skoe̱xkónli je chjota.

Jmeni xi tso Biblia: “Ali chʼaojin nikao je xi chʼao síkaono” (Romanos 12:17).

Xi tsonile: Kʼiatsa ʼya xi totaon skoe̱li, ali majtijinli kʼoa ali nijndangajaojinni. Tsa kʼoasʼiain to kjoa kuijnyí.

Jmeni xi tso Biblia: “Kʼoakoa̱nna tojmeni nga̱ tjínna nganʼio xi totʼatsʼe je xi kʼoasʼin tsjoána nganʼio” (Filipenses 4:13).

Xi tsonile: Je títjon kuenta tʼiain je Niná. Kʼoa kʼianga kʼoétsʼoalai tijélai nganʼio nga chókjoajinli je kjoa xi tibitjatojin. Je Niná koasenkaoli tsa kʼoasʼiain.

Jmeni xi tso Biblia: “Ali kʼoajin mano. Tojmenibe xi machjénno, tijélao Niná, tʼetsʼoalao, kʼoa tʼailao kjoanda. Kʼoasʼin katasʼejinle Niná jme xi nijáo. Je kjoanyʼántakonle Niná xi ñaki faʼatole ngayije kjoafaʼaitsjenle chjota, jé xi sikuinda ni̱ma̱no kao kjoafaʼaitsjenno” (Filipenses 4:6, 7).

Xi tsonile: Tojme kjoa xi kuitjátojin tijélai je Niná nga nyʼán katasʼe tokuin. Tʼexkiai jñani tso “Filipenses 4:6, 7 | No se inquieten por nada”.

a Kʼianga koannyaonni nga kitsʼia kjoajchán ya Ucrania, je Alto Comisionado de las Naciones Unidas para los Refugiados (ACNUR) kʼoakitso nga toya Ucrania jñani ngisasa nkjín chjota tjíobitjo naxinandále. Xi tosʼa 12 nichxin, tsʼato jao millón chjota kitjo ya Ucrania xi xin naxinandá kikatio kʼoa jngo millón mani xi xin ʼnde tjíofikatio xi tiyani Ucrania.

b Je Niná Jeobá ʼmi (Salmo 83:18). Tʼexkiai jñani tso “¿Quién es Jehová?”.