Sa nkjín sa nkjín kjimani chjota xi ba tjíosatío kon | Jótso je Biblia

Kʼianga kichjonangile je chjota tsa ba tjío kon,a nga ño chjota jngo xi kʼoakitso nga ba tjín kon.

• “Kʼoama toʼya chjotani, ali tsakuijin xi tsoni jñáni tíjna kʼoa jótjín nóle” (Chido Mpemba, copresidenta de la Comisión de la Organización Mundial de la Salud sobre Conexión Social).

Tjínkʼa chjota xi kʼoasʼin síkjaʼaitsjen nga toje xi ba satío kon je xi jejchínga kʼoa tsa je xi toje tjíoʼya ndʼia. Tonga kʼoati ba satío kon je xi sʼa xti, xi tsín jme chʼin tjínle, xi ndatjío kʼoa kao xi jechixan. Nga nʼio ba satío kon je chjota kui xosíkao nga tjochʼinnile kʼoa nga likui tinda satíoni kon.

• “Kʼianga ba satío kon je chjota saʼnda kjoabiya bichómani. Yaa mangóson jokji síkiʼaonná tsa xjaʼaon na̱jno̱ chjén nga nyaon nyaon” (Vivek Murthy, director general de Salud Pública de Estados Unidos).

Jotso je Biblia

Je Niná kui xi mele nga si̱miyoaa xi kjaʼaí. Je Niná kui xi mele nga kʼoétsaojiaan kao miyoná.

• Texto xi tsʼe Biblia: “Je Niná Jeobá i kitso: Alikui ndatjín nga tosi tonda toje kʼoéjna je xʼin” (Génesis 2:18).

Je Niná kui xi mele nga miyoná koa̱n. Tsa ñá xi kʼoasʼin si̱chriantʼalee Niná kʼoati sichriantʼaná tsanda je (Santiago 4:8).

• Texto xi tsʼe Biblia: “Tsjoa tjíole je xi be nga machjénle tʼatsʼe Niná nga̱ tsʼení je Chjotaxále ngʼajmi” (Mateo 5:3, TNM).

Kui xi mele Niná nga ñatjen jchaxkoán kao je chjota xi kʼoati je bexkón. Kʼianga ñatjen nixálee Niná kao xi kjaʼaí chjota, sínʼio tokoán.

• Texto xi tsʼe Biblia: “Kʼoa si̱kjaʼaitsjenjinnía xíngiaa nga jngójngoá, nga si̱nʼiojiaan xíngiaa, nga sʼe̱ná kjoatjaocha, kʼoa nga kʼoasʼiaan xá xi nda. Likui si̱kʼéjnaa nga koa̱nñaa” (Hebreos 10:24, 25).

Tsa mesali jchai jme xi koasenkaoná nga tsín ba sa̱tío tokoán, tʼexkiai jñani tso: “Soledad en la era de la comunicación”.