KJOAʼMIYA 13
Je religión ndiso síjndí je jaʼaínle Niná
Je Niná kjoatsjoachaní, tonga ánni nga kui kʼoasʼínni je xi chʼaotjín je religión tsa Niná tjíobexkón. Kuinga religión ndiso. Jmeni xi sʼín kʼoa jmeni xi bakóya síjndí je jaʼaínle Niná. Jósʼin tjíosíjndí je jaʼaínle Niná. Jósʼe kon je Niná nga kʼoasʼín. Jméni xi sikao je Niná je religión ndiso.
1. Jósʼin tjíosíjndí je jaʼaínle Niná jmeni xi bakóya je religión ndiso
Je religión ndiso “kisikʼantjaiya kjoakixile Niná nga tsakʼasje ndiso” (Romanos 1:25). Tobʼelañá, nkjín religión xi tsín bakóya joʼmi je Niná. Tonga ya Biblia kʼoatso nga tjínnele si̱chjén je jaʼaínle (Romanos 10:13, 14). Tjínkʼa chjota xi nyatítjonle je religión xi kʼoatso nga je Niná xi kʼoasʼin mele kʼianga jngo kjoaxkón kasokó, tonga alikui kʼoatjín. Alikui je Niná tjínle jée jmeni xi ma (tʼexkiai Santiago 1:13). Nga kui bakóya je religión ndiso jmeni xi tsín kʼoatjín kui xosíkao je chjota nga síkjinnile je Niná.
2. Jósʼin tjíosíjndí je jaʼaínle Niná jmeni xi sʼín je religión ndiso
Je religión ndiso alikui kʼoasʼin bekon je chjota josʼin bekon je Jeobá. Je Biblia itso: “Je kjoatsʼenle kʼoasʼin jicho saʼnda ngʼajmi” (Apocalipsis 18:5). Jenkjín siento nó tjínle nga kjoa política tsjonjin yaole je religión ndiso, tsjoánganʼio nga kjoajchán ma kʼoa nga nikjeson je chjota. Tjínkʼa je chjota xi nyatítjonle je religión xi mele nga nyiná koa̱n kʼoa tao̱n síjéle je chjota xi ya tjíojin je religiónle. Jmeni xi sʼín kui bakó nga tsín be je Niná. Alikui je Niná tjíosíxále (tʼexkiai 1 Juan 4:8).
3. Jósʼe kon je Niná nga be jmeni xi sʼín je religión ndiso
Tsa tsín nda bʼé tokuin jmeni xi sʼín je religión ndiso ngisaa tomale je Niná. Je Niná tsjoake je chjota, tonga jtike je chjota xi nyatítjonle je religión ndiso nga̱ tjíosíjndí je jaʼaínle kʼoa totaon be je chjota xi ya tjíojin je religiónle. Je Niná kʼoatso nga sikjeson je religión ndiso kʼoa nikʼiajin tikoa̱ntsenni (Apocalipsis 18:21). Tojeme sikjeson ngatsʼi je religión ndiso (Apocalipsis 18:8).
KATAʼYASAI JME XI TÍNCHJA̱NI
Kataʼyalasa josʼin síkjaʼaitsjen je Jeobá tʼatsʼe je religión ndiso. Kʼoati jchaa jmésani xi sʼín religión ndiso. Kʼoa ánni nga tsínkui katabʼéchjoanili nga tosi tonda chótʼayai xi tʼatsʼe Jeobá.
4. Je Niná alikui sasénle ngatsʼi religión
Nkjín chjota xi kʼoasʼin síkjaʼaitsjen nga tsín jme xi koa̱nle ninga tojme religión xi kuiyojiaan nga̱ tojngoni Niná. Tonga a kʼoatjín. Tʼexkiao Mateo 7:13, 14 kʼoa cho̱bayaño jebi:
Tojo tso je Biblia, jókji je ndiaa xi kjoabijnachon kuichokaoná.
Chótsenlao VIDEO kʼoa cho̱bayaño jebi:
A kʼoatso je Biblia nga sasénle je Niná ngatsʼi religión xi tjín.
5. Je religión ndiso alikui bakó kjoatsjoacha xi tjínle Niná
Nʼio nkjín koya jmeni xi sʼín je religión ndiso xi chʼaosʼin síkʼéjna je Niná. Tobʼelañá nga kjoajchán fijin. Jngola choa̱ kataʼyaa. Chótsenlao VIDEO kʼoa cho̱bayaño jebi:
Jméni xi kisʼin je religión kʼianga kisʼejna je Kjoajchántse xi majaoni.
Jósʼin nikjaʼaitsjenngái ji jmeni xi kisʼin.
Tʼexkiao Juan 13:34, 35 kao 17:16 kʼoa cho̱bayaño jebi:
Jósʼe kon je Jeobá kʼianga kjoajchán tsjonjin yaole je religión.
Je religión ndiso nʼio chʼao tjíosʼín kʼoa alikui bakó je kjoatsjoacha. Jméni xi tiʼyai ji jotjíosʼín.
Je religión ndiso alikui bakó je kjoatsjoacha
6. Je Niná kui xi mele nga katabinyaxinle chjota je religión ndiso
Tʼexkiao Apocalipsis 18:4a kʼoa cho̱bayaño jebi:
Jósʼe tokuin nga kui xi mele Niná nga katabinyaxinle chjota je religión ndiso.
7. Tosi tonda kataʼyai je Niná xi kixi
A ndatjín tsa je Niná kjoánelee jme xi tjíosʼín je religión ndiso. Maijin. Tikjaʼaitsjenlai jngo nʼai xi tsín sasénle jme xi tísʼín tile. Tsa tsín nrʼoé je kjoafaʼaitsjen xi tsjoále, bʼasjetʼaxin yaole kʼoa tokjaʼaíngása sʼín. A jé nʼai tjínle jée nga chʼao tísʼín ti jebi.
A je tjínle jée je Jeobá nga chʼao tjíosʼín je religión ndiso kʼoa tsa tokui nga tsín tichótʼayañá.
TJÍNKʼA XI I̱ TSO: “Tongósonla je religión nga̱ ndatjín jmeni xi bakóya”.
A kʼoatisʼin nikjaʼaitsjain ji.
Ninga kʼoatso je religión nga ndatjín jmeni xi bakóya, ánni nga tsín sasénnile Niná jmeni xi sʼín.
XI KACHOTʼAYÁ
Xi bakóya je religión ndiso kʼoa kao jmeni xi tjíosʼín tjíosíjndí je jaʼaínle Niná kʼoa kuinga sikjesonni.
Jmé xi kamajinli
Jósʼin nikjaʼaitsjain ji tʼatsʼe jmeni xi sʼín kʼoa jmeni xi bakóya je religión ndiso.
Jósʼin síkjaʼaitsjen Jeobá tʼatsʼe religión ndiso.
Jmé xi sikao Niná je religión ndiso.
XI KOASENKAOSALI
Jao koya tjínni anni nga tsín sasénnile Niná je religión ndiso.
“A binyakaoná je religión xi tjín nga machriantʼalee je Niná” (Yaa faʼaitʼa ya Internet ya jw.org)
Ánni nga kui xi menile je Jeobá nga jngo jtín kuiyojiaan kʼianga jchaxkoán.
“A machjén nga jngo religión kuiyojiaan” (Yaa faʼaitʼa ya Internet ya jw.org)
Jngo naʼmi xi to jao kisʼele tʼatsʼe religión xi tíjnajin, tonga alikui kui tsakʼéchjoale nga kiskotʼaya jokjoantjínni xi tʼatsʼe Niná.
“Jngo naʼmi xi kisikʼéjna je yo̱ngo̱” (¡Despertad!, febrero de 2015)
Jesiento nó tjínle nga to énndiso tsoya je religión, kʼoatso nga tsʼen je Niná kʼoa nga tsín mandosinle xi tʼatsaan. Janla koya kataʼyaa jña jinroani jmeni xi tso je religión ndiso.
“Énndiso xi bʼéchjoaná nga nichriantʼalee Niná” (Xo̱n xi Bájinkonná, 1 sá noviembre nó 2013)