6. Ri zopjꞹji na joo yo in chʼii ma jyopꞹji

¿PJE NEE RA MAMAYO?

Ne jñaa disciplina nee ra mama ke ra jichiji yo trʼii o ra mbøsʼꞹji ra tsjaji yo na joo, xo nee ra mama ra zopjꞹji ma kjaji yo na sʼoo. Pe xo me na mubi ra jichiji yo in chʼii ra minji na joo, na joo ra tsjaji, na joo rga tsjijñiji ngekʼua ma ra teji ra pjeta juajnꞹji na joo pje ra tsjaji ñe dya ra jyopꞹji.

¿PJENGA ME NA MUBIYO?

Yo kjɇɇ ke kja o kjogꞹ, yo tata ñe yo nana dya kja zopjꞹji o trʼii ma kjaji yo na sʼoo, nange su̱ji ra uɇnchʼiji na zɇzhi ke dya ra zøji na joo. Pe yo jyoo ñe yo jñꞹꞹ ke na joo ga tsjaji, jichiji o trʼii pje nge kʼo dya ra tsjaji xo pjøsʼꞹji ra dyⱥtⱥji.

”Me ni jyodʼꞹ ke yo trʼii ra mba̱ra̱ji pje nge kʼo søø ra tsjaji ñe pje nge kʼo dya søø ra tsjaji, ngekʼua ma ra teji ra juajnꞹji na joo pje ra tsjaji ñe ra minji na joo. Ma jyo ra chjenjui na barco ke dya pɇsʼi timón: dya ra mba̱ra̱ ja ra maa ñe ma ra e̱je̱ na trjadyebʼe ra b’ɇzhi kja trjazapjꞹ” (Pamela).

¿PJE SØØ RI TSJAA?

Dya ri potꞹ kʼo gui xipji. Ma in chʼii dya ⱥtkʼⱥ, tsjapꞹ ra unꞹ nguenda ke ma dya ra tsjaa kʼo gui xipji ra pɇsʼi nrrumꞹ. Ñe ma ra dyⱥtkʼⱥ, dya ri jyombeñe ri xipji ke me na joo kʼo bo tsjaa.

“Yo padya yo trʼii dya ⱥtⱥji na joo, ngekʼua ma yo in chʼii na joo ga dyⱥtⱥji ri xikʼø ke me na joo ke kjajiyo. Nuyo pjøsʼꞹji ra nee ra dyⱥrⱥji ma ra xipjiji pje nge kʼo dya na joo ga tsjaji” (Christine).

NE BIBLIA JIZHI: “Na nge kʼua ja ga tsjaa na ntee, je xo rga kjanu rga nzhopkꞹjikʼꞹ. Chjɇntjui nza kja na kʼꞹ ra mbodꞹ o ndɇxꞹ, ra ndagꞹ o ndɇxꞹ. Pero ma ra mbodꞹ o ndøbidyi, bidyi ra ndagꞹ” (Gálatas 6:7).

Ri tsjijñi ja rgi zopjꞹ. Ma ri uɇnchʼi in chʼii ri pɇsʼi nguenrra yo kjɇɇ ke ɇdyi, jaga kjijñi ñe ma na kjuana mi nee ro tsjaa kʼo na sʼoo. Na joo ra unꞹji disciplina ma o tsjaa kʼo na sʼoo. Nzakja ma in chʼii dya kjotpꞹ ñii yo nrrajme ma nuu ꞹ teléfono, bʼꞹma søø ri jyꞹnbʼꞹ janzi paa ꞹ celular. Xo ñeje, dya ri tsjapꞹ na trjanrrumꞹ ma dya ngeje akjanu.

“Me ni jyodʼꞹ ra pa̱rgø ma in chʼii dya bo nee bo dyⱥtⱥ o ma dya bo unꞹ nguenda ke o jyopꞹ. Ra pɇsʼi nguenda ma dya kjijñi na joo nange nee ra tsjaa kʼo na sʼoo, o ma ni jyodʼꞹ ra pjøsʼꞹ ra unꞹ nguenda ke bo jyopꞹ” (Wendell).

NE BIBLIA JIZHI: “Nuʼtskʼeji i̱n tataji, ri zopjꞹji na joo yo in chʼigeji, dya ri uɇnchʼiji na zɇzhi. Ma jiyø, na ra sjɇyaji, y ra ndo̱gꞹ o̱ mꞹbʼꞹji” (Colosenses 3:21).

Ri sʼiya yo in chʼii. Ma ri uɇnchʼi in chʼii angezeji ra nee ra dyⱥrⱥji ma ra unꞹji nguenrra ke me kʼi sʼiyage, ñe dya kja ra nee ra yepe ra tsjaji yo na sʼoo.

“Ma in chigobʼe mi jyopꞹ sido mi xikøbʼe ke me mi mⱥkjobʼe nange texe o na joo ke bo tsjaa mi jingua. Xo mi xikʼøbʼe ke ma bo jyopꞹ dya nee ra mama ke na sʼonte, nange søø ra jyɇzi kʼo na sʼoo, ñezgobʼe søø ra pjøsʼꞹbʼe ra tsjakʼo” (Daniel).

NE BIBLIA JIZHI: “Ma ra sʼiyaji yo nin minteji, ra pɇsp’iji paciencia ma kjo pje nde ra tsjakꞹji. Ra jodʼꞹji ja rga pjøsʼꞹji angesji” (1 Corintios 13:4).