Xorꞹ 4
¿Jarga soo ri pa̱ra̱ e Mizhokjimi?
Soo ri pa̱ra̱ na joo e Jehová ma ri xorꞹ ne Biblia. Mi jingua e Mizhokjimi o juajnꞹ yo bʼɇzo kʼꞹ ro opjꞹji kʼo mi nee angeze. Nu kʼo go opjꞹji nudya ri pa̱rgojme kʼꞹ ngeje ne Biblia. Nudya soo ra pa̱ra̱ji na joo e Mizhokjimi ma ri xorꞹji ne Biblia, nujnu junsꞹ kʼo mama e Jehová ngekʼua xipjiji nu jñaa e Mizhokjimi. E Jehová dya mama mbʼechjine ngekʼua soo ra ejmeji kʼo mama ne Biblia. «[E Mizhokjimi] dya soo ra tsjaa mbʼechjine.» (Hebreos 6:18.) Ngekʼua kja nu jñaa e Mizhokjimi ri chotrʼꞹ kʼo na kjuana (Juan 17:17).
E Mizhokjimi o charkʼoji kʼo ix na joo kʼꞹ ngeje ne Biblia. Ngeje nzakja na skuama kʼꞹ opjꞹ na tata a in chʼiji kʼꞹ me sʼiya. Ne Biblia mama kʼe e Mizhokjimi ra tsjaa ne xoñijomꞹ me rga zøø nuja ra minkʼoji. Xi mama pje o tsjaa e Mizhokjimi mi jingua, pje na kjaa dya, ñe pje nge kʼo ra tsjaa axojñi ngekʼua ra mbosʼꞹ nu chʼiji kʼo ⱥtⱥji angeze. Xi pjoskʼoji ra jokꞹ in nrrumꞹ ñe jitsʼkʼoji jarga minji na joo ngekʼua ra mⱥjⱥ (2 Timoteo 3:16, 17).
Yo nrrestigo e Jehová a go joji na joo ko e Mizhokjimi; angezeji ra mboxkʼꞹ ngekʼua ri pa̱ra̱ pje jizhi ne Biblia. Ngextrjo kʼꞹ ri xipji kʼe gi nee ri xorꞹ ne Biblia. Ma ra jitsʼi dya pje ri tsjontrʼꞹ (Mateo 10:8). Bʼꞹbʼꞹ nuja jmurꞹji yo nrrestigo e Jehová, soo ri paa nuja jmurꞹji angezeji. Ma ri maa nuja jmurꞹji nrrame ri pa̱ra̱ kjo ngeje e Mizhokjimi.
Soo ri pa̱ra̱ e Mizhokjimi ma ri ñuu ñe ri kjijñi texe kʼo o dyⱥtrʼⱥ. Ne Biblia mama: «E Mizhokjimi i̱ dyⱥtrʼⱥ e jensʼe ñe ne xoñijomꞹ» (Hechos 4:24). Ma e Jehová o dyⱥtrʼⱥ «e jensʼe» xo o dyⱥtrʼⱥ ne jyarꞹ kʼꞹ me na nojo. Nuʼma ¿pje jitsʼkʼoji yo, jaga ngeje e Mizhokjimi? E Jehová me na zezhi. Ngextrjo angeze soo ro dyⱥtrʼⱥ ne jyarꞹ kʼꞹ me na nojo. Xo xitsʼkʼoji kʼꞹ ngextrjo e Jehová me pa̱ra̱ na joo, akjaba soo ro dyⱥtrʼⱥ ne jyarꞹ, kʼꞹ patrʼkʼꞹji ñe pama pama dyakʼoji sibi, dya juenchʼe.
Texe kʼo o dyⱥtrʼⱥ e Jehová ñetsʼe kʼe me sʼiyatsʼgoji. Mbeñe texe yo lulu kʼꞹ kjaa kja ne xoñijomꞹ. E Jehová soo ro dyakʼoji ngextrjo yo nrrora, o dya pje ro dyakʼoji. E Jehová nrre nʼaño lulu kʼo o dyakʼoji, naja kʼꞹ na nojo, naja kʼꞹ na tsʼikʼe, naja kʼꞹ na mbezheje, naja kʼꞹ na mbaja, naja kʼꞹ na o̱ʼo̱, naja kʼꞹ na ixi. Je ga kjanu ri janrrgoji kʼe e Jehová me netsʼgoji, me jonte, nuu pje betsʼkʼoji kjanrru ga dyakʼoji, me sʼiyatsʼgoji (2 Corintios 9:10).