Mukanda Wamucibali wa Samwele

14 Joabu muna Zeluya wanangukile ngwendi mwene washungwiiye kukala na Abisalomu. 2 Ngeci Joabu watumine bamo ku Tekoa mangana bakambateko munakazi umo wa kunyanyama. Co Joabu walekele uje munakazi ngwendi: “Linga ngwe uje ali mu busiwa na kuzala bizalo bya busiwa, co keti ulikwite mazi. Linga ngwe munakazi uje nakala mu busiwa ha simbu yailaha mwafwa ya kutsisa. 3 Co ya ukendeke na mwene mu ngila ei.” Ngeci Joabu walekele ou munakazi byakwendeka.

4 Uje munakazi wa ku Tekoa waile kuli mwene, co wakatsikamene na kukulamena hasi na kwendeka ngwendi: “Njikwase obe mwene!” 5 Mwene wakumbulwile uje munakazi ngwendi: “Bukalu muka buuli nabwo?” Wamukumbulwile ngwendi: “Shukulu yange nji fwile, munalume wange watsa. 6 Co yange ngamba yobe njakele na bana babali, oloni balilwisile mu shwata. Kukwakele wa kubakanda, co umo wabo wapupile mukwabo na kumutsiya. 7 Co hano baka-naanga yange boshe bali na kunjilwisa yange ngamba yobe, co bali na kwendeka ngwabo, ‘Nena kuno owo natsii ndolome yendi mangana tumutsiye mwafwa ya mwonyo* wa ndolome yendi yanatsii, nameme ikeye swana.’ Bashaka kuzima linungu lya tuhya lya mamaneselelo linjili nalyo* na kuzilula lizina lya munalume wange na kumulingisa ajeneke kusala na mbuto hano hasi.”

8 Co mwene walekele uje munakazi ngwendi: “Ya ku njibo yobe, njitala ñanda yobe.” 9 Co uje munakazi wa ku Tekoa walekele mwene ngwendi: “Shukulu yange mwene, mulonga ukale hali yange na bakunjibo ya tate, co mwene keti akale na mulonga hamo na litanda lyendi.” 10 Kutundaho mwene wamulekele ngwendi: “Nga kukala umo akucokotesa lalo munene kuno, co ñele kakwaka lalo mu cikela.” 11 Oloni wendekele ngwendi: “Shukulu-kambu, obe mwene anuka Yehova Njambi yobe mangana muka-kulinga shambandinga keti anene bukalu na kunyongesa munange.” Ngeci mwene wamukumbulwile ngwendi: “Njilisinga hali Yehova wa kuyoya ngwange kukwesi nambe ciñambu ca munobe ciwila hasi.” 12 Uje munakazi wendekele ngwendi: “Shukulu yange mwene, tabesa ngamba yobe endeke lijwi limo kuli yobe.” Co wamukumbulwile ngwendi: “Endeka!”

13 Ngeci, uje munakazi wendekele ngwendi: “Mwafwa bika unayongola kulinga cuma ca cifweci ku banu ba Njambi? Mwene mwali na kwendeka ngacije alilingisa akale na mulonga, mwafwa mwene kelwisile munendi wa kulikitila uje natewela kweka. 14 Tutsa bene ngwe mwa mema abanetila hasi aje kubasa kutekula lalo. Oloni Njambi kasa kutsiya lika ngoco munu,* co lalo akashakezeka bingila bya kwilwisilamo munu uje natewela kweka mangana keti atwaleleleho kukala okwo kwanatewela. 15 Njinaija na kuleka shukulu yange mwene ebi byuma mwafwa banu bananjizibisa lyoba. Ngeci ngamba yobe nalyendekesele ngwendi, ‘Njiya na kusimutwiya na mwene, hamo mwene alinga kwesekesa nebi byamulomba ngamba yendi. 16 Mwene nasa kutolilila yange ngamba yendi na kunjamena ku liboko lya uje atonda kunyongesa munange umolika na kumwonowesa kuswana buswana bwanatwanene Njambi.’ 17 Co ngamba yobe nalyendekesele lalo ngwendi: ‘Majwi a shukulu yange mwene anjihwimise’ mwafwa shukulu yange mwene napu lika ngwe kangelo ka Njambi wa busunga mu kwangununa byuma byabibwa ku byuma byabibi. Yehova Njambi yobe akale nobe.”

18 Mwene wakumbulwile uje munakazi ngwendi: “Shukulu-kambu keti unjishwekele byoshe-byoshe binjikwihula.” Uje munakazi wakumbulwile ngwendi: “Shukulu yange mwene, endeke.” 19 Co mwene wamwihwile ngwendi: “Ngwetu Joabu ikeye nakulingisa ebi byoshe ndi?” Uje munakazi wakumbulwile ngwendi: “Njilisinga hali yobe uli na kuyoya obe shukulu yange mwene, omwo bene muunendeka mukemwo, mwafwa ngamba yobe Joabu ikeye nanjitumu na kunjileka awa majwi oshe, yange ngamba yobe. 20 Ngamba yobe Joabu ikeye nalingi ebi mangana byuma bitenguluke, oloni yobe shukulu yange uli na mana a kulifwa na mana a kangelo ka Njambi wa busunga, co uzibuka byoshe bili na kulingiwa mu lifuti.”

21 Co mwene walekele Joabu ngwendi: “Mwamubwa, njilinga ebi byuma, ya ukelwise mukwenje Abisalomu.” 22 Ngeci Joabu watsikamene na kukulamena hasi, co washangazalele mwene. Joabu wendekele ngwendi: “Lelo yange ngamba yobe njazibuka ngwange njinawana kutetela ku mesho obe, obe shukulu yange mwene, mwafwa mwene nalingi kwesekesa nebi byanamulombo ngamba yendi.” 23 Co Joabu wakatukile na kuya ku Gesha, co wanenele Abisalomu ku Jelusalema. 24 Nameme ngoco, mwene wendekele ngwendi: “Eluke ku njibo yendi, oloni kamono cihanga cange.” Ngeci Abisalomu welukile ku njibo yendi, co kamwene cihanga ca mwene.

25 Mu Isalele mwoshe kumwakele munalume ibashangazalele manene mwafwa ya bubwa bwendi ngwe Abisalomu. Kakele na kapenga, kutunda ku cilyato ca lindi lyendi kweta ku mutwe. 26 Mwakele na kutehula biñambu bya ku mutwe wendi, wakele na kubitehula ku mamaneselelo a mwaka na mwaka mwafwa byakele na kumulemena manene. Biñambu bya ku mutwe wendi byalemene mashekele 200* kwesekesa na cipeseleso ca limanya ca ku lipela.* 27 Abisalomu wakitile bana ba banalume batatu na mwana wa munakazi umo wa lizina lya Tamala. Tamala wapwile munakazi wamubwa manene.

28 Co Abisalomu watwaleleleleho kuyoya mu Jelusalema ha myaka ibali ya mutunu, oloni kalimwene na mwene. 29 Ngeci Abisalomu wasanene Joabu mangana amutume kuli mwene, oloni Joabu kezileko. Wamusanene lalo lwamucibali, oloni anga wabyanene kwijako. 30 Mamaneselelo walekele bangamba bendi ngwendi: “Lihya lya Joabu linalyata na lyange, co hano muli mbali. Yeniko mukalyenyeke.” Ngeci bangamba ba Abisalomu benyekele olyo lihya. 31 Co Joabu wakatukile na kwija ku njibo ya Abisalomu na kumwihula ngwendi: “Bangamba bobe banenyekela bika lihya lyange?” 32 Abisalomu wakumbulwile Joabu ngwendi: “Tala! Njinakutuminine muzimbu ngwange, ‘Ija njikutume kuli mwene ukamwihule ngwobe: “Bika binjinatundila ku Gesha? Cinesi kubwaha ngwe njinatwalelelaho kukala bene kuje. Ngeci njitabese njilimone na mwene. Nga njili na mulonga, co anjitsiye.”’”

33 Ngeci Joabu waile kuli mwene na kukamuleka, co wasanene Abisalomu uje wezile kuli mwene na kutsikama na kukulamena hasi halutwe lwa mwene. Co mwene watsembele Abisalomu.