Mukanda Wamucibali wa Samwele
21 Mu matangwa a Devidi kwakele njala yakama ha myaka itatu, co Devidi wehwile Yehova, co Yehova wamulekele ngwendi: “Saulu na bakunjibo yendi bali na mulonga wa maninga mwafwa watsiile baka-Gibioni.” 2 Ngeci mwene wasanene baka-Gibioni na kusimutwiya nabo. (Baka-Gibioni kubapwile Baisalele, oloni bapwile Baamoli baje basalele, co Baisalele balisingile ngwabo kubabatsii, oloni Saulu wayongwele kubatsiya mwafwa ya ntwima yendi ya kutubakanesa ya kushaka kukwasa banu ba Isalele na Juda.) 3 Devidi wehwile baka-Gibioni ngwendi: “Bika binjinapande kumilingila, co bika binjinapande kulinga mangana bubi bwetu babukonekele, mangana mubezikise buswana bwa Yehova?” 4 Baka-Gibioni bamukumbulwile ngwabo: “Siuva na goudi kubyasa kufwika bubi bwanatulingi Saulu na bakunjibo yendi, co lalo kutwasa kutsiya munu woshe-woshe mu Isalele.” Co Devidi wendekele ngwendi: “Byoshe bimwendeka njimilingilabyo.” 5 Baka-Gibioni balekele mwene ngwabo: “Uje munalume washakele kutunyongesa, co lalo wayongwele ngwendi keti kukale nameme umo wetu atwalelelaho kuyoya mu mutambela wa Isalele. 6 Ngeci, batwane bana bendi ba kupwa 7. Tushukika bibimbi byabo ha biti* halutwe lwa Yehova mu Gibea ya Saulu, uje yaangwile Yehova.” Mwene wabakumbulwile ngwendi: “Njimyanabo.”
7 Oloni mwene wazibilile mema ku mbunge Mefibosheti muna Jonathani, Jonathani muna Saulu, mwafwa ya cikumiiyo calingile Devidi na Jonathani muna Saulu halutwe lwa Yehova. 8 Ngeci mwene wambatele Alimoni na Mefibosheti baje bapwile bana babali ba Rizipa muna Aya bakitilile Saulu na bana ba banalume batanu ba Mikali* muna Saulu bakitilile kuli Adriele muna Bazilai muka-Mehola. 9 Wabanene mu maboko a baka-Gibioni, co bashukikile bibimbi byabo ha biti ha munkinda, ku mesho a Yehova. Boshe ba kupwa 7 babatsiilile hamo. Babatsiile mu matangwa a mashangumukilo a kuteja, ku mashangumukilo a kuteja mbali. 10 Ngeci Rizipa muna Aya wambatele cikeleya na kucijala ha limanya kushwa ku mashangumukilo a kuteja kweta noho hayanyokelele nyonzi ha bibimbi. Katabesele tuzila batongameho mutanya nambe tusitu ba mu shwata bashwene muyehi butsiki.
11 Devidi bamulekele byalingile Rizipa muna Aya munakazi mukwabo wa Saulu. 12 Ngeci Devidi waile na kwambata bitsiya bya Saulu na bitsiya bya munendi Jonathani ku bantwama* ba Jabeshi-giliyadi baje babibile mu mwela wa mbunga wa Bethi-shani muje mubabashukikile Bafilistiya, ha litangwa libatsiile Saulu Bafilistiya ha munkinda wa Giuboa. 13 Wanenele bitsiya bya Saulu na bitsiya bya munendi Jonathani kutunda kuje, co lalo wakungulwile na bitsiya bya banalume babashukikile.* 14 Co batsindile bitsiya bya Saulu na bitsiya bya munendi Jonathani mu lifuti lya Benjamini mu Zela mu mbumbo ya ishe Kishi. Mubamanesele kulinga byoshe byabashikile mwene, Njambi watolililile ku malombelo abo abalombelelele lifuti.
15 Nzita yakatukile lalo mukati ka Bafilistiya na Baisalele, co Devidi na bangamba bendi baile na kulwisa Bafilistiya, oloni Devidi wajukile manene. 16 Munalume umo wa ku cikota ca Balefaimu wa lizina lya Ishibi-benobu uje wakele na likunga lya kopa lije lyalemene mashekele* 300, co lalo wakele na mukwale wauha, washakele kutsiya Devidi. 17 Oho bene Abishai muna Zeluya wezile na kumwamena, co watsiile uje Kafilistiya. Ngeci, banu ba Devidi balisingile ku mesho endi ngwabo: “Kuwapandele kuya netu ku nzita lalo! Keti uzime ndeya ya Isalele!”
18 Munima yebi, nzita yakatukile lalo na Bafilistiya ku Gobu. Ha simbu oyo Sibekai wa ku Husha watsiile Safu uje wapwile wa ku cikota ca Balefaimu.
19 Nzita yakatukile lalo na Bafilistiya ku Gobu, co Euhanani muna Jale-olegimu wa ku Betelehema watsiile Goliati wa ku Gathi. Ceti ca likunga lya Goliati capwile ngwe mukambo habakatongela baka-kutonga.
20 Nzita yakatukile lalo ku Gathi kuje kwakele munalume wa kutunuka manene uje wakele na minye 6 ku liboko na liboko na minye 6 ku lindi na lindi, co minye yoshe yapwile 24. Ou munalume nendi wapwile wa ku cikota ca Balefaimu. 21 Watwaleleleleho kushendumuna Isalele. Ngeci Jonathani muna Shimei ndolome ya Devidi wamutsiile.
22 Aba banalume bawana bapwile ba ku cikota ca Balefaimu mu Gathi, co Devidi na bangamba bendi batsiile aba banalume.