Jelemiya
41 Mu ngonde ya bu 7, Ishimaele muna Nethanaya, Nethanaya muna Elishama, uje wapwile wa ku naanga ya bumwene, uje lalo wapwile umo wa banu ba mwene ba bulemu, wezile na banu 10 kuli Gedaliya muna Ahikamu ku Mizipa. Mubakele na kulya hamo ku Mizipa, 2 Ishimaele muna Nethanaya na baje banu 10 baakele nabo bakatukile na kutsiya Gedaliya muna Ahikamu, Ahikamu muna Shafani, na mukwale. Ngeci Ishimaele watsiile uje yangwile mwene wa Babiloni ngwendi atwamenene lije lifuti. 3 Ishimaele watsiile lalo na baJuda boshe baje bakele na Gedaliya mu Mizipa na maswalale ba baKaudiya baje bakele kuje.
4 Litangwa lyateleko kutunda habatsiilile Gedaliya, simbu kanda munu woshe-woshe azibe ei ñanda, 5 kwezile banalume 80 baje batundile ku Shekemu na ku Shilo na ku Samaliya. Babatehwile minjezi, co bizalo byabo babitabwile, co lalo balilengozwele. Aba banu bambatele bwana bwa binona na isense ya kutoka mangana babinene ku njibo ya Yehova. 6 Ngeci, Ishimaele muna Nethanaya watundile mu Mizipa, co waile na kuliwana nabo, waile oku alila. Mwaliwanene nabo wabalekele ngwendi: “Tuyeni kuli Gedaliya muna Ahikamu.” 7 Oloni mubakobelele mu nganda, Ishimaele muna Nethanaya na banu bendi batsiile baje banu na kubombila mu lisima.
8 Oloni hakati kabo hakele banalume 10 baje balekele Ishimaele ngwabo: “Yetu keti ututsiye, mwafwa tunashweke tiliku na mbali na mazi na buki mu mahya.” Ngeci kabatsiilile hamolika na bandolome babo. 9 Co Ishimaele wombilile bibimbi bya banu boshe batsiile mu lisima lyakama lije lyendile Mwene Asa mwamujujwisile Mwene Basha wa Isalele. Ishimaele muna Nethanaya washulisile eli lisima na bibimbi.
10 Ishimaele wakwatele bufunge banu boshe baje bakele mu Mizipa, hamolika na bana ba mwene ba banakazi na banu boshe baje basalele mu Mizipa. Nebuzaladani mukulunu wa baka-kunyunga wakele aba banu mu maboko a Gedaliya muna Ahikamu. Ishimaele muna Nethanaya wabakwatele bufunge na kuya nabo mu sambwa ku baAmoni.
11 Johanani muna Kaleya na bantwama ba maswalale boshe baje baakele nabo mubazibile ebi byuma byabibi byoshe byalingile Ishimaele muna Nethanaya, 12 bambatele banalume boshe na kuya na kulwisa Ishimaele muna Nethanaya, co bakamuwanenene kuyehi na mema amangi* mu Gibioni.
13 Banu boshe baje bakele na Ishimaele babwahelelele mubamwene Johanani muna Kaleya na bantwama ba maswalale boshe baje bakele nendi. 14 Co banu boshe baje babakwatele bufunge kuli Ishimaele ku Mizipa batengulukile na kwiluka na Johanani muna Kaleya. 15 Oloni Ishimaele muna Nethanaya na banu bendi 8 batewele Johanani, co baile ku baAmoni.
16 Johanani muna Kaleya na bantwama ba maswalale boshe baje bakele nendi baile na banu boshe ba ku Mizipa baje babobwele kuli Ishimaele muna Nethanaya munima ya kutsiya Gedaliya muna Ahikamu. Bambatele banalume, maswalale, banakazi, banike, na bakulunu ba mu nkuta kutunda ku Gibioni. 17 Ngeci baile na kukala ku mwela wa kutulila wa Kimuhamu uje wakele kuyehi na Betelehema. Biyongola byabo byapwile bya kuya ku Ijipiti 18 mwafwa ya baKaudiya. Bazibilile lyoba baKaudiya mwafwa Ishimaele muna Nethanaya watsiile Gedaliya muna Ahikamu uje yangwile mwene wa Babiloni ngwendi atwamenene lifuti lya Juda.