Ezekiele
19 “Unapande kwimba ou mwaso wa busiwa uje unatalesa ku bamyata ba Isalele 2 ngwobe,
‘Noko wapwile iya? Wapwile ndumba wa lwabo hakati ka bindumba bakwabo.
Wabutamene mukati ka bindumba ba nzili na kulela bana bendi.
3 Umo wa bana balelele wakolele na kupwa ndumba wa kukanyama.
Walilongesele kupapozola tusitu,
Wakele na kubwonda na banu.
4 Baka-mafuti bazibile byendi, co bamulabwile mu bwina bwabo,
Co bamutwalele ku lifuti lya Ijipiti na tulobo.
5 Ina wabandamenene, oloni kukapwa muje, wamwene ngwendi munendi keluka.
Ngeci wambatele munendi mukwabo na kumupwisa muna ndumba wa kukanyama.
6 Nendi wendanganene mukati ka bindumba bakwabo, co wapwile muna ndumba wa nzili.
Walilongesele kupapozola tusitu, co wakele na kubwonda na banu.
7 Walibembele mukati ka tuposhi twabo twa kukola na kunyongesa binganda byabo.
Ngeci mwakele na kubuluma, wakele na kuzibika mu lifuti lyoshe lije lyapwile ngundu.
8 Baka-mafuti a mu bimbongi bije byamuzengelekele bamujemukilile, co bamutelelele bwanda bwabo,
Ngeci bamulabwile mu bwina bwabo.
9 Bamwakele mu camba kupangesa tulobo, co bamutwalele kuli mwene wa Babiloni.
Co bakamushokeleleleko kuje mangana keti azibike ku minkinda ya Isalele.
10 Noko wapwile ngwe muti wa binyu uje uli mu maninga obe,* uje ubakunine ku mema.
Wemine bushuka, co wakele na minango yaingi mwafwa ya aje mema amangi.
11 Wakele na minango ya kukanyama, ije ibasele kupangaho milamu ya baka-kuyula.
Ou muti wakolele na kutubakana miti ikwabo,
Co wakele na kusholoka mwafwa ya bulaha bwawo na maputa awo amangi.
12 Oloni bautukwile mu butenu na kuumbila hasi,
Co lihunzi lya ku butuhukilo bwa litangwa lyomisile bushuka bwawo.
Minango yawo ya kukanyama baipokozwele, co yomine, co tuhya twayenyekele.
13 Hanwoni banaukunu mu mambo,
Mu lifuti lya kuma lya kujeneka mema.
14 Tuje tuhya twakele ku minango yawo twajalakanene, co twenyekele na tuminango twawo twatundondo na bushuka bwawo,
Co kukwasalele munango wa kukanyama. Kukwakele mulamu wa kupangesa mu kuyula.
“‘Ou ukewo mwaso wa busiwa, co ukatsimana.’”