Levitike

11 Co Yehova walekele Mosesa na Aloni ngwendi: 2 “Lekeni Baisalele ngweni, ‘Ebi bikebyo byakutanga bya kuyoya bya ha lifuti-libu bimwasa kulya: 3 Kasitu woshe uje ali na bimbemba bya kulitepa bije binalyangununa, uje akalekula byakulya na kubitsakinya mwasa kumulya.

4 “‘Oloni kumwapandele kulya aba tusitu banatako baje bakalekula byakulya na kubitsakinya nambe baje bali na bimbemba bya kulitepa: kumwapandele kulya kamele uje akalekula byakulya na kubitsakinya, oloni kesi na bimbemba bya kulitepa. Napu wa kujwala kuli yeni. 5 Kumwapandele lalo kulya lishea, mwafwa nameme akalekula byakulya na kubitsakinya, oloni kesi na bimbemba bya kulitepa. Napu wa kujwala kuli yeni. 6 Kumwapandele lalo kulya kalumba mwafwa akalekula byakulya na kubitsakinya, oloni kesi na bimbemba bya kulitepa. Napu wa kujwala kuli yeni. 7 Kumwapandele lalo kulya ngulu, mwafwa nameme ali na bimbemba bya kulitepa, co lalo binalyangununa, oloni kesi kulekula byakulya na bitsakinya. Napu wa kujwala kuli yeni. 8 Kumwapandele kulya situ yaba tusitu nambe kubakwata nga banatsi. Banapu ba kujwala kuli yeni.

9 “‘Ebi bikebyo bimwasa kulya ku byuma byoshe bije byakala mu mema: Cuma coshe-coshe cije cakala mu mema cije cili na matendo na mabanda, ipwe ca mu tulunga-ndonga nambe mu bindonga, mwasa kucilya. 10 Oloni byuma byoshe bije bili mu tulunga-ndonga na mu bindonga bije kubyesi na matendo na mabanda, hakati ka byuma byoshe bya kutanga bije bikende mu bibunga na byuma byoshe bikwabo bya kutanga bya kuyoya bije bili mu mema, binapu bya bunyengwe kuli yeni. 11 Eyo binapande kupwa bya bunyengwe kuli yeni, co kumwapandele kulya situ yabyo, co bije binatsi binapande kumizibisa bunyengwe. 12 Cuma coshe cili mu mema, cije kucesi na matendo na mabanda, cinapu ca bunyengwe kuli yeni.

13 “‘Ebi bikebyo byakutanga bya kupulula bije binapande kumizibisa bunyengwe, co kumwapandele kubilya mwafwa binapu bya bunyengwe: bingonga na mimbi na makubi ba kuzibala, 14 na tumbembe na miyati yoshe ya biselele 15 na miyati yoshe ya makololo 16 na banyamalanda, binkungulu na tukulekule na miyati yoshe ya tumbembe 17 na tuñulumapanda na tunolo na binkungulu ba matwi amalaha 18 na masisi na mambondo na makubi 19 na tunyangenyange na miyati yoshe ya mikwanga na bandahuhu na tumpukumpuku. 20 Byakutanga byoshe bya mambaba bije bikende mu bibunga, bije bikende na mendi awana binapu bya bunyengwe kuli yeni.

21 “‘Ku byakutanga bya mambaba bije bikende mu bibunga, bije bikende na mendi awana, mwasa kulya lika bije bili na mendi abali amalaha a kujombwesa hasi. 22 Mwasa kulya ebi binatako: miyati ya kuliseza-seza ya bimbimba baje bakajalozoka, bimbimba bakwabo bakulya, tujenje na bimbimba beka. 23 Byakutanga bikwabo byoshe bya mambaba bije bikende mu bibunga bije bili na mendi awana, binapu bya bunyengwe kuli yeni. 24 Ebi bimilingisa mupwe ba kujwala. Woshe abikwata nga binatsi apwa wa kujwala kweta mangwezi. 25 Woshe abyambata nga binatsi napande kukusha bizalo byendi. Apwa wa kujwala kweta mangwezi.

26 “‘Kasitu woshe wa bimbemba bya kulitepa, oloni kubyalyangunwine, co lalo kesi kulekula na kutsakinya byanalekula napu wa kujwala kuli yeni. Woshe amukwata apwa wa kujwala. 27 Byakutanga byoshe bije bikendesa bituto, byakutanga bije bekende na mendi awana binapu bya kujwala kuli yeni. Woshe abikwata nga binatsi apwa wa kujwala kweta mangwezi. 28 Woshe abyambata nga binatsi napande kukusha bizalo byendi, oloni apwa wa kujwala kweta mangwezi. Binapu bya kujwala kuli yeni.

29 “‘Ebi bikebyo byakutanga bya ha lifuti-libu bije bikende mu bibunga bije byapwa bya kujwala kuli yeni: biñolo, bimuku na misanga ba miyati yoshe, 30 misanga ba mabala-mabala, bitatu, banyamakantoma, bitombwe na byongono. 31 Ebi byakutanga bikende mu bibunga binapu bya kujwala kuli yeni. Woshe abikwata nga binatsi apwa wa kujwala kweta mangwezi.

32 “‘Nga ebi byakutanga bitsa, co hoshe habiwila hapwa ha kujwala, ipwe ha cikwata ca kushonga, ha cizalo, ha cilambu, nambe ha cikeleya. Cikwata coshe cimupangesa munapande kucimbwitika mu mema, oloni cipwa ca kujwala kweta mangwezi, kutundaho, co cipwa ca kujela. 33 Nga biwila mu ndeho ya buma, co munapande kuitsiya, co byuma byoshe binakala muje mu ndeho bipwa bya kujwala. 34 Byakulya byoshe biliwana na mema atunda omu mu bikwata bipwa bya kujwala, co byakunwa byoshe byomu mu bikwata bipwa bya kujwala. 35 Hoshe habiwila ebi byakutanga nga binatsi hapwa ha kujwala. Nga biwila ha liko lya buma lya kwocela nambe ha liko lya buma lya kutelekela, co munapande kulipujula. Anapu a kujwala, co atwalelelaho kupwa a kujwala kuli yeni. 36 Oloni nga biwila mu kabwelubwelu nambe mu lisima, oko kabwelubwelu nambe olyo lisima bitwalelelaho kupwa bya kujela. Oloni woshe akwata ebi byakutanga nga binatsi, apwa wa kujwala. 37 Nga ebi byakutanga biwila ha bimbuto bije bibanapande kukuna, co bije bimbuto anga bipwa bya kujela. 38 Oloni nga mbuto banaijabeka mu mema, co muje mu mema muwila cilyo ca cuma cakutanga ca kutsa, co ije mbuto ipwa ya kujwala kuli yeni.

39 “‘Nga kasitu uje imukali mumuwana natsi, co woshe amukwata apwa wa kujwala kweta mangwezi. 40 Woshe alya owo kasitu wa kutsa napande kukusha bizalo byendi, oloni apwa wa kujwala kweta mangwezi. Woshe ambata owo kasitu wa kutsa napande kukusha bizalo byendi, oloni apwa wa kujwala kweta mangwezi. 41 Byakutanga byoshe bya hasi bije bikende mu bibunga binapu bya bunyengwe, kumwapandele kubilya. 42 Kumwapandele kulya byakutanga byoshe bije bikende na lifu nambe byakutanga byoshe bije bikende na mendi awana nambe byakutanga bya ha lifuti-libu bije bikende mu bibunga bije bili na mendi amangi, mwafwa binapu bya bunyengwe. 43 Keti mulipwise ba bunyengwe kuli yange ha kulya byakutanga bije bikende mu bibunga, co keti mulijwalese yeni babenya na kupwa ba kujwala mwafwa yabyo. 44 Mwafwa yange Yehova Njambi yeni, co munapande kulijelesa na kupwa ba kujela mwafwa njapwa nji wa kujela. Ngeci kumwapandele kulijwalesa yeni babenya na byakutanga bije bikende mu bibunga, bije bikende hasi. 45 Mwafwa yange Yehova uje ali na kumitwamenena na kumitundisa mu lifuti lya Ijipiti mangana njimimwese ngwange njapwa nji Njambi, co munapande kupwa ba kujela, mwafwa yange njapwa nji wa kujela.

46 “‘Eli likelyo lishiko lya kutalesa ku tusitu na ku byakutanga bije bikapulula na ku byakutanga byoshe bya kuyoya bije bikende mu mema na kutalesa ku byakutanga byoshe bya ha lifuti-libu bije bikende mu bibunga, 47 mangana limwese kuliseza kuli mukati ka byuma bya kujwala na byuma bya kujela, na mukati ka byakutanga bya kuyoya bimwasa kulya na bije kumwasa kulya.’”