Levitike

13 Yehova watwaleleleleho kuleka Mosesa na Aloni ngwendi: 2 “Nga munu akala na lizimbo nambe libanda nambe citamba ha mubila wendi, co bije byasa kupwa mushongo wa mbumba* ha mubila wendi, co banapande kumunena kuli kapilistu Aloni nambe kuli umo wa bana bendi baje banapu tupilistu. 3 Kapilistu akelula uje mushongo uli ha cikanda cendi. Nga maka ali haje hali mushongo anatenguluka na kupwa a kutoka, co uje mushongo usholoka ngwe unakobela mu situ, co unapu mushongo wa mbumba. Kapilistu akawilula na kumutumbula ngwendi napu wa kujwala. 4 Oloni nga cije citamba cili ha cikanda cendi cinapu ca kutoka, co kucisholoka kukobela manene mu situ, co lalo maka aliho kuwatengulukile kupwa a kutoka, co kapilistu akaka uje munu ali na mushongo kwa likalyendi ha matangwa 7. 5 Co kapilistu akamwilula ha litangwa lya bu 7, co nga kukasholoka ngwabo uje mushongo unemana, co kuwajalakanene ha cikanda, co kapilistu akaka lalo uje munu kwa likalyendi ha matangwa 7.

6 “Kapilistu napande kumwilula lalo ha litangwa lya bu 7, co nga uje mushongo unashangumuka kwola, co lalo kuwajalakanene ha cikanda, uje kapilistu akamutumbula ngwendi najele, anapwile lika mabanda. Ngeci uje munu akakusha bizalo byendi na kupwa wa kujela. 7 Oloni nga aje mabanda* anajalakana ha cikanda munima ya kusholoka kuli kapilistu ha simbu ya kumwilula mangana amone indi najele, co akasholoka lalo* kuli kapilistu. 8 Kapilistu akelula uje mushongo, co nga aje mabanda anajalakana ha cikanda, co kapilistu akamutumbula ngwendi napu wa kujwala. Unapu mushongo wa mbumba.

9 “Nga munu akala na mushongo wa mbumba, co banapande kumunena kuli kapilistu. 10 Co kapilistu akamwilula. Nga ali na lizimbo lya kutoka ha cikanda cendi, co maka aliho anatenguluka na kupwa a kutoka, co lalo haje ha lizimbo hali mbandu inashama, 11 co unapu mushongo wa mbumba uje kuwolo, uje uli ha cikanda cendi, co kapilistu akamutumbula ngwendi napu wa kujwala. Kapandele kumwaka kwa likalyendi mangana akamwilule lalo mwafwa napu wa kujwala. 12 Co nga uje mushongo wa mbumba ujalakana ha cikanda coshe ca uje munu ali na mushongo wa mbumba kutunda ku mendi kuketa na ku mutwe kwesekesa nebi byanasa kumonako kapilistu, 13 co nga kapilistu namwilula, co namono ngwendi uje mushongo wa mbumba unafwiki cikanda cendi coshe, co akatumbula uje munu ali na mushongo ngwendi napu wa kujela.* Cikanda coshe cinapu ca kutoka, co najele. 14 Oloni nga haje ha cikanda cendi hakala mbandu inashama, co apwa wa kujwala. 15 Kapilistu mwamona ije mbandu inashama, akamutumbula ngwendi napu wa kujwala. Ije mbandu inashama inapu ya kujwala. Unapu mushongo wa mbumba. 16 Oloni ije mbandu nga itoka lalo, co uje munu akaija kuli kapilistu. 17 Kapilistu akamwilula, co nga ije mbandu inapu ya kutoka, co kapilistu akatumbula uje munu ali na mushongo ngwendi napu wa kujela. Najele.

18 “Nga munu amena lihute ha cikanda, co lije lihute lyola, 19 oloni nga haje hanakala lihute hamena lizimbo lya kutoka nambe citamba ca kubenga na kutoka, co napande kuya kuli kapilistu. 20 Kapilistu akelula cije citamba, co nga cisholoka kukobela manene mu situ, co lalo biñambu biliho binatenguluka kupwa bya kutoka, co kapilistu akamutumbula ngwendi napu wa kujwala. Unapu mushongo wa mbumba uli haje hanakala lihute. 21 Oloni nga kapilistu mwelula cije citamba amona ngwendi kuhesi maka a kutoka, co kucakobelele mu situ, co cisholoka ngwe cili na kwola, co kapilistu akaka uje munu kwa likalyendi ha matangwa 7. 22 Co nga cije citamba cinajalakana ha cikanda, co kapilistu akatumbula uje munu ngwendi napu wa kujwala. Unapu mushongo wa mbumba. 23 Oloni nga cije citamba cili lika ha mwela umo, co kucajalakanene, co lihute lika linazimbi, co kapilistu akamutumbula ngwendi najele.

24 “Nga munu nenye na tuhya, co uje mushuni unenye na tuhya usholoka kukala na citamba ca kubenga na kutoka nambe ca kutoka lika, 25 co kapilistu akelula ije mbandu. Nga maka ali haje ha citamba anatenguluka kupwa a kutoka, co lalo cije citamba cinakobela manene mu situ, unapu mushongo wa mbumba uje unamene ha mbandu, co kapilistu akamutumbula ngwendi wa kujwala. Unapu mushongo wa mbumba. 26 Oloni nga kapilistu elula cije citamba na kumona ngwendi haje ha citamba kuhesi maka a kutoka, co lalo kucakobelele manene mu situ, co cili na kwola, co kapilistu akaka uje munu kwa likalyendi ha matangwa 7. 27 Kapilistu akamwilula ha litangwa lya bu 7, co nga cije citamba cinajalakana ha cikanda, co kapilistu akamutumbula ngwendi najwala. Unapu mushongo wa mbumba. 28 Oloni nga citamba ca ha mbandu ya tuhya kucajalakanene ha cikanda, co cishangumuka kuziluka, co mbandu lika inazimbi, co kapilistu amutumbula ngwendi najele mwafwa mbandu lika inazimbi.

29 “Nga munalume nambe munakazi akala na mushongo ku mutwe nambe ku cipozi, 30 co kapilistu akelula uje mushongo. Nga usholoka ngwabo unakobela manene mu situ, co hali maka a yelo a kupepuka, co kapilistu akamutumbula ngwendi najwala. Unapu mushongo wa ha cikola nambe wa ku munjezi. Inapu mbumba ya ku mutwe nambe ya ku cipozi. 31 Oloni nga kapilistu amona ngwendi uje mushongo kuwakobelele manene mu situ, oloni uli lika ha cikanda, co kuhesi maka a kuzibala, co kapilistu napande kwaka munu uje ali na mushongo kwa likalyendi ha matangwa 7. 32 Kapilistu akelula uje mushongo ha litangwa lya bu 7, co nga uje mushongo kuwajalakanene ha cikanda, co kukwesi maka a yelo anameneho, co uje mushongo kuusholoka kukobela manene mu situ, 33 uje munu napande kulitehula, oloni haje hali mushongo kapandele kutehulaho. Co kapilistu akamwaka kwa likalyendi ha matangwa 7.

34 “Uje kapilistu akelula lalo haje hali mushongo ha litangwa lya bu 7, co nga uje mushongo kuwajalakanene ha cikola nambe ku munjezi, co lalo kuwakobelele manene mu situ, co kapilistu napande kutumbula uje munu ngwendi najele, co napande kukusha bizalo byendi na kupwa wa kujela. 35 Oloni nga uje mushongo ujalakana ha cikanda cendi munima ya kulijelesa, 36 co kapilistu akamwilula, co nga uje mushongo unajalakana ha cikanda, co kapilistu kapandele kutonda lalo maka a yelo. Owo munu napu wa kujwala. 37 Oloni nga mushongo kuwajalakanene ha cikanda munima ya kumwilula, co maka a kuzibala anameneho, co uje mushongo unolo, najele. Co kapilistu akamutumbula ngwendi najele.

38 “Nga munalume nambe munakazi akala na bitamba ha cikanda cendi, co bije bitamba bitoka, 39 co kapilistu akabilula. Nga bije bitamba bya kutoka biya na kuzimangana, co binapu bimbulu lika bije binamene ha cikanda. Ou munu najele.

40 “Nga biñambu bya munalume bishutuka ku mutwe wendi, co akala na libula, anga napu wa kujela. 41 Nga biñambu byendi bishutuka mu luholo, co akala na libula muje mu luholo, anga napu wa kujela. 42 Oloni nga amena mbandu ya kubenga na kutoka muje mu libula nambe ha luholo lwendi, co unapu mushongo wa mbumba uje uli ha cikola cendi nambe mu luholo lwendi. 43 Kapilistu akamwilula, co nga ije mbandu inazimbi isholoka kubenga na kutoka ha libula lya hakati ka mutwe wendi nambe mu luholo lwendi, co isholoka ngwe mushongo wa mbumba ha cikanda cendi, 44 co napu muka-mbumba. Napu wa kujwala, co kapilistu napande kumutumbula ngwendi napu wa kujwala mwafwa ya mushongo uli ha mutwe wendi. 45 Co kutalesa kuli munu uje ali na mushongo wa mbumba, bizalo byendi banapande kubitabula, co napande kwecelela biñambu bya ku mutwe wendi na kufwika minjezi yendi ya helu lya kanwa na kutambeka ngwendi, ‘Njinajwala, njinajwala!’ 46 Apwa wa kujwala ha simbu yoshe yabinja ou mushongo. Napande kukala kwa likalyendi mwafwa napu wa kujwala. Akakala hanja ya cilombo.

47 “Nga mushongo wa mbumba ujwalesa cizalo, ipwe ca bwanda nambe ca lineni, 48 ipwe ha bwanda bwa ha cizalo ca lineni nambe ca bwanda* nambe ha cilambu nambe cuma coshe-coshe ca kupanga ha cilambu, 49 co citamba cije cili na mubala wa yelo na bushompo nambe ca kubenga cije cinaija mwafwa ya mushongo cinajwalesa oco cizalo, nambe cilambu nambe bwanda bwa cizalo nambe cuma coshe-coshe ca kupanga ha cilambu cinajwala na mushongo wa mbumba, co munapande kucimwesa kapilistu. 50 Kapilistu akelula cije cuma cili na mushongo, co akacaka kwa likalyaco ha matangwa 7. 51 Co kapilistu mwelula uje mushongo ha litangwa lya bu 7, co nga amona ngwendi uje mushongo unajalakana ha cizalo nambe ha bwanda nambe ha cilambu (cije cibapangesa cipangi coshe-coshe), co unapu mushongo wa mbumba uje ushambukila, co cije cuma cinapu ca kujwala. 52 Co napande kwenyeka cije cizalo nambe nanga ya kupanga ha maka a bimanga nambe ya lineni nambe cuma coshe-coshe cibanapanga ha cilambu haje hanasholoka mushongo wa mbumba, mwafwa unapu mushongo wa mbumba uje ushambukila. Munapande kucenyeka.

53 Oloni nga kapilistu elula cije cuma, co amona ngwendi uje mushongo kuwajalakanene ha cizalo nambe ha nanga nambe ha cuma coshe-coshe ca kupanga ha cilambu, 54 co kapilistu akashika ngwendi bakushe cije cuma cili na mushongo, co akacaka kwa likalyaco ha matangwa 7 lalo. 55 Munima ya kukusha mwamubwa cije cuma cili na mushongo, kapilistu akacilula. Nga uje mushongo usholoka ngwe kuwatengulukile nameme uje mushongo kuwajalakanene, co cije cuma cinapu ca kujwala. Munapande kucenyeka mwafwa cinaliwa mukati nambe hanja.

56 “Oloni nga kapilistu nelula cije cuma cili na mushongo, co haje hanakala mushongo hali na kuzimangana munima ya kucikusha mwamubwa, co akatabula haje hanakala mushongo, ipwe ha cizalo nambe ha cilambu nambe ha nanga. 57 Oloni nga uje mushongo ucisholoka ha mitamba ikwabo ya cije cizalo nambe ha nanga nambe ha cuma coshe-coshe ca kupanga ha cilambu, co uje mushongo uli na kujalakana, co unapande kwenyeka cuma coshe-coshe cili na mushongo. 58 Oloni nga uje mushongo uzimangana haje ha cizalo nambe ha nanga nambe ha cuma coshe-coshe ca kupanga ha cilambu cije cimukusha, co munapande kucikusha lalo lwa mucibali, co cipwa ca kujela.

59 “Eli likelyo lishiko lya kutalesa ku mushongo wa mbumba uje uli ha cizalo ca kupanga ha bwaka bwa bimanga nambe ca lineni nambe ha nanga nambe ha cuma coshe-coshe ca kupanga ha cilambu, lije limikwasa kutumbula cuma kupwa ca kujela nambe ca kujwala.”