Levitike

2 “‘Nga munu anena bwana bwa binona kuli Yehova, bwana bwendi bunapande kupwa fulawa yaibwa, co napande kwitilaho mazi na kwakaho isense ya kutoka. 2 Co akatwale buje bwana kuli bana ba Aloni ba banalume baje banapu tupilistu, co kapilistu akajomone liboko lya kushula lya fulawa yaibwa na mazi na isense ya kutoka, co akabyenyekele ha mutula mangana bimaneneko bwana bwa mutunu, bwana bwa kwenyeka mu tuhya bwa lwengo lwalubwa kuli Yehova. 3 Byoshe bikasala ku bwana bwa binona bikapwe bya Aloni na bana bendi kupwa cuma ca kujela manene ca kutunda ku bwana bwa kwenyeka mu tuhya bubana kuli Yehova.

4 “‘Nga unena bwana bwa binona buje bubanoco mu liko lya kwocela makende, co bunapande kupwa fulawa yaibwa na makende a kujeneka musima a muzenguluke aje ali na bwina, a kutika na mazi nambe makende a kulipasha a kukwita mazi, a kujeneka musima.

5 “‘Nga bwana bwobe bunapu bwana bwa binona bwa ha cikango, co bunapande kupwa fulawa yaibwa, fulawa ya kujeneka musima ya kutika na mazi. 6 Unapande kubumungula mu bimbazubwila, co unapande kwitilaho mazi. Obu bunapu bwana bwa binona.

7 “‘Nga bwana bwobe bunapu bwana bwa binona bubanocela ha cikango, co bunapande kupwa fulawa yaibwa ya kutika na mazi. 8 Unapande kunena bwana bwa binona kuli Yehova bubanapanga ha byuma ebi, co ubwane kuli kapilistu uje akabutwala kuyehi na mutula. 9 Co kapilistu akambatako bwana bumo bwa binona mangana bwimaneneko bwana bwa mutunu na kubwenyeka mangana bukakumune bwisi ha mutula kupwa bwana bwa kwenyeka mu tuhya bwa lwengo lwalubwa kuli Yehova. 10 Byoshe bikasala ku bwana bwa binona bikapwe bya Aloni na bana bendi kupwa cuma ca kujela manene ca kutunda ku bwana bwa kwenyeka mu tuhya bubanana Yehova.

11 “‘Keti mwane Yehova bwana bwa binona buje buli na musima, mwafwa kumwapandele kwenyeka fulawa ya kutika ije ili na musima nambe buki kupwa bwana bwa kwenyeka mu tuhya bubana kuli Yehova.

12 “‘Mwasa kubwana kuli Yehova kupwa bwana bwa bimbuto byakulibanga, oloni kumwapandele kubunena ku mutula mangana bakubwenyeke kupwa bwana bwa lwengo lwalubwa.

13 “‘Bwana bwoshe bwa binona buwana, unapande kubutoba mwongwa, co keti wonwe kwaka mwongwa wa cikumiiyo ca Njambi yobe ha bwana bwobe bwa binona. Bwana bwobe bwoshe unapande kubwanena hamolika na mwongwa.

14 “‘Nga unenela Yehova bwana bwa binona bwa bimbuto bya kulibanga, co unapande kunena binona byabiha bya kwoca, na bunga buje buli na bitsetsi bwa bimbuto byabiha kupwa bwana bwa binona bwa bimbuto bya kulibanga. 15 Unapande kwitilaho mazi na kwakaho isense ya kutoka. Obu bunapu bwana bwa binona. 16 Kapilistu akabyenyeka mangana bikakumune bwisi mangana bimaneneko bwana bwa mutunu, kulumbununa bunga buli na bitsetsi na mazi hamolika na isense ya kutoka kupwa bwana bubanenyekela Yehova mu tuhya.