Levitike

25 Yehova watwaleleleleho kwendeka na Mosesa ha Munkinda wa Sinai ngwendi: 2 “Leka Baisalele ngwobe, ‘Mumuketa mu lifuti linjimyana, munapande kukanyunga lishiko lya Yehova lya mwaka wa sabata na kwecela lifuti lihwime. 3 Munapande kukakuna bimbuto mu mahya eni ha myaka 6 na kukabitetela na kukateja bimukalima. 4 Oloni mwaka wa bu 7 ukapwa mwaka wa sabata, co ukapwa mwaka wa kuhwima wa kulitila mangana lifuti likahwime. Ukapwa sabata ya Yehova. Kumwapandele kukakuna mbuto mu mahya eni nambe kukatetela mahya eni a binyu. 5 Kumwapandele kukateja bimbuto bya nzumba, co lalo kumwapandele kukateja bushuka bwa binyu ku miti ya binyu ya kujeneka kutetela. Lifuti linapande kukahwima mwaka woshe wa mutunu. 6 Oloni mwasa kukalya byakulya bije bimena mu lifuti mu mwaka wa sabata. Munasa kukabilya yeni na bindungo beni ba banalume na ba banakazi na baka-bipangi beni bamukakumuna na banu ba ku mafuti eka baje bakakala neni, 7 hamolika na bimuna na tusitu ba mu shwata ba mu lifuti lyeni. Byoshe bije bikaima mu lifuti lyeni munasa kukabilya.

8 “‘Munapande kukatanda myaka 7 ya bisabata lwa kupwa 7, co ei myaka yoshe ya bisabata imukatanda ikapwa 49. 9 Co mu ngonde ya bu 7 ha litangwa lya bu 10 omu mu ngonde, munapande kukohyesa limbinga mu kutambeka. Munapande kukohyesa limbinga ha litangwa lya kukonekela bubi mangana bakalizibe mu lifuti lyeni lyoshe. 10 Munapande kukatumbula mwaka wa bu 50 kupwa wa kujela na kukambulula kupatuka mu lifuti kuli boshe bakalamo. Ukapwa Mwaka wa Kupatuka kuli yeni, co umo na umo weni akeluka ku byuma byendi na kwiluka ku naanga yendi. 11 Mwaka wa bu 50 ukapwa Mwaka wa Kupatuka kuli yeni. Kumukakunu bimbuto nambe kuteja bimbuto bya nzumba nambe kuteja bushuka bwa binyu ku miti ya binyu ya kujeneka kutetela. 12 Ou ukapwa Mwaka wa Kupatuka. Unapande kupwa mwaka wa kujela kuli yeni. Munasa lika kukalya byuma bije bikalimenena mu lifuti.

13 “‘Omu mu Mwaka wa Kupatuka, munu na munu napande kukeluka ku byuma byendi. 14 Nga mukalandesa cuma kuli mukweni nambe kulanda cuma kuli ikeye, keti mukalinyanyamene umo na mukwabo. 15 Nga mukalanda bimo kuli mukweni munapande kwaka mu bisinganyeka myaka ineti kutunda mu Mwaka wa Kupatuka, co lalo uje akalandesa byuma nendi napande kwaka mu bisinganyeka myaka inasalako ya kulima bimbuto. 16 Nga kunasala myaka yaingi, co nasa kukabwezelela ku ndando yaco, oloni nga kunasala myaka yaindondo, co napande kukatepulula ku ndando yaco, mwafwa akalandesa eci cuma kwesekesa na myaka ya kuteja inasalako simbu kanda mwete mu Mwaka wa Kupatuka. 17 Naumo wahi hakati keni napande kukanyanyamena mukwabo, co munapande kukazibila lyoba Njambi yeni, mwafwa yange Yehova Njambi yeni. 18 Nga mukononoka mashiko ange na kunyunga kusompa kwange, co mukakala mu lifuti kwa kujeneka bushonde. 19 Lifuti likamenesa bushuka, co mukalya kukuta na kukalamo kwa kujeneka bushonde.

20 “‘Oloni nga mukehula ngweni: “Bika bitukalya mu mwaka wa bu 7 nga kutukunu bimbuto nambe kuteja bimbuto byetu?” 21 Keti mukalishoshomwene, njikamibezikisa mu mwaka wa bu 6, co lifuti likamenesa bimbuto byabingi bimukasa kulya ha myaka itatu. 22 Co mukakuna bimbuto mu mwaka wa bu 8 na kulya bimbuto bya laja kweta na mu mwaka wa bu 9. Mukatwalelelaho kulya bimbuto bya laja kweta noho hamukamanesela kuteja bimbuto byabiha.

23 “‘Nga mulandesa munu libu, keti mumulandeselelelyo kupwa lyendi myaka yoshe, mwafwa eli libu linapu lyange. Mwafwa kuli yangeni munapu lika ngwe banu baje banaija na kunyunyumana mu lifuti lyambala nambe baje banaija na kutunga mu lifuti lyambala. 24 Mu lifuti lyeni lyoshe munu napande kukakala na lisesa lya kulanda lalo libu lyendi.

25 “‘Nga ndolome yobe apwa kahutu, co alandesako mutamba umo wa libu lyendi, co muka-kusokola uje napu kabushoko kendi wa ha mbunge napande kwija na kulanda olyo libu lyanalandesele ndolome yendi. 26 Nga munu kesi na muka-kusokola, oloni afuka na kwasa lalo kulanda libu lyendi, 27 co napande kutotalesa ndando yolyo libu kutunda ha mwaka walilandesele, co lalo napande kwilwisila uje munu yanalandesele libu bimbongo binasalako, co asinoni eluka ha libu lyendi.

28 “‘Oloni nga kasa kulilanda lalo kuli uje munu, co lije libu lyanalandesele lipwa lya uje nalilandele kweta na mu Mwaka wa Kupatuka, co asinoni likeluka kuli ikeye mu Mwaka wa Kupatuka, co akeluka ha libu lyendi.

29 “‘Co nga munu alandesa njibo mu nganda ibanazengeleka cibumbe, co ou munu akala na lisesa lya kulanda lalo oyo njibo kutunda ha simbu yanalandesa oyo njibo kweta noho haukapwilamo mwaka. Atwalelelaho kukala na lisesa lya kulanda oyo njibo ha mwaka wa mutunu. 30 Oloni nga mwaka upwamo ikeye kalandele ije njibo, co ije njibo ili mu nganda ibanazengeleka na cibumbe ipwa ya uje nailandele kuli babenyayo. Ipwa yendi myaka yoshe, kubakaipatula mu Mwaka wa Kupatuka. 31 Oloni binjibo bije bili mu binganda bije kubazengelekele na cibumbe banapande kubimona kupwa mutamba wa bishwata bya kulako na bimbongi, co babenyabyo banapande kutwalelelaho kukala na lisesa lya kulanda lalo ebi binjibo, co banapande kubipatula mu Mwaka wa Kupatuka.

32 “‘Oloni binjibo bya Balevi bije bili mu binganda byabo, Balevi bakakala na lisesa lya kubilanda lalo myaka na myaka. 33 Nga Kalevi onowa kulanda lalo njibo yendi, co njibo ya mu nganda ya Balevi ibanalandesa banapande kuipatula mu Mwaka wa Kupatuka, mwafwa binjibo bya mu binganda bya Balevi byapwa byabo mu Isalele. 34 Kutundaho, kubapandele kulandesa myela ya kulila bimuna ije inazengeleka binganda byabo, mwafwa inapu buswana bwabo myaka na myaka.

35 “‘Nga ndolome yobe uje wakala hayehi nobe apwa kahutu, co onowa kuliwanena byuma bya kulikwasesa ku mubila, unapande kumukwasa ngwe muwasa kukwasela munu wa ku lifuti lyeka uje naija na kunyunyumana nambe uje naija na kutunga mangana atwaleleleleho kuyoya hamo nobe. 36 Kuwapandele kutambula bimbongo bya helu nambe kupangela pulofiti hali ikeye. Unapande kuzibila Njambi yobe lyoba, co ndolome yobe atwalelelaho kuyoya mukati keni. 37 Kuwapandele kumukumwisa bimbongo mangana uwaneneho bimbongo bya helu nambe kumwana byakulya mangana uwaneneho pulofiti. 38 Yange Yehova Njambi yeni uje wamitundisile mu lifuti lya Ijipiti na kumyana lifuti lya Kanana mangana njimimwese ngwange nji Njambi yeni.

39 “‘Nga ndolome yobe uje wakala hayehi nobe apwa kahutu, co aija na kulilandesa ikeye babenya kuli yobe, kuwapandele kumusindiya apange ngwe ndungo. 40 Unapande kumupangesa ngwe muka-kupanga iunakumuna nambe ngwe munu wa ku lifuti lyeka uje naija na kutunga neni. Unapande kumupangesa kweta na mu Mwaka wa Kupatuka. 41 Co akakuseza, ikeye na bana bendi na kwiluka kuli baka-naanga yendi. Napande kwiluka ku libu lya bakukulwila bendi. 42 Banapu bindungo bange banjatundisile mu lifuti lya Ijipiti. Kubapandele kulilandesa bakebo babenya ngwe bindungo. 43 Kuwapandele kumuyandesa, co unapande kuzibila Njambi yobe lyoba. 44 Bindungo beni ba banalume na bindungo beni ba banakazi banapande kutunda mu mafuti aje anamizengeleka, mwasa kulanda bindungo ba banalume na ba banakazi kuli bakebo. 45 Co lalo munasa kulanda bana ba banu ba ku mafuti eka baje banaija na kutunga neni mangana bapwe bindungo beni. Munasa kubalanda kuli bakebo nambe ku binaanga byabo bije banasemukila mu lifuti lyeni, co bakapwa buswana bweni. 46 Bana beni banasa kuswana aba bindungo na kubapwisa buswana bwabo bwa myaka na myaka. Munasa kubapangesa, oloni kumwapandele kuyandesa bandolome beni Baisalele.

47 “‘Oloni nga munu wa ku lifuti lyeka uje naija na kunyunyumana mu lifuti lyeni nambe uje naija na kutunga akala na bufuko bwabwingi, oloni ndolome yeni uje ali hayehi nendi apwa kahutu, co alilandesa kuli munu wa ku lifuti lyeka uje naija na kunyunyumana nambe uje naija na kutunga mu lifuti lyeni nambe alilandesa kuli umo wa mu naanga ya munu wa ku lifuti lyeka uje naija na kunyunyumana, 48 uje ndolome yeni atwalelelaho kukala na lisesa lya kulisokola nameme munima ya kulilandesa ikeye babenya. Umo wa bandolome bendi nasa kumusokola, 49 nambe ndolome ya ishe nambe muna ndolome ya ishe wa munalume nasa kumusokola, nambe kabushoko kendi woshe-woshe wa ha mbunge. Umo wa ba ku naanga yendi nasa kumusokola.

“‘Nambe ikeye nga akala na bufuko bwabwingi nasa kulisokola ikeye babenya. 50 Napande kutanda myaka na munu uje wamulandele, co banapande kushangumuka kutanda simbu inetimo kutunda ha mwaka walilandesele kweta na ha Mwaka wa Kupatuka, co ndando yalilandesele inapande kwendelela noyo myaka, co fweto ya matangwa anakala na kupanga inapande kupwa hamo na fweto ya muka-kupanga ibanakumuna. 51 Nga kunasala myaka yaingi, co napande kufweta bimbongo bya kulisokola kwesekesa na myaka inasalako. 52 Co nga kunasala myaka yaindondo mangana bete ha Mwaka wa Kupatuka, napande kulinga bipalo ikeye babenya na kufweta bimbongo bya kulisokola kwesekesa na myaka inasalako. 53 Ha simbu yapangela shukulu yendi, napande kumupangesa ngwe muka-kupanga yanakumuna, co munapande kumona ngweni kamuyandesa. 54 Oloni nga kasa kulipatula ikeye babenya mu bingila ebi, co akapatuka ha Mwaka wa Kupatuka hamolika na bana bendi.

55 “‘Mwafwa Baisalele bapwa bindungo bange. Bapwa bindungo bange baje banjapatwile mu lifuti lya Ijipiti. Yange Yehova Njambi yeni.