Levitike
5 “‘Nga munu amona mukwabo ali na kulinga bubi nambe aziba bya bubi bwanalingi mukwabo, co lalo aziba ngwabo bali na kutonda bakaleho baje bazibuka byobwo bubi, oloni ikeye kai na kwana bukaleho, co owo munu aliwana na bukalu butunda mu mulonga wendi.
2 “‘Nambe nga munu akwata cuma coshe-coshe ca kujwala, ipwe kasitu wa mu shwata wa kutsa, nambe cimuna wa kujwala nambe byakutanga bya kujwala bije bikende mu bibunga, co ou munu apwa wa kujwala, co lalo ali na mulonga nameme kananguka ngoco. 3 Nga munu akwata munu wa kujwala nambe cuma ca kujwala cije cimulingisa apwe wa kujwala kwa kujeneka kuzibuka ngwendi apwa wa kujwala nga alinga ngoco, anga bene akala na mulonga nameme ananguka hanima.
4 “‘Nga munu azambula kulisinga ngwendi alinga cuma, ipwe cuma cacibwa nambe cuma cacibi nambe cuma coshe-coshe, co uje munu kananguka ngwendi nazambula kulisinga, oloni munima asina ananguka ngwendi nazambwile kulisinga, anga bene akala na mulonga.*
5 “‘Nga akala na mulonga mwafwa ya kulinga cuma cimo ku byuma ebi, co napande kwendeka bubi bwanalingi. 6 Co lalo akanene bwana bwendi bwa mulonga kuli Yehova mwafwa ya bubi bwanalingi. Napande kunena cimuna wa lwabo wa ha butanga. Nasa kupwa muna manga wa lwabo nambe muna membe wa lwabo, mangana apwe bwana bwa kufwika bubi. Co kapilistu akana ou mulambu mangana ou munu bamukonekele mwafwa ya bubi bwendi.
7 “‘Oloni nga kasa kunena manga, co napande kunenela Yehova tutela babali nambe bana ba mayembe babali ba kulela mangana bapwe bwana bwendi bwa mulonga mwafwa ya bubi bwanalingi. Umo apwa wa bwana bwa kufwika bubi, mukwaboco wa bwana bwa kwenyeka. 8 Napande kubanena kuli kapilistu uje akambata kazila wakulibanga wa bwana bwa kufwika bubi na kumutanya ha milibu kwa kujeneka kumubatula singo. 9 Akambata maninga amo a uje kazila wa bwana bwa kufwika bubi na kuwashamwina kumukulo wa mutula, oloni maninga akasalaho akawandwekesela kwisi ya mutula. Obu bunapu bwana bwa kufwika bubi. 10 Co kazila mukwabo akamulinga ngwe mwakalingi bwana bwa kwenyeka kwesekesa nomu mubakabwanena simbu yoshe. Ebi bikebyo byakalinga kapilistu mangana ou munu bamukonekele mwafwa ya bubi bwanalingi, co bakamukonekela.
11 “‘Oloni nga kasa kwana tutela babali nambe bana ba mayembe babali ba kulela, co napande kunena mutamba umo wa ha mitamba 10 ya efa* ya fulawa yaibwa kupwa bwana bwa kufwika bubi. Kapandele kwakaho mazi nambe kwakaho isense ya kutoka, mwafwa bunapu bwana bwa kufwika bubi. 12 Akabunena kuli kapilistu, co kapilistu akajomonaho liboko lya kushula mangana bwimaneneko bwana bwa mutunu, co akabwenyeka ha mutula helu lya bwana bwa Yehova bwa kwenyeka mu tuhya. Obu bunapu bwana bwa kufwika bubi. 13 Ebi bikebyo byakalinga kapilistu mangana bakonekele ou munu mwafwa ya bubi bwoshe-bwoshe bwanalingi, co bakamukonekela. Bije bikasalako ku bwana bikapwa bya kapilistu ngecilika mwa bije bikasalako ku bwana bwa binona.’”
14 Yehova watwaleleleleho kuleka Mosesa ngwendi: 15 “Nga munu onwa kupwa wa kulongwa mwafwa ya kulinga bubi buje kayongwele kulinga kutalesa ku byuma bya kujela bya Yehova, co napande kunenela Yehova manga wa nkomba wamubwa mangana apwe bwana bwa mulonga. Ndando yendi mu mashekele a siuva* banayaka kwesekesa na kulema kwa shekele ya mu mwela wa kujela.* 16 Co napande kufweta mwafwa ya bubi bwanalingi kutalesa ku mwela wa kujela, co lalo napande kwakelaho mutamba wamucitanu wa ndando yobyo byuma bya kujela. Napande kubyana kuli kapilistu hamolika na manga wa nkomba wa bwana bwa mulonga, co kapilistu akana ou mulambu mangana ou munu bamukonekele, co bakamukonekela.
17 “Nga munu alinga bubi ha kulinga cuma coshe-coshe ku byuma byanabindika Yehova, nameme bene kanangukile ngwendi nalingi bubi, anga acikala na mulonga, co aliwana na bukalu butunda mu mulonga wendi. 18 Napande kunenela kapilistu manga wa nkomba wamubwa kupwa bwana bwa mulonga kwesekesa na ndando ibananamwakela. Co kapilistu akana ou mulambu mangana uje munu bamukonekele mwafwa ya kusebuka kwanasebuka kwa kujeneka kuzibuka, co bakamukonekela. 19 Obu bunapu bwana bwa mulonga. Cili bene ali na mulonga mwafwa nabiisila Yehova.”