Levitike

8 Yehova watwaleleleleho kuleka Mosesa ngwendi: 2 “Ambata Aloni na bana bendi ba banalume, na bizalo bya bupilistu, na mazi a kupangesa mu kubwabesa, na ngombe wa nkomba wa bwana bwa kufwika bubi, na bimanga babali ba nkomba, na cizuma ca makende a kujeneka musima, 3 co kungulula mbunga yoshe mangana iliwanene ku cikolo ca tenti ya kuliwanena.”

4 Co Mosesa walingile ngecilika mwamushikilile Yehova. Mbunga yalikungulwilile ku cikolo ca tenti ya kuliwanena. 5 Co Mosesa walekele mbunga ngwendi: “Ebi bikebyo byanatushiki Yehova ngwendi tulinge.” 6 Ngeci Mosesa wanenele Aloni na bana bendi ba banalume hayehi, co wabajwelesele na mema. 7 Kutundaho, wazikile Aloni mukanjo na kumukuta mwiba, co wamuzikile lalo cizalo ca helu ca kujeneka maboko na kumwaka efodi na kuikuta na mwiba wa nanga wa efodi, co wamukutilewo mwamubwa. 8 Kutundaho, wamwakele kananga ka ha nulo na kumwaka Urimu na Thamimu mu kananga ka ha nulo. 9 Wamuzikile nanga ya ku mutwe, co halutwe lwa ije nanga wakeleko kacikubo kakulipasha, kakubyakuma ka goudi, kaje kapwile cizibukiso ca kujela ca kumwesa kulikundika, ngecilika Yehova mwashikilile Mosesa.

10 Co Mosesa wambatele mazi a kupangesa mu kubwabesa, co wabwabesele tabanakele na byoshe byakelemo mangana abijelese. 11 Mwamanesele, washamwinine mazi amo lwa kupwa 7 ha mutula, co wabwabesele mutula na bikwata byawo byoshe na lilonga na citumbikilo calyo mangana abijelese. 12 Mamaneselelo wetilile mazi amo ha mutwe wa Aloni a kupangesa mu kubwabesa. Wamubwabesele mangana amujelese.

13 Co Mosesa wanenele bana ba Aloni ba banalume hayehi na kubazika mikanjo na kubakuta miba mu bimbunda na kubakuta binanga bya ku mitwe ngecilika Yehova mwashikilile Mosesa.

14 Co banenele ngombe wa nkomba wa bwana bwa kufwika bubi, co Aloni na bana bendi ba banalume bakambekele maboko abo ha mutwe wa uje muna ngombe wa bwana bwa kufwika bubi. 15 Mosesa watsiile uje ngombe na kwambata maninga amo ku munye wendi na kuwakwita ku mambinga oshe a mutula, ngeci wajelesele mutula ku bubi, oloni aje maninga oshe asalele wawetilile kwisi ya mutula. Mwalingile ngoco, waujelesele mangana ase kwanenaho mulambu wa kukonekela bubi. 16 Munima yebi, wambatele mazi oshe aje akele ha mila, na mazi oshe aje akele ha lishuli, na binso bibali na mazi abyo, co Mosesa wabyenyekele mangana bikakumune bwisi ha mutula. 17 Co wambatele uje ngombe woshe, na cilambu cendi, na situ yendi, na bufwati twendi na kubyenyekela kusambwa lya cilombo ngwe Yehova mwashikile Mosesa.

18 Co wanenele hayehi manga wa nkomba wa bwana bwa kwenyeka, co Aloni na bana bendi ba banalume bakambekele maboko abo ha mutwe wa uje manga. 19 Co Mosesa wamutsiile na kushamwina maninga endi ku mitambela yoshe ya mutula. 20 Watetangele uje manga bipuka-bipuka, co Mosesa wambatele mutwe wa uje manga, na bije bipuka, na mazi* na kubyenyeka mangana bikakumune bwisi ha mutula. 21 Wakushile mila na mendi mu mema, co Mosesa wenyekele uje manga woshe mangana akakumune bwisi ha mutula. Bwapwile bwana bwa kwenyeka bwa lwengo lwalubwa. Bwapwile bwana bwa kwenyeka mu tuhya bubana kuli Yehova, ngecilika Yehova mwashikilile Mosesa.

22 Co wanenele manga wa nkomba wamucibali, manga wa kupangesa mu kwangula, co Aloni na bana bendi ba banalume bakambekele maboko abo ha mutwe wa uje manga. 23 Mosesa watsiile uje manga na kwambatako maninga endi amo na kuwakwita ku shongo ya litwi lya cilyo lya Aloni na ku munye wakama wa liboko lyendi lya cilyo na ku munye wakama wa ku lindi lyendi lya cilyo. 24 Kutundaho, Mosesa wanenele bana ba Aloni ba banalume kulutwe, co wabakwitile maninga amo ku bishongo bya matwi abo a cilyo na ku minye yabo yakama ya ku maboko abo a cilyo na ku minye yabo yakama ya ku mendi abo a cilyo, oloni Mosesa washamwinine aje maninga asaleleko ku mitambela yoshe ya mutula.

25 Co wambatele mazi, na mukila uje uli na mazi, na mazi oshe aje akele ha mila, na mazi aje akele ku lishuli, na binso bibali na mazi abyo na litako lya cilyo. 26 Co mu cizuma ca makende a kujeneka musima cije cakele kulutwe lwa Yehova, wambatelemo likende limo lya kujeneka musima lya muzenguluke lije lili na bwina, na likende limo lya muzenguluke lije lili na bwina lya kutika na mazi, na likende limo lya kulipasha. Co wabyakele ha masheleshele a mazi na ha litako lya cilyo lya uje cimuna. 27 Kutundaho, byoshe wabyakele mu maboko a Aloni na mu maboko a bana ba Aloni ba banalume, co bashangumukile kubihwingisa noku-noku kupwa bwana bwa kuhwingisa kulutwe lwa Yehova. 28 Co Mosesa wabyambatele mu maboko abo na kubyenyeka mangana bikakumune bwisi ha mutula helu lya bwana bwa kwenyeka. Byapwile mulambu wa kwangwisa wa lwengo lwalubwa. Byapwile bwana bwa kwenyeka mu tuhya bubana kuli Yehova.

29 Mosesa wambatele ñundo* na kuihwingisa noku-noku kupwa bwana bwa kuhwingisa kulutwe lwa Yehova. Ije ñundo ya manga wa kupangesa mu kwangula ikeyo yapwile mutamba wa Mosesa, ngecilika Yehova mwashikilile Mosesa.

30 Co Mosesa wambatele mazi amo a kupangesa mu kubwabesa na maninga amo aje akele ha mutula na kuwakwita hali Aloni na ha bizalo byendi na hali bana bendi ba banalume baje bakele nabo na ha bizalo byabo. Ngeci wajelesele Aloni na bizalo byendi na bana bendi ba banalume na bizalo byabo.

31 Mosesa walekele Aloni na bana bendi ba banalume ngwendi: “Telekeleni ei situ ku cikolo ca tenti ya kuliwanena, co mukailila kuje hamolika na makende aje ali mu cizuma ca kupangesa mu kwangula ngecilika mubanjishikile ngwabo, ‘Aloni na bana bendi ba banalume bakailya.’ 32 Situ ije ikasalako na makende aje akasalaho mukabyenyeka mu tuhya. 33 Munapande kukala kuyehi na cikolo ca tenti ya kuliwanena ha matangwa 7 kweta noho habakamanesela kumyaka ha bupilistu, mwafwa kukambata matangwa 7 kumyaka ha bupilistu. 34 Yehova washikile ngwendi tulinge bitunalingi litangwa lya lelo mangana njimyanene mulambu wa kukonekela bubi. 35 Mukakale ku cikolo ca tenti ya kuliwanena butsiki na mutanya ha matangwa 7 na kwononoka mashiko a Yehova mangana keti mutse, mwafwa omu mukemwo mubananjishiki.”

36 Co Aloni na bana bendi ba banalume balingile byuma byoshe byashikile Yehova kwitila muli Mosesa.