Mukanda Wakulibanga wa Samwele
16 Mu kwita kwa simbu, Yehova walekele Samwele ngwendi: “Wambata simbu ya kupwa hali oku ulila Saulu? Njinamubyana kupwa mwene wa Isalele. Aka mazi mu limbinga lyobe na kuya. Njikutuma kuli Jesi wa ku Betelehema, mwafwa njalyangwila umo wa bana bendi ba banalume kupwa mwene.” 2 Oloni Samwele wendekele ngwendi: “Njiya bati? Saulu mwaziba ei ñanda anjitsiya.” Yehova wamukumbulwile ngwendi: “Ambata muna ngombe uye nendi, co ukendeke ngwobe, ‘Njinaija na kwana Yehova mulambu.’ 3 Ukalanye Jesi kuukanena mulambu, co njikakuleka byakulinga. Unapande kukanjibwabesela injikakuleka.”
4 Samwele walingile byamulekele Yehova. Mwetele mu Betelehema, bakulunu ba nganda bajajele mubaliwanene nendi, co bendekele ngwabo: “Ikeyeni unaija mu kwoloka?” 5 Wabakumbulwile ngwendi: “Njinaija mu kwoloka. Njinaija na kwana Yehova mulambu. Lijeleseni mangana tukane mulambu.” Kutundaho, wajelesele Jesi na bana bendi ba banalume, co wabalanyele ku kwana mulambu. 6 Mubetele, Samwele mwamwene Eliabu, wendekele ngwendi: “Cili bene ou nemana halutwe lwa Yehova ikeye bene wakubwabesa wendi.” 7 Oloni Yehova walekele Samwele ngwendi: “Keti wake mbunge ku sholwesi yendi na bulaha bwendi, mwafwa njamubyana. Mwafwa mwakamwena munu keti mukemwo mwakamwena Njambi. Munu akamono lika byakamono na mesho endi, oloni Yehova akamono bili mu mbunge.” 8 Co Jesi wasanene Abinadabu na kumunena kuli Samwele, oloni Samwele wendekele ngwendi: “Nou Yehova kamwangwile.” 9 Kutundaho, Jesi wanenele Shamaha, oloni Samwele wendekele ngwendi: “Nou Yehova kamwangwile.” 10 Jesi wanenele bana bendi ba kupwa 7 ba banalume kuli Samwele, oloni Samwele walekele Jesi ngwendi: “Wahi yanangula Yehova hali aba.”
11 Mamaneselelo Samwele wehwile Jesi ngwendi: “Bakebo lika bana ba banalume bauli nabo aba ndi?” Jesi wamukumbulwile ngwendi: “Wa mwanike manene wahi ha simbu ino. Ali na kulisa bimanga.” Co Samwele walekele Jesi ngwendi: “Tuma bamo bakamusane, mwafwa kututumama na kulya kubanga naija.” 12 Ngeci, watumine bamo, co bamunenele. Wapwile wa kubenga, wakele na mesho amabwa, co wapwile wamubwa kumutala. Yehova wendekele ngwendi: “Katuka umubwabese, mwafwa ikeye bene ou!” 13 Samwele wambatele limbinga lya mazi na kumubwabesela ha mesho a bandolome bendi. Co sipilitu ya Yehova yashangumukile kwana Devidi nzili kushwa bene lije litangwa. Mu kwita kwa simbu, Samwele wakatukile na kuya ku Lama.
14 Sipilitu ya Yehova yatundile hali Saulu, co sipilitu yaibi ya kutunda kuli Yehova yamuyandesele. 15 Bangamba ba Saulu bamulekele ngwabo: “Ngwetu wamono ngwobe sipilitu yaibi ya kutunda kuli Njambi ili na kukuyandesa. 16 Shukulu, shika bangamba bobe batonde munu uje ali na cashu ca kwimba kalyalya. Co hoshe haikuwanene sipilitu yaibi ya kutunda kuli Njambi, akemba, co ulizibako bwino.” 17 Ngeci, Saulu walekele bangamba bendi ngwendi: “Shukulu-kambu, tondeni owo munu asa kwimba mwamubwa kalyalya munjineneleye.”
18 Umo wa baka-kupanga wendekele ngwendi: “Tala! Njamono mwakembila mu butongwe muna Jesi muka-Betelehema, co lalo wapwa muka-kulwa wa nzili wa kusimpa. Akendeka mwamubwa, wamubwa, co lalo Yehova ali nendi.” 19 Co Saulu watumine tutumwa kuli Jesi bakamuleke ngwabo: “Tabesa munobe Devidi uje ali na kunyunga butanga bwa bimanga aije kuli yange.” 20 Ngeci, Jesi wambatele likende na ngonga ya cilambu ya binyu na kubitwika donki. Wambatele na muna membe na kumwana munendi Devidi mangana abitike Saulu. 21 Co Devidi wezile kuli Saulu na kushangumuka kumupangela. Saulu wamuzemene manene, co wamupwisile muka-kumwambatela bitwa. 22 Saulu watuminine Jesi muzimbu ngwendi: “Tabesa Devidi atwaleleleho kunjipangela, mwafwa nanjibwasa.” 23 Simbu yoshe sipilitu yaibi ya kutunda kuli Njambi muyakele na kwizila Saulu, Devidi wakele na kwambata kalyalya na kukemba, co Saulu wakele na kuziba ku mbunge too na kulizibako mwamubwa, co sipilitu yaibi yakele na kutunda kuli ikeye.