Mukanda Wakulibanga wa Samwele
31 Bafilistiya bakele na kulwisa Baisalele. Co banalume ba mu Isalele batewele Bafilistiya, co babangi babatsiilile ha Munkinda wa Giuboa. 2 Bafilistiya bashunananene Saulu na bana bendi, co batsiile Jonathani, Abinadabu, na Mauki-shuwa, bana ba Saulu ba banalume. 3 Nzita yamenene Saulu, baka-kwasha mikili bamuwanene, co bamubulumwine manene. 4 Co Saulu walekele muka-kumwambatela bitwa ngwendi: “Shomona mukwale wobe unjitibe na kunjipulyasana mangana aba banalume ba kujeneka kuya ku mukanda keti baije na kunjitiba na kunjipulyasana na kunjilinga mwamubi.” Oloni muka-kumwambatela bitwa kashakele kulinga ngoco mwafwa walijujukilile manene. Ngeci Saulu wambatele mukwale na kuwilaho. 5 Muka-kwambatela Saulu bitwa mwamwene ngwendi natsi, nendi wawililile ha mukwale wendi, co watsililile hamo nendi. 6 Ngeci Saulu, na bana bendi ba banalume batatu, na muka-kumwambatela bitwa, na banalume boshe bakele nendi batsililile hamo lije litangwa. 7 Banu ba mu Isalele baje bakele mu mutambela wa cingulunga na baje bakele mu mutambela wa Jodani mubamwene ngwabo banalume ba mu Isalele banatewe, co lalo Saulu na bana bendi banatsi, bashangumukile kuseza binganda byabo na kutewa. Co Bafilistiya bezile na kukalamo.
8 Lyamukwabo, Bafilistiya mubezile na kupukula byuma bya banu babatsiile, bawanene Saulu na bana bendi batatu banatsila ha Munkinda wa Giuboa. 9 Ngeci bamutapele mutwe na kumushulula bizalo byendi bya nzita, co batumine muzimbu mu lifuti lya Bafilistiya mangana ou muzimbu bawambulule mu binjibo* bya tumponya babo na kuulingisa ujalakane hakati ka banu. 10 Co bakele bizalo byendi bya nzita mu njibo ya tumponya ba Ashitolethi na kupameya cibimbi cendi ha cibumbe ca Bethi-shani. 11 Banu ba mu Jabeshi-giliyadi mubazibile bibalingile Bafilistiya kuli Saulu, 12 baka-kulwa boshe bakatukile na kwenda butsiki bwoshe, co bakambatele cibimbi ca Saulu na bibimbi bya bana bendi, kubitundisa ha cibumbe ca Bethi-shani. Belukile ku Jabeshi na kukabyenyekelako. 13 Kutundaho, bambatele bitsiya byabo na kubitsinda mwisi ya muti wa tamariski mu Jabeshi, na kulibindika kulya ha matangwa 7.