Levitike

4 Yehova watwaleleleleho kuleka Mosesa ngwendi: 2 “Leka Baisalele ngwobe, ‘Nga munu alinga bubi buje kayongwele kulinga ha kulinga cuma coshe-coshe ku byuma binjinashiki yange Yehova ngwange keti mubilinge, co ebi bikebyo binapande kulingiwa:

3 “‘Nga kapilistu wa kubwabesa alinga bubi na kulingisa banu bakale na mulonga, co napande kwana muna ngombe wamubwa wa nkomba kuli Yehova kupwa bwana bwa kufwika bubi mwafwa ya bubi bwanalingi. 4 Akatwale ou muna ngombe wa nkomba ku cikolo ca tenti ya kuliwanena, halutwe lwa Yehova na kukambeka liboko lyendi ha mutwe wou ngombe, co napande kutsiila ou ngombe halutwe lwa Yehova. 5 Co kapilistu wa kubwabesa akambatako maninga amo ou ngombe na kuwanena mu tenti ya kuliwanena, 6 co kapilistu akambwitika munye wendi mu maninga na kushamwina maninga amo lwa kupwa 7 kulutwe lwa Yehova, kulutwe lwa nanga ije ibatula mwela wa kujela. 7 Kapilistu akambata lalo maninga amo na kuwakwita ku mambinga a mutula wa isense ya lwengo lwalubwa uje uli kulutwe lwa Yehova mu tenti ya kuliwanena, co aje maninga anasalako a uje ngombe akawetila kwisi ya mutula wa kwenyekela bwana uje uli ku cikolo ca tenti ya kuliwanena.

8 “‘Co akatundisa mazi oshe a uje ngombe wa bwana bwa kufwika bubi, kwambateselela na mazi aje akafwiki ha mila na mazi aje anazengeleka mila, 9 na binso bibali bili kuyehi na mitanda na mazi abyo. Co lalo akatundise mazi aje ali ha lishuli hamolika na binso. 10 Akatundisa byuma bya kulifwa na bije byakatundisa ku ngombe wa nkomba uje ibana kupwa mulambu wa kulila hamo, co kapilistu akabyenyeka ha mutula wa kwenyekela bwana mangana bikakumune bwisi.

11 Oloni cilambu ca uje ngombe na situ yendi yoshe hamolika na mutwe wendi na mendi endi na mila yendi na bufwati bwendi, 12 byoshe bije bikasalako kuli uje ngombe, kapilistu akashika ngwendi babitwale kusambwa lya cilombo, ku mwela wa kujela kuje kubakajukwila lito,* co akabyenyeka ha bikuni. Akabyenyekela kuje kubakajukwila lito.

13 “‘Co nga mbunga yoshe ya Isalele ikala na mulonga mwafwa ya kulinga bubi buje kubayongwele, oloni ije mbunga kuyanangukile ngwayo inalingi byuma bije byaibindikile Yehova, 14 co ije mbunga muinanguka bubi buinalingi, inapande kwana muna ngombe wa nkomba kupwa bwana bwa kufwika bubi na kumunena kulutwe lwa tenti ya kuliwanena. 15 Bakulunu ba ije mbunga bakakambeka maboko abo ha mutwe wa uje muna ngombe kulutwe lwa Yehova, co uje ngombe bakamutsiila kulutwe lwa Yehova.

16 “‘Co uje kapilistu wa kubwabesa akanena maninga amo a uje muna ngombe mu tenti ya kuliwanena. 17 Kapilistu akambwitika munye wendi muje mu maninga na kushamwinako amo lwa kupwa 7 kulutwe lwa Yehova, kulutwe lwa nanga. 18 Co akakwita maninga amo ku mambinga a mutula uje uli kulutwe lwa Yehova mu tenti ya kuliwanena. Co maninga aje akasalako, akawetila kwisi ya mutula wa kwenyekela bwana uje uli ku cikolo ca tenti ya kuliwanena. 19 Akatundisa mazi oshe a uje ngombe na kuwenyeka mangana akakumune bwisi ha mutula. 20 Napande kulinga ou muna ngombe ngwe mwanalingi uje ngombe mukwabo wa bwana bwa kufwika bubi. Ebi bikebyo byanapande kulinga kapilistu mangana babakonekele bubi bwabo, co bakabakonekela. 21 Akaleka banu batwale uje muna ngombe hanja ya cilombo na kukamwenyeka ngecilika mwanenyekelele ngombe wakulibanga. Obu bunapu bwana bwa kufwika bubi bwa mbunga.

22 “‘Nga mwata nalingi bubi buje kayongwele kulinga ha kulinga cuma cimo ku byuma byanabindika Yehova Njambi yendi, co nazibuka ngwendi ali na mulonga, 23 nambe nga hanima ananguka ngwendi nalingi bubi ha kupokola lishiko, co napande kunena muna membe wa cizamba wamubwa kupwa bwana bwendi. 24 Akakambeka liboko lyendi ha mutwe wa uje muna membe na kumutsiila mu mwela muje mubakatsiila cimuna wa bwana bwa kwenyeka kulutwe lwa Yehova. Obu bunapu bwana bwa kufwika bubi. 25 Kapilistu akambatako maninga amo a bwana bwa kufwika bubi ku munye wendi na kuwakwita ku mambinga a mutula wa kwenyekela bwana, co maninga akasalako akawetila kwisi ya mutula wa kwenyekela bwana. 26 Akenyeka mazi oshe ha mutula ngwe mwakenyekela mazi a mulambu wa kulila hamo. Ebi bikebyo byakalinga kapilistu mangana bakonekele ou munu mwafwa ya bubi bwanalingi, co bakamukonekela.

27 “‘Nga munu umo mukati ka banu ba mu lifuti alinga bubi buje kayongwele kulinga, co akala na mulonga mwafwa ya kulinga cuma cimo ku byuma byanashiki Yehova ngwendi keti balinge, 28 nambe nga ananguka bubi bwanalingi, co napande kunena muna membe wa lwabo wamubwa kupwa bwana bwendi mwafwa ya bubi bwanalingi. 29 Akakambeka liboko lyendi ha mutwe wa cimuna wa bwana bwa kufwika bubi na kutsiila uje cimuna wa bwana bwa kufwika bubi mu mwela ubakatsiila cimuna wa bwana bwa kwenyeka. 30 Kapilistu akambatako maninga amo a bwana bwa kufwika bubi ku munye wendi na kuwakwita ku mambinga a mutula wa kwenyekela bwana, co maninga akasalako akawetila kwisi ya mutula. 31 Akatundisa mazi oshe a uje cimuna ngwe mubakatundisa mazi a cimuna wa mulambu wa kulila hamo, co kapilistu akawenyeka ha mutula mangana apwe lwengo lwalubwa kuli Yehova. Ebi bikebyo byakalinga kapilistu mangana ou munu bamukonekele, co bakamukonekela.

32 Oloni nga ana muna manga kupwa bwana bwendi bwa kufwika bubi, co napande kunena muna manga wa lwabo wamubwa. 33 Akakambeka liboko lyendi ha mutwe wa cimuna wa bwana bwa kufwika bubi na kutsiya uje cimuna kupwa bwana bwa kufwika bubi. Akamutsiila mu mwela muje mubakatsiila cimuna wa bwana bwa kwenyeka. 34 Kapilistu akambatako maninga amo a bwana bwa kufwika bubi ku munye wendi na kuwakwita ku mambinga a mutula wa kwenyekela bwana. Co maninga akasalako akawetila kwisi ya mutula wa kwenyekela bwana. 35 Akatundisa mazi endi oshe ngwe mubakatundisa mazi a muna manga wa nkomba wa mulambu wa kulila hamo, co kapilistu akawenyeka ha mutula, helu lya mulambu wa Yehova wa kwenyeka mu tuhya. Ebi bikebyo byakalinga kapilistu mangana ou munu bamukonekele mwafwa ya bubi bwanalingi, co bakamukonekela.