Jelemiya
42 Co bantwama ba maswalale boshe na Johanani muna Kaleya na Jezaniya muna Hoshaya na banu boshe, kutunda ku wamundondo kutwala ku wakama, bezile 2 kuli kapolofweto Jelemiya na kwendeka ngwabo: “Shukulu-kambu tolilila byuma bitukulomba, co utulombeleleko kuli Yehova Njambi yobe. Lombelelako aba banu banasalako, mwafwa ngwe muunamwena, babandondo lika banasalako ku mbunga yakama. 3 Yehova Njambi yobe atuleke ngila itunapande kwendamo nebi bitunapande kulinga.”
4 Kapolofweto Jelemiya wabakumbulwile ngwendi: “Njinamizibi, co njilombela kuli Yehova Njambi yeni kwesekesa na byuma bimunalombo, co majwi oshe amikumbulula Yehova njimilekawo. Kunjimishwekela nameme lijwi limo.”
5 Bakumbulwile Jelemiya ngwabo: “Yehova Njambi apwe mukaleho wa busunga na wa kulongwa, co atulinge mwamubi nga kutulingi bene byatushika Yehova Njambi yobe kwitila muli yobe. 6 Nameme bipwe byabibwa nambe byabibi, twononoka lijwi lya Yehova Njambi yetu kuje kutunakutumu, mangana byuma bitwendele mwamubwa, mwafwa twononoka lijwi lya Yehova Njambi yetu.”
7 Munima ya matangwa 10, Yehova wendekele na Jelemiya. 8 Co Jelemiya wasanene Johanani muna Kaleya na bantwama ba maswalale boshe baje bakele nendi na banu boshe, kutunda ku wamundondo kutwala ku wakama. 9 Jelemiya wabalekele ngwendi: “Yehova Njambi ya Isalele kuje kumunanjitumine ngweni njikamulombe mangana amitetele, nendeka ngwendi: 10 ‘Nga cili bene mukala muno mu lifuti, co njimitunga, kunjimisiula, co lalo njimikuna, kunjimitukula, mwafwa njitengulula bisinganyeka byange ha bukalu bunjinaminenela. 11 Keti muzibe lyoba mwafwa ya mwene wa Babiloni uje imuli na kuzibila lyoba.’
“‘Keti mumuzibile lyoba,’ mukemwo mwanendeka Yehova, ‘mwafwa njili hamo neni mangana njimyobole na kumitundisa mu liboko lyendi. 12 Njikamitetela, co nendi akamitetela na kumilwisa ku lifuti lyeni.
13 “‘Oloni nga mwendeka ngweni, “Embwe kutukalamo muno mu lifuti,” co lalo kumwononoka lijwi lyange Yehova Njambi yeni 14 ha kwendeka ngweni, “Embwe tuya ku lifuti lya Ijipiti kuje kukwesi nzita nambe cilumo ca limbinga ca nzita nambe njala, kukekwo kutukakala,” 15 co tolilileni lijwi lya Yehova eni munasala mu Juda. Yehova wa maswalale, Njambi ya Isalele nendeka ngwendi: “Nga mukakateya kuya ku Ijipiti na kukakalako, 16 co owo bene mukwale umuli na kutewa ukamiwana kuje bene ku lifuti lya Ijipiti, co lalo njala yakama imuli na kutewa imikaba ku lifuti lya Ijipiti, co kukekwo kumukatsila. 17 Co banu boshe baje banakakateya kuya ku Ijipiti na kukakalako bakatsilako na mukwale na njala yakama na mushongo wa kulitambwisa. Naumo wahi akoboka nambe kutewa bukalu bunjikabanenela.”’
18 “Mwafwa Yehova wa maswalale, Njambi ya Isalele nendeka ngwendi: ‘Nga muya ku Ijipiti, co njiketila butenu bwange hali yeni ngwe munjetilile butenu bwange hali banu ba mu Jelusalema, co mukapwa cisingo na cuma ca kukomokesa na cuma ca kushauka na cuma ca shwamwa, co uno mwela kumukaumono lalo.’
19 “Eni munasala mu Juda, Yehova namikanda ngwendi keti muye ku Ijipiti. Zibukeni ngweni njinaminangula litangwa lya lelo 20 ngwange milonga yeni imitsiisa. Mwafwa munanjitumine kuli Yehova Njambi yeni ngweni, ‘Tulombelele kuli Yehova Njambi yetu, co tuleke byoshe byakuleka Yehova Njambi yetu, co tubilinga.’ 21 Co lelo njinamileke, oloni kumwononoka lijwi lya Yehova Njambi yeni nambe kulinga byoshe-byoshe byananjitumu ngwendi njimileke. 22 Ngeci, cili bene zibukeni ngweni mukatsila ku mwela kumunashungwiya kuya na kukala. Mukatsilako na mukwale na njala yakama na mushongo wa kulitambwisa.”