Mukanda Wakulibanga wa Samwele
2 Co Hana walombelele ngwendi:
“Mbunge yange inabwahelela mwafwa ya Yehova,
Yehova nanjana nzili.*
Njikumbulula bitozi bange mu kusimpa,
Mwafwa bilinga byobe bya kwobola byanjilingisa njibwahelele.
2 Naumo wahi wa kujela ngwe yobe Yehova,
Naumo wahi kubanga yobe,
Co kukwesi limanya linalifu na Njambi yetu.
3 Keti utwaleleleho kwendeka mu kulyalesa,
Mu kanwa kobe keti mutunde lijwi lya kulijundula,
Mwafwa Yehova wapwa Njambi wa mangana,
Co ikeye elula mwamubwa bilinga bya banu.
4 Mata a lusipa a banalume ba nzili bawapokola,
Oloni baje bali na kutanuka babana nzili.
5 Baje babakele na kushuka mwamubwa bapangela likende,
Oloni baje batsile njala kubesi na kutsa lalo njala.
Mumba nakiti bana 7,
Oloni uje wakele na bana babangi nasala mu ngundu.
6 Yehova akatsii na kwobola,
Akasikumwisa banu mu Cihilo* na kusangula banu.
7 Yehova akanene buhutu na kufukisa,
Akakehesa na kujundula banu.
8 Atundisa munu wa kwisi mu likungu,
Atundisa kahutu ha mutumbo wa lito,*
Na kubalingisa batumame na bamyata,
Na kubana citwamo ca bulemu.
Yehova ikeye nashimbika bingunzi bya lifuti-libu,
Na kwakaho lifuti.
9 Akanyungu myanja ya bakulongwa bendi,
Oloni olwesa banu bababi mu lisusulungu,
Mwafwa munu kesi kuhyana mu nzili yendi.
10 Yehova akabwabwangeya baje bamulwisa,*
Akabalumina kutundilila mwilu.
11 Co Elikana welukile ku njibo yendi mu Lama, oloni uje mwanike wa munalume washangumukile kupangela Yehova ku mesho a kapilistu Eli.
12 Bana ba Eli ba banalume bapwile banu bababi, kubazibilile Yehova lyoba. 13 Mubakele na kutambula milambu ibapandele kwana banu ku tupilistu, bakele na kulinga ngacije: Simbu yoshe munu mwakele na kunena mulambu, muka-kupangela kapilistu wakele na kwija na nguto ya mishomo itatu mu liboko lyendi oku situ ili na kumbwata, 14 co wakele na kutibisa oyo nguto mu lilonga, mu ndeho ya makulo abali, mu ndeho yakama, nambe mu ndeho ya mukota. Co kapilistu wakele na kwambata byoshe biyakele na kutiba oyo nguto. Ebi bikebyo bibakele na kulinga mu Shilo ku Baisalele boshe bakele na kwijako. 15 Co lalo nameme simbu kanda munu uje ana mulambu akakumwise bwisi bwa mazi, muka-kupangela kapilistu wakele na kwija na kumuleka ngwendi: “Ana kapilistu situ oce. Katambula situ ya kuteleka kuli yobe, yaibishu lika atonda.” 16 Owo munu nga amuleka ngwendi: “Bacikakumwise tahi bwisi bwa mazi, co ulyambatelako byoshe-byoshe biushaka,”* owo muka-kupangela kapilistu wakele na kwendeka ngwendi: “Embwe, njanebyo hano bene, nga kuunjanabyo, njilyambatelabyo yange babenya.” 17 Ngeci bubi bwa baka-kupangela tupilistu bwamene manene kuli Yehova, mwafwa banu kubasingimikile bwana bwa Yehova.
18 Samwele wakele na kupangela Yehova oku nazala Efodi ya lineni, nameme wapwile mwanike. 19 Co lalo mwaka na mwaka, ina wakele na kumutongela cizalo ca helu ca kujeneka maboko na kumunenelaco mwakele na kwija na munalume wendi kwa kwana mulambu wa ha mwaka. 20 Co Eli wabezikisile Elikana na munakazi wendi na kwendeka ngwendi: “Yehova akwane mwana kwitila muli ou munakazi, wa kwinga muli ou imunana* Yehova.” Co belukile kwimbo. 21 Yehova wanukile Hana, ngeci wemitile na kukita bana bakwabo batatu ba banalume na ba banakazi babali. Co mwanike Samwele watwaleleleleho kukola ku mesho a Yehova.
22 Eli wakulubalele manene, oloni wazibile byoshe bibakele na kulinga bana bendi kuli Baisalele boshe, nomu mubakele na kulilalela na banakazi baje bakele na kupangela ku cikolo ca tenti ya kuliwanena. 23 Wakele na kubaleka ngwendi: “Bika bimuli na kulingila byuma bya cifweci? Byuma binjili na kuziba hali yeni ku banu boshe byabibi. 24 Embwe bana bange, mizimbu injili na kuziba ibali na kwendeka banu ba Yehova hali yeni keti yaibwa. 25 Nga munu abiisila mukwabo munu, munu asa kumulambelelela kuli Yehova,* oloni nga munu abiisila Yehova, iya asa kumulombelelako?” Oloni babyanene kutolilila ishabo, co Yehova wayongwele kubatsiya. 26 Mwanike Samwele watwaleleleleho kukola ku mubila, co lalo watwaleleleleho kuzibisa Yehova na banu kubwaha.
27 Munalume umo uje wapwile ngamba ya Njambi wezile kuli Eli na kumuleka ngwendi: “Yehova nendeka ngwendi: ‘Kuma kunjalisholwele ku bakunjibo ya isho mu Ijipiti ha simbu ibapwile bindungo ba ku njibo ya Falo ndi? 28 Co njamwangwile hakati ka miyati yoshe ya Isalele mangana apwe kapilistu wange na kuya ku mutula wange mangana ane milambu na kwana isense* na kuzala Efodi halutwe lwange, co njanene bakunjibo ya kukulwila yobe bwana bwoshe bwa kwenyeka bwa Baisalele. 29 Bika bimuli na kushawila mulambu wange na bwana bwange bunjinashiki ngwange babunene mu mwela munjakala? Mwafwa bika muli na kutwalelelaho kusingimika manene bana beni kutubakana yange omwo muli na kulinunisa na mitamba yaibwa manene ya bwana bwoshe bubanena banu bange Baisalele?
30 “‘Mukemwo Yehova Njambi ya Isalele nendeka ngwendi: “Njendekele ngwange bakunjibo yobe na bakunjibo ya kukulwila yobe batwalelelaho kwenda kulutwe lwange.” Oloni hano Yehova nendeka ngwendi: “Kunjitabesa eci cuma citwaleleleho, mwafwa njisingimika baje banjisingimika, oloni njishaula baje banjilumbilisa.” 31 Tala! Matangwa ali na kwija, omwo njikamanesa nzili yobe na nzili ya bakunjibo ya isho, co ku bakunjibo yobe, kukwesi munu aketa ku bukulukazi. 32 Baisalele mubakalikuwa byuma byoshe byabibwa binjikabalingila, yobe ukamona lika citozi mu mwela wange, co mu njibo yobe kumukakala lalo kakulukazi. 33 Munu umo wa ku njibo yobe uje kunjikabindika kupangela ku mutula wange akatsitsibalesa mesho obe na kukunenela busiwa, oloni bwingi bwa bakunjibo yobe bakatsa ku mukwale wa banu. 34 Co byuma bilingiwa ku bana bobe babali ba banalume, Hofini na Finihasi, bipwa cimweso kuli yobe: Boshe batsa ha litangwa limo. 35 Njikalyangwila kapilistu wa kulongwa. Akalinga mwaya mbunge yange. Njikamutungila njibo* ije ikakalako myaka yoshe, co akenda kulutwe lwa wakubwabesa wange simbu yoshe. 36 Woshe akasala mu njibo yobe akaija na kumutsikamena mangana amwane bimbongo na mukasha wa likende na kwendeka ngwendi: “Shukulu-kambu, njane cipangi ca bupilistu mangana njilye mbazubwila ya likende.”’”