Mukanda Wakulibanga wa Samwele
3 Mwanike Samwele wakele na kupangela Yehova ku mesho a Eli. Oloni aje matangwa, Yehova kakele na kutuma manene lijwi lyendi ku banu. Bimona kubyalisalele.
2 Litangwa limo Eli walalele mu mwela mwakele na kulala simbu yoshe. Mesho endi atsitsibalele, co kakele na kumona mwamubwa. 3 Ndeya ya Njambi te kanda izime, co Samwele walalele mu tempele* ya Yehova, muje mwakele cikasha ca Njambi. 4 Co Yehova wasanene Samwele. Samwele wakumbulwile ngwendi: “Yange uno.” 5 Washatukilile kuli Eli na kwendeka ngwendi: “Yange uno, mwafwa unanjisana.” Oloni Eli wamukumbulwile ngwendi: “Kunjakusanene. Yakalale.” Ngeci, waile na kulala. 6 Yehova wamusanene lalo ngwendi: “Samwele!” Ngeci, Samwele wendukile na kuya kuli Eli na kwendeka ngwendi: “Yange uno, mwafwa unanjisana.” Oloni Eli wamulekele ngwendi: “Kunjakusanene munange, yakalale.” 7 (Samwele te kanda azibuke Yehova, co te kanda ashangumuke kuziba lijwi lya Yehova.) 8 Co Yehova wamusanene lalo lwamucitatu ngwendi: “Samwele!” Co Samwele wendukile na kuya kuli Eli na kwendeka ngwendi: “Yange uno, mwafwa unanjisana.”
Ngeci, Eli wanangukile ngwendi Yehova ikeye wakele na kusana ou mwanike. 9 Eli walekele Samwele ngwendi: “Ya ukalale, co nga akusana, umukumbulule ngwobe, ‘Yehova, endeka, mwafwa ngamba yobe ali na kutolilila.’” Co Samwele waile na kulala mu mwela wendi.
10 Yehova wezile na kwimana kuje, co wasanene ngwe mwalingilile ha bisimbu bikwabo ngwendi: “Samwele, Samwele!” Co Samwele wakumbulwile ngwendi: “Endeka, mwafwa ngamba yobe ali na kutolilila.” 11 Yehova walekele Samwele ngwendi: “Tala! Njilinga cuma cimo mu Isalele cije cikalingisa woshe uje akaciziba akalikomokele.* 12 Ha litangwa olyo, njikalinga byuma byoshe binjendekele ngwange njikalinga kuli Eli na ku njibo yendi, kushangumukila ku mashangumukilo, kweta ku mamaneselelo. 13 Unapande kumuleka ngwobe njinena kashitiko ka myaka yoshe ha njibo yendi mwafwa ya bubi bwazibuka, mwafwa bana bendi bali na kushaula Njambi mu bilinga byabo,* oloni kabatenukilile. 14 Mukemwo njalisingi ku njibo ya Eli ngwange mulonga wa ku njibo ya Eli kubakaukonekela na milambu nambe na bwana.”
15 Samwele walalele kweta na mutondo, co washokolwele bikolo bya ku njibo ya Yehova. Samwele wakele na kuziba lyoba kuleka Eli byamulekele Njambi mu cimona. 16 Oloni Eli wasanene Samwele ngwendi: “Samwele munange!” Co Samwele wakumbulwile ngwendi: “Mwane.” 17 Eli wamwihwile ngwendi: “Muzimbu muka wanakuleke? Keti unjishwekelewo. Nga unjishwekela nameme lijwi limo ku byuma byoshe byanakuleke, Njambi akwane kashitiko.” 18 Ngeci, Samwele wamulekele byoshe, kamushwekelele cuma coshe-coshe. Eli wendekele ngwendi: “Yehova ikeye nendekamo. Alinge byamona ngwendi bikebyo byabibwa mu mesho endi.”
19 Samwele watwaleleleleho kukola, co Yehova wakele hamo nendi. Walingisile majwi endi oshe alishulisilile. 20 Baisalele boshe kutunda ku Dani kuya ku Belesheba, bazibukile ngwabo Yehova nangula Samwele kupwa kapolofweto kendi. 21 Co Yehova watwaleleleleho kusholoka mu Shilo, mwafwa Yehova walisholwele kuli Samwele mu Shilo kwitila mu lijwi lyendi Yehova.