Mukanda Wakulibanga wa Samwele
21 Devidi wetele mu Nobu kuli kapilistu Ahimeleki. Ahimeleki mwamwene Devidi washangumukile kulijajela, co wamwihwile ngwendi: “Bika biuli na kwendela likalyobe?” 2 Devidi wakumbulwile kapilistu Ahimeleki ngwendi: “Mwene nanjitumu ngwendi njilingeko bimo. Oloni nanjileke ngwendi, ‘Keti uleke munu nambe umo binjinakutumu nambe binjinakushiki ngwange ulinge.’ Njinalikumiiya na bakwenje bange ngwange tuliwane ku mwela umo. 3 Ngeci, nga uli na makende atanu, njanewo, nameme byoshe-byoshe biuli nabyo.” 4 Oloni kapilistu wakumbulwile Devidi ngwendi: “Kuli lika makende a kujela, kukwesi makende eka. Cakama lika bakwenje bobe kubalimwene* na banakazi.” 5 Devidi wakumbulwile kapilistu ngwendi: “Kutwalimwene na banakazi, ngwe mutunalingila ha mangenzi akwabo atunai ku nzita. Nga bakwenje bakapu ba kujela ha mangenzi angoco, batico buno bungenzi?” 6 Ngeci, kapilistu wamwanene makende a kujela, mwafwa kukwakele makende eka kubanga makende a kujela aje abatundisile ha mesho a Yehova mangana bawengise na eka lije bene litangwa.
7 Umo wa bangamba ba Saulu kwakele olyo litangwa, mwafwa bamukwatele na kumutumbika ha mesho a Yehova. Lizina lyendi Doegi wa Kaedomu, uje wapwile mukulunu wa tunyungi ba Saulu.
8 Co Devidi walekele Ahimeleki ngwendi: “Kuwesi na likunga nambe mukwale kuno? Kunjezile na mukwale wange nambe bitwa byeka, mwafwa mwene nanjitumu mu bwasi-bwasi.” 9 Kapilistu wamukumbulwile ngwendi: “Mukwale wa Goliati, Kafilistiya uje iwatsiilile mu Cingulunga ca Elahe, kuuli. Wa kuzengela mu nanga, co uli kunima ya efodi. Nga ushaka kuwambata, wambate, mwafwa ukewo lika uliko.” Devidi wendekele ngwendi: “Owoni ukewo bene unapande. Njanewo.”
10 Devidi watwaleleleleho na bungenzi bwendi bwa kutewa Saulu lije litangwa, co waketele kuli Akishi, mwene wa Gathi. 11 Bangamba ba Akishi balekele Akishi ngwabo: “Kuma ou keti ikeye Devidi, mwene wa Isalele ndi? Kuma keti ikeye ibembile omwo bakele na kukina na kwimba ngwabo,
‘Saulu natsii makulukazi,
Devidi natsii makumi a makulukazi’?”
12 Devidi wasinganyekesesele ha majwi awa, co wazibile manene lyoba mwafwa ya Mwene Akishi wa Gathi. 13 Ngeci, walikwisile kuzaluka oku banamutalelela. Wakele na kusona ha mapito a cikolo na kulijejela ha minjezi yendi. 14 Mamaneselelo Akishi walekele bangamba bendi ngwendi: “Mwazibuka ngweni ou munu nazaluka! Bika bimunamunenela kuli yange? 15 Kuma bizaluke banjili nabo banakeha mangana njitonde lalo ou ali na kuzalukila ha mesho ange ndi? Kuma ou munalume napande kukobela mu njibo yange ndi?”