Mukanda Wakulibanga wa Samwele
22 Ngeci, Devidi watundile ku Gathi na kutewela mu bwina bwa mu limanya bwa mu Adulamu. Bandolome bendi na bakunjibo ya ishe boshe mubazibile ngoco basikumukile kuli ikeye. 2 Co banu boshe baje bakele na kuyanda na baje bakele na mikuli na baje bakele na kulinyenyeta balikungulwilile kuli ikeye, co wapwile ntwama yabo. Wakele na banalume ba kweta ku 400.
3 Kutundaho, Devidi watundileko na kuya ku Mizipa mu Mowabi. Co wakalekele mwene wa Mowabi ngwendi: “Njikulomba utabese batate na banana bakale nobe kweta noho hanjizibukila byanjilingila Njambi.” 4 Ngeci, Devidi wasezele bisemi bendi kuli mwene wa Mowabi, co bakele nendi simbu yoshe yakele Devidi mu cimpaka.
5 Mu kwita kwa simbu, kapolofweto Gadi walekele Devidi ngwendi: “Keti ukale mu cimpaka. Tundamo uye ku lifuti lya Juda.” Ngeci, Devidi waile mu shwata ya Helethi.
6 Saulu wazibile ngwabo Devidi na banalume bakele nendi banabamono. Ha simbu oyo Saulu watumamene mwisi ya muti wa tamariski mu Gibea ha mwela wa kulunduka oku nakwata likunga mu liboko, co bangamba bendi boshe bamuzengelekele. 7 Co Saulu walekele bangamba bendi baje bamuzengelekele ngwendi: “Tolilileni, eni Babenjamini! Kuma muna Jesi nendi amyana mahya mubaboshe, kwambateselela na mahya a miti ya bushuka bwa binyu ndi? Kuma mubaboshe amyangula kupwa bantwama ba maswalale 1,000 na bantwama ba maswalale 100 ndi? 8 Mubaboshe munanjitengulukila! Naumo wahi nanjilekele, munange wa kulikitila mwanalingile cikumiiyo na muna Jesi. Naumo wahi nanjizibila ngozi na kunjileka ngwendi munange nakokweya ngamba yange mangana anjitengulukile na kunjibandelela ngwe mwanalingila hano.”
9 Co Doegi wa Kaedomu uje ibanene cipangi ca kutwamenena bangamba ba Saulu wakumbulwile ngwendi: “Njinamwene muna Jesi aija ku Nobu kuli Ahimeleki muna Ahitubu. 10 Co Ahimeleki namwihwilileko kuli Yehova na kumwana byakulya. Namwanene na mukwale wa Goliati wa Kafilistiya.” 11 Ngeci, mwene washikile ngwendi banene kapilistu Ahimeleki muna Ahitubu na tupilistu boshe ba ku njibo ya ishe baje bakele mu Nobu. Co boshe bezile kuli mwene.
12 Saulu wendekele ngwendi: “Tolilila, obe muna Ahitubu!” Co Ahimeleki wamukumbulwile ngwendi: “Ewani shukulu.” 13 Saulu wamwihwile ngwendi: “Mwafwa bika unanjitengulukila, nobe na muna Jesi, omwo unamwana makende na mukwale na kumwihwilako kuli Njambi? Ali na kunjilwisa na kunjibandelela, ngwe mwanalingila hano.” 14 Co Ahimeleki wakumbulwile mwene ngwendi: “Iya hakati ka bangamba bobe boshe wapwa wa kulongwa ngwe Devidi? Wapwa ishomweno, obe mwene, co lalo wapwa ntwama wa baka-kukunyunga, co bamusingimika mu njibo yobe. 15 Kuma lelo lukelwo lwakulibanga kumwihwilako kuli Njambi ndi? Kunjasa kulinga byuma biunendeka! Mwene keti asinganyekele yange ngamba yendi byuma byabibi hamolika na bakunjibo ya tate boshe, mwafwa yange ngamba yobe nacimo cahi cinjinazibukile ha ñanda ei.”
16 Oloni mwene wendekele ngwendi: “Lelo utsa Ahimeleki, yobe na bakunjibo ya isho boshe.” 17 Co mwene walekele baka-kumunyunga baje bamuzengelekele ngwendi: “Tsiyeni tupilistu ba Yehova, mwafwa banalikwatasana na Devidi! Banazibukile ngwabo natewe, oloni kubanjilekele!” Oloni bangamba ba mwene kubashakele kutsiya tupilistu ba Yehova. 18 Ngeci, mwene walekele Doegi ngwendi: “Tsiya tupilistu!” Oho bene Doegi wa Kaedomu waile na kutsiya tupilistu. Ha litangwa olyo, watsiile banalume 85 baje bazalele efodi ya lineni. 19 Watsiile lalo na mukwale banu ba mu Nobu ije yapwile nganda ya tupilistu. Watsiile banalume na banakazi, banike na bimbututu, bingombe, bidonki* na bimanga na mukwale.
20 Nameme ngoco, umo wa bana ba Ahimeleki muna Ahitubu wa lizina lya Abiatha wobokele, co washatukile na kukaba Devidi. 21 Abiatha wakalekele Devidi ngwendi: “Saulu natsii tupilistu ba Yehova.” 22 Co Devidi walekele Abiatha ngwendi: “Njinazibukile lije litangwa ngwange Doegi wa Kaedomu kubanga akaleke Saulu, mwafwa kwakele. Yange bene njinatsiisa bakunjibo ya isho boshe. 23 Kala nange. Keti uzibe lyoba, mwafwa woshe atonda mwonyo* wobe, atonda mwonyo* wange. Njikunyungilila.”