CILONGESA 4

Bika Bitunatuhwisila Mbimbiliya ya Bisoneka bya Kaye Kakaha?

Banatuhwisa Mbimbiliya ya kulibanga ya Bisoneka bya Kujela bya Kaye Kakaha

Banu bali na kwilula Mbimbiliya ya Bisoneka bya Kujela bya Kaye Kakaha ku Congo (Kinshasa) — Ku Congo (Kinshasa)

Banatuhwisa Mbimbiliya ya Bisoneka bya Kujela bya Kaye Kakaha ku Rwanda — Ku Rwanda

Mbazubwila ya libulu lya kuzenga lya Symmachus imwesa lizina lya Njambi ku Myaso 69:31. Eli libulu linatumbama myaka ya kushangumukila ha 1600 kweta ku 1800

Ha myaka yaingi, Bakaleho ba Yehova banapangesa Bimbimbiliya bya kulisezaseza. Bimo banabipulinta na kubipangezela ku banu. Oloni mu kwita kwa simbu, twamwene ngwetu tunapande kutuhwisa Mbimbiliya yaiha ije ikwasa banu balilongese ‘mana a kuzibuka busunga’ mwafwa mukemwo mwashaka Njambi. (1 Timateo 2:3, 4) Ngeci mu 1950, twashangumukile kutuhwisa mitamba imo ya Mbimbiliya ya Bisoneka bya Kaye Kakaha. Eyi Mbimbiliya banainungulula mwamubwa mu bindaka bya kutubakana 180.

Twatondele Mbimbiliya yayasi kuzibisisa. Bindaka bikatenguluka mu kwita kwa simbu. Ngeci Bimbimbiliya byabingi bikapangesa majwi amakalu kuzibisisa. Co lalo baka-kutondesesa banawana mabulu a kusañulu a kuzenga aje ali na busunga bwa mu mabulu a kulibanga a mu bisona bya Cihebelu, mu Alamaiki na Cingiliki.

Twatondele Mbimbiliya ije ilumbununa mwamubwa lijwi lya Njambi. Baka-kunungulula Mbimbiliya banapande kunungulula busunga habwo bwa mu mabulu a kulibanga kwa kujeneka kutengululako byuma bimo. Oloni bungi bwa Bimbimbiliya bibali na kulipangesa banu banatundisamo lizina lya Yehova.

Twatondele Mbimbiliya ije isingimika Babenyayo. (2 Samwele 23:2) Mu mikanda ya kusañulu, lizina lya Yehova lya waniwilemo 7,000, ngwe mubanamwesa kwisi. Oloni baka-kunungulula Mbimbiliya kubanungulwile lizina lya Yehova. Ngeci, mu Mbimbiliya ya Bisoneka bya Kaye Kakaha banelwisa lizina lya Yehova haje halinapande kukala. (Myaso 83:18) Baje banungulwile eyi Mbimbiliya bapangele na nzili ha myaka yaingi, co yaibwa kuitanda mwafwa inamwesa biyongola bya Njambi. Nameme muli na Mbimbiliya ya Bisoneka bya Kaye Kakaha mu ndaka yeni nambe embwe, tumilomba ngwetu mulizilise kutanda Lijwi lya Yehova ha litangwa na litangwa.—Yoshwa 1:8; Myaso 1:2, 3.

Bika byatulingisile tumone ngwetu tunapande kukala na Mbimbiliya yaiha?
Munu uje ashaka kulilongesa cizango ca Njambi napande kulinga bika ha litangwa na litangwa?