Majwi a Maputukilo

Eli libulu lya Bisoneka Bikwasa Baka-Kristu limikwasa kuwana bwasi bisoneka bya mu Mbimbiliya na biñanda bije bimikwasa omwo muliwana na bukalu. Limikwasa lalo kuwana mizimbu ya mu Mbimbiliya imwasa kupangesa mu kutakamesa bakweni na kubakwasa kwangula byuma bije bizibisa Yehova kubwaha. Yeni ha mutwe wa ñanda imushaka. Ñanda na ñanda ili na bihula na mizimbu imo ya mu Mbimbiliya ibanendeka mu bwihi. (Taleni Cipalo ca “Mwakuwanena Biñanda Bili Omu mu Libulu.”) Muwana bisoneka bije biminangula na kumitakamesa. Muwana lalo binangulo bya mu Mbimbiliya bimwasa kupangesa mu kukwasa bakweni na kubatakamesa.

Mwakuwanena Biñanda Bili Omu mu Libulu

Nga mushaka kuwana ñanda imo, mwasa kupangesa cipalo ca kutondela nambe kutonda oyo ñanda ha mukana wa biñanda. Libulu lya Bisoneka Bikwasa Baka-Kristu banalitepe mu mitamba 7: Mutamba wa Bukalu, Futisi, Cikungulukilo, Buyoye bwa ha Litangwa na Litangwa, Naanga, Busamba Bwetu na Yehova na Bifwa Bitwakala Nabyo. Ei mitamba ili na bwingi bwa biñanda bimutonda. Yeni ha mutamba unapande na kwangula ñanda imushaka kutanda. Oloni nga muli na kupangesa likina, co kumuzibuka bwino mutamba uli na ñanda imutonda, mwasa kunyateka ha Byoshe na kutala biñanda bili mwisi mangana muwane ñanda imutonda. Ha ñanda na ñanda hali mitwe yaindondo ije ili mu bulombo bubanamesa. Mitwe imo mikana lika, ikwaboco bihula. Omwo mutanda bisoneka bili mu bulombo bubanamesa bije bili mwisi ya mutwe waundondo, singanyekeseseniho na kumona mubinalitombwela nowo mukana nambe mubikumbulwilamo cihula. Biñanda bimo banabitepesa mu mitamba yaindondo mangana munu awane bwasi biñanda byatonda. Mu biñanda bimo muli bisoneka bikwabo bibanabwezelelako bibanamwesa ngwabo “Taleni lalo.” Ebi bisoneka nabyo byendekako byuma bimo byendelela noyo ñanda. Mu biñanda byabingi kuli “Mwanja” nambe “Myanja ya mu Mbimbiliya ije yasa kumikwasa.” Kutundaho, kuli mukana nambe mikana ije ilumbununa mu bwihi simpi yakama ili ha cisoneka nambe bisoneka bibanamwesa. Ou mukana nambe mikana imikwasa kuzibisisa mwamubwa byuma bibanendeka mu cisoneka nambe bisoneka omwo mubitanda.

Omu mu libulu kubendekele bisoneka byoshe byendeka ha ñanda na ñanda imuwana. Nameme ngoco, limikwasa kuwana bisoneka binapande, co mwasa kupangesa lalo bikwata bikwabo mu kutondesesa nga mushaka kulilongesa byabingi. (Pro 2:1-6) Nga mushaka kuzibisisa mwamubwa cisoneka cimo nambe mumwasa kucipangesela, mwasa kupangesa Buka ya Lipatisiso ya Lipaki za Jehova nambe Watch Tower Publications Index. Pangeseni biñanda byabiha binatuhuka ololo bije bilumbununa oco cisoneka mangana mwendelele na munga.

Twakulahela ngwetu eli libuli lya Bisoneka Bikwasa Baka-Kristu limikwasa kuwana mana na kumikwasa kuzibisisa mwamubwa Bisoneka bya Kujela. Omwo mupangesa eli libulu, mulimwena na kukulahela bene ngweni “lijwi lya Njambi lyapwa lya kuyoya, co lyakala na nzili.”—Heb 4:12.