Vika Vivakulahela Vakaleho va Yehova?

“Tushaka kuziva viyongola vyove, omwo tuzivuka ngwetu kwoshe-ikwoshe vanu valinakwendeka nakulwisa mbunga eyi muje muuli.” (Vilinga 28:22) Ava vantwama va mu mbunga ya mu Loma ya mu likulukathzi lya myaka lyakulivanga vanene chakumwenaho chachivwa. Vashakele kulithzivila vavenya mutunwa twa vapositolo, kethi kutunda ku vanu veka, embwe.

Na matwangwa ano lalo, vanu vali nakwendeka vyuma vyavivi hali Vakaleho va Yehova. Ngechi kumwatha kutanekeya vuthunga hali vakevo nga mwihula vaka-ñole vavo. Tunavwahelela kumilumbunwina vyuma vimo vyakulema vitwakulahela.

Mbimbiliya, Yesu Kilisitu, na Njambi

Twakulahela ngwetu “Visoneka vyoshe Njambi wahwiminininemo ngechi vili na seo.” (2 Timateo 3:16) Nambe vanu vamo vamona ngwavo kethi tu vaka-Kilisitu va vuthunga, oloni vanu vachifwa echi vali nakumikwitha. Yetu Vakaleho twatava majwi wendekele kapositolo Petulu hali Yesu Kilisitu ngwendi: “Kutwasa kuwana kwovoka muli weka lalo embwe, omwo kukwesi lizina lyeka muno mu kaye lyanaana Njambi ku vanu litunapande kwovokelamo.”—Vilinga 4:12.

Yesu wendekele ngwendi wapwa “Muna Njambi,” cho wendekele lalo ngwendi ‘Tate ikeye wanjitumine.’ Ngechi Vakaleho va Yehova vakulahela ngwavo Njambi wapwa wakama kutuvakana Yesu. (Yowano 10:36; 6:57) Na Yesu vavenya wendekele ngwendi: “Tate wapwa wakama kutuvakana yange.” (Yowano 14:28; 8:28) Ngechi kutwakulahelele ngwetu Yesu wapwa hamo lika na Ishe ngwe omwo yasholola longethi ya Tulunga Vatatu. Oloni yetu twakulahela ngwetu Yesu vamutangele kuli Njambi, cho lalo wakala mwithi ya Njambi.—Kolose 1:15; 1 Kolinte 11:3.

Mundaka ya Mbunda, lithzina lya Njambi ikeye Yehova. Mbimbiliya yendeka ngwayo: “Yove likalyove wakala na lithzina Yehova, yove wapwa Wahelu Manene hathi hoshe.” (Myaso 83:18, NW) Kwetheka na majwi awa, Yesu watakamethele kwendeka ha lithzina lya Njambi, nakulongetha vaka-kumukavangeya valombe ngwavo: “Tatetu uli mwilu, valemese lizina lyove.” Cho vavenya walombele kuli Njambi ngwendi: “Njinasholola lizina lyove kuli vanu vaje vawanjanene.”—Mateo 6:9; Yowano 17:6.

Vakaleho va Yehova vakulahela ngwavo vanapande kupwa ngwe Yesu nakusholwela vanu lithzina lya Njambi na vyuma vyakalinga. Ngechi tukalithana ngwetu tu Vakaleho va Yehova mwafwa tukatembunwina Yesu, “mukaleo wa vushunga.” (Kujombolola 1:5; 3:14) Mukemwo muwendeka na mukanda wa Isaya 43:10 ku vanu vaje vemanenako Njambi, ngwawo: “Yeni munapu mu vakaleo vange, njakwangwile kupwa ngamba yange.”

Vumwene vwa Njambi

Yesu walongethele vaka-kumukavangeya valombe ngwavo, “Vumwene vwove vwije,” cho lalo wangwile ñanda ya Vumwene kupwa mutwe wa ñanda omwo wakele nakulongetha vanu. (Mateo 6:10; Luka 4:43) Vakaleho va Yehova vakulahela ngwavo ovu Vumwene vwapwa fulumende hayo yamwilu. Vakulahela ngwavo eyi fulumende yikayula hathi hoshe, cho lalo Yesu Kilisitu ikeye vangula kupwa Mwene uje kutwatha kumona na mesho. Mbimbiliya yendeka ngwayo: “Vumwene vwendi vukakala ha chithsili chendi.” Cho lalo ngwayo: “Vumwene vwendi na kwoloka kuvikahu.”—Isaya 9:6, 7, NW.

Yesu Kilisitu kakapu likalyendi mwene mu fulumende ya Njambi embwe. Oloni akayula na vakwavo vimyene mwilu. Kapositolo Paulu wathonekele ngwendi: “Nga tutwalao na lukakateya, co tukashwana lalo amo nendi.” (2 Timateo 2:12) Mbimbiliya yasholola ngwayo vanu vaje vakathanguka nakukayula na Kilisitu mwilu vapwa vavandondo, vapwa ‘144,000 vaje vavakulile kutunda akati ka miyati ya vanu voshe.’—Kujombolola 14:1, 3.

Fulumende yoshe yakala na vanu vayayula. Ngechi Vakaleho va Yehova vakulahela ngwavo kwakala lalo maundthzi a vanu veka vaje vakayoya myaka yoshe. Kutwala muje, kano kaye vakakatengulula kupwa Palandaisi, cho kakashula vanu vaje vavukayula Vumwene vwa Njambi, vaje lalo vakononoka ku chiyulo cha Kilisitu na vaje akayula navo. Vakaleho va Yehova vakulahela ngwavo Njambi kakanyongetha kano kaye. Cho vakulahela lalo ngwavo eli likulahetho lya mu Mbimbiliya likashulithiwa, lyakwendeka ngwavo: “Vaka-vushunga vakakala mu lifuti, co vakayoyelamo ku myaka yoshe.”—Myaso 37:29; 104:5.

Vumwene vwa Njambi vukayija vati? Kutala vuvandamena noho havakononokela vanu voshe ku fulumende ya Njambi ndi? Embwe! Mbimbiliya yasholola vwino ngwayo Njambi akalikika ha viyulo vya mafuti nakunena Vumwene vwendi. Yendeka ngwayo: ‘Njambi wa mwilu akaaka Vumwene vuje kuvukahu . . . co vukanyongesa vumwene vwoshe, oloni vukevwo vukakala myaka yoshe.’—Ndanyele 2:44.

Vumwene vwa Njambi vukayija mwaka uka? Vakaleho va Yehova vakulahela ngwavo ololo vwija, mwafwa vali nakumona muvuli nakushulithiwa vupolofweto vwa Mbimbiliya matangwa ano. Tuli nakumilomba muthinganyeke ha vupolofweto vuje vwendeka ha vyuma vili nakusholoka mu “matangwa akukotoka” a tumbamethi ya myaka yino. Vavuthoneka ku Mateo 24:3-14; na Luka 21:7-13, 25-31; na 2 Timateo 3:1-5.

Yetu Vakaleho ‘twazema Yehova Njambi yetu na mbunge yetu yoshe, na mwonyo wetu woshe, na mana etu oshe, na nzili yetu yoshe, co twazema lalo vakwetu ngwe omwo twalizema yetu vavenya.’ Ngechi kutwalyangunwine ha miyati, na vikova, na yoyethi yetu, embwe. (Mako 12:30, 31) Vanu vatutanekeyela ha chithzemo chitukasholwela vakwetu vaka-Kilisitu va ku mafuti oshe. (Yowano 13:35; 1 Yowano 3:10-12) Kutwethi kukovela mu viñanda vya chiyulo cha lifuti. Twalifwa na vandongethi va Yesu vakulivanga vaje Yesu wendekele vyavo ngwendi: “Ngwe omo yange kesi nji muka-kaye, vakevo kesi vaka-kaye.” (Yowano 17:16) Twakulahela ngwetu nga munu nalyangununa ku kaye kano, cho napande kujenjuka lalo ku vilinga vyavivi, vyakufwa ngwe makuli, vwithzi, vupangala, vukwithzi, vundei, nakujenjuka lalo ku maninga, na kukulemetha tumponya na vyuma vyeka vivavindika mu Mbimbiliya.—1 Kolinte 6:9-11; Efeso 5:3-5; Vilinga 15:28, 29.

Vyuma Vitwalavelela Kulutwe

Vakaleho va Yehova vakulahela ngwavo kuyoya tuli nacho mu thimbu yino, kethi chikecho chakalako lika embwe. Twakulahela ngwetu Yehova watumine Kilisitu kwija hathi nakwitila maninga endi kupwa ndando ya kupatula mangana vanu vapwe vakulongwa kuli Njambi, nakukatambula kuyoya kwa myaka yoshe mu kaye kakaha. Kapositolo ka Yesu wendekele ngwendi: “A ñombelo ya kutsa kwendi, ololo vanatupwisa vaka-vushunga ku mesho a Njambi.” (Loma 5:9; Mateo 20:28) Vakaleho va Yehova vakakandelela manene Njambi na Munendi Yesu ha ndando ya kupatula yije yalingitha vanu vakayoye kulutwe.

Vakaleho va Yehova vakulahela manene ngwavo vanu vakayoya kulutwe, mwafwa kukakala kuthanguka kwa vathsi mu Vumwene vwa Njambi. Twakulahela muje muyalongetha Mbimbiliya ngwayo, nga munu nathsi kuyoya kwendi kunahu, cho “matumbe endi oshe ahwa a litangwa lije atsa.” (Myaso 146:3, 4; Ezekiyele 18:4; Muka-kwambulula 9:5) Vathsi vakayoya lalo omwo Njambi akavanuka nakuvathangula.—Yowano 5:28, 29.

Vakaleho va Yehova vakulahela lalo ngwavo vanu vaje vali nakuyoya mu thimbu yino vakovoka omwo Vumwene vwa Njambi vukanyongetha vifulumende viliko mu thimbu yino. Vakaleho va Yehova vakayoya myaka yoshe mu lifuti lya kujela ngwe muje Nowa na nanga yendi vovokele Livathzi. (Mateo 24:36-39; 2 Petulu 3:5-7, 13) Oloni tunathzivuka ngwetu munu napande kulinga vyuma vyashaka Yehova athina akovoke. Mwafwa Mbimbiliya yendeka ngwayo: ‘Kaye kali nakwita, oloni vaje valinga cizango ca Njambi vakayoya myaka yoshe.’—1 Yowano 2:17; Myaso 37:11; Kujombolola 7:9, 13-15; 21:1-5.

Kutwatha kulumbununa vyuma vyoshe vivakulahela Vakaleho va Yehova mu tilakiti yino, oloni tumilomba mutonde mithzimbu yikwavo.

Vithoneka vyoshe vinatundu mu Mbimbiliya ya Livulu lya Shukulu Kalunga, oloni vije vili na NW vinatundu mu Mbimbiliya ya New World Translation of the Holy Scriptures—With References.

[Mazu akulumbununa muvwimbimbi uli halifwo 4]

Tukalithana ngwetu tu Vakaleho va Yehova mwafwa tukatembunwina Yesu