Bika Bibakulahela Bakaleho ba Yehova?

Ha kupwa Bakaleho ba Yehova, tukeseka mwoshe mutukasela kukabangeya binangulo bya Yesu na kukabangeya mwanja wa tupositolo. Ei ñanda inalumbununa mu bwihi bitwakulahela.

1. Njambi. Tukalemesa Njambi umolika wa busunga uje wapwa Muka-nzili Yoshe na Ishamatanga. Co lizina lyendi ikeye Yehova. (Myaso 83:18; Kujombolola 4:11) Ikeye Njambi ya Abilahama, Mosesa na Yesu.—Kutuuka 3:6; 32:11; Yowano 20:17.

2. Mbimbiliya. Twamona Mbimbiliya kupwa muzimbu wahwimininine Njambi na kuwana banu. (Yowano 17:17; 2 Timateo 3:16) Bitwakulahela byemana ha mikanda yoshe ya kupwa 66, ije ili mu “Testamenti ya Laja” na mu “Testamenti Yaiha.” Profesa Jason D. BeDuhn walumbunwine mwamubwa ei ñanda mwendekele ngwendi “bibakulahela Bakaleho ba Yehova na bilinga byabo byemana ha byuma biyendeka Mbimbiliya, keti ha biñanda bya kulisinganyekela.”a

   Nameme twakulahela byoshe biyendeka Mbimbiliya, kutwapwile ba kuminina bimbunge. Tuzibuka ngwetu biñanda bimo bya mu Mbimbiliya byapwa bimweso na bimona, co munu napande kutondesesa mangana abizibisise.—Kujombolola 1:1.

3. Yesu. Tukakabangeya bilongesa bya Yesu na mwanja wendi, co twamumona kupwa Muna Njambi na Mwobole wetu. (Mateo 20:28; Vilinga 5:31) Ngeci, twapwa baka-Kristu. (Vilinga 11:26) Oloni twalilongesa mu Mbimbiliya ngwetu Yesu kapwile Njambi Muka-nzili Yoshe, co lalo Bisoneka kubimwesa ngwabyo kwakala binjambi batatu.—Yowano 14:28.

4. Bumwene bwa Njambi. Bwapwa fulumende mpundu ije ili mwilu. Kubwakele mu bimbunge bya baka-Kristu embwe. Bukainga bifulumende bya banu na kulingisa cizango ca Njambi cilingiwe hano hasi. (Ndanyele 2:44; Mateo 6:9, 10) Ololo bulinga ebi byuma mwafwa bupolofweto bwa mu Mbimbiliya bumwesa ngwabwo tuli na kuyoya mu “matangwa a kukotoka.”—2 Timateo 3:1-5; Mateo 24:3-14.

   Yesu ikeye Mwene wa Bumwene bwa Njambi. Washangumukile kuyula mu 1914.—Kujombolola 11:15.

5. Kwoboka. Kwoboka kwija kwitila mu ndando ya kupatula ya Yesu. (Mateo 20:28; Vilinga 4:12) Nga munu ashaka kuwana bukwasi ku mulambu wa Yesu, napande kumwesa likulahelo muli ikeye na kutengulula futisi yendi na kumumbwitika. (Mateo 28:19, 20; Yowano 3:16; Vilinga 3:19, 20) Bipangi bya munu bimwesa indi ali na likulahelo. (Yakomba 2:24, 26) Oloni kwoboka kukwasa kulizila lika, kwija mu “kutetela kwa Njambi.”—Ngalatiya 2:16, 21.

6. Lilu. Yehova Njambi, Yesu Kristu na tungelo ba kulongwa bakala mwilu.b (Myaso 103:19-21; Vilinga 7:55) Banu babandondo lika ba kupwa 144,000 bakabasangula mangana bakayoye mwilu, co bakayula hamo na Yesu mu Bumwene bwa Njambi.—Ndanyele 7:27; 2 Timateo 2:12; Kujombolola 5:9, 10; 14:1, 3.



7. Lifuti-libu. Njambi watangele lifuti-libu mangana banu bayoyeho. (Myaso 104:5; 115:16; Muka-kwambulula 1:4) Ngeci, Njambi akabezikisa banu ba kulongwa na kubalingisa bapwe ba kulumbunuka, co bakayoya myaka yoshe mu paradaisi hano hasi.—Myaso 37:11, 34.

8. Bubi na tuyando. Byashangumukile omwo umo wa tungelo ba Njambi wamutengulukilile. (Yowano 8:44) Ou kangelo ibakutumbwile ngwabo “Satana” na “Liyabolo” munima ya kutengulukila Njambi, wakokweyeye banu bakulibanga nabo batengulukile Njambi. Co kulinga ngoco kunanenela bana babo bukalu bwakama. (Kushangumuka 3:1-6; Loma 5:12) Ha kulinga ngwabo ñanda yakatwile Satana ihwe, Njambi necelela bubi na tuyando ha simbu ino, oloni akabimanesa kulutwe.

9. Kutsa. Banu mubakatsi, bakecela kuyoya. (Myaso 146:4; Muka-kwambulula 9:5, 10) Kubesi kuyanda mu litende lya tuhya.

   Njambi akasangula banu babangi-bangi baje banatsi. (Vilinga 24:15) Oloni baje bakabyana kulilongesa bingila bya Njambi bakabanyongesa, co kubakasanguka lalo.—Kujombolola 20:14, 15.



10. Naanga. Tukakabangeya biyongola bya Njambi byakulibanga. Wayongwele ngwendi munalume umo na munakazi umo balyambate, co basa lika kulitepa nga umo wabo nalingi bupangala. (Mateo 19:4-9) Twakulahela ngwetu binangulo bya mu Mbimbiliya bikwasa binaanga bikale mwamubwa.—Efeso 5:22–6:1.

11. Kulemesa. Kutwesi kulemesa cilindakano nambe tumponya. (Kwituluka mu Mashiko 4:15-19; 1 Yowano 5:21) Kulemesa kwetu kunambateselela byuma binatako:

    • Kulombela kuli Njambi.—Filipu 4:6.

    • Kutanda na kulilongesa Mbimbiliya.—Myaso 1:1-3.

    • Kusinganyekesesa ha byuma bitutanda mu Mbimbiliya.—Myaso 77:12.

    • Kukunguluka hamo mu kulombela, kulilongesa Mbimbiliya, kwimba myaso, kulinga byuma bimwesa likulahelo lyetu, na kutakamesa bakwetu Bakaleho na banu beka.—Kolose 3:16; Vahevelu 10:23-25.

    • Kwambulula ‘muzimbu waubwa wa Bumwene.’—Mateo 24:14.

    • Kukwasa baje bali mu bukalu.—Yakomba 2:14-17.

    • Kutunga na kunyunga Binjibo bya Bumwene na mitungo ikwabo itukapangesa mu cipangi ca mu kaye koshe ca kulongesa Mbimbiliya.—Myaso 127:1.

    • Kukwasa baje banaliwana na bukalu bwa cishitukila.—Vilinga 11:27-30.

    

12. Munga yetu. Umo na umo wetu ali mu cikungulukilo cije cicili na kunyunga cibunga ca bakulunu. Oloni bakulunu kubapwile bantwama, co lalo kubesi kutambula fweto. (Mateo 10:8; 23:8) Kutwesi kufweta cabulikumi, nambe kufwetesa banu bakaija ku biwano. (2 Kolinte 9:7) Banu bakakundwiya bipangi byetu ha kwana milambu kwa kujeneka kulitumbula.

    Cibunga ca Kutwamenena, cije capwa cibunga cacindondo ca bandolome baje bapwa baka-Kristu ba kukola ku sipilitu baje bakapangela ku cikota cetu cikeco cikatwamenena Bakaleho ba Yehova mu kaye koshe.—Mateo 24:45.

13. Likwatasano lyetu. Tubaboshe twakulahela byuma bya kulifwa. (1 Kolinte 1:10) Co lalo tukeseka mwoshe mutukasela kujeneka kukala na kangu ka muyati, ndaka, lifuti, mubala wa cikonde ca munu nambe byuma byali nabyo. (Vilinga 10:34, 35; Yakomba 2:4) Nameme ngoco, munu na munu nazituka kulyangwila byakulinga. Mukaleho woshe akangula byakulinga kwesekesa na citakutaku cendi canalongesa na Mbimbiliya.—Loma 14:1-4; Vahevelu 5:14.

14. Futisi yetu. Tukeseka mwoshe mutukasela kuzema bakwetu kutundilila kwisi ya mbunge. (Yowano 13:34, 35) Tukajenjuka ku bilinga bije kubizibisa Njambi kubwaha, kwambateselela na kutwaka maninga. (Vilinga 15:28, 29; Ngalatiya 5:19-21) Twashaka kukala mu kwoloka na bakwetu, co kutwesi kulikobelesa mu kulwa binzita. (Mateo 5:9; Isaya 2:4) Tukasingimika fulumende ya mu lifuti mutuli na kwononoka mashiko ayo aje kuwalilwisi na mashiko a Njambi.—Mateo 22:21; Vilinga 5:29.

15. Mutukayoyela na bakwetu. Yesu wendekele ngwendi: “Unapande kuzema mukweni ngwe muwalizema yobe babenya.” Wendekele lalo ngwendi baka-Kristu ‘kubapwile baka-kaye.’ (Mateo 22:39; Yowano 17:16) Ngeci, tukeseka mwoshe mutukasela kupanga ‘bipangi byabibwa ku banu boshe,’ oloni kutwesi kulikobelesa mu biñanda bya bupolitiki nambe kulikwatasana na bulombelo bweka. (Ngalatiya 6:10; 2 Kolinte 6:14) Nameme ngoco, tukasingimika bibakangula bakwetu mu biñanda ebi.—Loma 14:12.

Nga muli na bihula bikwabo kutalesa ku byuma bibakulahela Bakaleho ba Yehova, mwasa kulitandela byabingi ha webusaiti yetu, kusonekela umo wa minango yetu, kuya ku biwano byetu ku Njibo ya Bumwene ili kuyehi neni, nambe kusimutwiya na umo wa Bakaleho ba Yehova kumwakala.