CILONGESA 43
MWASO 41 Ziba Lilombelo Lyange
Lombeleleniko Bakweni
‘Lilombeleleni umo na mukwabo . . . Kulambelela kwa munu wa kusungama kuli na nzili.’—JEMS 5:16.
BILI MUNO MU CILONGESA
Mwafa bika kwapwa kwa seho kulombelela bakwetu, co twasa kulombelela bati bakwetu?
1. Twasa kuzibuka bati ngwetu malombelo etu apwa a seho kuli Yehova?
LILOMBELO lyapwa bwana bwabubwa manene bwanatwana Yehova. Acisinganyekeni: Yehova nana tungelo bipangi bya kuliseza-seza. (Samu 91:11) Co lalo nana munendi bipangi bya seho manene. (Mate 28:18) Nameme ngoco, kuma kuli umo yanana cipangi ca kutolilila ku malombelo etu ndi? Embwe. Yehova “Muka-kuziba lilombelo” ikeye akatolilila ku malombelo etu.—Samu 65:2.
2. Kapositolo Paulu natwakela mwanja muka kutalesa kukulombelela bakwetu?
2 Twazituka kuleka Yehova mwoshe mutuli na kulizibila. Nameme ngoco, tunapande kulombelelako bakwetu. Ebi bikebyo byalingile kapositolo Paulu. Cakumwenako, wasonekelele baka-Kristu ba mu cikungulukilo ca Efeso ngwendi: “Njinatwalelelaho kumyaka mu malombelo ange.” (Efeso 1:16) Co lalo wakele na kulombelela umo na umo wa bandolome bendi. Cakumwenako, walekele Timothi ngwendi: “Njili na kukandelela kuli Njambi. . . Butsiki na mutanya, kunjalikelele kukwanuka mu malombelo ange a kulambelela.” (2 Timo 1:3) Paulu nendi wakele na kuliwana na bukalu buje bwakele na kulomba Yehova ngwendi amukwase. (2 Kori 11:23; 12:7, 8) Nameme ngoco, wakele na kuwanako simbu ya kulombelela bakwabo.
3. Mwafwa bika tunasa kwibala kulombelela bakwetu?
3 Simbu imo tunasa kwibala kulombelela bakwetu. Mwafwa bika? Ndokazi Sabrinaa wendekele cuma cimo cikatulingisa twibale kulombelela bakwetu. Wendekele ngwendi: “Bwingi bwetu tukazezama manene ano matangwa. Ngeci tunasa kwaka lika mbunge ku bukalu bwetu na kulomba Yehova ha byuma bitutonda lika yetu.” Kuma neni bisimbu bimo mukalingi ngoco ndi? Nga mukemwo, co cino cilongesa cimikwasa manene. Muno mu cilongesa tusimutwiya bikwapwila kwa seho kulombelela bakwetu, nomu mutwasa kulingila ngoco.
MWAFWA BIKA TUNAPANDE KULOMBELELA BAKWETU?
4-5. Kulombelela bakwetu kuli bati na “nzili”? (Jemusi 5:16)
4 Kulombelela bakwetu “kuli na nzili.” (Tandeni Jemusi 5:16.) Kuma kulombelela bakwetu kwasa kutengulula byuma bili na kulingiwa mu kuyoya kwabo ndi? Eyo. Yesu mwazibukile ngwendi kapositolo Pita amubyana, wamulekele ngwendi: “Njinalambelela Njambi mangana likulahelo lyobe keti lizeye.” (Luka 22:32) Paulu nendi wazibukile ngwendi kulombelela bakwabo kwasa kutengulula byuma bili na kulingiwa mu kuyoya kwabo. Mubamukutilile mu Loma kwa kujeneka mulonga, wasonekelele Filimoni ngwendi: “Njakulahela ngwange kwitila mu malombelo eni njiluka lalo kuli yeni.” (Film 22) Ebi bikebyo bene byalingiwile. Mukwetile lika simbu yaindondo, Paulu bamutundisile mu kamenga, co wasele lalo kwambulula.
5 Oku kukulumbununa ngwabo kwitila mu malombelo etu twasa kusindiya Yehova alinge byuma byoshe-byoshe bitutonda. Yehova akaka mbunge ku byuma bibakalombo bangamba bendi. Co bisimbu bimo akangula kulingila bangamba bendi byuma bibanamulombo. Kuzibuka ngoco kwasa kutulingisa tulombele kuli Yehova kutundilila kwisi ya mbunge na kukulahela ngwetu alinga byuma binapande.—Samu 37:5; taleni 2 Korinte 1:11.
6. Kulombelela bakwetu kutulingisa tulizibe bati hali bakebo? (1 Pita 3:8)
6 Kulombelela bakwetu kutukwasa tukale na “mema ku mbunge.” (Tandeni 1 Pita 3:8.) Munu uje wakala na mema ku mbunge akananguka tuyando twa bakwabo, co akatondo kubakwasa. (Maki 1:40, 41) Ndolome Michael uje wapwa mukulunu mu cikungulukilo wendekele ngwendi: “Munjikalombelela bakwetu njikazibisisa mwamubwa bukalu bubali na kuliwana nabwo, co oku kukanjilingisa njibazeme manene. Njikalizibi kushwena manene kuyehi nabo nameme kubazibuka ngoco.” Ndolome Richard uje wapwa mukulunu mu cikungulukilo wendekele bubwa bukwabo bukatundu mu kulombelela bakwetu. Wendekele ngwendi: “Kulombelela bakwetu kukatushongangeya tubakwase. Nga tulingako bimo mu kukwasa munu itunakala na kulombelela, co kunapu lika ngwe tuli na kukwasa mu kukumbulula lilombelo lyetu.”
7. Kulombelela bakwetu kutukwasa bati tujeneke kwaka manene mbunge ku bukalu bwetu? (Filipi 2:3, 4) (Taleni na bikupulo.)
7 Kulombelela bakwetu kutukwasa tumone bukalu bwetu mu ngila inapande. (Tandeni Filipi 2:3, 4.) Tubaboshe tukaliwana na bukalu mwafwa tuli na kuyoya mu kaye kaje kaali na kuyula Satana Liyabolo. (1 Iwa 5:19; Kujo 12:12) Nga tulombelela bakwetu kushwa kumo, co twanuka ngwetu ‘tuyando tutuli na kumona tuketwo tuyando twa kulifwa tubali na kuliwana natwo bandolome betu boshe.’ (1 Pita 5:9) Ndokazi Katherine uje wapwa painiya, wendekele ngwendi: “Kulombelela bakwetu kukanjanukisa ngwange nabo bakaliwana na bukalu. Kuzibuka ngoco, kukanjikwasa njijeneke kwaka manene mbunge ku bukalu bwange.”
Kulombelela bakwetu kutukwasa tumone bukalu bwetu mu ngila inapande (Taleni paragirafu 7)d
BATONDA MALOMBELO ETU
8. Beya batwasa kulombelela?
8 Beya batwasa kulombelela? Twasa kulombelela bibunga bya banu. Cakumwenako, twasa kulombelela baje bali na kubinja na banike babali na kushendumuna na kusindiya kulinga byuma byabibi ku sikola nambe baje bali na kuyanda mwafwa ya bukulukazi. Bandolome na bandokazi babangi bali na kubalwisa kuli baka-naanga yabo nambe baka-fulumende. (Mate 10:18, 36; Bili 12:5) Bandolome bamo bakatewe ha binjibo byabo mwafwa ya lwozi luje lukaija mwafwa ya bupolitiki. Bamo bali na kuyanda mwafwa ya bukalu bwakulizila. Hamo kutuzibuka aba bandolome na bandokazi, oloni nga tubalombelela tumwesa ngwetu tuli na kwononoka lishiko lya Yesu lya kwendeka ngwalyo “lizemeni umo na mukwabo.”—Iwano 13:34.
9. Mwafwa bika tunapande kulombelela baje bali na kutwamenena mu munga ya Yehova hamolika na banakazi babo?
9 Twasa kulombelela lalo baje bali na kutwamenena mu munga ya Yehova. Aba banambateselela ba mu Cibunga ca Kutwamenena na bakwasi babo, ba mu Komiti ya Munango, bandolome baje bali na kutwamena madipatimenti a ha munango, tunyungi ba kuzenguluka, bakulunu ba cikungulukilo na bangamba ba cikungulukilo. Aba bandolome nabo bali na kuliwana na bukalu, oloni bali na kweseka mwoshe mubasela mangana batukwase. (2 Kori 12:15) Cakumwenako, ndolome Mark uje wapwa kanyungi wa kuzenguluka, wendekele ngwendi: “Kukanjikaluwila kukala kulako na bisemi bange baje banakulubala. Boshe babali bali na kubinja. Nameme bali na kubanyunga kuli ndokazi yange na munalume wendi, njikalizibi manene kubabala ku mbunge mwafwa kunjasa kubakwasa mu kushula.” Kutwasa kuzibuka bukalu bwoshe bubali na kuliwana nabwo aba bandolome baje bali na kupanga na nzili, oloni twasa kubalombelela. (1 Tesa 5:12, 13) Twasa kulombelela lalo na banakazi babo mwafwa bakapangela hamo na banalume babo mangana banalume babo batwaleleho kupangela cikungulukilo.
10-11. Kuma malombelo a kulombelela bandolome na bandokazi betu boshe akazibisa Yehova kubwaha ku mbunge ndi? Lumbununeni.
10 Ngwe mutunasimutwiya, kakangi tukalombelela bibunga bya bandolome na bandokazi. Cakumwenako, nga kutuzibuka muka-Kristu uje ali mu bukalu, twasa kulomba Yehova akwase baka-Kristu baje bali mu tumenga nambe azembeleke baje banatsisa banu babazema. Ndolome Donald uje wapwa mukulunu mu cikungulukilo wendekele ngwendi: “Tuli na bandolome na bandokazi babangi baje bali na kuliwana na bukalu, ngeci bisimbu bimo tukalombo Yehova akwase boshe baje bali na kuliwana na tuyando.”
11 Kuma malombelo a cifweci akazibisa Yehova kubwaha ndi? Eyo. Kutuzibuka mpundu bukalu bwoshe bubali na kuliwana nabwo bakwetu baka-Kristu. Ngeci kunapande kulomba Yehova akwase bandolome na bandokazi betu boshe. (Iwano 17:20; Efeso 6:18) Awa malombelo anapu bukaleho buje bumwesa ngwabwo ‘twazema bandolome betu boshe.’—1 Pita 2:17.
NGA MULI NA KULOMBELELAKO MUNU IMUZIBUKA
12. Kunanguka bukalu bubali na kuliwana nabwo bakwetu baka-Kristu kutulingisa bati tutumbule bukalu bubali na kuliwana nabwo?
12 Nangukeni bukalu bubali na kuliwana nabwo bandolome na bandokazi beni. Kutubakana kulombelela bandolome na bandokazi beni ha kupwa lika cibunga, kwapwa kwa seho kulombelela umo na umo wabo na kumutumbula ha lizina. Kuma kuli umo mu cikungulukilo ceni ali na kulifwita na mushongo uje kuwesi kwola bwasi ndi? Kuma mu cikungulukilo ceni muli mwanike umo uje nazeye mwafwa bakwabo ku sikola bakamusindiya kulinga byuma byabibi ndi? Kuma kuli cisemi uje ali na kuliwana na bukalu kulela munendi likalyendi na ‘kumunangula na binangulo bya Yehova’ ndi? (Efeso 6:4) Kuzibuka bukalu bubali na kuliwana nabwo bandolome na bandokazi beni, kumilingisa mubazeme manene na kubazibila ngozi, co oku kumishongangeya mubalombelele.b—Loma 12:15.
13. Twasa kulombelela bati baje kanda tumoneho?
13 Lombeleleni bakweni ha kubatumbula ha mazina. Twasa kulinga ngoco nameme ku banu baje kanda tumoneho. Cakumwenako, singanyekeseseni ha bandolome na bandokazi baje bali mu tumenga mu mafuti a kufwa ngwe Crimea, Eritrea, Russia, na Singapore. Mwasa kuwana mazina a bandolome na bandokazi baje bali mu tumenga ha jw.org.c Ndolome Brian uje wapwa kanyungi wa kuzenguluka wendekele ngwendi: “Njananguka ngwange kusoneka lizina lya mukwetu muka-Kristu uje ali mu kamenga na kulyendeka mu kutambeka, kukanjikwasa njanuke uje munu mu malombelo ange.”
14-15. Twasa kulombelela bati bandolome na bandokazi betu ha bukalu mpundu bubali na kuliwana nabwo?
14 Tumbuleni byuma bimutonda ngweni bilingiwe. Michael itunabanga kwendeka, wendekele ngwendi: “Munjikatanda mizimbu ya bandolome na bandokazi baje bali mu tumenga ha jw.org, njikeseka kusinganyekesesa munjinesi kulizibila ngwe yange njaliwana na bukalu bubanaliwana nabwo. Njinesi kulishoshomwena manene hali munakazi wange na kulinga mwoshe munjasela mangana awane byuma byatonda. Kusinganyeka mu ngila ei kukanjikwasa njiwane bya kwendeka omwo njilombelela bandolome bali mu tumenga baje banambata.”—Hebe 13:3, ftn.
15 Nga tusinganyekesesa ha buyoye bwa ha litangwa na litangwa bwa bandolome na bandokazi betu baje bali mu tumenga, co tuwana byuma bikwabo bitwasa kwendeka mu malombelo etu omwo tubalombelela. Cakumwenako, twasa kulombelela baka-kunyunga tumenga bazibile ngozi bandolome betu na kulombelela baje bali na bitwamo byakama batabese bandolome betu kulemesa Yehova mu kushubuluka. (1 Timo 2:1, 2) Twasa kulombela ngwetu mwanja waubwa wa bandolome na bandokazi ba kulongwa baje bali mu tumenga ushongangeye bandolome na bandokazi mu bikungulukilo bibatunda. (1 Pita 2:12) Nambe kulomba ngwetu baje kubapwile Bakaleho bamone bifwa byabibwa bya ndolome nambe ndokazi uje ali mu kamenga mangana base kutambula muzimbu waubwa. Co twasa kulinga cuma ca kulifwa omwo tulombelela bandolome na bandokazi baje bali na kuliwana na bukalu bweka. Nga tunanguka bukalu bubali na kuliwana nabwo bandolome na bandokazi na kutumbula mazina abo na bukalu bubali na kuliwana nabwo mu malombelo etu, co tumwesa ngwetu ‘cizemo cetu cinama manene kuli umo na mukwabo.’—1 Tesa 3:12.
KUMONA MALOMBELO ETU MU NGILA INAPANDE
16. Twasa kumona bati malombelo etu mu ngila inapande? (Mateu 6:8)
16 Ngwe mutunamwena, kulombelela bakwetu kwasa kutengulula byuma bili na kulingiwa mu kuyoya kwabo. Nameme ngoco, tunapande kumona malombelo etu mu ngila inapande. Omwo tulombela tunapande kwanuka ngwetu kutwesi na kuleka Yehova byuma bije kazibuka. Co lalo kutwapandele kumuleka byakulinga, Yehova azibuka mwamubwa byuma bibatonda bangamba bendi nameme bakebo kubabizibuka. (Tandeni Mateu 6:8.) Mwafwa bika tunapande kulombelela bakwetu? Kubwezelela ku byuma bitunasimutwiya muno mu cilongesa, kulombelela bakwetu yapwa lalo ngila itukamweselamo ngwetu twabaka mbunge. Cizemo cikatushongangeya tulombelele bakwetu. Co lalo Yehova akazibi kubwaha mwakamono bangamba bendi bamutembwinina omwo balimwesa cizemo.
17-18. Endekeni cakumwenako cije cimwesa mutwasa kulombelela bakwetu?
17 Nameme nga malombelo etu simbu imo kuwatengulula byuma bilingiwa mu kuyoya kwa bakwetu, akamwesa ngwawo twazema bandolome na bandokazi betu, co Yehova akawatolilila. Tucisimutwiyeni hali eci cakumwenako: Acisinganyekeni ngweni, mu naanga muli banike babali, mukwenje na mumbanda. Co uje wa mukwenje abinja, ngeci mwanike wa mumbanda alomba baishe ngwendi: “Tate kwaseni ndolome yange. Ali na kubinja manene!” Ishe wazema manene munendi wa mukwenje, co nabwahesa laja ngila mwakumukwasela. Nameme ngoco abwahelela manene mwananguka ngwendi munendi wa mumbanda wazema manene ndolome yendi, co atonda ngwendi akanguke.
18 Mu ngila imolika, Yehova ali na kutushongangeya ngwendi tulyake mbunge umo na mukwabo na kulilombelela umo na mukwabo. Nga tulinga ngoco, co tumwesa ngwetu kutwakele mbunge ku byuma bitutonda lika yetu, oloni twazema manene bandolome na bandokazi betu, co Yehova amona byuma bituli na kulinga. (2 Tesa 1:3; Hebe 6:10) Ngwe mutunasimutwiya, simbu imo malombelo akakwasa mu kutengulula byuma byali na kuliwana nabyo munu, ngeci tulingeni mwoshe mutwasela kulilombelela umo na mukwabo.
MWASO 101 Tulikwatasaneni na Kupangela Hamolika
a Mazina amo banawatengulula.
b Kengeni vidio ya mutwe wa Takeshi Shimizu: Jehovah Is the “Hearer of Prayer.” ha jw.org
c Nga mushaka kuwana mazina a bandolome na bandokazi baje bali mu tumenga, co nyatekeni ha mutamba wa kutondela ha jw.org na kusoneka ngweni “Jehovah’s Witnesses Imprisoned for Their Faith—By Location.”
d KULUMBUNUNA CIKUPULO : Bandolome na bandokazi baje bali na kuliwana na bukalu bali na kulombelela bakwabo.