Bulombelo Bunalikobelesa mu Nzita Ili mu Ukraine—Bika Biyendeka Mbimbiliya?

Zibeni byuma binatako bije bimwesa bantwama bamo ba bulombelo ba kutsimana mubanalikobelesela mu nzita ili mu Ukraine:

• “Patriarch Kirill uje wapwa ntwama wa ceci ya Orthodox mu Russia kapayele lifuti lya Russia ha kulwisa lifuti lya Ukraine . . . . Ceci yendi inatwalelelaho kushandola biñanda bya makuli kutalesa ku lifuti lya Ukraine, co Putin ali na kupangesa ebi biñanda mu kwimanena ei nzita.”—Lipapelo lya mizimbu lya EUobserver, March 7, 2022.

• “Patriarch Kirill . . . nemanena nzita ili mukati ka lifuti lya Russia na Ukraine ngwendi inapu ngila imo ya kulwisilamo bubi.”—AP News, March 8, 2022.

• “Lyamande, ntwama wa ceci ya Orthodox mu Ukraine, Metropolitan Epiphanius I wa mu nganda ya Kyiv nabezikisile banu bendi mangana ‘balwise baka-Russia baje banai na kubalwisa’ . . . Nendekele lalo ngwendi kutsiya maswalale ba lifuti lya Russia keti bubi.”—Lipapelo lya mizimbu lya Jerusalem Post, March 16, 2022.

• “Yetu Baka-cibunga ca Biceci na Bimunga bya Bulombelo bya mu Ukraine [Ukrainian Council of Churches and Religious Organizations (UCCRO)] twimanena maswalale ba Ukraine na boshe baje bali na kutunyungilila, tubabezikisa ha kunyungilila lifuti lya Ukraine ku baka-kutulwisa, co tutwalelelaho kubalombelela.”—Majwi a Baka-UCCROa, February 24, 2022.

Mumona bati? Kuma bulombelo buje buli na kukabangeya Yesu Kilistu bunapande kushongangeya banu balimo baye ku nzita ndi? Bika biyendeka Mbimbiliya?

Bulombelo bwashwile laja kwimanena binzita

Ha myaka yaingi, bulombelo bwabwingi bunatabesa na kwecelela binzita nambe kubikundwiya oku bulikwisa ngwabwo buli na kunena kwoloka. Oloni Bakaleho ba Yehova banatwalelelaho kujombolola eci cibembulu. Moneni byakumwenako binatako.

• Ñanda ya “Katulo ya Mulimu Fahalimw’a ‘Mutu Wa Sibi’” imwesa bulombelo bwa Katolika mubunalikobeleselele mu kutsiya banu babangi kuje kubamwene ngwe kunapu kupangela Njambi na Kilistu.

• Ñanda ya “Libaka Bulapeli bwa Silifasi Ha Bu ka Fela” imwesa omwo bulombelo bwonowelele kwecelesa nzita ya miyati.

• Ñanda ya “Kana Mulimu Wa Amuhela Bulapeli Kaufela?” na vidio ya ““Maceci Amangi Akundwiiye Nzita ya Kaye ya mu Cibali” bimwesa omwo bantwama ba bulombelo bwa Katolika, Orthodox, na Protestanti bemanenenemo bibunga bibali bije byalilwisile mu binzita byabingi.

Kuma baka-Kilistu banapande kulikobelesa mu binzita ndi?

Byalongesele Yesu: “Unapande kuzema mukweni ngwe muwalizema yobe babenya.” (Mateo 22:39) “Zemeni bitozi beni.”—Mateo 5:44-47.

Byendekele Yesu: ‘Bumwene bwange kesi bwa hano ha kaye embwe. Ngwe bumwene bwange bwapwile bwa hano ha kaye, ngwe bandongesi bange banalu kutewa banjana kuli baka-kuswana ba Bayunda.’ (Yowano 18:36) ‘Boshe baje bapangesa mikwale bakanyonga ku mikwale’.—Mateo 26:47-52.

Acisinganyekeni ha ñanda ei: Nga baka-Kilistu kubapandele kulwa mangana banyungilile Yesu, kuma kuli bimo binapande kubalingisa balwe ndi? Tandeni ñanda ya “Kujeneka Kulikobelesa mu Byuma bya Kaye Kulumbununa Bika?” mangana mumone omwo baka-Kilistu ba kulibanga bakabangeyeye mu kulongwa mwanja wa Yesu na bilongesa byendi.

Bika bikalingiwa ku bulombelo buje bukundwiya binzita?

Mbimbiliya imwesa ngwayo Njambi abyana bulombelo buje buli na kulishasha ngwabwo buli na kwimanena Yesu okuni kubwesi na kukabangeya bilongesa byendi.—Mateo 7:21-23; Tito 1:16.

• Mukanda wa Kujombolola umwesa ngwawo Njambi akasompa obu bulombelo mwafwa ya “maninga a baje boshe babatsiile hano hasi.” (Kujombolola 18:21, 24) Nga mushaka kuzibuka byakalingila ngoco, tandeni ñanda ya “Mbambilone Wakama Iya?”

• Yesu wamwesele ngwendi bulombelo bwoshe bwanabyana Njambi bakabunyongesa mwafwa ya bilinga byabwo byabibi ngwe mwa muti wa kubola uje ukemi bushuka bwa kubola uje ‘ubakashinji na kuumbila mu tuhya.’ (Mateo 7:15-20) Tandeni ñanda ya “Bulombelo bwa Makuli Bunabiisa Njambi Lizina” mangana muzibe mubikalingiwila ebi byuma.

Babenya bikupulo, kutunda ku cimoshwe kuya ku cilyo: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images