Kaye Kali na Kubihya—Bika biyendeka Mbimbiliya?

“Byuma bibali na kulinga banu ololo binena bukalu bwakama manene. Binganda byakama bimo bijabama mu mema. Mu mitambela yaingi kushaluka manene. Kukala lihunzi lije lyasa kubiisa byuma. Mu mitambela yaingi mema akeha manene. Tusitu na bimena byabingi ololo biziluka. Ebi keti bisimo lika, co lalo kutwesi na kutobalesa lika biñanda. Twendeka ngoco mwafwa bibali na kutuleka baka-sayansi bimwesa ngwabyo bikebyo byuma bilingiwa nga baka-fulumende kubatengulula mashiko abo aje amwesa mwakupangesela nzili itunda ha byuma bya kutanga.” António Guterres uje wapwa mukulunu wa United Nations ikeye wendekele awa majwi kutalesa ku majwi amo abendekele ha ciwano cibalingile bantwama ba mafuti. Owo majwi amo abendekele ali mu muzimbu wa April 4, 2022.

“Baka-sayansi ngwabo mu myaka ija, bishwata 423 byoshe bya mu [United States], na byuma bilimo bibihya mwafwa mukashaluka manene. Ebi byuma byabibi binasa kulingiwa bizibika ngwe bije bitukatanda mu Mbimbiliya bya kufwa ngwe: tuhya na libazi, kusongonoka kwa mema a kukonda, kulibwezelela kwa mema mu tulunga-ndonga na kushaluka manene.” Awa majwi atunda mu lipapelo lya mizimbu lya The New York Times lya June 15, 2022 ha mutwe wa “Flooding Chaos in Yellowstone, a Sign of Crises to Come.”

Kuma kuli byuma byasa kulingiwa mangana byuma keti bibihye mu kaye ndi? Nga mukemwo, co iya asa kulinga ngoco? Tumoneni biyendeka Mbimbiliya.

Mbimbiliya yapolofwetele ngwayo banu bamo bakabiisa kaye

Mbimbiliya ngwayo Njambi “akanyongesa baje bali na kubiisa kaye.” (Kujombolola 11:18, NWT) Kuli byuma bitatu bitulilongesa aha ha vesi:

1. 1. Byuma bibali na kulinga banu bikebyo binakubiisa kaye.

2. 2. Banu kubatwalelelaho kubiisa kaye.

3. 3. Njambi ikeye akamanesa bukalu bwoshe buli hano ha kaye keti banu embwe.

Byuma ha kaye bikakala mwamubwa kulutwe

Mbimbiliya Imwesa mgwayo ‘kaye kakalako myaka yoshe.’ (Muka-kwambulula 1:4) Hakala banu simbu yoshe.

• “Baka-bushunga bakakala mu lifuti, co bakayoyelamo ku myaka yoshe.”—Myaso 37:29.

Byuma byoshe bikakala ha kaye kubikabihya lalo.

• “Mambo na lifuti lyakuma bikajolela, na bishani bikashamwina mu mambo.”—Isaiah 35:1.