Kushaluka Kunalibwezelela Manene mu Kaye Koshe—Bika Biyendeka Mbimbiliya?

Mu ngonde ya July 2022, kushaluka kunalibwezelela manene mu kaye koshe:

• “Mu ngonde ya July, baka-kutala bya mizimbu mu China banatwalelelaho kunangula banu ngwabo kushaluka kulibwezelela manene mu bimbongi bya kupwa 70.”—July 25, 2022, CNN Wire Service.

• “Tuhya twa mushwata tunatwalelelaho kwenyeka byuma mu mafuti amangi a mu Europe, mwafwa ya kushaluka manene kuje kuli na kulibwezelelela.”—July 17, 2022, The Guardian.

• “Lyacalumingo, kunashalukile manene mu bimbongi bimo bya mu United States, mwafwa ya kushaluka kwa ntondwe kuje kanakele ku ngenge ya kalunga ndonga wa Atlantic na ku mitambela imo ya ku Mbwela na Kangombe kayambi ka United States.”—July 24, 2022, The New York Times.

Mwafwa bika byuma bya cifweci bili na kulingiwa? Kuma kutukasa kutwalelelaho kuyoya hano ha kaye ndi? Bika Biyendeka Mbimbiliya?

Kuma Mbimbiliya yapolofwetele ngwayo kushaluka kukalibwezelela manene ndi?

Eyo. Kushaluka manene mu kaye koshe kulitabasana na byuma biyendekele Mbimbiliya ngwayo bikalingiwa mu matangwa etu. Cakumwenako, Yesu wapolofwetele ngwendi kukakala “byuma byakujujwisa na kukomokesa.” (Luka 21:11) Mwafwa ya kushaluka kuje kuli na kulibwezelela manene, banu babangi banalishoshomwena ngwabo hamo kutukasa kuyoya hano ha kaye, mwafwa ya byuma bibali na kulinga banu bije bili na kubiisa manene kaye.

Kuma kutukasa kutwalelelaho kuyoya hano ha kaye ndi?

Embwe. Njambi watangele kano kaye mangana banu bayoyeho myaka yoshe. (Myaso 115:16; Muka-kwambulula 1:4) Kakecelela banu batwaleleho kubiisa kano kaye, oloni nakulahesa ‘kukanyongesa baje banyongesa kaye.’—Kujombolola 11:18

Tusimutwiyeni ha bupolofweto bubali, buje bumwesa byuma bikwabo byanakulahesa Njambi:

• “Mambo na lifuti lyakuma bikajolela, na bishani bikashamwina mu mambo.” (Isaya 35:1) Njambi kakecelela kaye kakatenguluke kupwa mambo embwe, oloni akabwahesa mitamba ya kaye ije inabihya.

• “Ukanyungu lifuti ha kulitumina nyonzi co wakamo bwilo.” (Myaso 65:9) Njambi akalingisa kaye kapwe Paradaisi.

Nga mushaka kuzibuka omwo kutenguluka kwa myaka kushulisilila bupolofweto, co tandeni ñanda ya “Climate Change and Our Future—What the Bible Says.”

Nga mushaka kuzibuka byabingi ha cikulaheso ca kupwisa kaye kakabwa, co tandeni ñanda ya “Who Will Save the Earth?”